চূল়ৰগ্গো

পারিৰাসিকক্খন্ধককথা

২৭৪৮. তজ্জনীযং নিযস্সঞ্চ, পব্বাজং পটিসারণং;

তিৰিধুক্খেপনঞ্চাতি, সত্ত কম্মানি দীপযে.

২৭৪৯. তেচত্তালীস ৰত্তানি, খন্ধকে কম্মসঞ্ঞিতে;

নৰাধিকানি তিংসেৰ, খন্ধকে তদনন্তরে.

২৭৫০. এৰং সব্বানি ৰত্তানি, দ্ৰাসীতেৰ মহেসিনা;

হোন্তি খন্ধকৰত্তানি, গহিতাগহণেন তু.

২৭৫১. পারিৰাসঞ্চ ৰত্তঞ্চ, সমাদিন্নস্স ভিক্খুনো;

রত্তিচ্ছেদো কথং ৰুত্তো, ৰত্তভেদো কথং ভৰে?

২৭৫২. সহৰাসো ৰিনাৰাসো, অনারোচনমেৰ চ;

পারিৰাসিকভিক্খুস্স, রত্তিচ্ছেদো চ দুক্কটং.

২৭৫৩. একচ্ছন্নে পনাৰাসে, পকতত্তেন ভিক্খুনা;

নিৰাসো দকপাতেন, উক্খিত্তস্স নিৰারিতো.

২৭৫৪. পারিৰাসিকভিক্খুস্স, অন্তোযেৰ ন লব্ভতি;

ইচ্চেৰং পন নিদ্দিট্ঠং, মহাপচ্চরিযং পন.

২৭৫৫. ‘‘অৰিসেসেন নিদ্দিট্ঠং, মহাঅট্ঠকথাদিসু;

উভিন্নং দকপাতেন, নিৰাসো ৰারিতো’’তি হি.

২৭৫৬. অভিক্খুকে পনাৰাসে, অনাৰাসেপি কত্থচি;

ৰিপ্পৰাসং ৰসন্তস্স, রত্তিচ্ছেদো চ দুক্কটং.

২৭৫৭. পারিৰাসিকভিক্খুস্স, ভিক্খুং দিস্ৰান তঙ্খণে;

নারোচেন্তস্স চেতস্স, রত্তিচ্ছেদো চ দুক্কটং.

২৭৫৮. পঞ্চেৰ চ যথাৰুড্ঢং, লভতে পারিৰাসিকো;

কাতুং তত্থেৰ চ ঠত্ৰা, উপোসথপৰারণং.

২৭৫৯. ৰস্সসাটিং যথাৰুড্ঢং, দেন্তি চে সঙ্ঘদাযকা;

ওণোজনং তথা ভত্তং, লভতে পঞ্চিমে পন.

পারিৰাসিকক্খন্ধককথা.

সমথক্খন্ধককথা

২৭৬০. ৰিৰাদাধারতা চানু-ৰাদাধিকরণম্পি চ;

আপত্তাধারতা চেৰ, কিচ্চাধিকরণম্পি চ.

২৭৬১. এতানি পন চত্তারি, ৰুত্তানি চ মহেসিনা;

ভেদকারকৰত্থূনি, ৰিৰাদো তত্থ নিস্সিতো.

২৭৬২. ৰিপত্তিযো চতস্সোৰ, অনুৰাদো উপাগতো;

আপত্তাধারতা নাম, সত্ত আপত্তিযো মতা.

২৭৬৩. সঙ্ঘকিচ্চানি নিস্সায, কিচ্চাধিকরণং সিযা;

এতেসং তু চতুন্নম্পি, সমত্তা সমথা মতা.

২৭৬৪. সম্মুখা সতি চামূল়্হো, পটিঞ্ঞাৰিনযোপি চ;

তস্সপাপিযসী চেৰ, তথা যেভুয্যসীপি চ.

২৭৬৫. তিণৰত্থারকো চেৰ, সত্তমো ৰিনযো মতো;

সত্তিমে সমথা ৰুত্তা, বুদ্ধেনাদিচ্চবন্ধুনা.

