৫. সুদ্ধিকসংসন্দনৰণ্ণনা

১৭-২৭. সচ্চিকট্ঠস্স, সচ্চিকট্ঠে ৰা সংসন্দনং সচ্চিকট্ঠসংসন্দনন্তি সমাসদ্ৰযং ভৰতীতি দস্সেন্তো ‘‘সচ্চিকট্ঠস্সা’’তিআদিমাহ. তত্থ সচ্চিকট্ঠস্স পুগ্গলস্সাতি সচ্চিকট্ঠসভাৰস্স পরমত্থতো ৰিজ্জমানসভাৰস্স পুগ্গলস্স. রূপাদীহি সদ্ধিং সংসন্দনন্তি সচ্চিকট্ঠতাসামঞ্ঞেন রূপাদীহি সমীকরণং. সচ্চিকট্ঠেতি সচ্চিকট্ঠহেতু, তত্থ ৰা তং অধিট্ঠানং কত্ৰা. ‘‘তুল্যযোগে সমুচ্চযো’’তি সমুচ্চযত্থত্তা এৰ চ-কারস্স সচ্চিকট্ঠেন উপলদ্ধিসামঞ্ঞেন ইধ রূপমাহটন্তি তস্স উদাহটভাৰো যুত্তোতি ‘‘যথারূপ’’ন্তি নিদস্সনৰসেন অত্থো ৰুত্তো, অঞ্ঞথা ইধ রূপস্স আহরণমেৰ কিমত্থিযং. এৰং সেসধম্মেসুপি. যা পনেত্থ অঞ্ঞত্তপুচ্ছা, সাপি নিদস্সনত্থং উপব্রূহেতি অঞ্ঞত্তনিবন্ধনত্তা তস্স. ওপম্মসংসন্দনে পন নিদস্সনত্থো গাহীযতীতি ইমস্মিং সুদ্ধিকসংসন্দনে কেৰলং সমুচ্চযৰসেনেৰ অত্থদস্সনং যুত্তন্তি অধিপ্পাযো. রূপাদীনি উপাদাপঞ্ঞত্তিমত্তত্তা পুগ্গলস্স সো তেহি অঞ্ঞো, অনঞ্ঞো চাতি ন ৰত্তব্বোতি অযং সাসনক্কমোতি আহ ‘‘রূপাদীহি…পে… সমযো’’তি. অনুঞ্ঞাযমানেতি তস্মিং সমযে সুত্তে চ অপ্পটিক্খিপিযমানে. অযঞ্চ অত্থো সাসনিকস্স পরৰাদিনো ৰসেন ৰুত্তোতি ৰেদিতব্বং.

‘‘আজানাহি নিগ্গহ’’ন্তি পাঠো দিট্ঠো ভৰিস্সতি, অঞ্ঞথা ‘‘পটিলোমপঞ্চকানি দস্সিতানি, পটিকম্মচতুক্কাদীনি সংখিত্তানী’’তি ন সক্কা ৰত্তুন্তি অধিপ্পাযো. চোদনায ৰিনা পরৰাদিনো পটিজানাপনং নত্থীতি ৰুত্তং ‘‘পটিজানাপনত্থন্তি…পে… চোদনত্থ’’ন্তি. চোদনাপুব্বকঞ্হি তস্স পটিজানাপনং. তেন ফলৰোহারেন কারণং ৰুত্তন্তি দস্সেতি. অব্যাকতত্তাতি অব্যাকরণীযত্তা, ভগৰতা ৰা ন ব্যাকতত্তা. যদি ঠপনীযত্তা পটিক্খিপিতব্বন্তি ইমস্মিং পচ্চনীকনযে ঠপনীযত্তা পঞ্হস্স সকৰাদিনা পটিক্খিপিতব্বং. পরেনপীতি পরৰাদিনাপি ঠপনীযত্তা লদ্ধিমেৰ নিস্সায অনুলোমনযে পটিক্খেপো কতোতি অযমেত্থ সুদ্ধিকসংসন্দনায অধিপ্পাযো যুত্তো অনুলোমেপি রূপাদীহি অঞ্ঞত্তচোদনাযমেৰ পরৰাদিনা পটিক্খেপস্স কতত্তাতি অধিপ্পাযো.

সুদ্ধিকসংসন্দনৰণ্ণনা নিট্ঠিতা.