ভিক্খুনীৰিভঙ্গো

১৯৬৪. ভিক্খুনীনং হিতত্থায, ৰিভঙ্গং যং জিনোব্রৰি;

তস্মিং অপি সমাসেন, কিঞ্চিমত্তং ভণামহং.

পারাজিককথা

১৯৬৫. ছন্দসো মেথুনং ধম্মং, পটিসেৰেয্য যা পন;

হোতি পারাজিকা নাম, সমণী সা পৰুচ্চতি.

১৯৬৬. মনুস্সপুরিসাদীনং, নৰন্নং যস্স কস্সচি;

সজীৰস্সাপ্যজীৰস্স, সন্থতং ৰা অসন্থতং.

১৯৬৭. অত্তনো তিৰিধে মগ্গে, যেভুয্যক্খাযিতাদিকং;

অঙ্গজাতং পৰেসেন্তী, অল্লোকাসে পরাজিতা.

১৯৬৮. ইতো পরমৰত্ৰাৰ, সাধারণৰিনিচ্ছযং;

অসাধারণমেৰাহং, ভণিস্সামি সমাসতো.

১৯৬৯. অধক্খকং সরীরকং, যদুব্ভজাণুমণ্ডলং;

সরীরকেন চে তেন, ফুসেয্য ভিক্খুনী পন.

১৯৭০. অৰস্সুতস্সাৰস্সুতা, মনুস্সপুগ্গলস্স যা;

সরীরমস্স তেন ৰা, ফুট্ঠা পারাজিকা সিযা.

১৯৭১. কপ্পরস্স পনুদ্ধম্পি, গহিতং উব্ভজাণুনা;

যথাৰুত্তপ্পকারেন, কাযেনানেন অত্তনো.

১৯৭২. পুরিসস্স তথা কায- পটিবদ্ধং ফুসন্তিযা;

তথা যথাপরিচ্ছিন্ন- কাযবদ্ধেন অত্তনো.

১৯৭৩. অৰসেসেন ৰা তস্স, কাযং কাযেন অত্তনো;

হোতি থুল্লচ্চযং তস্সা, পযোগে পুরিসস্স চ.

১৯৭৪. যক্খপেততিরচ্ছান- পণ্ডকানং অধক্খকং;

উব্ভজাণুং তথেৰস্সা, উভতোৰস্সৰে সতি.

১৯৭৫. একতোৰস্সৰে চাপি, থুল্লচ্চযমুদীরিতং;

অৰসেসে চ সব্বত্থ, হোতি আপত্তি দুক্কটং.

১৯৭৬. উব্ভক্খকমধোজাণু-মণ্ডলং পন যং ইধ;

কপ্পরস্স চ হেট্ঠাপি, গতং এত্থেৰ সঙ্গহং.

১৯৭৭. কেলাযতি সচে ভিক্খু, সদ্ধিং ভিক্খুনিযা পন;

উভিন্নং কাযসংসগ্গ-রাগে সতি হি ভিক্খুনো.

১৯৭৮. হোতি সঙ্ঘাদিসেসোৰ, নাসো ভিক্খুনিযা সিযা;

কাযসংসগ্গরাগো চ, সচে ভিক্খুনিযা সিযা.

১৯৭৯. ভিক্খুনো মেথুনো রাগো, গেহপেমম্পি ৰা ভৰে;

তস্সা থুল্লচ্চযং ৰুত্তং, ভিক্খুনো হোতি দুক্কটং.

১৯৮০. উভিন্নং মেথুনে রাগে, গেহপেমেপি ৰা সতি;

অৰিসেসেন নিদ্দিট্ঠং, উভিন্নং দুক্কটং পন.

১৯৮১. যস্স যত্থ মনোসুদ্ধং, তস্স তত্থ ন দোসতা;

উভিন্নম্পি অনাপত্তি, উভিন্নং চিত্তসুদ্ধিযা.

