২. পারিৰাসিকক্খন্ধকং

পারিৰাসিকৰত্তকথাৰণ্ণনা

৭৫. পারিৰাসিকক্খন্ধকে নৰকতরং পারিৰাসিকন্তি অত্তনো নৰকতরং পারিৰাসিকং. পারিৰাসিকস্স হি অত্তনো নৰকতরং পারিৰাসিকং ঠপেত্ৰা অঞ্ঞে মূলাযপটিকস্সনারহমানত্তারহমানত্তচারিকঅব্ভানারহাপি পকতত্তট্ঠানেযেৰ তিট্ঠন্তি. তেনাহ ‘‘অন্তমসো মূলাযপঅকস্সনারহাদীনম্পী’’তি. পাদে ঘংসেন্তি এতেনাতি পাদঘংসনং, সক্খরকথলাদি. ‘‘অনুজানামি, ভিক্খৰে, তিস্সো পাদঘংসনিযো সক্খরং কথলং সমুদ্দফেণক’’ন্তি (চূল়ৰ. ২৬৯) হি ৰুত্তং. সদ্ধিৰিহারিকাদীনম্পি সাদিযন্তস্সাতি সদ্ধিৰিহারিকানম্পি অভিৰাদনাদিং সাদিযন্তস্স. ‘‘মা মং গামপ্পৰেসনং আপুচ্ছথা’’তি ৰুত্তে অনাপুচ্ছাপি গামং পৰিসিতুং ৰট্টতি. যো যো ৰুড্ঢোতি পারিৰাসিকেসু ভিক্খূসু যো যো ৰুড্ঢো. নৰকতরস্স সাদিতুন্তি পারিৰাসিকনৰকতরস্স অভিৰাদনাদিং সাদিতুং.

তত্থেৰাতি সঙ্ঘনৰকট্ঠানেযেৰ. অত্তনো পাল়িযা পৰারেতব্বন্তি অত্তনো ৰস্সগ্গেন পত্তপাল়িযা পৰারেতব্বং, ন পন সব্বেসু পৰারিতেসূতি অত্থো. যদি পন ন গণ্হাতি ন ৰিস্সজ্জেতীতি যদি পুরিমদিৰসে অত্তনো ন গণ্হাতি গহেত্ৰা চ ন ৰিস্সজ্জেতি. চতুস্সালভত্তন্তি ভোজনসালাযং পটিপাটিযা দিয্যমানভত্তং. হত্থপাসে ঠিতেনাতি দাযকস্স হত্থপাসে ঠিতেন.

৭৬. অঞ্ঞো সামণেরো ন গহেতব্বোতি উপজ্ঝাযেন হুত্ৰা অঞ্ঞো সামণেরো ন গহেতব্বো. উপজ্ঝং দত্ৰা গহিতসামণেরাপীতি পকতত্তকালে উপজ্ঝং দত্ৰা গহিতসামণেরাপি. লদ্ধসম্মুতিকেন আণত্তোপি গরুধম্মেহি অঞ্ঞেহি ৰা ওৰদিতুং লভতীতি আহ ‘‘পটিবলস্স ৰা ভিক্খুস্স ভারো কাতব্বো’’তি. আগতা ভিক্খুনিযো ৰত্তব্বাতি সম্বন্ধো. সৰচনীযন্তি সদোসং. জেট্ঠকট্ঠানং ন কাতব্বন্তি পধানট্ঠানং ন কাতব্বং. কিং তন্তি আহ ‘‘পাতিমোক্খুদ্দেসকেন ৰা’’তিআদি.

রজেহি হতা উপহতা ভূমি এতিস্সাতি রজোহতভূমি, রজোকিণ্ণভূমীতি অত্থো. পচ্চযন্তি ৰস্সাৰাসিকলাভং সন্ধায ৰুত্তং. একপস্সে ঠত্ৰাতি পাল়িং ৰিহায ভিক্খূনং পচ্ছতো ঠত্ৰা. সেনাসনং ন লভতীতি সেয্যাপরিযন্তভাগিতায ৰস্সগ্গেন গণ্হিতুং ন লভতি. অস্সাতি ভৰেয্য. ‘‘আগন্তুকেন আরোচেতব্বং, আগন্তুকস্স আরোচেতব্ব’’ন্তি অৰিসেসেন ৰুত্তত্তা সচে দ্ৰে পারিৰাসিকা গতট্ঠানে অঞ্ঞমঞ্ঞং পস্সন্তি, উভোহিপি অঞ্ঞমঞ্ঞস্স আরোচেতব্বং. যথা বহি দিস্ৰা আরোচিতস্স ভিক্খুনো ৰিহারং আগতে পুন আরোচনকিচ্চং নত্থি, এৰং অঞ্ঞং ৰিহারং গতেনপি তত্থ পুব্বে আরোচিতস্স পুন আরোচনকিচ্চং নত্থীতি ৰদন্তি.

৮১. অৰিসেসেনাতি পারিৰাসিকস্স উক্খিত্তকস্স চ অৰিসেসেন. ওবদ্ধন্তি পলিবুদ্ধং.

৮৩. সহৰাসোতি ৰুত্তপ্পকারে ছন্নে পকতত্তেন ভিক্খুনা সদ্ধিং সযনমেৰ অধিপ্পেতং, ন সেসইরিযাপথকপ্পনং. সেসমেত্থ সুৰিঞ্ঞেয্যমেৰ.

পারিৰাসিকক্খন্ধকৰণ্ণনা নিট্ঠিতা.