৯. রাজৰগ্গো

১. অন্তেপুরসিক্খাপদৰণ্ণনা

৪৯৭-৪৯৯. রাজৰগ্গস্স পঠমসিক্খাপদে অট্ঠকথাযং সব্বং উত্তানত্থমেৰ. পাল়িযং পন অযমনুত্তানপদত্থো. কতং ৰা করিস্সন্তি ৰাতি মেথুনৰীতিক্কমনং কতং ৰা করিস্সন্তি ৰা. ইমেসন্তি পদং ৰিভত্তিৰিপরিণামং কত্ৰা উভযত্থ যোজেতব্বং ‘‘ইমেহি কতং ইমে করিস্সন্তী’’তি. রতনন্তি মণিরতনাদীসু যংকিঞ্চি. উভতোতি দ্ৰীহি পক্খেহি. ‘‘উভতো সুজাতো’’তি এত্তকে ৰুত্তে যেহি কেহিচি দ্ৰীহি ভাগেহি সুজাততা ৰিঞ্ঞাযেয্য, সুজাত-সদ্দো চ ‘‘সুজাতো চারুদস্সনো’’তিআদীসু আরোহসম্পত্তিপরিযাযোতি জাতিৰসেনেৰ সুজাততং ৰিভাৰেতুং ‘‘মাতিতো চ পিতিতো চা’’তি ৰুত্তং. অনোরসপুত্তৰসেনপি লোকে মাতুপিতুসমঞ্ঞা দিস্সতি, ইধ পন সা ওরসপুত্তৰসেনেৰ ইচ্ছিতাতি দস্সেতুং ‘‘সংসুদ্ধগহণিকো’’তি ৰুত্তং. গব্ভং গণ্হাতি ধারেতীতি গহণী, গব্ভাসযসঞ্ঞিতো মাতুকুচ্ছিপ্পদেসো. সংসুদ্ধা গহণী অস্সাতি সংসুদ্ধগহণিকো, সংসুদ্ধা তস্স মাতুকুচ্ছীতি ৰুত্তং হোতি. ‘‘সমৰেপাকিনিযা গহণিযা’’তি এত্থ পন যথাভুত্তস্স আহারস্স ৰিপাচনৰসেন গণ্হনতো অছড্ডনতো কম্মজতেজোধাতু ‘‘গহণী’’তি ৰুচ্চতি.

যাৰ সত্তমা পিতামহযুগাতি এত্থ পিতু পিতা পিতামহো, পিতামহস্স যুগং পিতামহযুগং. ‘‘যুগ’’ন্তি আযুপ্পমাণং ৰুচ্চতি. অভিলাপমত্তমেৰ চেতং, অত্থতো পন পিতামহোযেৰ পিতামহযুগং. পিতা চ মাতা চ পিতরো, পিতূনং পিতরো পিতামহা, তেসং যুগো পিতামহযুগো, তস্মা যাৰ সত্তমা পিতামহযুগা, পিতামহদ্ৰন্দাতি এৰমেত্থ অত্থো দট্ঠব্বো. এৰঞ্হি পিতামহগ্গহণেনেৰ মাতামহোপি গহিতো হোতি. যুগ-সদ্দো চেত্থ একসেসেন দট্ঠব্বো যুগো চ যুগো চ যুগোতি. এৰঞ্হি তত্থ তত্থ দ্ৰন্দং গহিতমেৰ হোতি, তস্মা ততো উদ্ধং সব্বেপি পুব্বপুরিসা পিতামহযুগগ্গহণেনেৰ গহিতা. এৰং যাৰ সত্তমো পিতামহযুগো, তাৰ সংসুদ্ধগহণিকো.

অক্খিত্তোতি ‘‘অপনেথ এতং, কিং ইমিনা’’তি এৰং অক্খিত্তো অনৰক্খিত্তো. অনুপকুট্ঠোতি ন উপকুট্ঠো, ন অক্কোসং ৰা নিন্দং ৰা পত্তপুব্বো. কেন কারণেনাতি আহ ‘‘জাতিৰাদেনা’’তি. এত্থ চ ‘‘উভতো…পে… পিতামহযুগা’’তি এতেন তস্স যোনিদোসাভাৰো দস্সিতো সংসুদ্ধগহণিকভাৰকিত্তনতো, ‘‘অক্খিত্তো’’তি ইমিনা কিরিযাপরাধাভাৰো. কিরিযাপরাধেন হি সত্তা খেপং পাপুণন্তি. ‘‘অনুপকুট্ঠো’’তি ইমিনা অযুত্তসংসগ্গাভাৰো. অযুত্তসংসগ্গঞ্হি পটিচ্চ সত্তা অক্কোসং লভন্তি. সেসমেত্থ উত্তানমেৰ. খত্তিযতা, অভিসিত্ততা, উভিন্নম্পি সযনিঘরতো অনিক্খন্ততা, অপ্পটিসংৰিদিততা, ইন্দখীলাতিক্কমোতি ইমানি পনেত্থ পঞ্চ অঙ্গানি.