১৯৮২. কাযসংসগ্গরাগেন, ভিন্দিত্ৰা পঠমং পন;

পচ্ছা দূসেতি চে নেৰ, হোতি ভিক্খুনিদূসকো.

১৯৮৩. অথ ভিক্খুনিযা ফুট্ঠো, সাদিযন্তোৰ চেতসা;

নিচ্চলো হোতি চে ভিক্খু, ন হোতাপত্তি ভিক্খুনো.

১৯৮৪. ভিক্খুনী ভিক্খুনা ফুট্ঠা, সচে হোতিপি নিচ্চলা;

অধিৰাসেতি সম্ফস্সং, তস্সা পারাজিকং সিযা.

১৯৮৫. তথা থুল্লচ্চযং খেত্তে, দুক্কটঞ্চ ৰিনিদ্দিসে;

ৰুত্তত্তা ‘‘কাযসংসগ্গং, সাদিযেয্যা’’তি সত্থুনা.

১৯৮৬. তস্সা ক্রিযসমুট্ঠানং, এৰং সতি ন দিস্সতি;

ইদং তব্বহুলেনেৰ, নযেন পরিদীপিতং.

১৯৮৭. অনাপত্তি অসঞ্চিচ্চ, অজানিত্ৰামসন্তিযা;

সতি আমসনে তস্সা, ফস্সং ৰাসাদিযন্তিযা.

১৯৮৮. ৰেদনট্টায ৰা খিত্ত-চিত্তাযুম্মত্তিকায ৰা;

সমুট্ঠানাদযো তুল্যা, পঠমন্তিমৰত্থুনা.

উব্ভজাণুমণ্ডলকথা.

১৯৮৯. পারাজিকত্তং জানন্তি, সলিঙ্গে তু ঠিতায হি;

‘‘ন কস্সচি পরস্সাহং, আরোচেস্সামি দানি’’তি.

১৯৯০. ধুরে নিক্খিত্তমত্তস্মিং, সা চ পারাজিকা সিযা;

অযং ৰজ্জপটিচ্ছাদি- নামিকা পন নামতো.

১৯৯১. সেসং সপ্পাণৰগ্গস্মিং, দুট্ঠুল্লেন সমং নযে;

ৰিসেসো তত্র পাচিত্তি, ইধ পারাজিকং সিযা.

ৰজ্জপটিচ্ছাদিকথা.

১৯৯২. সঙ্ঘেনুক্খিত্তকো ভিক্খু, ঠিতো উক্খেপনে পন;

যংদিট্ঠিকো চ সো তস্সা, দিট্ঠিযা গহণেন তং.

১৯৯৩. অনুৰত্তেয্য যা ভিক্খুং, ভিক্খুনী সা ৰিসুম্পি চ;

সঙ্ঘমজ্ঝেপি অঞ্ঞাহি, ৰুচ্চমানা তথেৰ চ.

১৯৯৪. অচজন্তীৰ তং ৰত্থুং, গহেত্ৰা যদি তিট্ঠতি;

তস্স কম্মস্স ওসানে, উক্খিত্তস্সানুৰত্তিকা.

১৯৯৫. হোতি পারাজিকাপন্না, হোতাসাকিযধীতরা;

পুন অপ্পটিসন্ধেযা, দ্ৰিধা ভিন্না সিলা ৰিয.

১৯৯৬. অধম্মে পন কম্মস্মিং, নিদ্দিট্ঠং তিকদুক্কটং;

সমুট্ঠানাদযো সব্বে, ৰুত্তা সমনুভাসনে.

উক্খিত্তানুৰত্তিককথা.

১৯৯৭. অপারাজিকখেত্তস্স, গহণং যস্স কস্সচি;

অঙ্গস্স পন তং হত্থ-গ্গহণন্তি পৰুচ্চতি.

