৬. সুরুসুরুৰগ্গৰণ্ণনা

৬২৭. ছট্ঠৰগ্গে সীতীকতোতি সীতট্টো, সীতপীল়িতোতি ৰুত্তং হোতি. সিলকবুদ্ধোতি পরিহাসৰচনমেতং. সিলকঞ্হি কঞ্চি দিস্ৰা ‘‘বুদ্ধো অয’’ন্তি ৰোহরন্তি.

৬৩৪. ৰিলীৰচ্ছত্তন্তি ৰেণুৰিলীৰেহি কতং ছত্তং. তত্থজাতকদণ্ডকেন কতন্তি তালপণ্ণং সহ দণ্ডকেন ছিন্দিত্ৰা তমেৰ ছত্তদণ্ডং করোন্তি গোপালকাদযো ৰিয, তং সন্ধাযেতং ৰুত্তং. ছত্তপাদুকায ৰা ঠিতং হোতীতি এত্থ ছত্তপাদুকা ৰুচ্চতি ছত্তাধারো. যস্মিং ছত্তং অপতমানং কত্ৰা ঠপেন্তি, তাদিসিকায ছত্তপাদুকায ঠিতং ছত্তং ‘‘ছত্ত’’ন্তি অজ্ঝাহরিতব্বং. ‘‘ছত্তং ছত্তপাদুকায ঠিত’’ন্তিপি পঠন্তি, তত্থাপি অযমেৰত্থো.

৬৩৭. চাপোতি মজ্ঝে ৰঙ্কা কাচদণ্ডসদিসা ধনুৰিকতি. কোদণ্ডোতি ৰট্টলদণ্ডা ধনুৰিকতি. পটিমুক্কন্তি পৰেসিতং লগ্গিতং.

সুরুসুরুৰগ্গৰণ্ণনা নিট্ঠিতা.