২৭৬৬. ৰিৰাদো সম্মতি দ্ৰীহি, অনুৰাদো চতূহি চ;

আপত্তি পন তীহেৰ, কিচ্চমেকেন সম্মতি.

২৭৬৭. ছট্ঠেন পঠমেনাপি, ৰিৰাদো এত্থ সম্মতি;

সম্মুখাৰিনযাদীহি, অনুপুব্বেন তীহিপি.

২৭৬৮. তথেৰ পঞ্চমেনাপি, অনুৰাদো হি সম্মতি;

সম্মুখেন পটিঞ্ঞায, তিণৰত্থারকেন চ.

২৭৬৯. আপত্তূপসমং যাতি, তীহেৰ সমথেহি সা;

সম্মুখাৰিনযেনেৰ, কিচ্চমেকেন সম্মতি.

২৭৭০. যেভুয্যসিককম্মে তু, সলাকং গাহযে বুধো;

গূল়্হেন ৰিৰটেনাপি, কণ্ণজপ্পেন ৰা পন.

২৭৭১. অলজ্জুস্সদে গূল়্হেন, ৰিৰটেনেৰ লজ্জিসু;

বালেসু কণ্ণজপ্পেন, সলাকং গাহযে বুধো.

২৭৭২. লজ্জী অলজ্জী বালোতি, কেন সক্কা ৰিজানিতুং?

সকেন কম্মুনাযেৰ, তেন সক্কা ৰিজানিতুং.

২৭৭৩. আপজ্জতি চ সঞ্চিচ্চ, আপত্তিং পরিগূহতি;

ছন্দাদিঅগতিং যাতি, অলজ্জী এদিসো সিযা.

২৭৭৪. নাপজ্জতি চ সঞ্চিচ্চ, আপত্তিং ন চ গূহতি;

ন গচ্ছতিগতিঞ্চাপি, এদিসো লজ্জি পুগ্গলো.

২৭৭৫. দুচ্চিন্তিতো চ দুব্ভাসী, তথা দুক্কটকারিকো;

এদিসো পন ‘‘বালো’’তি, লক্খণেনেৰ ঞাযতি.

২৭৭৬. তিধা সলাকগাহেন, বহুকা ধম্মৰাদিনো;

যেভুয্যসিককম্মেন, কত্তব্বন্তি জিনোব্রৰি.

২৭৭৭. অলজ্জী সানুৰাদো চ, অসুচী কম্মতো চ যো;

তস্সপাপিযসীকম্ম-যোগ্গো সো হোতি পুগ্গলো.

২৭৭৮. ভণ্ডনে কলহে জাতে, ৰিৰাদস্মিং অনপ্পকে;

বহুঅস্সামণে চিণ্ণে, অনগ্গেপি চ ভস্সকে.

২৭৭৯. মূলমূলং গৰেসন্তং, হোতি ৰাল়ঞ্চ কক্খল়ং;

তিণৰত্থারকেনেৰ, কাতব্বন্তি পকাসিতং.

২৭৮০. যথা চ তিণপণ্ণেন, ছন্নং গূথঞ্চ মুত্তকং;

ন চ ৰাযতি দুগ্গন্ধং, ৰূপসম্মতি তঙ্খণে.

২৭৮১. ঠপেত্ৰা থুল্লৰজ্জঞ্চ, গিহীহি পটিসংযুতং;

দিট্ঠাৰিকম্মিকঞ্চেৰ, যো চ তত্থ ন হোতি তং.

২৭৮২. সেসাযাপত্তিযা যাৰ, উপসম্পদমাল়তো;

সুদ্ধো হোতি নিরাপত্তি, তিণৰত্থারকে তথা.

সমথক্খন্ধককথা.

খুদ্দকৰত্থুক্খন্ধককথা

২৭৮৩. রুক্খে ৰা পন কুট্টেৰা, অট্টানে থম্ভকেসু ৰা;

ন্হাযমানো সকং কাযং, উগ্ঘংসেয্যস্স দুক্কটং.

