২. সঙ্ঘাদিসেসকণ্ডং (ভিক্খুনীৰিভঙ্গৰণ্ণনা)

১. পঠমসঙ্ঘাদিসেসসিক্খাপদৰণ্ণনা

৬৭৯. সঙ্ঘাদিসেসকণ্ডস্স পঠমসিক্খাপদে দ্ৰীসু জনেসূতি অড্ডকারকেসু দ্ৰীসু জনেসু. যো কোচীতি তেসুযেৰ দ্ৰীসু যো কোচি, অঞ্ঞো ৰা তেহি আণত্তো. দুতিযস্স আরোচেতীতি এত্থাপি দ্ৰীসু জনেসু যস্স কস্সচি দুতিযস্স কথং যো কোচি আরোচেতীতি এৰমত্থো গহেতব্বোতি আহ ‘‘দুতিযস্স আরোচেতীতি এত্থাপি এসেৰ নযো’’তি. গতিগতন্তি চিরকালপৰত্তং.

আপত্তীতি আপজ্জনং. সহ ৰত্থুজ্ঝাচারাতি ৰত্থুৰীতিক্কমেন সহ. সহযোগে করণৰচনপ্পসঙ্গে ইদং নিস্সক্কৰচনং. যন্তি যং ধম্মং. নিস্সারেতীতি আপন্নং ভিক্খুনিসঙ্ঘম্হা নিস্সারেতি. হেতুম্হি চাযং কত্তুৰোহারো. নিস্সারণহেতুভূতো হি ধম্মো নিস্সারণীযোতি ৰুত্তো. গীৰাযেৰ হোতি, ন পারাজিকং অনাণত্তিযা গহিতত্তা. যথা দাসদাসীৰাপীআদীনি সম্পটিচ্ছিতুং ন ৰট্টতি, এৰং তেসং অত্থায অড্ডকরণম্পি ন ৰট্টতীতি আহ ‘‘অযং অকপ্পিযঅড্ডো নাম, ন ৰট্টতী’’তি.

এত্থ চ সচে অধিকরণট্ঠানং গন্ত্ৰা ‘‘অম্হাকং এসো দাসো, দাসী, ৰাপী, খেত্তং, আরামো, আরামৰত্থু, গাৰো, অজা, কুক্কুটা’’তিআদিনা ৰোহরতি, অকপ্পিযং. ‘‘অযং অম্হাকং আরামিকো, অযং ৰাপী ইত্থন্নামেন সঙ্ঘস্স ভণ্ডধোৰনত্থায দিন্না, ইতো খেত্ততো আরামতো উপ্পজ্জনকচতুপচ্চযা ইতো গাৰিতো মহিংসিতো অজাতো উপ্পজ্জনকগোরসা ইত্থন্নামেন সঙ্ঘস্স দিন্নাতি পুচ্ছিতে ৰা অপুচ্ছিতে ৰা ৰত্তুং ৰট্টতী’’তি ৰদন্তি. সেসমেত্থ উত্তানমেৰ. অনাকড্ঢিতায অড্ডকরণং, অড্ডপরিযোসানন্তি ইমানি পনেত্থ দ্ৰে অঙ্গানি.

পঠমসঙ্ঘাদিসেসসিক্খাপদৰণ্ণনা নিট্ঠিতা.

২. দুতিযসঙ্ঘাদিসেসসিক্খাপদৰণ্ণনা

৬৮৩. দুতিযে মল্লগণভটিপুত্তগণাদিকন্তিআদীসু মল্লগণো নাম নারাযনভত্তিকো তত্থ তত্থ পানীযট্ঠপনপোক্খরণীখণনাদিপুঞ্ঞকম্মকারকো গণো, ভটিপুত্তগণো নাম কুমারভত্তিকগণো. ধম্মগণোতি সাসনভত্তিগণো অনেকপ্পকারপুঞ্ঞকম্মকারকগণো ৰুচ্চতি. গন্ধিকসেণীতি অনেকপ্পকারসুগন্ধিৰিকতিকারকো গণো. দুস্সিকসেণীতি পেসকারকগণো. কপ্পগতিকন্তি কপ্পিযভাৰং গতং.

