১২. ওতরণহারসম্পাতৰিভাৰনা

৭৪. যেন যেন পঞ্ঞত্তিহারসম্পাতেন পঞ্ঞত্তিপ্পভেদা নিদ্ধারিতা, সো পঞ্ঞত্তিহারসম্পাতো পরিপুণ্ণো, ‘‘কতমো ওতরণো হারসম্পাতো’’তি পুচ্ছিতব্বত্তা ‘‘তত্থ কতমো ওতরণো হারসম্পাতো’’তিআদিমাহ.

‘‘তত্থ তিস্সং গাথাযং কতমানি ইন্দ্রিযানি নিদ্ধারেত্ৰা কতমেহি নিদ্ধারিতেহি ধম্মেহি ওতরতী’’তি পুচ্ছিতব্বত্তা ‘‘তস্মা’’তিআদি ৰুত্তং. যা ‘‘তস্মা রক্খিতচিত্তস্সা’’তিআদিগাথা ৰুত্তা, তিস্সং গাথাযং ‘‘তস্মা…পে… পুরেক্খারো’’তি সুত্তপ্পদেসেন সম্মাদিট্ঠি গহিতা, সম্মাদিট্ঠিযা গহিতায পঞ্চিন্দ্রিযানি সদ্ধাদিপঞ্চিন্দ্রিযানি গহিতানি ভৰন্তি.

তানিযেৰ সদ্ধাদিপঞ্চিন্দ্রিযানি ৰিজ্জায উপকারত্তা ৰা পদট্ঠানত্তা ৰা ৰিজ্জা ভৰন্তি, ৰিজ্জুপ্পাদা তাদিসায ৰিজ্জায উপ্পাদা উপ্পাদহেতুতো অৰিজ্জানিরোধো সম্ভৰতি, অৰিজ্জানিরোধা সঙ্খারনিরোধো সম্ভৰতি…পে… জাতিনিরোধা জরামরণনিরোধো সম্ভৰতীতি. অযং ওতরণা পটিচ্চসমুপ্পাদেন পঞ্চিন্দ্রিযানং ওতরণা নাম.

তানিযেৰ পঞ্চিন্দ্রিযানি সীলক্খন্ধেন সমাধিক্খন্ধেন পঞ্ঞাক্খন্ধেন তীহি খন্ধেহি সঙ্গহিতানি ভৰন্তি সদ্ধাৰীরিযেহি সীলসম্ভৰতো, সতিযা চ পঞ্ঞানুৰত্তকত্তা. অযং ওতরণা খন্ধেহি পঞ্চিন্দ্রিযানং ওতরণা নাম.

তানিযেৰ পঞ্চিন্দ্রিযানি সঙ্খারপরিযাপন্নানি ভৰন্তি. যে সঙ্খারা অনাসৰা ভৰন্তি, ভৰঙ্গা ভৰহেতূ নো ভৰন্তি, তে অনাসৰা সঙ্খারা ধম্মধাতুসঙ্গহিতা ভৰন্তি ধম্মধাতুযা অন্তোগধত্তা. অযং ওতরণা ধাতূহি পঞ্চিন্দ্রিযানং ওতরণা নাম.

সা অনাসৰা ধম্মধাতু ধম্মাযতনপরিযাপন্না ভৰতি, যং আযতনং অনাসৰং ভৰতি, ভৰঙ্গং ভৰহেতু নো ভৰতি. অযং ওতরণা আযতনেহি ধম্মধাতুযা ওতরণা নাম.

‘‘এত্তকোৰ ওতরণো হারসম্পাতো পরিপুণ্ণো’’তি ৰত্তব্বত্তা ‘‘নিযুত্তো ওতরণো হারসম্পাতো’’তি ৰুত্তং. যেন যেন সংৰণ্ণনাৰিসেসভূতেন ওতরণহারসম্পাতেন সুত্তপ্পদেসত্থা ওতরিতব্বা, সো সো সংৰণ্ণনাৰিসেসভূতো ওতরণো হারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি.

ইতি ওতরণহারসম্পাতে সত্তিবলানুরূপা রচিতা

ৰিভাৰনা নিট্ঠিতা.

পণ্ডিতেহি পন…পে… গহেতব্বোতি.

ইতো পট্ঠায ‘‘তত্থ কতমো’’তিআদিঅনুসন্ধ্যত্থো চ পরিযোসানে ‘‘নিযুত্তো’’তিআদিঅনুসন্ধ্যত্থো চ ৰুত্তনযানুসারেনেৰ ৰিঞ্ঞাতব্বো. কত্থচি কত্থচি পাঠে অপাকটংযেৰ যথাবলং কথযিস্সাম.