২৭৮৪. কাযং গন্ধব্বহত্থেন, কুরুৰিন্দকসুত্তিযা;

মল্লকেন ন ঘংসেয্য, নাঞ্ঞমঞ্ঞঞ্চ কাযতো.

২৭৮৫. অকতং মল্লকং নাম, গিলানস্সেৰ ৰট্টতি;

কতং তং মল্লকং নাম, সব্বেসম্পি ন ৰট্টতি.

২৭৮৬. কপালিট্ঠকখণ্ডানি, সব্বস্স পুথুপাণিকং;

গিলানস্সাগিলানস্স, ৰত্থৰট্টি চ ৰট্টতি.

২৭৮৭. ৰুত্তা ফেণকপাসাণ-কথলা পাদঘংসনে;

ৰট্টং ৰা চতুরস্সং ৰা, কতকং ন চ ৰট্টতি.

২৭৮৮. যং কিঞ্চিপি অলঙ্কারং, ধারেন্তস্সপি দুক্কটং;

হোতি অন্তমসো তাল-পণ্ণমত্তম্পি ভিক্খুনো.

২৭৮৯. ওসণ্হেয্য সকে কেসে, যো হত্থফণকেন ৰা;

ফণকেনপি কোচ্ছেন, দুক্কটং তস্স নিদ্দিসে.

২৭৯০. সিত্থতেলোদতেলেহি, মণ্ডনত্থং ন ৰট্টতি;

অনুলোমনিপাতত্থং, উদ্ধংলোমেন ভিক্খুনা.

২৭৯১. হত্থং তেলেন তেমেত্ৰা, পুঞ্ছিতব্বা সিরোরুহা;

ৰট্টতুণ্হাভিতত্তস্স, অল্লহত্থেন পুঞ্ছিতুং.

২৭৯২. আদাসে উদপত্তে ৰা, যত্থ কত্থচি অত্তনো;

মুখবিম্বং ৰিনা হেতুং, ওলোকেন্তস্স দুক্কটং.

২৭৯৩. ‘‘সঞ্ছৰিং তু মুখং, নো’’তি, দট্ঠুমাবাধপচ্চযা;

‘‘জিণ্ণো নো’’তাযুসঙ্খার-জাননত্থঞ্চ ৰট্টতি.

২৭৯৪. নচ্চং ৰা পন গীতং ৰা, ৰাদিতং ৰাপি ভিক্খুনো;

দট্ঠুং ৰা পন সোতুং ৰা, গচ্ছতো হোতি দুক্কটং.

২৭৯৫. দট্ঠুমন্তমসো মোর-নচ্চম্পি চ ন ৰট্টতি;

সোতুমন্তমসো দন্ত-গীতম্পি চ ন ৰট্টতি.

২৭৯৬. নচ্চন্তস্স সযং ৰাপি, নচ্চাপেন্তস্স দুক্কটং;

অনাপত্তন্তরারামে, ঠত্ৰা সুণাতি পস্সতি.

২৭৯৭. ‘‘পস্সিস্সামী’’তি নচ্চং ৰা, গীতং ৰা পন ৰাদিতং;

ৰিহারতো ৰিহারং ৰা, গচ্ছতো হোতি দুক্কটং.

২৭৯৮. আপত্তন্তোৰিহারেপি, উট্ঠহিত্ৰান গচ্ছতো;

ঠত্ৰা গীৰং পসারেত্ৰা, পস্সতোপি চ ৰীথিযং.

২৭৯৯. কেসা দীঘা ন ধারেয্যা, যো ধারেয্যস্স দুক্কটং;

দ্ৰঙ্গুলং ৰা দুমাসং ৰা, ততো উদ্ধং ন ৰট্টতি.

২৮০০. নখে নাসিকলোমানি, দীঘানি ন তু ধারযে;

ন চ ৰীসতিমট্ঠং ৰা, কাতুং ৰট্টতি ভিক্খুনো.

২৮০১. কপ্পাপেয্য ৰিসুং মস্সুং, দাঠিকং ৰা ঠপেয্য যো;

সংহরাপেয্য ৰা লোমং, সম্বাধে তস্স দুক্কটং.