১৯৯৮. পারুতস্স নিৰত্থস্স, গহণং যস্স কস্সচি;

এতং সঙ্ঘাটিযা কণ্ণ-গ্গহণন্তি পৰুচ্চতি.

১৯৯৯. কাযসংসগ্গসঙ্খাত-অসদ্ধম্মস্স কারণা;

ভিক্খুনী হত্থপাসস্মিং, তিট্ঠেয্য পুরিসস্স ৰা.

২০০০. সল্লপেয্য তথা তত্থ, ঠত্ৰা তু পুরিসেন ৰা;

সঙ্কেতং ৰাপি গচ্ছেয্য, ইচ্ছেয্যা গমনস্স ৰা.

২০০১. তদত্থায পটিচ্ছন্ন-ট্ঠানঞ্চ পৰিসেয্য ৰা;

উপসংহরেয্য কাযং ৰা, হত্থপাসে ঠিতা পন.

২০০২. অযমস্সমণী হোতি, ৰিনট্ঠা অট্ঠৰত্থুকা;

অভব্বা পুনরুল়্হায, ছিন্নো তালোৰ মত্থকে.

২০০৩. অনুলোমেন ৰা ৰত্থুং, পটিলোমেন ৰা চুতা;

অট্ঠমং পরিপূরেন্তী, তথেকন্তরিকায ৰা.

২০০৪. অথাদিতো পনেকং ৰা, দ্ৰে ৰা তীণিপি সত্ত ৰা;

সতক্খত্তুম্পি পূরেন্তী, নেৰ পারাজিকা সিযা.

২০০৫. আপত্তিযো পনাপন্না, দেসেত্ৰা তাহি মুচ্চতি;

ধুরনিক্খেপনং কত্ৰা, দেসিতা গণনূপিকা.

২০০৬. ন হোতাপত্তিযা অঙ্গং, সউস্সাহায দেসিতা;

দেসনাগণনং নেতি, দেসিতাপি অদেসিতা.

২০০৭. অনাপত্তি অসঞ্চিচ্চ, অজানিত্ৰা করোন্তিযা;

সমুট্ঠানাদযো সব্বে, অনন্তরসমা মতা.

২০০৮. ‘‘অসদ্ধম্মো’’তি নামেত্থ, কাযসংসগ্গনামকো;

অযমুদ্দিসিতো অত্থো, সব্বঅট্ঠকথাসুপি.

২০০৯. ৰিঞ্ঞূ পটিবলো কায-সংসগ্গং পটিপজ্জিতুং;

কাযসংসগ্গভাৰে তু, সাধকং ৰচনং ইদং.

অট্ঠৰত্থুককথা.

২০১০. অৰস্সুতা পটিচ্ছাদী, উক্খিত্তা অট্ঠৰত্থুকা;

অসাধারণপঞ্ঞত্তা, চতস্সোৰ মহেসিনা.

পারাজিককথা নিট্ঠিতা.

সঙ্ঘাদিসেসকথা

২০১১. যা পন ভিক্খুনী উস্সযৰাদা;

অট্টকরী মুখরী ৰিহরেয্য;

যেন কেনচি নরেনিধ সদ্ধিং;

সা গরুকং কির দোসমুপেতি.

২০১২. সক্খিং ৰাপি সহাযং ৰা, পরিযেসতি দুক্কটং;

পদে পদে তথা অট্টং, কাতুং গচ্ছন্তিযাপি চ.

২০১৩. আরোচেতি সচে পুব্বং, ভিক্খুনী অত্তনো কথং;

দিস্ৰা ৰোহারিকং তস্সা, হোতি আপত্তি দুক্কটং.

২০১৪. আরোচেতি সচে পচ্ছা, ইতরো অত্তনো কথং;

হোতি ভিক্খুনিযা তস্সা, থুল্লচ্চযমনন্তরং.

২০১৫. আরোচেতিতরো পুব্বং, সচে সো অত্তনো কথং;

পচ্ছা ভিক্খুনী চে পুব্ব-সদিসোৰ ৰিনিচ্ছযো.

