১০. সংৰরকথাৰণ্ণনা

৩৭৯. আটানাটিযসুত্তে ‘‘সন্তি, ভিক্খৰে, যক্খা যেভুয্যেন পাণাতিপাতা অপ্পটিৰিরতা’’তি (দী. নি. ৩.২৭৬, ২৮৬) আগতত্তা চাতুমহারাজিকানং সংৰরাসংৰরসব্ভাৰো অৰিৰাদসিদ্ধো. যত্থ পন ৰিৰাদো, তমেৰ দস্সেন্তেন তাৰতিংসাদযো গহিতাতি ইমমত্থং দস্সেতুং ‘‘চাতুমহারাজিকান’’ন্তি ৰুত্তং. এৰং সতীতি যদি তাৰতিংসেসু সংৰরাসংৰরো নত্থি, এৰং সন্তে. সুরাপানন্তি এত্থাপি ‘‘সুয্যতী’’তি পদং আনেত্ৰা সম্বন্ধিতব্বং. কথং সুয্যতীতি? ৰুত্তঞ্হেতং কুম্ভজাতকে –

‘‘যং ৰে পিৰিত্ৰা পুব্বদেৰা পমত্তা,

তিদিৰা চুতা সস্সতিযা সমাযা;

তং তাদিসং মজ্জমিমং নিরত্থং,

জানং মহারাজ কথং পিৰেয্যা’’তি. (জা. ১.১৬.৫৮);

তত্থ পুব্বদেৰা নাম অসুরা. তে হি তাৰতিংসানং উপ্পত্তিতো পুব্বদেৰাতি পঞ্ঞাযিংসু. পমত্তাতি সুরাপানেন পমাদং আপন্না. তিদিৰাতি মনুস্সচাতুমহারাজিকলোকে উপাদায ততিযলোকভূতা দেৰট্ঠানা, নামমেৰ ৰা এতং তস্স দেৰট্ঠানস্স. সস্সতিযাতি কেৰলং দীঘাযুকতং সন্ধায ৰদতি. সমাযা সহ অত্তনো অসুরমাযায, অসুরমন্তেহি সদ্ধিং চুতাতি অত্থো. অট্ঠকথাযঞ্চ ৰুত্তং ‘‘আগন্তুকদেৰপুত্তা আগতাতি নেৰাসিকা গন্ধপানং সজ্জযিংসু. সক্কো সকপরিসায সঞ্ঞমদাসী’’তি. তেনাহ ‘‘তেসং সুরাপানং অসংৰরো ন হোতীতি ৰত্তব্বং হোতী’’তি. এত্থ চ তাৰতিংসানং পাতুভাৰতো পট্ঠায সুরাপানম্পি তত্থ নাহোসি, পগেৰ পাণাতিপাতাদযোতি ৰিরমিতব্বাভাৰতো এৰ তাৰতিংসতো পট্ঠায উপরি দেৰলোকেসু সমাদানসম্পত্তৰিরতিৰসেন পুরেতব্বা সংৰরা ন সন্তি, লোকুত্তরা পন সন্তিযেৰ. তথা তেহি পহাতব্বা অসংৰরা. ন হি অপ্পহীনানুসযানং মগ্গৰজ্ঝা কিলেসা ন সন্তীতি.

সংৰরকথাৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.