১. অতীতাদিএকচ্চকথাৰণ্ণনা

২৯৯. যে কতূপচিতা কুসলাকুসলা ধম্মা ৰিপাকদানায অকতোকাসা, কতোকাসা চ যে ‘‘ওকাসকতুপ্পন্না’’তি ৰুচ্চন্তি. যে চ ৰিপ্পকতৰিপাকা, তে সব্বেপি ‘‘অৰিপক্কৰিপাকা’’তি ৰেদিতব্বা. তেসং ৰিপাকদানসামত্থিযং অনপগতন্তি অধিপ্পাযেন পরৰাদী অত্থিতং ইচ্ছতি. যে পন পরৰাদী সব্বেন সব্বং ৰিপক্কৰিপাকা কুসলাকুসলা ধম্মা, তেসং অপগতন্তি নত্থিতং ইচ্ছতি. তেনাহ ‘‘অত্থীতি একচ্চং অত্থি একচ্চং নত্থী’’তিআদি. এৰং ইচ্ছন্তস্স পন পরৰাদিনো যথা অৰিপাকেসুপি একচ্চং নত্থীতি আপজ্জতি, এৰং ৰিপক্কৰিপাকেসু অৰিপক্কৰিপাকেসু চ আপজ্জতেৰাতি দস্সেতুং ‘‘অৰিপক্কৰিপাকা ধম্মা একচ্চে’’তিআদিনা পাল়ি পৰত্তা. তেন ৰুত্তং ‘‘তিণ্ণং রাসীনং ৰসেনা’’তিআদি. ৰোহারৰসেনাতি ফলস্স অনুপরমৰোহারৰসেন, হেতুকিচ্চং পন অনুপরতং অনুপচ্ছিন্নং অত্থীতি লদ্ধিযং ঠিতত্তা চোদেতব্বোৰ. অৰিচ্ছেদৰসেন পৰত্তমানঞ্হি ফলস্স পবন্ধৰোহারং পরৰাদী ৰোহারতো অত্থীতি ইচ্ছতি, হেতু পনস্স কম্মং পরমত্থতো চ কম্মূপচযৰাদিভাৰতো পত্তিঅপ্পত্তিসভাৰতাদযো ৰিয চিত্তৰিপ্পযুত্তো কম্মূপচযো নাম একো সঙ্খারধম্মো অৰিপন্নো, সোপি তস্সেৰ ৰেৰচনন্তি পরৰাদী. যং সন্ধাযাহ –

‘‘নপ্পচযন্তি কম্মানি, অপি কপ্পসহস্সতো;

পত্ৰা পচ্চযসামগ্গিং, কালে পচ্চন্তি পাণিন’’ন্তি.

যঞ্চ সন্ধায পরতো পরিভোগমযপুঞ্ঞকথায ‘‘পরিভোগমযং পন চিত্তৰিপ্পযুত্তং উপ্পজ্জতীতি লদ্ধিযা পটিজানাতী’’তি ৰক্খতি.

একচ্চংঅত্থীতিকথাৰণ্ণনা নিট্ঠিতা.