অন্তেপুরসিক্খাপদৰণ্ণনা নিট্ঠিতা.

২. রতনসিক্খাপদৰণ্ণনা

৫০২. দুতিযে মহালতং নামাতি পতিকুলং গচ্ছন্তিযা কির তস্সা পিতা মহালতাপিল়ন্ধনং নাম কারাপেসি. তস্মিং পিল়ন্ধনে চতস্সো ৰজিরনাল়িযো তত্থ তত্থ অপ্পেতব্বট্ঠানে অপ্পনৰসেন ৰিনিযোগং অগমংসু, মুত্তানং একাদস নাল়িযো, পৰাল়স্স দ্ৰাৰীসতি নাল়িযো, মণীনং তেত্তিংস নাল়িযো. ইতি এতেহি চ অঞ্ঞেহি চ ৰেল়ুরিযলোহিতঙ্কমসারগল্লাদীহি সত্তৰণ্ণেহি চ রতনেহি নিট্ঠানং অগমাসি. তং সীসে পটিমুক্কং যাৰ পাদপিট্ঠিযা ভস্সতি, পঞ্চন্নং হত্থীনং বলং ধারযমানাৰ ইত্থী নং ধারেতুং সক্কোতি. তং সন্ধাযেতং ৰুত্তং.

৫০৬. আৰসথস্স পন সুপ্পপাতো ৰা মুসলপাতো ৰা উপচারো নামাতি যোজেতব্বং. আৰসথোতি চেত্থ অন্তোআরামে ৰা হোতু অঞ্ঞত্থ ৰা, অত্তনো ৰসনট্ঠানং ৰুচ্চতি. ছন্দেনপি ভযেনপীতি ৰড্ঢকীআদীসু ছন্দেন, রাজৰল্লভেসু ভযেন. তমেৰ ভিক্খুং আসঙ্কন্তীতি ৰিস্সরিত্ৰা গমনকালে অত্তনো পচ্ছতো অঞ্ঞস্সাভাৰা আসঙ্কন্তি. পতিরূপং নাম রতনসম্মতে পংসুকূলগ্গহণং ৰা রতনে নিরুস্সুক্কগমনং ৰা. যদি হি তং রতনসম্মতং আমাসং চে, ‘‘নত্থি এতস্স সামী’’তি পংসুকূলং গহেস্সতি. অনামাসং চে, ‘‘নত্থি এতস্স সামী’’তি পংসুকূলছিন্নপলিবোধো নিরপেক্খো গমিস্সতি. সমাদপেত্ৰাতি অঞ্ঞং সমাদপেত্ৰা, ‘‘উদ্দিস্স অরিযা তিট্ঠন্তি, এসা অরিযানযাচনা’’তি (জা. ১.৭.৫৯) ৰুত্তনযেন যাচিত্ৰাতি অত্থো. সেসমেত্থ উত্তানমেৰ. অননুঞ্ঞাতকরণং, পরসন্তকতা, ৰিস্সাসগ্গাহপংসুকূলসঞ্ঞানং অভাৰো, উগ্গহণং ৰা উগ্গহাপনং ৰাতি ইমানি পনেত্থ চত্তারি অঙ্গানি.

রতনসিক্খাপদৰণ্ণনা নিট্ঠিতা.

