পঠমগাথাসঙ্গণিকং

সত্তনগরেসু পঞ্ঞত্তসিক্খাপদৰণ্ণনা

৩৩৫. অড্ঢুড্ঢসতানীতি তীণি সতানি পঞ্ঞাসঞ্চ সিক্খাপদানি. ৰিগ্গহন্তি মনুস্সৰিগ্গহং. অতিরেকন্তি দসাহপরমং অতিরেকচীৰরং. কাল়কন্তি ‘‘সুদ্ধকাল়কান’’ন্তি ৰুত্তকাল়কং. ভূতন্তি ভূতারোচনং. পরম্পরভত্তন্তি পরম্পরভোজনং. ভিক্খুনীসু চ অক্কোসোতি ‘‘যা পন ভিক্খুনী ভিক্খুং অক্কোসেয্য ৰা পরিভাসেয্য ৰা’’তি (পাচি. ১০২৯) ৰুত্তসিক্খাপদং. অন্তরৰাসকন্তি অঞ্ঞাতিকায ভিক্খুনিযা চীৰরপটিগ্গণ্হনং. রূপিযন্তি রূপিযসংৰোহারং. সুত্তন্তি ‘‘সামং সুত্তং ৰিঞ্ঞাপেত্ৰা তন্তৰাযেহী’’তি (পারা. ৬৩৭) ৰুত্তসিক্খাপদং. উজ্ঝাপনকেতি উজ্ঝাপনকে খিয্যনকে পাচিত্তিযং. পাচিতপিণ্ডন্তি ভিক্খুনীপরিপাচিতং. চীৰরং দত্ৰাতি ‘‘সমগ্গেন সঙ্ঘেন চীৰরং দত্ৰা’’তি (পাচি. ৪৮৫) ৰুত্তসিক্খাপদং. ৰোসাসন্তীতি ‘‘ভিক্খূ পনেৰ কুলেসু নিমন্তিতা ভুঞ্জন্তি, তত্র চেসা ভিক্খুনী’’তি (পাচি. ৫৫৮) ৰুত্তপাটিদেসনীযং. গিরগ্গন্তি ‘‘যা পন ভিক্খুনী নচ্চং ৰা গীতং ৰা’’তি (পাচি. ৮৩৪) ৰুত্তসিক্খাপদং. চরিযাতি ‘‘অন্তোৰস্সং চারিকং চরেয্যা’’তি (পাচি. ৯৭০) চ, ‘‘ৰস্সংৰুত্থা চারিকং ন পক্কমেয্যা’’তি (পাচি. ৯৭৪) চ ৰুত্তসিক্খাপদদ্ৰযং. ছন্দদানেনাতি পারিৰাসিকেন ছন্দদানেন.

পারাজিকানি চত্তারীতি ভিক্খুনীনং চত্তারি পারাজিকানি. কুটীতি কুটিকারসিক্খাপদং. কোসিযন্তি কোসিযমিস্সকসিক্খাপদং. সেয্যাতি অনুপসম্পন্নেন সহসেয্যসিক্খাপদং. খণনেতি পথৰীখণনং. গচ্ছ দেৰতেতি ভূতগামসিক্খাপদং. সিঞ্চন্তি সপ্পাণকউদকসিঞ্চনং. মহাৰিহারোতি মহল্লকৰিহারো. অঞ্ঞন্তি অঞ্ঞৰাদকং. দ্ৰারন্তি যাৰ দ্ৰারকোসা. সহধম্মোতি সহধম্মিকং ৰুচ্চমানো. পযোপানন্তি সুরুসুরুকারকং. এল়কলোমানীতি এল়কলোমধোৰাপনং. পত্তোতি ঊনপঞ্চবন্ধনপত্তো. ওৰাদোতি ভিক্খুনুপস্সযং উপসঙ্কমিত্ৰা ওৰাদো. ভেসজ্জন্তি তদুত্তরিভেসজ্জৰিঞ্ঞাপনং. সূচীতি অট্ঠিমযাদিসূচিঘরং. আরঞ্ঞিকোতি ‘‘যানি খো পন তানি আরঞ্ঞকানি সেনাসনানী’’তিআদিনা (পাচি. ৫৭০) ৰুত্তপাটিদেসনীযং. ওৰাদোতি ‘‘যা পন ভিক্খুনী ওৰাদায ৰা সংৰাসায ৰা ন গচ্ছেয্যা’’তি (পাচি. ১০৫৫) ৰুত্তসিক্খাপদং.

পারাজিকানি চত্তারীতিআদিনা ছসু নগরেসু পঞ্ঞত্তং একতো সম্পিণ্ডিত্ৰা সাৰত্থিযা পঞ্ঞত্তং ৰিসুং গণেত্ৰা সব্বানেৰ সিক্খাপদানি দ্ৰীহি রাসীহি সঙ্গণ্হাতি.

সত্তনগরেসু পঞ্ঞত্তসিক্খাপদৰণ্ণনা নিট্ঠিতা.

চতুৰিপত্তিৰণ্ণনা

৩৩৬. একতিংস গরুকা নাম উভতো অট্ঠ পারাজিকা, ভিক্খূনং তেরস, ভিক্খুনীনং দস সঙ্ঘাদিসেসা. অট্ঠেত্থ অনৰসেসাতি এতেসু যথাৰুত্তগরুকেসু সাধারণাসাধারণৰসেন অট্ঠ পারাজিকা অনৰসেসা নাম.

অসাধারণাদিৰণ্ণনা

৩৩৮. ‘‘ধোৰনঞ্চ পটিগ্গহো’’তি গাথা অট্ঠকথাচরিযানং. তত্থ ধোৰনঞ্চ পটিগ্গহোতি অঞ্ঞাতিকায ভিক্খুনিযা চীৰরধোৰাপনং চীৰরপটিগ্গহণঞ্চ. কোসেয্য…পে… দ্ৰে লোমাতি এল়কলোমৰগ্গে আদিতো সত্ত সিক্খাপদানি ৰুত্তানি. ৰস্সিকাতি ৰস্সিকসাটিকসিক্খাপদং. আরঞ্ঞকেন চাতি সাসঙ্কসিক্খাপদং ৰুত্তং. পণীতন্তি পণীতভোজনৰিঞ্ঞত্তি. ঊনন্তি ঊনৰীসতিৰস্সসিক্খাপদং. নিসীদনে চ যা সিক্খা, ৰস্সিকা যা চ সাটিকাতি নিসীদনৰস্সিকসাটিকানং পমাণাতিক্কমো.

আপত্তিক্খন্ধা চেৰ উপোসথাদীনি চ ‘‘পারাজিকসঙ্ঘাদিসেসা’’তিআদিনা ৰিভত্তত্তা ‘‘ৰিভত্তিযো’’তি ৰুত্তানি. তেৰীসতি সঙ্ঘাদিসেসাতি ভিক্খুনীনং আগতানি দস, ভিক্খূনং তেরসাতি তেৰীসতি. দ্ৰেচত্তালীস নিস্সগ্গিযাতিআদীসুপি এসেৰ নযো. দ্ৰীহি…পে… কিচ্চং একেন সম্মতীতি দ্ৰীহি ৰিৰাদাধিকরণং, চতূহি অনুৰাদাধিকরণং, তীহি আপত্তাধিকরণং, একেন কিচ্চাধিকরণং সম্মতীতি অত্থো.

৩৩৯. নিরঙ্কতোতি সঙ্ঘম্হা অপসারিতো.