২০১৬. ‘‘আরোচেহী’’তি ৰুত্তা চে, ‘‘কথং তৰ মমাপি চ’’;

আরোচেতু যথাকামং, পঠমে দুক্কটং সিযা.

২০১৭. দুতিযারোচনে তস্সা, থুল্লচ্চযমুদীরিতং;

উপাসকেন ৰুত্তেপি, অযমেৰ ৰিনিচ্ছযো.

২০১৮. আরোচিতকথং সুত্ৰা, উভিন্নম্পি যথা তথা;

ৰিনিচ্ছযে কতে তেহি, অট্টে পন চ নিট্ঠিতে.

২০১৯. অট্টস্স পরিযোসানে, জযে ভিক্খুনিযা পন;

পরাজযেপি ৰা তস্সা, হোতি সঙ্ঘাদিসেসতা.

২০২০. দূতং ৰাপি পহিণিত্ৰা, আগন্ত্ৰান সযম্পি ৰা;

পচ্চত্থিকমনুস্সেহি, আকড্ঢীযতি যা পন.

২০২১. আরামে পন অঞ্ঞেহি, অনাচারং কতং সচে;

অনোদিস্স পরং কিঞ্চি, রক্খং যাচতি তত্থ যা.

২০২২. যায কিঞ্চি অৰুত্তাৰ, ধম্মট্ঠা সযমেৰ তু;

সুত্ৰা তং অঞ্ঞতো অট্টং, নিট্ঠাপেন্তি সচে পন.

২০২৩. তস্সা, উম্মত্তিকাদীন-মনাপত্তি পকাসিতা;

কথিনেন সমুট্ঠানং, তুল্যং সকিরিযং ইদং.

অট্টকারিকথা.

২০২৪. জানন্তী ভিক্খুনী চোরিং, ৰজ্ঝং ৰিদিতমেৰ যা;

সঙ্ঘং অনপলোকেত্ৰা, রাজানং গণমেৰ ৰা.

২০২৫. ৰুট্ঠাপেয্য ৰিনা কপ্পং, চোরিৰুট্ঠাপনং পন;

সঙ্ঘাদিসেসমাপত্তি-মাপন্না নাম হোতি সা.

২০২৬. পঞ্চমাসগ্ঘনং যায, হরিতং পরসন্তকং;

অতিরেকগ্ঘনং ৰাপি, অযং ‘‘চোরী’’তি ৰুচ্চতি.

২০২৭. ভিক্খুনীসু পনঞ্ঞাসু, তিত্থিযেসুপি ৰা তথা;

যা পব্বজিতপুব্বা সা, অযং ‘‘কপ্পা’’তি ৰুচ্চতি.

২০২৮. ৰুট্ঠাপেতি চ যা চোরিং, ঠপেত্ৰা কপ্পমেৰিদং;

সচে আচরিনিং পত্তং, চীৰরং পরিযেসতি.

২০২৯. সম্মন্নতি চ সীমং ৰা, তস্সা আপত্তি দুক্কটং;

ঞত্তিযা দুক্কটং দ্ৰীহি, কম্মৰাচাহি চ দ্ৰযং.

২০৩০. থুল্লচ্চযস্স, কম্মন্তে, গরুকং নিদ্দিসে বুধো;

গণো আচরিনী চেৰ, ন চ মুচ্চতি দুক্কটং.

২০৩১. অনাপত্তি অজানন্তী, ৰুট্ঠাপেতি, তথেৰ চ;

কপ্পং ৰা অপলোকেত্ৰা, তস্সা উম্মত্তিকায ৰা.

২০৩২. চোরিৰুট্ঠাপনং নাম, জাযতে ৰাচচিত্ততো;

কাযৰাচাদিতো চেৰ, সচিত্তঞ্চ ক্রিযাক্রিযং.

চোরিৰুট্ঠাপনকথা.