৪. পৰারণক্খন্ধকং

অফাসুকৰিহারকথাৰণ্ণনা

২০৯. পৰারণক্খন্ধকে আদিতো লাপো আলাপো, ৰচনপটিৰচনৰসেন সমং লাপো সল্লাপো. পিণ্ডায পটিক্কমেয্যাতি গামে পিণ্ডায চরিত্ৰা পচ্চাগচ্ছেয্য. অৰক্কারপাতিং ধোৰিত্ৰা উপট্ঠাপেয্যাতি অতিরেকপিণ্ডপাতং অপনেত্ৰা ঠপনত্থায একং সমুগ্গপাতিং ধোৰিত্ৰা ঠপেয্য. সমুগ্গপাতি নাম সমুগ্গপুটসদিসা পাতি. অপ্পহরিতেতি অপরূল়্হহরিতে, যস্মিং ঠানে পিণ্ডপাতজ্ঝোত্থরণেন ৰিনস্সনধম্মানি তিণানি নত্থি, তস্মিন্তি অত্থো. তেন নিত্তিণঞ্চ মহাতিণগহনঞ্চ যত্থ সকটেনপি ছড্ডিতে পিণ্ডপাতে তিণানি ন ৰিনস্সন্তি, তঞ্চ ঠানং পরিগ্গহিতং হোতি. ভূতগামসিক্খাপদস্স হি অৰিকোপনত্থমেতং ৰুত্তং. অপ্পাণকেতি নিপ্পাণকে, পিণ্ডপাতজ্ঝোত্থরণেন মরিতব্বপাণকরহিতে ৰা মহাউদকক্খন্ধে. পরিত্তোদকে এৰ হি ভত্তপক্খেপেন আলুল়িতে সুখুমপাণকা মরন্তি, ন মহাতল়াকাদীসূতি. পাণকানুরক্খণত্থঞ্হি এতং ৰুত্তং. ওপিলাপেয্যাতি নিমুজ্জাপেয্য.

ৰচ্চঘটন্তি আচমনকুম্ভী. রিত্তন্তি রিত্তকং. তুচ্ছন্তি তস্সেৰ ৰেৰচনং. অৰিসয্হন্তি উক্খিপিতুং অসক্কুণেয্যং অতিভারিকং. হত্থৰিকারেনাতি হত্থসঞ্ঞায. হত্থেহি উক্খিপনং হত্থৰিলঙ্ঘনং. তেনাহ ‘‘হত্থুক্খেপকেনা’’তি. অথ ৰা ৰিলঙ্ঘেতি দেসন্তরং পাপেতি এতেনাতি ৰিলঙ্ঘকো, হত্থো এৰ ৰিলঙ্ঘকো হত্থৰিলঙ্ঘকো, তেন হত্থৰিলঙ্ঘকেন, অঞ্ঞমঞ্ঞং সংসিব্বিতহত্থেনাতি ৰুত্তং হোতি. দ্ৰে হি জনা হত্থেন হত্থং সংসিব্বেত্ৰা দ্ৰীসু হত্থেসু ঠপেত্ৰা উট্ঠপেন্তা হত্থৰিলঙ্ঘকেন উট্ঠপেন্তি নাম. তিত্থিযসমাদানন্তি তিত্থিযেহি সমাদাতব্বং.

অফাসুকৰিহারকথাৰণ্ণনা নিট্ঠিতা.

পৰারণাভেদকথাৰণ্ণনা

২১২. দ্ৰেমা, ভিক্খৰে, পৰারণা চাতুদ্দসিকা চ পন্নরসিকা চাতি এত্থ পুরিমৰস্সংৰুত্থানং পুব্বকত্তিকপুণ্ণমা, তেসংযেৰ সচে ভণ্ডনকারকেহি উপদ্দুতা পৰারণং পচ্চুক্কড্ঢন্তি, অথ কত্তিকমাসস্স কাল়পক্খচাতুদ্দসো ৰা পচ্ছিমকত্তিকপুণ্ণমা ৰা, পচ্ছিমৰস্সংৰুত্থানঞ্চ পচ্ছিমকত্তিকপুণ্ণমা এৰ ৰাতি ইমে তযো পৰারণদিৰসাতি ৰেদিতব্বা. ইদঞ্চ পকতিচারিত্তৰসেন ৰুত্তং, তথারূপপচ্চযে পন সতি দ্ৰিন্নং কত্তিকপুণ্ণমানং পুরিমেসু চাতুদ্দসেসুপি পৰারণং কাতুং ৰট্টতি, তেনেৰ মহাৰিহারে ভিক্খূ চাতুদ্দসিযা পৰারেত্ৰা পন্নরসিযা কাযসামগ্গিং দেন্তি, চেতিযগিরিমহদস্সনত্থম্পি অট্ঠমিযা গচ্ছন্তি, তম্পি চাতুদ্দসিযং পৰারেতুকামানঞ্ঞেৰ হোতি.

