৩. সমুচ্চযক্খন্ধকং

সুক্কৰিস্সট্ঠিকথাৰণ্ণনা

৯৭. সমুচ্চযক্খন্ধকে ৰুত্তনযেন ৰত্তং সমাদাতব্বন্তি পারিৰাসিকক্খন্ধকৰণ্ণনাযং ৰুত্তনযেন দ্ৰীহি পদেহি একেন ৰা সমাদাতব্বং. ৰেদিযামীতি চিত্তেন সম্পটিচ্ছিত্ৰা সুখং অনুভৰামি, ন তপ্পচ্চযা অহং দুক্খিতোতি অধিপ্পাযো. ৰুত্তনযেনেৰ সঙ্ঘমজ্ঝে নিক্খিপিতব্বন্তি পারিৰাসিকক্খন্ধকে ৰুত্তনযেন ‘‘মানত্তং নিক্খিপামি, ৰত্তং নিক্খিপামী’’তি ইমেহি দ্ৰীহি একেন ৰা নিক্খিপিতব্বং. তস্স আরোচেত্ৰা নিক্খিপিতব্বন্তি অনারোচনেন ৰত্তভেদদুক্কটপরিমোচনত্থং ৰুত্তং. দ্ৰে লেড্ডুপাতে অতিক্কমিত্ৰাতি ভিক্খূনং সজ্ঝাযনসদ্দসৰনূপচারৰিজহনত্থং ৰুত্তং, মহামগ্গতো ওক্কম্মাতি মগ্গপ্পটিপন্নভিক্খূনং উপচারৰিজহনত্থং, গুম্বেন ৰা ৰতিযা ৰা পটিচ্ছন্নট্ঠানেতি দস্সনূপচারৰিজহনত্থং. অনিক্খিত্তৰত্তেন অন্তোউপচারগতানং সব্বেসম্পি আরোচেতব্বত্তা ‘‘অযং নিক্খিত্তৰত্তস্স পরিহারো’’তি ৰুত্তং. তত্থ নিক্খিত্তৰত্তস্সাতি ৰত্তং নিক্খিপিত্ৰা পরিৰসন্তস্সাতি অত্থো. অযং পনেত্থ থেরস্স অধিপ্পাযো – ৰত্তং নিক্খিপিত্ৰা পরিৰসন্তস্স উপচারগতানং সব্বেসং আরোচনকিচ্চং নত্থি, দিট্ঠরূপানং সুতসদ্দানং আরোচেতব্বং, অদিট্ঠঅসুতানম্পি অন্তোদ্ৰাদসহত্থগতানং আরোচেতব্বং. ইদং ৰত্তং নিক্খিপিত্ৰা পরিৰসন্তস্স লক্খণন্তি.

পরিৰাসকথাৰণ্ণনা

১০২. ‘‘সতিযেৰ অন্তরাযে অন্তরাযিকসঞ্ঞী ছাদেতি, অচ্ছন্না হোতি. অন্তরাযিকস্স পন অনন্তরাযিকসঞ্ঞায ছাদযতো অচ্ছন্নাৰা’’তিপি পাঠো. অৰেরীতি হিতকামো. উদ্ধস্তে অরুণেতি উট্ঠিতে অরুণে. সুদ্ধস্স সন্তিকেতি সভাগসঙ্ঘাদিসেসং অনাপন্নস্স সন্তিকে. ৰত্থুন্তি অসুচিমোচনাদিৰীতিক্কমং.

সুক্কৰিস্সট্ঠীতি ৰত্থু চেৰ গোত্তঞ্চাতি সুক্কৰিস্সট্ঠীতি ইদং অসুচিমোচনলক্খণস্স ৰীতিক্কমস্স পকাসনতো ৰত্থু চেৰ হোতি, সজাতিযসাধারণৰিজাতিযৰিনিৰত্তসভাৰায সুক্কৰিস্সট্ঠিযা এৰ পকাসনতো গোত্তঞ্চ হোতীতি অত্থো. গং তাযতীতি হি গোত্তং. সঙ্ঘাদিসেসোতি নামঞ্চেৰ আপত্তি চাতি সঙ্ঘাদিসেসোতি তেন তেন ৰীতিক্কমেন আপন্নস্স আপত্তিনিকাযস্স নামপ্পকাসনতো নামঞ্চেৰ হোতি আপত্তিসভাগত্তা আপত্তি চ.

তদনুরূপং কম্মৰাচং কত্ৰা মানত্তং দাতব্বন্তি –

‘‘সুণাতু মে, ভন্তে, সঙ্ঘো, অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং একাহপটিচ্ছন্নং, সো সঙ্ঘং একিস্সা আপত্তিযা সঞ্চেতনিকায সুক্কৰিস্সট্ঠিযা একাহপটিচ্ছন্নায একাহপরিৰাসং যাচি. সঙ্ঘো ইত্থন্নামস্স ভিক্খুনো একিস্সা আপত্তিযা সঞ্চেতনিকায সুক্কৰিস্সট্ঠিযা একাহপটিচ্ছন্নায একাহপরিৰাসং অদাসি. সো পরিৰুত্থপরিৰাসো. অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং অপ্পটিচ্ছন্নং, সো সঙ্ঘং তাসং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং দদেয্য, এসা ঞত্তি.

