৬. পাটিদেসনীযকণ্ডং

পাটিদেসনীযসিক্খাপদৰণ্ণনা

৫৫২. পাটিদেসনীযেসু পঠমে ‘‘গারয্হং আৰুসোতিআদি পটিদেসেতব্বাকারদস্সন’’ন্তি ৰচনতো পাল়িযং আগতনযেনেৰ আপত্তি দেসেতব্বা. অসপ্পাযন্তি সগ্গমোক্খানং অহিতং অননুকূলং. সেসমেত্থ উত্তানমেৰ. পরিপুণ্ণূপসম্পন্নতা, অঞ্ঞাতিকতা, অন্তরঘরে ঠিতায হত্থতো সহত্থা পটিগ্গহণং, যাৰকালিকতা, অজ্ঝোহরণন্তি ইমানি পনেত্থ পঞ্চ অঙ্গানি.

৫৫৭-৫৬২. দুতিযততিযচতুত্থেসু নত্থি ৰত্তব্বং, অঙ্গেসু পন দুতিযে পরিপুণ্ণূপসম্পন্নতা, পঞ্চভোজনতা, অন্তরঘরে ঠিতায অনুঞ্ঞাতপ্পকারতো অঞ্ঞথা ৰোসাসনা, অনিৰারণা, অজ্ঝোহারোতি ইমানি পঞ্চ অঙ্গানি.

ততিযে সেক্খসম্মততা, পুব্বে অনিমন্তিততা, অগিলানতা, ঘরূপচারোক্কমনং, ঠপেত্ৰা নিচ্চভত্তাদীনি অঞ্ঞং আমিসং গহেত্ৰা ভুঞ্জনন্তি ইমানি পঞ্চ অঙ্গানি.

চতুত্থে যথাৰুত্তআরঞ্ঞকসেনাসনতা, যাৰকালিকস্স অতত্থজাতকতা, অগিলানতা, অগিলানাৰসেসকতা, অপ্পটিসংৰিদিততা, অজ্ঝারামে পটিগ্গহণং, অজ্ঝোহরণন্তি ইমানি সত্ত অঙ্গানি.

পাটিদেসনীযসিক্খাপদৰণ্ণনা নিট্ঠিতা.

পাটিদেসনীযকণ্ডং নিট্ঠিতং.