পৰারণাদানানুজাননকথাৰণ্ণনা

২১৩. সচে পন ৰুড্ঢতরো হোতীতি সচে পৰারণদাযকো ভিক্খু ৰুড্ঢতরো হোতি. তেন চ ভিক্খুনাতি পৰারণদাযকেন ভিক্খুনা.

অনাপত্তিপন্নরসককথাৰণ্ণনা

২২২. পন্নরসকেসু পৰারিতমত্তেতি পৰারিতসমনন্তরং. অৰুট্ঠিতায পরিসাযাতি পৰারেত্ৰা পচ্ছা অঞ্ঞমঞ্ঞং কথেন্তিযা. একচ্চায ৰুট্ঠিতাযাতি একচ্চেসু যথানিসিন্নেসু একচ্চেসু সকসকট্ঠানং গতেসু. পুন পৰারিতব্বন্তি পুনপি সব্বেহি সমাগন্ত্ৰা পৰারেতব্বং. আগচ্ছন্তি সমসমা, তেসং সন্তিকে পৰারেতব্বন্তি গতে অনানেত্ৰা নিসিন্নানঞ্ঞেৰ সন্তিকে পৰারেতব্বং. সব্বায ৰুট্ঠিতায পরিসায আগচ্ছন্তি সমসমা, তেসং সন্তিকে পৰারেতব্বন্তি যদি সব্বে ৰুট্ঠহিত্ৰা গতা সন্নিপাতেতুঞ্চ ন সক্কা, একচ্চে সন্নিপাতেত্ৰা পৰারেতুং ৰট্টতি, ঞত্তিং ঠপেত্ৰা কত্তব্বসঙ্ঘকম্মাভাৰা ৰগ্গং ন হোতি. উপোসথেপি এসেৰ নযো.

পৰারণাঠপনকথাৰণ্ণনা

২৩৭. ‘‘নত্থি দিন্ন’’ন্তিআদিনযপ্পৰত্তা দসৰত্থুকা মিচ্ছাদিট্ঠি. ‘‘হোতি তথাগতো পরং মরণা, ন হোতি তথাগতো পরং মরণা’’তিআদিনা সস্সতুচ্ছেদসঙ্খাতং অন্তং গণ্হাতীতি অন্তগ্গাহিকা.

ভণ্ডনকারকৰত্থুকথাৰণ্ণনা

২৪০. চতুত্থে কতে সুণন্তীতি চতুত্থে পন্নরসিকুপোসথে কতে অম্হাকং পৰারণং ঠপেস্সন্তীতি সুণন্তি. এৰম্পি দ্ৰে চাতুদ্দসিকা হোন্তীতি ততিযেন সদ্ধিং দ্ৰে চাতুদ্দসিকা হোন্তি.

পৰারণাসঙ্গহকথাৰণ্ণনা

২৪১. অযং পৰারণাসঙ্গহো একস্স দিন্নোপি সব্বেসং দিন্নোৰ হোতীতি আহ ‘‘একস্সপি ৰসেন দাতব্বো’’তি. আগন্তুকা তেসং সেনাসনং গহেতুং ন লভন্তীতি সচেপি সট্ঠিৰস্সভিক্খূ আগচ্ছন্তি, তেসং সেনাসনং গহেতুং ন লভন্তি. পৰারেত্ৰা পন অন্তরাপি চারিকং পক্কমিতুং লভন্তীতি পৰারণাসঙ্গহে কতে অন্তরা পক্কমিতুকামা সঙ্ঘং সন্নিপাতাপেত্ৰা পৰারেতুং লভন্তি. সেসমেত্থ পাল়িতো অট্ঠকথাতো চ সুৰিঞ্ঞেয্যমেৰ.

পৰারণক্খন্ধকৰণ্ণনা নিট্ঠিতা.