মহাৰগ্গো

মহাখন্ধককথা

পব্বজ্জাকথা

২৪৪৪. সীলক্খন্ধাদিযুত্তেন, সুভক্খন্ধেন দেসিতে;

খন্ধকেপি পৰক্খামি, সমাসেন ৰিনিচ্ছযং.

২৪৪৫. মাতরা অননুঞ্ঞাতং, পিতরা ৰাপি ভিক্খুনো;

ভণ্ডুকম্মমপুচ্ছিত্ৰা, পব্বাজেন্তস্স দুক্কটং.

২৪৪৬. উদ্দেসপরিপুচ্ছায, সযং চে ব্যাৰটো সিযা;

দহরো আণাপেতব্বো, পব্বাজেত্ৰানযাতি চ.

২৪৪৭. উপজ্ঝাযমথুদ্দিস্স, অৰুত্তো দহরো পন;

পব্বাজেতি সচে তং সো, সযমেৰাপি ৰট্টতি.

২৪৪৮. সামণেরোপি ৰত্তব্বো, দহরো নত্থি তত্থ চে;

‘‘খণ্ডসীমমিমং নেত্ৰা, পব্বাজেত্ৰানযা’’তি চ.

২৪৪৯. সরণানি পনেতস্স, দাতব্বানেৰ অত্তনা;

এৰম্পি ভিক্খুনাযেৰ, হোতি পব্বাজিতো নরো.

২৪৫০. পুরিসং ভিক্খুতো অঞ্ঞো, পব্বাজেতি ন ৰট্টতি;

ইত্থিং ভিক্খুনিতো অঞ্ঞো, পব্বাজেতি ন ৰট্টতি.

২৪৫১. সামণেরোপি ৰা দাতুং, সামণেরীপি ৰা তথা;

আণত্তিযা উভিন্নম্পি, কাসাযানি লভন্তি তে.

২৪৫২. সযমেৰ চ যং কিঞ্চি, পব্বাজেন্তেন ভিক্খুনা;

কেসাপনযনং কত্ৰা, পঠমং উদকে পুন.

২৪৫৩. ন্হাপেতব্বো সিযা সুট্ঠু, ঘংসিত্ৰা গোমযাদিনা;

সরীরে পীল়কা ৰাপি, কচ্ছু ৰা তস্স হোন্তি চে.

২৪৫৪. মাতা যথা নিযংপুত্তং, ন জিগুচ্ছতি সব্বসো;

ন্হাপেতব্বোৰ যতিনা, তথেৰ অজিগুচ্ছতা.

২৪৫৫. কস্মা? পনেত্তকেনাপি, উপকারেন সাসনে;

সো সদা বলৰস্নেহো, হোতুপজ্ঝাযকাদিসু.

২৪৫৬. ৰিনোদেত্ৰা পনুপ্পন্নং, উক্কণ্ঠং কুলপুত্তকা;

সিক্খাযো পরিপূরেত্ৰা, নিব্বানং পাপুণন্তি হি.

২৪৫৭. গন্ধচুণ্ণেন ৰা পচ্ছা, চুণ্ণেনপি হলিদ্দিযা;

সরীরং তস্স সীসঞ্চ, উব্বট্টেত্ৰা পুনপ্পুনং.

২৪৫৮. গিহিগন্ধং ৰিনোদেত্ৰা, কাসাযানি পনেকতো;

দ্ৰত্তিক্খত্তুং সকিং ৰাপি, দাতব্বানিস্স ভিক্খুনা.

২৪৫৯. অথ হত্থেপি ৰা তস্স, অদত্ৰা সযমেৰ তং;

অচ্ছাদেতি উপজ্ঝাযো, ৰট্টতাচরিযোপি ৰা.

২৪৬০. নিৰাসেতি অনাণত্তো, সো পারুপতি ৰা সযং;

অপনেত্ৰা ততো সব্বং, পুন দাতব্বমেৰ তং.

