৩. নিস্সগ্গিযকণ্ডং (ভিক্খুনীৰিভঙ্গৰণ্ণনা)

৭৩৩. নিস্সগ্গিযেসু পঠমং উত্তানমেৰ.

৭৪০. দুতিযে ‘‘অয্যায দম্মীতি এৰং পটিলদ্ধন্তি নিস্সট্ঠপটিলদ্ধং. তেনেৰ মাতিকাট্ঠকথাযম্পি ‘‘নিস্সট্ঠং পটিলভিত্ৰাপি যথাদানেযেৰ উপনেতব্ব’’ন্তি ৰুত্তং. যথাদানেযেৰ উপনেতব্বন্তি যথা দাযকেন দিন্নং, তথা উপনেতব্বং, অকালচীৰরপক্খেযেৰ ঠপেতব্বন্তি ৰুত্তং হোতি. এত্থ চ ভাজাপিতায লদ্ধচীৰরমেৰ নিস্সগ্গিযং হোতি, তং ৰিনযকম্মং কত্ৰাপি অত্তনা ন লভতি. সেসমেত্থ উত্তানমেৰ. অকালচীৰরতা, তথাসঞ্ঞিতা, কালচীৰরন্তি অধিট্ঠায লেসেন ভাজাপনং, পটিলাভোতি ইমানি পনেত্থ চত্তারি অঙ্গানি.

৭৪৩. ততিযে মেতন্তি মে এতং. সকসঞ্ঞায গহিতত্তা পাচিত্তিযং দুক্কটঞ্চ ৰুত্তং. ইতরথা ভণ্ডগ্ঘেন কারেতব্বং. উপসম্পন্নতা, পরিৰত্তিতচীৰরস্স ৰিকপ্পনুপগতা, সকসঞ্ঞায অচ্ছিন্দনং ৰা অচ্ছিন্দাপনং ৰাতি ইমানি পনেত্থ তীণি অঙ্গানি.

৭৪৮-৭৫২. চতুত্থে আহটসপ্পিং দত্ৰাতি অত্তনো দত্ৰা. যমকং পচিতব্বন্তি সপ্পিঞ্চ তেলঞ্চ একতো কত্ৰা পচিতব্বং. লেসেন গহেতুকামতা, অঞ্ঞস্স ৰিঞ্ঞাপনং, পটিলাভোতি ইমানি পনেত্থ তীণি অঙ্গানি.

৭৫৩. পঞ্চমে সাতি থুল্লনন্দা. অযন্তি অযং সিক্খমানা. চেতাপেত্ৰাতি জানাপেত্ৰা ইচ্চেৰ অত্থোতি ইধ ৰুত্তং, মাতিকাট্ঠকথাযং (কঙ্খা. অট্ঠ. অঞ্ঞচেতাপনসিক্খাপদৰণ্ণনা) পন ‘‘অঞ্ঞং চেতাপেত্ৰাতি অত্তনো কপ্পিযভণ্ডেন ইদং নাম আহরাতি অঞ্ঞং পরিৰত্তাপেত্ৰা’’তি ৰুত্তং, তস্মা ‘‘চেতাপেত্ৰা’’তি ইমস্স পরিৰত্তাপেত্ৰাতিপি অত্থো দট্ঠব্বো. অঞ্ঞং চেতাপেয্যাতি ‘‘এৰং মে ইদং দত্ৰা অঞ্ঞম্পি আহরিস্সতী’’তি মঞ্ঞমানা ‘‘ন মে ইমিনা অত্থো, ইদং নাম মে আহরা’’তি ততো অঞ্ঞং চেতাপেয্য.

৭৫৮. ছট্ঠে ধম্মকিচ্চন্তি পুঞ্ঞকম্মং. পাৰারিকস্সাতি দুস্সৰাণিজকস্স. যায চেতাপিতং, তস্সাযেৰ নিস্সগ্গিযং নিস্সট্ঠপটিলাভো চ, তস্মা তায ভিক্খুনিযা নিস্সট্ঠং পটিলভিত্ৰা যথাদানে উপনেতব্বং, ন অত্তনা গহেতব্বং. অঞ্ঞস্সত্থাযাতি চীৰরাদীসু অঞ্ঞতরস্সত্থায. অঞ্ঞুদ্দিসিকেনাতি পুরিমস্সেৰত্থদীপনং. পরিক্খারেনাতি কপ্পিযভণ্ডেন.

৭৬৪. সত্তমে সযং যাচিতকেনাতি সযং যাচিতকেনাপীতি অত্থো. তেনেৰ পাল়িযং ‘‘তেন চ পরিক্খারেন সযম্পি যাচিত্ৰা’’তি ৰুত্তং, ততোযেৰ মাতিকাট্ঠকথাযং ‘‘সঞ্ঞাচিকেনাতি সযং যাচিতকেনাপী’’তি অত্থো ৰুত্তো.

৭৬৮-৭৭৩. অট্ঠমনৰমদসমানি উত্তানত্থানেৰ.

৭৮৪. একাদসমে যস্মা পৰারিতট্ঠানে ৰিঞ্ঞত্তি নাম ন পটিসেধেতব্বা, তস্মা ভগৰা ধম্মনিমন্তনৰসেন পৰারিতট্ঠানে ‘‘ৰদেয্যাসি যেনত্থো’’তি ৰুত্তায ‘‘চতুক্কংসপরমং ৰিঞ্ঞাপেতব্ব’’ন্তি পরিচ্ছেদং দস্সেতীতি ৰেদিতব্বং. তেনেৰ মাতিকাট্ঠকথাযং (কঙ্খা. অট্ঠ. গরুপাৰুরণসিক্খাপদৰণ্ণনা) ‘‘চেতাপেতব্বন্তি ঠপেত্ৰা সহধম্মিকে চ ঞাতকপৰারিতে চ অঞ্ঞেন কিস্মিঞ্চিদেৰ গুণে পরিতুট্ঠেন ৰদেয্যাসি যেনত্থোতি ৰুত্তায ৰিঞ্ঞাপেতব্ব’’ন্তি ৰুত্তং.

৭৮৮. দ্ৰাদসমং উত্তানত্থমেৰ.

ভিক্খুনীৰিভঙ্গে নিস্সগ্গিযপাচিত্তিযসিক্খাপদৰণ্ণনা নিট্ঠিতা.

নিস্সগ্গিযকণ্ডং নিট্ঠিতং.