১০. ৰেৰচনহারসম্পাতৰিভাৰনা

৭২. যেন যেন পরিৰত্তনহারসম্পাতেন সুত্তপ্পদেসত্থা পরিৰত্তেতব্বা, সো পরিৰত্তনো হারসম্পাতোতি পরিপুণ্ণো, ‘‘কতমো ৰেৰচনো হারসম্পাতো’’তি পুচ্ছিতব্বত্তা ‘‘তত্থ কতমো ৰেৰচনো হারসম্পাতো’’তিআদি ৰুত্তং.

‘‘কতমেসং সুত্তপ্পদেসত্থানং, সুত্তপদানং ৰা কতমানি ৰেৰচনানী’’তি পুচ্ছিতব্বত্তা ‘‘তস্মা’’তিআদি ৰুত্তং. যা ‘‘তস্মা…পে… গোচরো’’তি গাথা ৰুত্তা, তায গাথায ‘‘রক্খিতচিত্তস্সা’’তি পদেন ৰুত্তস্স চিত্তস্স, ‘‘রক্খিতচিত্তস্সা’’তি এত্থ চিত্তস্স পদস্স ৰা ‘‘চিত্তং…পে… ৰিজানিতত্ত’’ন্তি যং ৰচনং ৰুত্তং, ইদং ৰচনং ৰেৰচনং, ‘‘মানসং হদয’’ন্তিআদিৰচনম্পি (ধ. স. ১৭, ৬৩) চিত্তস্স ৰেৰচনং. ‘‘সম্মাসঙ্কপ্পগোচরো’’তি এত্থ সম্মাসঙ্কপ্পস্স ‘‘নেক্খম্মসঙ্কপ্পো অব্যাপাদসঙ্কপ্পো অৰিহিংসাসঙ্কপ্পো’’তি যং ৰচনং ৰুত্তং, ইদং ৰচনং ৰেৰচনং, ‘‘তক্কো ৰিতক্কো’’তিআদি (ধ. স. ৭) ৰচনম্পি সম্মাসঙ্কপ্পস্স ৰেৰচনং. ‘‘সম্মাদিট্ঠিপুরেক্খারো’’তি এত্থ সম্মাদিট্ঠিপদস্স ‘‘সম্মাদিট্ঠি নাম পঞ্ঞাসত্থং পঞ্ঞাখগ্গো পঞ্ঞারতনং পঞ্ঞাপতোদো পঞ্ঞাপাসাদো’’তি যং ৰচনং ৰুত্তং, ইদং ৰচনং ৰেৰচনং, ‘‘পঞ্ঞা পজাননা ৰিচযো’’তিআদি (ধ. স. ১৬) ৰচনম্পি সম্মাদিট্ঠিপদস্স ৰেৰচনং. ‘‘থিনং থিযনা থিযিতত্তং চিত্তস্স, চিত্তস্স অকল্লতা অকম্মঞ্ঞতা ওনাহো পরিযোনাহো অন্তোসঙ্কোচো’’তি (ধ. স. ১১৬২-১১৬৩) যং ৰচনং ৰুত্তং, ইদং ৰচনং থিনস্স ৰেৰচনং. ‘‘কাযস্স অকল্লতা অকম্মঞ্ঞতা কাযালসিযং সোপ্পং সুপনা সুপ্পিতত্ত’’ন্তি (ধ. স. ১১৬৩) যং ৰচনং ৰুত্তং, ইদং ৰচনং মিদ্ধস্স ৰেৰচনং. ‘‘ভিক্খকো ভিক্খূ’’তিআদিকং (পারা. ৪৫; ৰিভ. ৫১০) যং ৰচনং ৰুত্তং, ইদং ৰচনং ভিক্খুপদস্স ৰেৰচনং. ‘‘দুগ্গতি অপাযো ৰিনিপাতো ৰট্টদুক্খং সংসারো’’তিআদিকং যং ৰচনং ৰুত্তং, ইদং ৰচনং দুগ্গতিপদস্স ৰেৰচনং. ইতি ৰেৰচনানি নীহরিতানি.

‘‘এত্তকোৰ ৰেৰচনহারসম্পাতো পরিপুণ্ণো’’তি ৰত্তব্বত্তা ‘‘নিযুত্তো ৰেৰচনো হারসম্পাতো’’তি ৰুত্তং. যেন যেন সংৰণ্ণনাৰিসেসভূতেন ৰেৰচনহারসম্পাতেন ৰেৰচনানি নীহরিতানি, সো সো সংৰণ্ণনাৰিসেসভূতো ৰেৰচনহারসম্পাতো নিযুত্তো যথাসম্ভৰং নীহরিত্ৰা যুজ্জিতব্বোতি অত্থো গহিতোতি.

ইতি ৰেৰচনহারসম্পাতে সত্তিবলানুরূপা রচিতা

ৰিভাৰনা নিট্ঠিতা.

পণ্ডিতেহি পন…পে… গহেতব্বোতি.