২৪৬১. ভিক্খুনা তু সহত্থেন, তথা আণত্তিযাপি ৰা;

দিন্নং ৰট্টতি কাসাৰং, নাদিন্নং পন ৰট্টতি.

২৪৬২. তস্সেৰ সন্তকং ৰাপি, কা কথা অত্তসন্তকে;

ৰন্দাপেত্ৰা তত্থ ভিক্খূ, কারাপেত্ৰান উক্কুটিং.

২৪৬৩. অঞ্জলিং পগ্গহাপেত্ৰা, দাতব্বং সরণত্তযং;

পটিপাটিৰসেনেৰ, ন চ উপ্পটিপাটিযা.

২৪৬৪. সচে একপদং ৰাপি, দেতি একক্খরম্পি ৰা;

পটিপাটিং ৰিরজ্ঝিত্ৰা, গহিতং চে ন ৰট্টতি.

২৪৬৫. তিক্খত্তুং যদি ৰা দেতি, বুদ্ধং সরণমেৰ ৰা;

তথা সেসেসু চেৰম্পি, ন দিন্নানেৰ হোন্তি হি.

২৪৬৬. কত্ৰানুনাসিকন্তানি, একাবদ্ধানি ৰা পন;

ৰিচ্ছিন্দিত্ৰাথ ম-ন্তানি, দাতব্বানি ৰিজানতা.

২৪৬৭. উপসম্পদকম্মং তু, একতোসুদ্ধিযা সিযা;

ন হোতি পন পব্বজ্জা, উভতোসুদ্ধিযা ৰিনা.

২৪৬৮. তস্মা আচরিযেনাপি, তথান্তেৰাসিকেনপি;

বু-দ্ধ-কারাদযো ৰণ্ণা, ঠানকরণসম্পদং.

২৪৬৯. অহাপেন্তেন ৰত্তব্বা, পব্বজ্জাগুণমিচ্ছতা;

একৰণ্ণৰিনাসেন, পব্বজ্জা হি ন রূহতি.

২৪৭০. যদি সিদ্ধাপি পব্বজ্জা, সরণাগমনতোৰ হি;

দাতব্বা দস সীলানি, পূরণত্থায ভিক্খুনা.

পব্বজ্জাকথা.

২৪৭১. উপজ্ঝাযমথাচরিযং, নিস্সায ৰসতা পন;

কত্তব্বানেৰ ৰত্তানি, পিযসীলেন ভিক্খুনা.

২৪৭২. আসনং পঞ্ঞপেতব্বং, দন্তকট্ঠং মুখোদকং;

দাতব্বং তস্স কালেন, সচে যাগু ভৰিস্সতি.

২৪৭৩. যাগু তস্সুপনেতব্বা, সঙ্ঘতো কুলতোপি ৰা;

পত্তে ৰত্তঞ্চ কাতব্বং, ৰত্তং গামপ্পৰেসনে.

২৪৭৪. চীৰরে যানি ৰত্তানি, ৰুত্তানি হি মহেসিনা;

সেনাসনে তথা পাদ-পীঠকথলিকাদিসু.

২৪৭৫. এৰমাদীনি ৰত্তানি, সব্বানি পন রোগতো;

ৰুট্ঠানাগমনন্তানি, সত্ততিংসসতং সিযুং.

২৪৭৬. ৰত্তভেদেন সব্বত্থ, দুক্কটং তু পকাসিতং;

অনাদরৰসেনেৰ, অকরোন্তস্স ভিক্খুনো.

উপজ্ঝাযাচরিযৰত্তকথা.

২৪৭৭. উপজ্ঝাযস্স ৰত্তানি, তথা সদ্ধিৰিহারিকে;

সতং তেরস হোন্তেৰ, তথান্তেৰাসিকেপি চ.

সদ্ধিৰিহারিকন্তেৰাসিকৰত্তকথা.

২৪৭৮. পক্কন্তে ৰাপি ৰিব্ভন্তে, পক্খসঙ্কন্তকে মতে;

আণত্তিযা উপজ্ঝাযা, পস্সম্ভতি চ নিস্সযো.

