৯. চম্পেয্যক্খন্ধকং

কস্সপগোত্তভিক্খুৰত্থুকথাৰণ্ণনা

৩৮০. চম্পেয্যক্খন্ধকে চম্পাযন্তি এৰংনামকে নগরে. তস্স হি নগরস্স আরামপোক্খরণীআদীসু তেসু তেসু ঠানেসু চম্পকরুক্খাৰ উস্সন্না অহেসুং, তস্মা ‘‘চম্পা’’তি সঙ্খং অগমাসি. গগ্গরায পোক্খরণিযা তীরেতি তস্স চম্পানগরস্স অৰিদূরে গগ্গরায নাম রাজমহেসিযা খণিতত্তা ‘‘গগ্গরা’’তি লদ্ধৰোহারা পোক্খরণী অত্থি, তস্সা তীরে সমন্ততো নীলাদিপঞ্চৰণ্ণকুসুমপটিমণ্ডিতং মহন্তং চম্পকৰনং, তস্মিং ভগৰা কুসুমগন্ধসুগন্ধে চম্পকৰনে ৰিহরতি. তং সন্ধায ‘‘গগ্গরায পোক্খরণিযা তীরে’’তি ৰুত্তং. তন্তিবদ্ধোতি তন্তি ৰুচ্চতি ব্যাপারো, তত্থ বদ্ধো পসুতো উস্সুক্কং আপন্নোতি অত্থো, তস্মিং আৰাসে অকতং সেনাসনং করোতি, জিণ্ণং পটিসঙ্খরোতি, কতে ইস্সরো হোতীতি অধিপ্পাযো. তেনাহ ‘‘তস্মিং আৰাসে কত্তব্বত্তা তন্তিপটিবদ্ধো’’তি, কত্তব্বকম্মে উস্সাহমাপন্নোতি অত্থো.

ঞত্তিৰিপন্নকম্মাদিকথাৰণ্ণনা

৩৮৫-৩৮৭. পটিক্কোসন্তেসূতি নিৰারেন্তেসু. হাপনং ৰা অঞ্ঞথা করণং ৰা নত্থীতি ঞত্তিকম্মস্স একায এৰ ঞত্তিযা কত্তব্বত্তা ততো হাপনং ন সম্ভৰতি, অনুস্সাৰনায অভাৰতো পচ্ছা ঞত্তিঠপনৰসেন দ্ৰীহি ঞত্তীহি করণৰসেন চ অঞ্ঞথা করণং নত্থি.

চতুৰগ্গকরণাদিকথাৰণ্ণনা

৩৮৯. উক্খেপনীযকম্মকতো কম্মনানাসংৰাসকো, উক্খিত্তানুৰত্তকো লদ্ধিনানাসংৰাসকো.

দ্ৰেনিস্সারণাদিকথাৰণ্ণনা

৩৯৫. অপ্পত্তো নিস্সারণন্তি এত্থ নিস্সারণকম্মং নাম কুলদূসকানঞ্ঞেৰ অনুঞ্ঞাতং, অযঞ্চ ‘‘বালো হোতি অব্যত্তো’’তিআদিনা নিদ্দিট্ঠো কুলদূসকো ন হোতি, তস্মা ‘‘অপ্পত্তো’’তি ৰুত্তো. যদি এৰং কথং সুনিস্সারিতো হোতীতি? বালঅব্যত্ততাদিযুত্তস্সপি কম্মক্খন্ধকে ‘‘আকঙ্খমানো সঙ্ঘো পব্বাজনীযকম্মং করেয্যা’’তি (চূল়ৰ. ২৭) ৰুত্তত্তা. তেনেৰাহ ‘‘তঞ্চেস…পে… তস্মা সুনিস্সারিতো হোতী’’তি. তত্থ তন্তি পব্বাজনীযকম্মং. এসোতি ‘‘বালো’’তিআদিনা নিদ্দিট্ঠো. আৰেণিকেন লক্খণেনাতি পব্বাজনীযকম্মস্স আৰেণিকভূতেন কুলদূসকভাৰলক্খণেন.

তঞ্চে সঙ্ঘো নিস্সারেতি, সুনিস্সারিতোতি এত্থ অধিপ্পেতস্স পব্বাজনীযকম্মস্স ৰসেন অত্থং দস্সেত্ৰা ইদানি যদি ‘‘তঞ্চে সঙ্ঘো নিস্সারেতী’’তি তজ্জনীযাদিকম্মৰসেন নিস্সারণা অধিপ্পেতা, তদা নিস্সারণং সম্পত্তোযেৰ তজ্জনীযাদিৰসেন সুনিস্সারিতোতি ব্যতিরেকমুখেন অত্থং দস্সেতুং পুন ‘‘তঞ্চে সঙ্ঘো নিস্সারেতী’’তি উল্লিঙ্গেত্ৰা অত্থো কথিতো. নত্থি এতস্স অপদানং অৰখণ্ডনং আপত্তিপরিযন্তোতি অনপদানো. একেকেনপি অঙ্গেন নিস্সারণা অনুঞ্ঞাতাতি কম্মক্খন্ধকে অনুঞ্ঞাতা. সেসমেত্থ পাল়িতো অট্ঠকথাতো চ সুৰিঞ্ঞেয্যমেৰ.

দ্ৰেনিস্সারণাদিকথাৰণ্ণনা নিট্ঠিতা.

চম্পেয্যক্খন্ধকৰণ্ণনা নিট্ঠিতা.