২৮০২. ছিন্দতো দুক্কটং ৰুত্তং, কেসে কত্তরিকায ৰা;

অগিলানস্স অঞ্ঞেন, ছিন্দাপেন্তস্স ৰা তথা.

২৮০৩. ছিন্দতো অত্তনো অঙ্গ-জাতং থুল্লচ্চযং সিযা;

সেসঙ্গছেদনে অত্ত-ৰধে আপত্তি দুক্কটং.

২৮০৪. অহিকীটাদিদট্ঠস্স, তাদিসাবাধপচ্চযা;

ন দোসো ছিন্দতো অঙ্গং, মোচেন্তস্স চ লোহিতং.

২৮০৫. অপরিস্সাৰনো মগ্গং, সচে গচ্ছতি দুক্কটং;

যাচমানস্স ৰা মগ্গে, তথেৰাদদতোপি তং.

২৮০৬. ন ভুঞ্জে ন পিৰে নগ্গো, ন খাদে ন চ সাযযে;

ন দদে ন চ গণ্হেয্য, ন গচ্ছেয্যপি অঞ্জসং.

২৮০৭. ৰন্দিতব্বং ন নগ্গেন, ৰন্দাপেতব্বমেৰ ৰা;

পরিকম্মং ন কাতব্বং, ন নগ্গেন চ কারযে.

২৮০৮. পরিকম্মে পটিচ্ছাদী, তিস্সো জন্তাঘরাদিকা;

ৰুত্তা, ৰত্থপটিচ্ছাদী, সব্বত্থ পন ৰট্টতি.

২৮০৯. যত্থ কত্থচি পেল়াযং, ভুঞ্জিতুং ন চ ৰট্টতি;

একতো ভুঞ্জতো হোতি, দুক্কটং একভাজনে.

২৮১০. একপাৰুরণা এক-ত্থরণা ৰা নিপজ্জরে;

একমঞ্চেপি ৰা তেসং, হোতি আপত্তি দুক্কটং.

২৮১১. ন নিসীদেয্য সঙ্ঘাটি-পল্লত্থিকমুপাগতো;

কিঞ্চি কীল়ং ন কীল়েয্য, পলিতং ন চ গাহযে.

২৮১২. ভমুকায নলাটে ৰা, দাঠিকাযপি উগ্গতং;

তাদিসং পলিতং চঞ্ঞং, গাহাপেতুম্পি ৰট্টতি.

২৮১৩. অগিলানো সচে ভিক্খু, ছত্তং ধারেয্য দুক্কটং;

অত্তনো চীৰরাদীনং, গুত্তত্থং পন ৰট্টতি.

২৮১৪. হত্থিসোণ্ডং চতুক্কণ্ণং, ৰসনং মচ্ছৰাল়কং;

ৰেল্লিযং তালৰণ্টঞ্চ, নিৰাসেন্তস্স দুক্কটং.

২৮১৫. গহিপারুপনং ৰাপি, পারুপন্তস্স দুক্কটং;

নিৰাসনে পারুপনে, পরিমণ্ডলতা মতা.

২৮১৬. লোকাযতং ন ৰাচেয্য, ন চ তং পরিযাপুণে;

ন তিরচ্ছানৰিজ্জা ৰা, ৰাচেতব্বাৰ ভিক্খুনা.

২৮১৭. ন চ ৰট্টতি ধারেতুং, সব্বা চামরিবীজনী;

ন চালিম্পেয্য দাযং ৰা, ন চ লঞ্জে মুখম্পি চ.

২৮১৮. ন ৰহে উভতোকাজং, ৰট্টতন্তরকাজকং;

সীসক্খন্ধকটোলম্ব-ভারে দোসো ন ৰিজ্জতি.

২৮১৯. অট্ঠঙ্গুলাদিকং ভিক্খু, পচ্ছিমং চতুরঙ্গুলা;

খাদতো দন্তকট্ঠঞ্চ, হোতি আপত্তি দুক্কটং.