৩. ৰিকালগামপ্পৰিসনসিক্খাপদৰণ্ণনা

৫০৮. ততিযে অরিযমগ্গস্সাতি এত্থ সগ্গমগ্গোপি সঙ্গহেতব্বো. অনিয্যানিকত্তা সগ্গমোক্খমগ্গানং তিরচ্ছানভূতা হি কথা তিরচ্ছানকথা. তিরচ্ছানভূতন্তি তিরোকরণভূতং ৰিবন্ধনভূতং. রাজপটিসংযুত্তং কথন্তি (দী. নি. অট্ঠ. ১.১৭; ম. নি. অট্ঠ. ২.২২৩; সং. নি. অট্ঠ. ৩.৫.১০৮০; অ. নি. অট্ঠ. ৩.১০.৬৯-৭০) রাজানং আরব্ভ ‘‘মহাসম্মতো মন্ধাতা ধম্মাসোকো এৰংমহানুভাৰো’’তিআদিনা নযেন পৰত্তকথং. এত্থ চ ‘‘অসুকো রাজা অভিরূপো দস্সনীযো’’তিআদিনা নযেন গেহস্সিতকথাৰ তিরচ্ছানকথা হোতি. ‘‘সোপি নাম এৰংমহানুভাৰো খযং গতো’’তি এৰং পৰত্তা পন অনিচ্চতাপটিসংযুত্তা কম্মট্ঠানভাৰে তিট্ঠতি. চোরেসুপি ‘‘মূলদেৰো এৰংমহানুভাৰো, মেঘমালো এৰংমহানুভাৰো’’তি তেসং কম্মং পটিচ্চ ‘‘অহো সূরা’’তি গেহস্সিতকথাৰ তিরচ্ছানকথা. যুদ্ধেপি ভরতযুদ্ধাদীসু ‘‘অসুকেন অসুকো এৰং মারিতো এৰং ৰিদ্ধো’’তি কামস্সাদৰসেনেৰ কথা তিরচ্ছানকথা. ‘‘তেপি নাম খযং গতা’’তি এৰং পৰত্তা পন সব্বত্থ কম্মট্ঠানমেৰ হোতি.

অপিচ অন্নাদীসু ‘‘এৰং ৰণ্ণৰন্তং গন্ধৰন্তং রসৰন্তং ফস্সসম্পন্নং খাদিম্হ ভুঞ্জিম্হ পিৰিম্হ পরিভুঞ্জিম্হা’’তি কামস্সাদৰসেন কথেতুং ন ৰট্টতি, সাত্থকং পন কত্ৰা ‘‘পুব্বে এৰং ৰণ্ণাদিসম্পন্নং অন্নং পানং ৰত্থং সযনং মালাগন্ধং সীলৰন্তানং অদম্হ, চেতিযপূজং অকরিম্হা’’তি কথেতুং ৰট্টতি. ঞাতিকথাদীসুপি ‘‘অম্হাকং ঞাতকা সূরা সমত্থা’’তি ৰা ‘‘পুব্বে মযং এৰং ৰিচিত্রেহি যানেহি ৰিচরিম্হা’’তি ৰা অস্সাদৰসেন ৰত্তুং ন ৰট্টতি, সাত্থকং পন কত্ৰা ‘‘তেপি নো ঞাতকা খযং গতা’’তি ৰা ‘‘পুব্বে মযং এৰরূপা উপাহনা সঙ্ঘস্স অদম্হা’’তি ৰা কথেতব্বং. গামকথাপি সুনিৰিট্ঠদুন্নিৰিট্ঠসুভিক্খদুব্ভিক্খাদিৰসেন ৰা ‘‘অসুকগামৰাসিনো সূরা সমত্থা’’তি ৰা এৰং অস্সাদৰসেন ন ৰট্টতি, সাত্থকং পন কত্ৰা ‘‘সদ্ধা পসন্না’’তি ৰা ‘‘খযৰযং গতা’’তি ৰা ৰত্তুং ৰট্টতি. নিগমনগরজনপদকথাসুপি এসেৰ নযো.

ইত্থিকথাপি ৰণ্ণসণ্ঠানাদীনি পটিচ্চ অস্সাদৰসেন ন ৰট্টতি, ‘‘সদ্ধা পসন্না, খযং গতা’’তি এৰং ৰত্তুং ৰট্টতি. সূরকথাপি ‘‘নন্দিমিত্তো নাম যোধো সূরো অহোসী’’তি অস্সাদৰসেন ন ৰট্টতি, ‘‘সদ্ধো অহোসি, খযং গতো’’তি এৰমেৰ ৰট্টতি. ৰিসিখাকথাপি ‘‘অসুকা ৰিসিখা সুনিৰিট্ঠা দুন্নিৰিট্ঠা সূরা সমত্থা’’তি অস্সাদৰসেনেৰ ন ৰট্টতি, ‘‘সদ্ধা পসন্না, খযং গতা’’ইচ্চেৰ ৰট্টতি.