ৰুট্ঠাপেন্তিযাতি উপসম্পাদেন্তিযা. ‘‘চোরিং ৰুত্তনযেন অনাপুচ্ছা পব্বাজেন্তিযা দুক্কট’’ন্তি ৰদন্তি. পণ্ণত্তিং অজানন্তা অরিযাপি ৰুট্ঠাপেন্তীতি ৰা কম্মৰাচাপরিযোসানে আপত্তিক্খণে ৰিপাকাব্যাকতসমঙ্গিতাৰসেন ৰা ‘‘তিচিত্ত’’ন্তি ৰুত্তন্তি ৰেদিতব্বং. সেসমেত্থ উত্তানমেৰ. চোরিতা, চোরিসঞ্ঞা, অঞ্ঞত্র অনুঞ্ঞাতকারণা ৰুট্ঠাপনন্তি ইমানি পনেত্থ তীণি অঙ্গানি.

দুতিযসঙ্ঘাদিসেসসিক্খাপদৰণ্ণনা নিট্ঠিতা.

৩. ততিযসঙ্ঘাদিসেসসিক্খাপদৰণ্ণনা

৬৯২. ততিযে পরিক্খেপং অতিক্কামেন্তিযাতি সকগামতো অঞ্ঞস্স গামস্স পরিক্খেপং অতিক্কামেন্তিযা. ‘‘গামন্তরং গচ্ছেয্যা’’তি হি ৰচনতো অঞ্ঞস্স গামস্স পরিক্খেপং অতিক্কামেন্তিযা এৰ আপত্তি, ন সকগামস্স. অঞ্ঞো হি গামো গামন্তরং. অপরিক্খিত্তস্স গামস্স উপচারন্তি এত্থ উপচার-সদ্দেন ঘরূপচারতো পঠমলেড্ডুপাতসঙ্খাতং পরিক্খেপারহট্ঠানং গহিতং, ন ততো দুতিযলেড্ডুপাতসঙ্খাতো উপচারোতি আহ ‘‘পরিক্খেপারহট্ঠান’’ন্তি. তেনেৰ পাল়িযং ‘‘উপচারং অতিক্কামেন্তিযা’’তি ৰুত্তং. অঞ্ঞথা যথা ৰিকালগামপ্পৰিসনসিক্খাপদে ‘‘পরিক্খিত্তস্স গামস্স পরিক্খেপং অতিক্কমন্তস্স, অপরিক্খিত্তস্স গামস্স উপচারং ওক্কমন্তস্সা’’তি (পাচি. ৫১৩) ৰুত্তং, এৰমিধাপি ‘‘পরিক্খিত্তস্স গামস্স পরিক্খেপং অতিক্কামেন্তিযা অপরিক্খিত্তস্স গামস্স উপচারং ওক্কমন্তিযা’’তি ৰদেয্য. সঙ্খেপতো ৰুত্তমত্থং ৰিভজিত্ৰা দস্সেন্তো ‘‘অপিচেত্থা’’তিআদিমাহ. ৰিহারস্স চতুগামসাধারণত্তাতি ইমিনা ‘‘ৰিহারতো একং গামং গন্তুং ৰট্টতী’’তি এত্থ কারণমাহ. ৰিহারস্স চতুগামসাধারণত্তাযেৰ হি চতূসু গামেসু যংকিঞ্চি একং গামং গন্তুং ৰট্টতি.

যত্থাতি যস্সং নদিযং. ‘‘পঠমং পাদং উত্তারেন্তিযা আপত্তি থুল্লচ্চযস্স, দুতিযং পাদং উত্তারেন্তিযা আপত্তি সঙ্ঘাদিসেসস্সা’’তি ৰচনতো নদিং ওতরিত্ৰা পদসা উত্তরন্তিযা এৰ আপত্তীতি আহ ‘‘সেতুনা গচ্ছতি, অনাপত্তী’’তিআদি. পরতীরমেৰ অক্কমন্তিযা অনাপত্তীতি নদিং অনোতরিত্ৰা যাননাৰাদীসু অঞ্ঞতরেন গন্ত্ৰা পরতীরমেৰ অক্কমন্তিযা অনাপত্তি. উভযতীরেসু ৰিচরন্তি, ৰট্টতীতি ইদং অসতিপি নদীপারগমনে উপরি ৰক্খমানস্স ৰিনিচ্ছযস্স ফলমত্তদস্সনত্থং ৰুত্তন্তি ৰেদিতব্বং. ওরিমতীরমেৰ আগচ্ছতি, আপত্তীতি পরতীরং গন্তুকামতায ওতিণ্ণত্তা ৰুত্তং. তমেৰ তীরন্তি তমেৰ ওরিমতীরং. অনাপত্তীতি পরতীরং গন্তুকামতায অভাৰতো অনাপত্তি.

