৫. অচেলকৰগ্গো

১. অচেলকসিক্খাপদৰণ্ণনা

২৭৩. অচেলকৰগ্গস্স পঠমসিক্খাপদে তেসন্তি তিত্থিযানং. তত্থাতি ভাজনে. ইতোতি পত্ততো. সচে তিত্থিযো ৰদতীতি ‘‘পঠমমেৰ মং সন্ধায অভিহরিত্ৰা ঠপিতং ময্হং সন্তকং হোতি, ইমস্মিং ভাজনে আকিরথা’’তি ৰদতি, ৰট্টতি. সেসমেত্থ উত্তানমেৰ. অঞ্ঞতিত্থিযতা, অজ্ঝোহরণীযতা, অজ্ঝোহরণত্থায সহত্থা অনিক্খিত্তভাজনে দানন্তি ইমানি পনেত্থ তীণি অঙ্গানি.

অচেলকসিক্খাপদৰণ্ণনা নিট্ঠিতা.

২. উয্যোজনসিক্খাপদৰণ্ণনা

২৭৪. দুতিযং উত্তানত্থমেৰ. অনাচারং আচরিতুকামতা, তদত্থমেৰ উপসম্পন্নস্স উয্যোজনা, এৰং উয্যোজেন্তস্স উপচারাতিক্কমোতি ইমানি পনেত্থ তীণি অঙ্গানি.

উয্যোজনসিক্খাপদৰণ্ণনা নিট্ঠিতা.

৩. সভোজনসিক্খাপদৰণ্ণনা

২৮০. ততিযে পিট্ঠসঙ্ঘাটোতি দ্ৰারবাহাযেতং অধিৰচনং. খুদ্দকং নাম সযনিঘরং ৰিত্থারতো পঞ্চহত্থপ্পমাণং হোতি, তস্স চ মজ্ঝিমট্ঠানং পিট্ঠসঙ্ঘাটতো অড্ঢতেয্যহত্থপ্পমাণমেৰ হোতি, তস্মা তাদিসে সযনিঘরে পিট্ঠসঙ্ঘাটতো হত্থপাসং ৰিজহিত্ৰা নিসিন্নো পিট্ঠিৰংসং অতিক্কমিত্ৰা নিসিন্নো নাম হোতি. এৰং নিসিন্নো চ মজ্ঝং অতিক্কমিত্ৰা নিসিন্নো নাম হোতীতি আহ ‘‘ইমিনা মজ্ঝাতিক্কমং দস্সেতী’’তি. যথা ৰা তথা ৰা কতস্সাতি পিট্ঠিৰংসং আরোপেত্ৰা ৰা অনারোপেত্ৰা ৰা কতস্স. সচিত্তকন্তি অনুপৰিসিত্ৰা নিসীদনচিত্তেন সচিত্তকং. সেসমেত্থ উত্তানমেৰ. পরিযুট্ঠিতরাগজাযম্পতিকানং সন্নিহিততা, সযনিঘরতা, দুতিযস্স ভিক্খুনো অভাৰো, অনুপখজ্জ নিসীদনন্তি ইমানি পনেত্থ চত্তারি অঙ্গানি.

সভোজনসিক্খাপদৰণ্ণনা নিট্ঠিতা.

২৮৪-২৮৯. চতুত্থপঞ্চমেসু নত্থি কিঞ্চি ৰত্তব্বং.

৬. চারিত্তসিক্খাপদৰণ্ণনা

২৯৮. ছট্ঠে পকতিৰচনেনাতি এত্থ যং দ্ৰাদসহত্থব্ভন্তরে ঠিতেন সোতুং সক্কা ভৰেয্য, তং পকতিৰচনং নাম. আপুচ্ছিতব্বোতি ‘‘অহং ইত্থন্নামস্স ঘরং গচ্ছামী’’তি ৰা ‘‘চারিত্তং আপজ্জামী’’তি ৰা ঈদিসেন ৰচনেন আপুচ্ছিতব্বো. সেসমেত্থ উত্তানমেৰ. পঞ্চন্নং ভোজনানং অঞ্ঞতরেন নিমন্তনসাদিযনং, সন্তং ভিক্খুং অনাপুচ্ছনা, ভত্তিযঘরতো অঞ্ঞঘরপ্পৰেসনং, মজ্ঝন্হিকানতিক্কমো, সমযস্স ৰা আপদানং ৰা অভাৰোতি ইমানি পনেত্থ পঞ্চ অঙ্গানি.

চারিত্তসিক্খাপদৰণ্ণনা নিট্ঠিতা.