কুম্ভট্ঠানকথাতি কুটট্ঠানকথা উদকতিত্থকথা ৰুচ্চতি, কুম্ভদাসীকথা ৰা. সাপি ‘‘পাসাদিকা নচ্চিতুং গাযিতুং ছেকা’’তি অস্সাদৰসেন ন ৰট্টতি, ‘‘সদ্ধা পসন্না’’তিআদিনা নযেনেৰ ৰট্টতি. পুব্বপেতকথাতি অতীতঞাতিকথা. তত্থ ৰত্তমানঞাতিকথাসদিসোৰ ৰিনিচ্ছযো.

নানত্তকথাতি পুরিমপচ্ছিমকথাৰিমুত্তা অৰসেসা নানাসভাৰা নিরত্থককথা. লোকক্খাযিকাতি ‘‘অযং লোকো কেন নিম্মিতো, অসুকেন পজাপতিনা ব্রহ্মুনা ইস্সরেন ৰা নিম্মিতো, কাকো সেতো অট্ঠীনং সেতত্তা, বকা রত্তা লোহিতস্স রত্তত্তা’’তি এৰমাদিকা লোকাযতৰিতণ্ডসল্লাপকথা. উপ্পত্তিঠিতিসংহারাদিৰসেন লোকং অক্খাযতীতি লোকক্খাযিকা. সমুদ্দক্খাযিকা নাম কস্মা সমুদ্দো সাগরো, সাগরস্স রঞ্ঞো পুত্তেহি খতত্তা সাগরো. খতো অম্হেহীতি হত্থমুদ্দায নিৰেদিতত্তা সমুদ্দোতি এৰমাদিকা নিরত্থকা সমুদ্দক্খাযিককথা.

ইতি ভৰো ইতি অভৰোতি যং ৰা তং ৰা নিরত্থককারণং ৰত্ৰা পৰত্তিতকথা ইতিভৰাভৰকথা. এত্থ চ ভৰোতি সস্সতং, অভৰোতি উচ্ছেদং. ভৰোতি ৰুদ্ধি, অভৰোতি হানি. ভৰোতি কামসুখং, অভৰোতি অত্তকিলমথো. ইতি ইমায ছব্বিধায ইতিভৰাভৰকথায সদ্ধিং বাত্তিংস তিরচ্ছানকথা নাম হোতি. অথ ৰা পাল়িযং সরূপতো অনাগতাপি অরঞ্ঞপব্বতনদীদীপকথা ইতি-সদ্দেন সঙ্গহেত্ৰা ছত্তিংস তিরচ্ছানকথাতি ৰুচ্চতি. ইতি ৰাতি হি এত্থ ইতি-সদ্দো পকারত্থে, ৰা-সদ্দো ৰিকপ্পত্থে. ইদং ৰুত্তং হোতি – ‘‘এৰংপকারং ইতো অঞ্ঞং ৰা তাদিসং নিরত্থককথং কথেন্তী’’তি. আদিঅত্থে ৰা ইতি-সদ্দো ‘‘ইতি ৰা ইতি এৰরূপা নচ্চগীতৰাদিতৰিসূকদস্সনা পটিৰিরতো’’তিআদীসু (দী. নি. ১.১০, ১৯৪) ৰিয, এৰমাদিং অঞ্ঞম্পি তাদিসং কথং কথেন্তীতি অত্থো.

৫১২. অপরিক্খিত্তস্স গামস্স উপচারো অদিন্নাদানে ৰুত্তনযেনেৰ ৰেদিতব্বোতি ইমিনা দুতিযলেড্ডুপাতো ইধ উপচারোতি দস্সেতি. সেসমেত্থ উত্তানমেৰ. সন্তং ভিক্খুং অনাপুচ্ছনা, অনুঞ্ঞাতকারণাভাৰো, ৰিকালে গামপ্পৰিসনন্তি ইমানি পনেত্থ তীণি অঙ্গানি.

ৰিকালগামপ্পৰিসনসিক্খাপদৰণ্ণনা নিট্ঠিতা.

৪. সূচিঘরসিক্খাপদৰণ্ণনা

৫১৭. চতুত্থে তং অস্স অত্থীতি পঠমং ভিন্দিত্ৰা পচ্ছা দেসেতব্বত্তা তং ভেদনকং তস্স পাচিত্তিযস্স অত্থীতি ভেদনকং, পাচিত্তিযং. অস্সত্থিঅত্থে অ-কারপচ্চযো দট্ঠব্বো. ৰাসিজটেতি ৰাসিদণ্ডকে. সেসমেত্থ উত্তানমেৰ. সূচিঘরতা, অট্ঠিমযাদিতা, অত্তনো অত্থায করণং ৰা কারাপেত্ৰা ৰা পটিলাভোতি ইমানি পনেত্থ তীণি অঙ্গানি.