তাদিসে অরঞ্ঞেতি ‘‘বহিইন্দখীলা সব্বমেতং অরঞ্ঞ’’ন্তি (ৰিভ. ৫২৯) এৰং ৰুত্তলক্খণে অরঞ্ঞে. অথ তাদিসস্সেৰ অরঞ্ঞস্স গহিতভাৰো কথং ৰিঞ্ঞাযতীতি আহ ‘‘তেনেৰা’’তিআদি. ইমিনা হি অট্ঠকথাৰচনেন ঈদিসেপি গামসমীপে দস্সনূপচারে ৰিজহিতে সতিপি সৰনূপচারে আপত্তি হোতীতি ৰিঞ্ঞাযতি. মগ্গমূল়্হা উচ্চাসদ্দং করোন্তীতি আহ ‘‘মগ্গমূল়্হসদ্দেন ৰিযা’’তি. সদ্দাযন্তিযাতি সদ্দং করোন্তিযা. পুরিমাযোতি পুরেতরং গচ্ছন্তিযো. অঞ্ঞং মগ্গং গণ্হাতীতি মগ্গমূল়্হত্তা, ন ওহাতুং, তস্মা দ্ৰিন্নম্পি অনাপত্তি. সেসমেত্থ উত্তানমেৰ. অনন্তরাযেন একভাৰো, গামন্তরগমনাদীসু অঞ্ঞতরতাপজ্জনং, আপদায অভাৰোতি ইমানি পনেত্থ তীণি অঙ্গানি.

ততিযসঙ্ঘাদিসেসসিক্খাপদৰণ্ণনা নিট্ঠিতা.

৪. চতুত্থসঙ্ঘাদিসেসসিক্খাপদৰণ্ণনা

৬৯৪. চতুত্থে কারকগণস্সাতি উক্খেপনীযকম্মকারকগণস্স. তেচত্তালীসপ্পভেদং ৰত্তং খন্ধকে আৰি ভৰিস্সতি. নেত্থারৰত্তেতি নিত্থরণহেতুম্হি ৰত্তে. সেসং উত্তানমেৰ. ধম্মেন কম্মেন উক্খিত্ততা, অঞ্ঞত্র অনুঞ্ঞাতকারণা ওসারণন্তি ইমানি পনেত্থ দ্ৰে অঙ্গানি.

চতুত্থসঙ্ঘাদিসেসসিক্খাপদৰণ্ণনা নিট্ঠিতা.

৫. পঞ্চমসঙ্ঘাদিসেসসিক্খাপদৰণ্ণনা

৭০১. পঞ্চমে এতং ন ৰুত্তন্তি ‘‘ভিক্খুনিযা অৰস্সুতভাৰো দট্ঠব্বো’’তি এতং নিযমনং ন ৰুত্তং. তন্তি তং নিযমেত্ৰা অৰচনং. পাল়িযা সমেতীতি ‘‘একতো অৰস্সুতে’’তি অৰিসেসেত্ৰা ৰুত্তপাল়িযা ‘‘অনৰস্সুতোতি জানন্তী পটিগ্গণ্হাতী’’তি ইমায চ পাল়িযা সমেতি. যদি হি পুগ্গলস্স অৰস্সুতভাৰো নপ্পমাণং, কিং ‘‘অনৰস্সুতোতি জানন্তী’’তি ইমিনা ৰচনেন, ‘‘অনাপত্তি উভতোঅনৰস্সুতা হোন্তি, অনৰস্সুতা পটিগ্গণ্হাতী’’তি এত্তকমেৰ ৰত্তব্বং সিযা. ‘‘উভতোঅনৰস্সুতা হোন্তি, অনৰস্সুতোতি জানন্তী পটিগ্গণ্হাতী’’তি ইমস্স চ অনাপত্তিৰারস্স অযমত্থো. উভো চে অনৰস্সুতা, সব্বথাপি অনাপত্তি. অথ ভিক্খুনী অনৰস্সুতা সমানা অৰস্সুতম্পি ‘‘অনৰস্সুতো’’তি সঞ্ঞায তস্স হত্থতো পটিগ্গণ্হাতি, এৰম্পি অনাপত্তি. অথ সযং অনৰস্সুতাপি অঞ্ঞং অনৰস্সুতং ৰা অৰস্সুতং ৰা ‘‘অৰস্সুতো’’তি জানাতি, দুক্কটমেৰ. ৰুত্তঞ্হেতং অনন্তরসিক্খাপদে ‘‘কিস্স ত্ৰং অয্যে ন পটিগ্গণ্হাসীতি. অৰস্সুতা অয্যেতি. ত্ৰং পন অয্যে অৰস্সুতাতি. নাহং অয্যে অৰস্সুতা’’তি. সেসমেত্থ উত্তানমেৰ. উদকদন্তপোনতো অঞ্ঞং অজ্ঝোহরণীযং, উভতোঅৰস্সুততা, সহত্থা গহণং, অজ্ঝোহরণন্তি ইমানি পনেত্থ চত্তারি অঙ্গানি.