৭. মহানামসিক্খাপদৰণ্ণনা

৩০৩. সত্তমে মহানামো নামাতি অনুরুদ্ধত্থেরস্স ভাতা ভগৰতো চূল়পিতু পুত্তো. সুদ্ধোদনো সক্কোদনো সুক্কোদনো ধোতোদনো অমিতোদনোতি ইমে হি পঞ্চ জনা ভাতরো. অমিতা নাম দেৰী তেসং ভগিনী, তিস্সত্থেরো তস্সা পুত্তো. তথাগতো চ নন্দত্থেরো চ সুদ্ধোদনস্স পুত্তা, মহানামো চ অনুরুদ্ধত্থেরো চ সুক্কোদনস্স, আনন্দত্থেরো অমিতোদনস্স. সো ভগৰতো কনিট্ঠো, মহানামো মহল্লকতরো সকদাগামী অরিযসাৰকো. তেন ৰুত্তং ‘‘মহানামো নাম…পে… অরিযসাৰকো’’তি.

৩০৫-৩০৬. পাল়িযং অজ্জণ্হোতি অজ্জ একদিৰসন্তি অত্থো, ‘‘অজ্জনো’’তি ৰা অত্থো গহেতব্বো, নো অম্হাকং. কালং আহরিস্সথাতি স্ৰে হরিস্সথ. ততো চে উত্তরি সাদিযেয্যাতি সচে তত্থ রত্তীহি ৰা ভেসজ্জেহি ৰা পরিচ্ছেদো কতো হোতি ‘‘এত্তকাযেৰ ৰা রত্তিযো এত্তকানি ৰা ভেসজ্জানি ৰিঞ্ঞাপেতব্বানী’’তি, ততো রত্তিপরিযন্ততো ৰা ভেসজ্জপরিযন্ততো ৰা উত্তরি ৰিঞ্ঞাপেন্তো সাদিযেয্য. ‘‘ইমেহি তযা ভেসজ্জেহি পৰারিতম্হ, অম্হাকঞ্চ ইমিনাৰ ভেসজ্জেন অত্থো’’তি আচিক্খিত্ৰা ৰিঞ্ঞাপেতুম্পি গিলানোৰ লভতি.

৩১০. যস্মা সঙ্ঘপৰারণাযমেৰাযং ৰিধি, তস্মা ‘‘যে অত্তনো পুগ্গলিকায পৰারণায পৰারিতা’’তি ৰুত্তং. সেসং উত্তানমেৰ. সঙ্ঘপৰারণতা, ভেসজ্জৰিঞ্ঞত্তি, অগিলানতা, পরিযন্তাতিক্কমোতি ইমানি পনেত্থ চত্তারি অঙ্গানি.

মহানামসিক্খাপদৰণ্ণনা নিট্ঠিতা.

৮. উয্যুত্তসেনাসিক্খাপদৰণ্ণনা

৩১১. অট্ঠমং উত্তানত্থমেৰ. উয্যুত্তসেনা, দস্সনত্থায গমনং, অনুঞ্ঞাতোকাসতো অঞ্ঞত্র দস্সনং, তথারূপপচ্চযস্স আপদায ৰা অভাৰোতি ইমানি পনেত্থ চত্তারি অঙ্গানি.

উয্যুত্তসেনাসিক্খাপদৰণ্ণনা নিট্ঠিতা.

৯. সেনাৰাসসিক্খাপদৰণ্ণনা

৩১৭. নৰমসিক্খাপদম্পি উত্তানমেৰ. তিরত্তাতিক্কমো, সেনায সূরিযস্স অত্থঙ্গমো, গিলানতাদীনং অভাৰোতি ইমানি পনেত্থ তীণি অঙ্গানি.

সেনাৰাসসিক্খাপদৰণ্ণনা নিট্ঠিতা.

১০. উয্যোধিকসিক্খাপদৰণ্ণনা

৩২২. দসমে কতি তে লক্খানি লদ্ধানীতি তৰ সরপ্পহারস্স লক্খণভূতা কিত্তকা জনা তযা লদ্ধাতি অত্থো, কিত্তকা তযা ৰিদ্ধাতি ৰুত্তং হোতি. সেসমেত্থ উত্তানমেৰ. উয্যোধিকাদিদস্সনত্থায গমনং, অনুঞ্ঞাতোকাসতো অঞ্ঞত্র দস্সনং, তথারূপপচ্চযস্স আপদায ৰা অভাৰোতি ইমানি পনেত্থ তীণি অঙ্গানি.

উয্যোধিকসিক্খাপদৰণ্ণনা নিট্ঠিতা.

নিট্ঠিতো অচেলকৰগ্গো পঞ্চমো.