২৪৭৯. হোতি আচরিযম্হাপি, ছধা নিস্সযভেদনং;

পক্কন্তে ৰাপি ৰিব্ভন্তে, পক্খসঙ্কন্তকে মতে.

২৪৮০. আণত্তিযং উভিন্নম্পি, ধুরনিক্খেপনেপি চ;

একেকস্স উভিন্নং ৰা, নালযে সতি ভিজ্জতি.

২৪৮১. উপজ্ঝাযসমোধান-গতস্সাপি চ ভিজ্জতি;

দস্সনং সৰনঞ্চাতি, সমোধানং দ্ৰিধা মতং.

২৪৮২. অদ্ধিকস্স গিলানস্স, গিলানুপট্ঠকস্স চ;

যাচিতস্স ন দোসোৰ, ৰসিতুং নিস্সযং ৰিনা.

২৪৮৩. জানতা অত্তনো চেৰ, ৰনে ফাসুৰিহারতং;

সভাগে দাযকেসন্তে, ৰসিতুম্পি চ ৰট্টতি.

নিস্সযপটিপ্পস্সম্ভনকথা.

২৪৮৪. কুট্ঠিং গণ্ডিং কিলাসিঞ্চ, সোসিঞ্চ অপমারিকং;

তথা রাজভটং চোরং, লিখিতং কারভেদকং.

২৪৮৫. কসাহতং নরঞ্চেৰ, পুরিসং লক্খণাহতং;

ইণাযিকঞ্চ দাসঞ্চ, পব্বাজেন্তস্স দুক্কটং.

২৪৮৬. হত্থচ্ছিন্নমল়চ্ছিন্নং, পাদচ্ছিন্নঞ্চ পুগ্গলং;

কণ্ণনাসঙ্গুলিচ্ছিন্নং, কণ্ডরচ্ছিন্নমেৰ চ.

২৪৮৭. কাণং কুণিঞ্চ খুজ্জঞ্চ, ৰামনং ফণহত্থকং;

খঞ্জং পক্খহতঞ্চেৰ, সীপদিং পাপরোগিনং.

২৪৮৮. জরায দুব্বলং অন্ধং, বধিরঞ্চেৰ মম্মনং;

পীঠসপ্পিং তথা মূগং, পব্বাজেন্তস্স দুক্কটং.

২৪৮৯. অতিদীঘোতিরস্সো ৰা, অতিকালোপি ৰা তথা;

অচ্চোদাতোপি ৰা মট্ঠ-তম্বলোহনিদস্সনো.

২৪৯০. অতিথূলো অতিকিস্সো, মহাসীসোপি ৰা তথা;

অতিখুদ্দকসীসেন, সহিতেন যুত্তোপি ৰা.

২৪৯১. কুটকুটকসীসো ৰা, তথা সিখরসীসকো;

ৰেল়ুনাল়িসমানেন, সীসেন চ যুতো নরো.

২৪৯২. কপ্পসীসোপি পব্ভার-সীসো ৰা ৰণসীসকো;

তথা কণ্ণিককেসো ৰা, থূলকেসোপি ৰা তথা.

২৪৯৩. পূতিনিল্লোমসীসো ৰা, জাতিপণ্ডরকেসকো;

জাতিযা তম্বকেসো ৰা, তথেৰাৰট্টসীসকো.

২৪৯৪. সীসলোমেকবদ্ধেহি, ভমুকেহি যুতোপি ৰা;

সম্বদ্ধভমুকো ৰাপি, নিল্লোমভমুকোপি ৰা.

২৪৯৫. মহন্তখুদ্দনেত্তো ৰা, তথা ৰিসমলোচনো;

কেকরো ৰাপি গম্ভীর-নেত্তো ৰিসমচক্কলো.