পঞ্চমসঙ্ঘাদিসেসসিক্খাপদৰণ্ণনা নিট্ঠিতা.

৬. ছট্ঠসঙ্ঘাদিসেসসিক্খাপদৰণ্ণনা

৭০৫. ছট্ঠে পরিৰারগাথায অযমত্থো. ন দেতি ন পটিগ্গণ্হাতীতি (পরি. অট্ঠ. ৪৮১) ন উয্যোজিকা দেতি, নাপি উয্যোজিতা তস্সা হত্থতো গণ্হাতি. পটিগ্গহো তেন ন ৰিজ্জতীতি তেনেৰ কারণেন উয্যোজিকায হত্থতো উয্যোজিতায পটিগ্গহো ন ৰিজ্জতি. আপজ্জতি গরুকন্তি এৰং সন্তেপি অৰস্সুতস্স হত্থতো পিণ্ডগ্গহণে উয্যোজেন্তী সঙ্ঘাদিসেসাপত্তিং আপজ্জতি. তঞ্চ পরিভোগপচ্চযাতি তঞ্চ পন আপত্তিং আপজ্জমানা তস্সা উয্যোজিতায পরিভোগপচ্চযা আপজ্জতি. তস্সা হি ভোজনপরিযোসানে উয্যোজিকায সঙ্ঘাদিসেসো হোতি. সেসমেত্থ উত্তানমেৰ. মনুস্সপুরিসতা, অঞ্ঞত্র অনুঞ্ঞাতকারণা খাদনীযং ভোজনীযং গহেত্ৰা ভুঞ্জাতি উয্যোজনা, তেন ৰচনেন গহেত্ৰা ইতরিস্সা ভোজনপরিযোসানন্তি ইমানি পনেত্থ তীণি অঙ্গানি.

ছট্ঠসঙ্ঘাদিসেসসিক্খাপদৰণ্ণনা নিট্ঠিতা.

৭. সত্তমসঙ্ঘাদিসেসসিক্খাপদৰণ্ণনা

৭০৯. সত্তমে কিন্নুমাৰ সমণিযোতি কিং নু ইমা এৰ সমণিযো. তাসাহন্তি তাসং অহং. সেসং উত্তানমেৰ.

সত্তমসঙ্ঘাদিসেসসিক্খাপদৰণ্ণনা নিট্ঠিতা.

৭১৫. অট্ঠমং উত্তানত্থমেৰ.

৯. নৰমসঙ্ঘাদিসেসসিক্খাপদৰণ্ণনা

৭২১. নৰমে ৰজ্জপ্পটিচ্ছাদিকাতি খুদ্দানুখুদ্দকৰজ্জস্স পটিচ্ছাদিকা. সমনুভাসনকম্মকালে চেত্থ দ্ৰে তিস্সো একতো সমনুভাসিতব্বা.

নৰমসঙ্ঘাদিসেসসিক্খাপদৰণ্ণনা নিট্ঠিতা.

৭২৭. দসমং উত্তানত্থমেৰ.

ভিক্খুনীৰিভঙ্গে সঙ্ঘাদিসেসৰণ্ণনা নিট্ঠিতা.

সঙ্ঘাদিসেসকণ্ডং নিট্ঠিতং.