সুণাতু মে, ভন্তে…পে… সো পরিৰুত্থপরিৰাসো. অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং অপ্পটিচ্ছন্নং, সো সঙ্ঘং তাসং…পে… যাচতি. সঙ্ঘো ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং দেতি. যস্সাযস্মতো খমতি ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তস্স দানং, সো তুণ্হস্স. যস্স নক্খমতি, সো ভাসেয্য.

দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে…

দিন্নং সঙ্ঘেন ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং, খমতি সঙ্ঘস্স, তস্মা তুণ্হী. এৰমেতং ধারযামীতি –

এৰং কম্মৰাচং কত্ৰা মানত্তং দাতব্বং. চিণ্ণমানত্তস্স চ ইমিনাৰ নযেন কম্মৰাচং যোজেত্ৰা অব্ভানং কাতব্বং.

অঞ্ঞস্মিন্তি সুদ্ধন্তপরিৰাসৰসেন আপত্তিৰুট্ঠানতো অঞ্ঞস্মিং. দসসতং আপত্তিযো রত্তিসতং ছাদযিত্ৰাতি যোজেতব্বং.

পরিৰাসকথাৰণ্ণনা নিট্ঠিতা.

অত্তনো সীমং সোধেত্ৰা ৰিহারসীমাযাতি ৰিহারে বদ্ধসীমমেৰ সন্ধায ৰুত্তং. ৰিহারূপচারতোপি দ্ৰে লেড্ডুপাতা অতিক্কমিতব্বাতি ভিক্খুৰিহারং সন্ধায ৰদতি গামূপচারাতিক্কমেনেৰ ভিক্খুনীৰিহারূপচারাতিক্কমস্স সিদ্ধত্তা. ৰিহারস্স চাতি ভিক্খুৰিহারস্স. গামস্সাতি ন ৰুত্তন্তি গামস্স উপচারং মুঞ্চিতুং ৰট্টতীতি ন ৰুত্তং, তস্মা গামূপচারেপি ৰট্টতীতি অধিপ্পাযো.

তত্থেৰ ঠানং পচ্চাসীসন্তীতি ভিক্খূনং ঠানং পচ্চাসীসন্তি. পরিৰাসৰত্তাদীনন্তি পরিৰাসনিস্সযপটিপ্পস্সদ্ধিআদীনং. যুত্ততরং দিস্সতীতি ইমিনা অনিক্খিত্তৰত্তভিক্খুনা ৰিয ভিক্খুনিযাপি অন্তোউপচারসীমগতানংযেৰ আরোচেতব্বং, ন গামে ঠিতানম্পি গন্ত্ৰা আরোচেতব্বন্তি দীপেতি. তস্মিং গামেতি যস্মিং গামে ভিক্খুনুপস্সযো হোতি, তস্মিং গামে. বহি উপচারসীমায ঠত্ৰাতি উপচারসীমতো বহি ঠত্ৰা. সম্মন্নিত্ৰা দাতব্বাতি এত্থ সম্মন্নিত্ৰা দিন্নায সহৰাসেপি রত্তিচ্ছেদো ন হোতি.

পটিচ্ছন্নপরিৰাসকথাৰণ্ণনা

১০৮. ৰিসুং মানত্তং চরিতব্বন্তি মূলাযপটিকস্সনং অকত্ৰা ৰিসুং কম্মৰাচায মানত্তং গহেত্ৰা চরিতব্বং.

সুক্কৰিস্সট্ঠিকথাৰণ্ণনা নিট্ঠিতা.

অগ্ঘসমোধানপরিৰাসকথাৰণ্ণনা

১৩৪. একাপত্তিমূলকন্তি ‘‘একা আপত্তি একাহপ্পটিচ্ছন্না, একা আপত্তি দ্ৰীহপ্পটিচ্ছন্না’’তিআদিনা ৰুত্তনযং সন্ধায ৰদতি. আপত্তিৰড্ঢনকন্তি ‘‘একা আপত্তি একাহপ্পটিচ্ছন্না, দ্ৰে আপত্তিযো দ্ৰীহপ্পটিচ্ছন্না’’তিআদিনা ৰুত্তং আপত্তিৰড্ঢনকনযং সন্ধায.

দ্ৰেভিক্খুৰারএকাদসকাদিকথাৰণ্ণনা

১৮১. থুল্লচ্চযাদীহি মিস্সকন্তি একৰত্থুম্হি পুব্বভাগে আপন্নথুল্লচ্চযদুক্কটেহি মিস্সকং. মক্খধম্মো নাম ছাদেতুকামতা.

১৮২. সম্বহুলা সঙ্ঘাদিসেসা আপত্তিযো আপজ্জতি পরিমাণম্পীতিআদি জাতিৰসেনেকৰচনং, ভাৰনপুংসকনিদ্দেসো ৰা. সেসমেত্থ পাল়িতো অট্ঠকথাতো চ সুৰিঞ্ঞেয্যমেৰ.

সমুচ্চযক্খন্ধকৰণ্ণনা নিট্ঠিতা.