সূচিঘরসিক্খাপদৰণ্ণনা নিট্ঠিতা.

৫. মঞ্চপীঠসিক্খাপদৰণ্ণনা

৫২২. পঞ্চমে ছেদনকং ৰুত্তনযমেৰাতি ছেদনমেৰ ছেদনকং, তং তস্স অত্থীতি ছেদনকন্তি ইমমত্থং অতিদিস্সতি. সেসমেত্থ উত্তানমেৰ. পমাণাতিক্কন্তমঞ্চপীঠতা, অত্তনো অত্থায করণং ৰা কারাপেত্ৰা ৰা পটিলাভোতি ইমানি পনেত্থ দ্ৰে অঙ্গানি.

মঞ্চপীঠসিক্খাপদৰণ্ণনা নিট্ঠিতা.

৬. তূলোনদ্ধসিক্খাপদৰণ্ণনা

৫২৬. ছট্ঠে তূলং পক্খিপিত্ৰাতি হেট্ঠা চিমিলিকং পত্থরিত্ৰা তস্স উপরি তূলং পক্খিপিত্ৰাতি অত্থো. পোটকিতূলন্তি এরকতূলাদি যংকিঞ্চি তিণজাতীনং তূলং. সেসমেত্থ উত্তানমেৰ. তূলোনদ্ধমঞ্চপীঠতা, অত্তনো অত্থায করণং ৰা কারাপেত্ৰা ৰা পটিলাভোতি ইমানি পনেত্থ দ্ৰে অঙ্গানি. অত্তনা কারাপিতস্স হি পটিলাভমত্তেনেৰ পাচিত্তিযং. তেনেৰ পদভাজনে ‘‘পটিলাভেন উদ্দালেত্ৰা পাচিত্তিযং দেসেতব্ব’’ন্তি ৰুত্তং. কেনচি পন ‘‘পটিলাভেন উদ্দালেত্ৰা পাচিত্তিযং দেসেতব্বন্তি এত্থ কিঞ্চাপি পটিলাভমত্তেনেৰ পাচিত্তিযং ৰিয দিস্সতি, পরিভোগেযেৰ আপত্তি দট্ঠব্বা. ‘অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্সা’তি ৰচনং এত্থ সাধক’’ন্তি ৰুত্তং, তং তস্স মতিমত্তং. ন হি ‘‘অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্সা’’তি ইদং অত্তনা কারাপিতং সন্ধায ৰুত্তং, করণকারাপনপচ্চযা চ ইমিনা সিক্খাপদেন পাচিত্তিযং ৰুত্তং, ন পরিভোগপচ্চযা. ‘‘ন, ভিক্খৰে, তূলোনদ্ধং মঞ্চং ৰা পীঠং ৰা পরিভুঞ্জিতব্বং, যো পরিভুঞ্জেয্য, আপত্তি দুক্কটস্সা’’তি হি খন্ধকে ৰুত্তত্তা অত্তনা ৰা কতং হোতু অঞ্ঞেন ৰা, পরিভুঞ্জন্তস্স পরিভোগপচ্চযা দুক্কটমেৰ, ন পাচিত্তিযং.

তূলোনদ্ধসিক্খাপদৰণ্ণনা নিট্ঠিতা.

৭. নিসীদনসিক্খাপদৰণ্ণনা

৫৩১. সত্তমে যং ৰত্তব্বং, তং নিসীদনসন্থতসিক্খাপদে ৰুত্তমেৰ. নিসীদনস্স পমাণাতিক্কন্ততা, অত্তনো অত্থায করণং ৰা কারাপেত্ৰা ৰা পটিলাভোতি ইমানি পনেত্থ দ্ৰে অঙ্গানি.

নিসীদনসিক্খাপদৰণ্ণনা নিট্ঠিতা.

৫৩৭-৫৪২. অট্ঠমনৰমদসমেসু নত্থি ৰত্তব্বং, অঙ্গানিপি সত্তমেৰ ৰুত্তনযেনেৰ ৰেদিতব্বানি.

নিট্ঠিতো রাজৰগ্গো নৰমো.

ইতি সমন্তপাসাদিকায ৰিনযট্ঠকথায সারত্থদীপনিযং

খুদ্দকৰণ্ণনা সমত্তা.

পাচিত্তিযকণ্ডং নিট্ঠিতং.