৩. চত্তালীসকং

১৬০. তেন খো পন সমযেন অঞ্ঞতরো ভিক্খু পরিৰসন্তো ৰিব্ভমি. সো পুন পচ্চাগন্ত্ৰা ভিক্খূ উপসম্পদং যাচি. ভগৰতো এতমত্থং আরোচেসুং.

‘‘ইধ পন, ভিক্খৰে, ভিক্খু পরিৰসন্তো ৰিব্ভমতি. ৰিব্ভন্তকস্স, ভিক্খৰে, পরিৰাসো ন রুহতি. সো চে পুন উপসম্পজ্জতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো সামণেরো হোতি. সামণেরস্স, ভিক্খৰে, পরিৰাসো ন রুহতি. সো চে পুন উপসম্পজ্জতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো উম্মত্তকো হোতি. উম্মত্তকস্স, ভিক্খৰে, পরিৰাসো ন রুহতি. সো চে পুন অনুম্মত্তকো হোতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো খিত্তচিত্তো হোতি. খিত্তচিত্তস্স, ভিক্খৰে, পরিৰাসো ন রুহতি. সো চে পুন অখিত্তচিত্তো হোতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পুরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো ৰেদনাট্টো হোতি. ৰেদনাট্টস্স, ভিক্খৰে, পরিৰাসো ন রুহতি. সো চে পুন অৰেদনাট্টো হোতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো, আপত্তিযা অদস্সনে, উক্খিপিয্যতি [উক্খিপিযতি (স্যা.), উক্খিপীযতি (ক.)]. উক্খিত্তকস্স, ভিক্খৰে, পরিৰাসো ন রুহতি. সো চে পুন ওসারিয্যতি [ওসারিযতি (স্যা.), ওসারীযতি (ক.)], তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো, আপত্তিযা অপ্পটিকম্মে, উক্খিপিয্যতি. উক্খিত্তকস্স, ভিক্খৰে, পরিৰাসো ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

‘‘ইধ পন, ভিক্খৰে, ভিক্খু পরিৰসন্তো, পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৰে, পরিৰাসো ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো, অৰসেসো পরিৰসিতব্বো.

১৬১. ‘‘ইধ পন, ভিক্খৰে, ভিক্খু মূলাযপটিকস্সনারহো ৰিব্ভমতি. ৰিব্ভন্তকস্স, ভিক্খৰে, মূলাযপটিকস্সনা ন রুহতি. সো চে পুন উপসম্পজ্জতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো. সো ভিক্খু মূলায পটিকস্সিতব্বো.

‘‘ইধ পন, ভিক্খৰে, ভিক্খু মূলাযপটিকস্সনারহো সামণেরো হোতি…পে… উম্মত্তকো হোতি…পে… খিত্তচিত্তো হোতি…পে… ৰেদনাট্টো হোতি…পে… আপত্তিযা অদস্সনে উক্খিপিয্যতি…পে… আপত্তিযা অপ্পটিকম্মে উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৰে, মূলাযপটিকস্সনা ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো. সো ভিক্খু মূলায পটিকস্সিতব্বো.

১৬২. ‘‘ইধ পন, ভিক্খৰে, ভিক্খু মানত্তারহো ৰিব্ভমতি. ৰিব্ভন্তকস্স, ভিক্খৰে, মানত্তদানং ন রুহতি. সো চে পুন উপসম্পজ্জতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো. তস্স ভিক্খুনো মানত্তং দাতব্বং.

‘‘ইধ পন, ভিক্খৰে, ভিক্খু মানত্তারহো সামণেরো হোতি…পে… উম্মত্তকো হোতি…পে… খিত্তচিত্তো হোতি…পে… ৰেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৰে, মানত্তদানং ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো. তস্স ভিক্খুনো মানত্তং দাতব্বং.

১৬৩. ‘‘ইধ পন, ভিক্খৰে, ভিক্খু মানত্তং চরন্তো ৰিব্ভমতি. ৰিব্ভন্তকস্স, ভিক্খৰে, মানত্তচরিযা ন রুহতি. সো চে পুন উপসম্পজ্জতি তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং, অৰসেসং চরিতব্বং.

‘‘ইধ পন, ভিক্খৰে, ভিক্খু মানত্তং চরন্তো সামণেরো হোতি…পে… উম্মত্তকো হোতি…পে… খিত্তচিত্তো হোতি…পে… ৰেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৰে, মানত্তচরিযা ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পুরিৰুত্থো সুপরিৰুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং, অৰসেসং চরিতব্বং.

১৬৪. ‘‘ইধ পন, ভিক্খৰে, ভিক্খু অব্ভানারহো ৰিব্ভমতি. ৰিব্ভন্তকস্স, ভিক্খৰে, অব্ভানং ন রুহতি. সো চে পুন উপসম্পজ্জতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং. সো ভিক্খু অব্ভেতব্বো.

‘‘ইধ পন, ভিক্খৰে, ভিক্খু অব্ভানারহো সামণেরো হোতি…পে… উম্মত্তকো হোতি…পে…

খিত্তচিত্তো হোতি…পে… ৰেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৰে, অব্ভানং ন রুহতি. সো চে পুন ওসারিয্যতি, তস্স তদেৰ পুরিমং পরিৰাসদানং. যো পরিৰাসো দিন্নো সুদিন্নো, যো পরিৰুত্থো সুপরিৰুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং. সো ভিক্খু অব্ভেতব্বো.

চত্তালীসকং সমত্তং.