২৪৯৬. জতুমূসিককণ্ণো ৰা, হত্থিকণ্ণোপি ৰা পন;

ছিদ্দমত্তককণ্ণো ৰা, তথেৰাৰিদ্ধকণ্ণকো.

২৪৯৭. তথা টঙ্কিতকণ্ণো ৰা, পূতিকণ্ণোপি ৰা পন;

যোনকাদিপ্পভেদোপি, নাযং পরিসদূসকো.

২৪৯৮. অতিপিঙ্গলনেত্তো ৰা, তথা নিপ্পখুমক্খি ৰা;

অস্সুপগ্ঘরনেত্তো ৰা, পক্কপুপ্ফিতলোচনো.

২৪৯৯. তথেৰ চ মহানাসো, অতিখুদ্দকনাসিকো;

তথা চিপিটনাসো ৰা, নরো কুটিলনাসিকো.

২৫০০. নিচ্চৰিস্সৰনাসো ৰা, যো ৰা পন মহামুখো;

ৰঙ্কভিন্নমুখো ৰাপি, মহাওট্ঠোপি ৰা পন.

২৫০১. তথা তনুকওট্ঠো ৰা, ৰিপুলুত্তরওট্ঠকো;

ওট্ঠছিন্নোপি উপ্পক্ক-মুখো এল়মুখোপি ৰা.

২৫০২. সঙ্খতুণ্ডোপি দুগ্গন্ধ-মুখো ৰা পন পুগ্গলো;

মহাদন্তোপি অচ্চন্তং, তথা অসুরদন্তকো.

২৫০৩. হেট্ঠা উপরিতো ৰাপি, বহিনিক্খন্তদন্তকো;

অদন্তো পূতিদন্তো ৰা, অতিখুদ্দকদন্তকো.

২৫০৪. যস্স দন্তন্তরে দন্তো, কাল়কদন্তসন্নিভো;

সুখুমোৰ ঠিতো, তং চে, পব্বাজেতুম্পি ৰট্টতি.

২৫০৫. যো মহাহনুকো পোসো;

দীঘেন হনুনা যুতো;

চিপিটহনুকো ৰাপি;

রস্সেন হনুনা যুতো.

২৫০৬. নিম্মস্সুদাঠিকো ৰাপি, অতিদীঘগলোপি ৰা;

অতিরস্সগলোপি ৰা, ভিন্নগণ্ঠিগলোপি ৰা.

২৫০৭. তথা ভট্ঠংসকূটো ৰা, ভিন্নপিট্ঠিউরোপি ৰা;

সুদীঘরস্সহত্থো ৰা, কচ্ছুকণ্ডুসমাযুতো.

২৫০৮. মহানিসদমংসো ৰা, উদ্ধনগ্গুপমাযুতো;

ৰাতণ্ডিকো মহাঊরু, সঙ্ঘট্টনকজাণুকো.

২৫০৯. ভিন্নজাণু মহাজাণু, দীঘজঙ্ঘো ৰিজঙ্ঘকো;

ৰিকটো ৰাপি পণ্হো ৰা, তথা উব্বদ্ধপিণ্ডিকো.

২৫১০. যট্ঠিজঙ্ঘো মহাজঙ্ঘো, মহাপাদোপি যো নরো;

তথা পিট্ঠিকপাদো ৰা, মহাপণ্হিপি ৰা পন.

২৫১১. ৰঙ্কপাদো নরো যো ৰা, গণ্ঠিকঙ্গুলিকোপি ৰা;

যো পনন্ধনখো ৰাপি, কাল়পূতিনখোপি চ.

২৫১২. ইচ্চেৰমাদিকং কঞ্চি, নরং পরিসদূসকং;

পব্বাজেন্তস্স ভিক্খুস্স, হোতি আপত্তি দুক্কটং.

পরিসদূসককথা.

২৫১৩. ‘‘সামণেরজ্জ মা খাদ, মা ভুঞ্জ চ পিৰা’’তি চ;

নিৰারেন্তস্স আহারং, হোতি আপত্তি দুক্কটং.