২. সংসন্দনব্রহ্মচরিযকথাৰণ্ণনা

২৭৩. রূপাৰচরমগ্গেনাতি রূপাৰচরজ্ঝানেন. তঞ্হি রূপভৰূপপত্তিযা উপাযভাৰতো মগ্গোতি ৰুত্তো. যথাহ ‘‘রূপুপপত্তিযা মগ্গং ভাৰেতী’’তি (ধ. স. ১৬০). ইদন্তি ইদং রূপাৰচরজ্ঝানং. ‘‘ইধৰিহাযনিট্ঠহেতুভূতো রূপাৰচরমগ্গো’’তিআদিকং দীপেন্তং ৰচনং অনাগামিমগ্গস্স তব্ভাৰদীপকেন ‘‘ইধ ভাৰিতমগ্গো’’তিআদিকেন কথং সমেতীতি চোদেত্ৰা যথা সমেতি, তং দস্সেতুং ‘‘পুব্বে পনা’’তিআদি ৰুত্তং. তত্থ ‘‘পুব্বে’’তি ইমিনা ‘‘ইধ ভাৰিতমগ্গো’’তিআদিকং ৰদন্তি, ইধাপি পন ‘‘রূপাৰচরমগ্গেনা’’তিআদিকং. তত্থ অনাগামী এৰাতি অনাগামিফলট্ঠো এৰ. ঝানানাগামীতি অসমুচ্ছিন্নজ্ঝত্তসংযোজনোপি রূপভৰে উপ্পজ্জিত্ৰা অনাৰত্তিধম্মমগ্গং ভাৰেত্ৰা তত্থেৰ পরিনিব্বাযনতো. অধিপ্পাযোতি যথাৰুত্তো দ্ৰিন্নং অট্ঠকথাৰচনানং অৰিরোধদীপকো অধিপ্পাযো.

ইধাতি কামলোকে. তত্থাতি ব্রহ্মলোকে. এত্থ চ পরৰাদী এৰং পুচ্ছিতব্বো ‘‘তীহি, ভিক্খৰে, ঠানেহী’’তি সুত্তং কিং যথারুতৰসেন গহেতব্বত্থং, উদাহু সন্ধাযভাসিতন্তি? তত্থ জানমানো সন্ধাযভাসিতন্তি ৰদেয্য. অঞ্ঞথা ‘‘পরনিম্মিতৰসৰত্তিদেৰে উপাদাযা’’তিআদি ৰত্তুং ন সক্কা ‘‘দেৰে চ তাৰতিংসে’’তি ৰুত্তত্তা. যথা হি তস্স ‘‘সেয্যথাপি দেৰেহি তাৰতিংসেহি সদ্ধিং মন্তেত্ৰা’’তিআদীসু ৰিয সক্কং দেৰরাজানং উপাদায কামাৰচরদেৰেসু তাৰতিংসদেৰা পাকটা পঞ্ঞাতাতি তেসং গহণং, ন তেযেৰ অধিপ্পেতাতি সুত্তপদস্স সন্ধাযভাসিতত্থং সম্পটিচ্ছিতব্বং, এৰং ‘‘ইধ ব্রহ্মচরিযৰাসো’’তি এত্থাপি অনৰজ্জসুখঅব্যাসেকসুখনেক্খম্মসুখাদিসন্নিস্সযভাৰেন মহানিসংসতায সাসনে পব্বজ্জা ‘‘ইধ ব্রহ্মচরিযৰাসো’’তি ইমস্মিং সুত্তে অধিপ্পেতা. সা হি উত্তরকুরুকানং দেৰানঞ্চ অনোকাসভাৰতো দুক্করা দুল্লভা চ. তত্থ সূরিযপরিৰত্তাদীহিপি দেৰেসু মগ্গপটিলাভায অত্থিতা ৰিভাৰেতব্বা, উত্তরকুরুকানং পন ৰিসেসানধিগমভাৰো উভিন্নম্পি ইচ্ছিতো এৰাতি.

সংসন্দনব্রহ্মচরিযকথাৰণ্ণনা নিট্ঠিতা.

ব্রহ্মচরিযকথাৰণ্ণনা নিট্ঠিতা.