১. সুরাপানসিক্খাপদৰণ্ণনা

৩২৬-৩২৮. সুরাপানৰগ্গস্স পঠমসিক্খাপদে ৰতিযাতি গামপরিক্খেপৰতিযা. পাল়িযং পিট্ঠসুরাদীসু পিট্ঠং ভাজনে পক্খিপিত্ৰা তজ্জং উদকং দত্ৰা মদ্দিত্ৰা কতা পিট্ঠসুরা. এৰং পূৰে ওদনে চ ভাজনে পক্খিপিত্ৰা তজ্জং উদকং দত্ৰা মদ্দিত্ৰা কতা পূৰসুরা ওদনসুরাতি চ ৰুচ্চতি. ‘‘কিণ্ণা’’তি পন তস্সা সুরায বীজং ৰুচ্চতি. যে সুরামোদকাতিপি ৰুচ্চন্তি, তে পক্খিপিত্ৰা কতা কিণ্ণপক্খিত্তা. হরীতকীসাসপাদিনানাসম্ভারেহি সংযোজিতা সম্ভারসংযুত্তা.

মধুকতালনাল়িকেরাদিপুপ্ফরসো চিরপরিৰাসিতো পুপ্ফাসৰো. পনসাদিফলরসো ফলাসৰো. মুদ্দিকারসো মধ্ৰাসৰো. উচ্ছুরসো গুল়াসৰো. হরীতকামলককটুকভণ্ডাদিনানাসম্ভারানং রসো চিরপরিৰাসিতো সম্ভারসংযুত্তো. বীজতো পট্ঠাযাতি সম্ভারে পটিযাদেত্ৰা চাটিযং পক্খিত্তকালতো, তালনাল়িকেরাদীনং পুপ্ফরসস্স গহিতঅভিনৰকালতোযেৰ চ পট্ঠায.

৩২৯. লোণসোৰীরকং সুত্তঞ্চ অনেকেহি ভেসজ্জেহি অভিসঙ্খতো অমজ্জভূতো আসৰৰিসেসো. ৰাসগ্গাহাপনত্থন্তি সুগন্ধিভাৰগ্গাহাপনত্থং. অচিত্তকং লোকৰজ্জন্তি এত্থ যং ৰত্তব্বং, তং পঠমপারাজিকৰণ্ণনাযং ৰুত্তনযেন ৰেদিতব্বং. সেসমেত্থ উত্তানমেৰ. মজ্জভাৰো, তস্স পানঞ্চাতি ইমানি পনেত্থ দ্ৰে অঙ্গানি.

সুরাপানসিক্খাপদৰণ্ণনা নিট্ঠিতা.