সেখিযকথা

১৮৭০. যো অনাদরিযেনেৰ, পুরতো পচ্ছতোপি ৰা;

ওলম্বেত্ৰা নিৰাসেয্য, তস্স চাপত্তি দুক্কটং.

১৮৭১. হত্থিসোণ্ডাদিতুল্যং তু, নিৰাসেন্তস্স দুক্কটং;

আপত্তিভীরুনা নিচ্চং, ৰত্থব্বং পরিমণ্ডলং.

১৮৭২. জাণুমণ্ডলতো হেট্ঠা, অট্ঠঙ্গুলপ্পমাণকং;

ওতারেত্ৰা নিৰত্থব্বং, ততো ঊনং ন ৰট্টতি.

১৮৭৩. অসঞ্চিচ্চাসতিস্সাপি, অজানন্তস্স কেৰলং;

অনাপত্তি গিলানস্সা-পদাসুম্মত্তকাদিনো.

পরিমণ্ডলকথা.

১৮৭৪. উভো কোণে সমং কত্ৰা, সাদরং পরিমণ্ডলং;

কত্ৰা পারুপিতব্বেৰং, অকরোন্তস্স দুক্কটং.

১৮৭৫. অৰিসেসেন ৰুত্তং তু, ইদং সিক্খাপদদ্ৰযং;

তস্মা ঘরে ৰিহারে ৰা, কত্তব্বং পরিমণ্ডলং.

দুতিযং.

১৮৭৬. গণ্ঠিকং পটিমুঞ্চিত্ৰা, কত্ৰা কোণে উভো সমং;

ছাদেত্ৰা মণিবন্ধঞ্চ, গন্তব্বং গীৰমেৰ চ.

১৮৭৭. তথা অকত্ৰা ভিক্খুস্স, জত্তূনিপি উরম্পি চ;

ৰিৰরিত্ৰা যথাকামং, গচ্ছতো হোতি দুক্কটং.

ততিযং.

১৮৭৮. গলৰাটকতো উদ্ধং, সীসঞ্চ মণিবন্ধতো;

হত্থে পিণ্ডিকমংসম্হা, হেট্ঠা পাদে উভোপি চ.

১৮৭৯. ৰিৰরিত্ৰাৰসেসঞ্চ, ছাদেত্ৰা চে নিসীদতি;

হোতি সো সুপ্পটিচ্ছন্নো, দোসো ৰাসূপগস্স ন.

চতুত্থং.

১৮৮০. হত্থং ৰা পন পাদং ৰা, অচালেন্তেন ভিক্খুনা;

সুৰিনীতেন গন্তব্বং, ছট্ঠে নত্থি ৰিসেসতা.

পঞ্চমছট্ঠানি.

১৮৮১. সতীমতাৰিকারেন, যুগমত্তঞ্চ পেক্খিনা;

সুসংৰুতেন গন্তব্বং, ভিক্খুনোক্খিত্তচক্খুনা.

১৮৮২. যত্থ কত্থচি হি ট্ঠানে, একস্মিং অন্তরে ঘরে;

ঠত্ৰা পরিস্সযাভাৰং, ওলোকেতুম্পি ৰট্টতি.

১৮৮৩. যো অনাদরিযং কত্ৰা, ওলোকেন্তো তহিং তহিং;

সচেন্তরঘরে যাতি, দুক্কটং অট্ঠমং তথা.

সত্তমট্ঠমানি.

১৮৮৪. একতো উভতো ৰাপি, হুত্ৰা উক্খিত্তচীৰরো;

ইন্দখীলকতো অন্তো, গচ্ছতো হোতি দুক্কটং.

নৰমং.

১৮৮৫. তথা নিসিন্নকালেপি, নীহরন্তেন কুণ্ডিকং;

অনুক্খিপিত্ৰা দাতব্বা, দোসো ৰাসূপগস্স ন.

দসমং.

পঠমো ৰগ্গো.

১৮৮৬. ন ৰট্টতি হসন্তেন, গন্তুঞ্চেৰ নিসীদিতুং;

ৰত্থুস্মিং হসনীযস্মিং, সিতমত্তং তু ৰট্টতি.

পঠমদুতিযানি.

১৮৮৭. অপ্পসদ্দেন গন্তব্বং, চতুত্থেপি অযং নযো;

মহাসদ্দং করোন্তস্স, উভযত্থাপি দুক্কটং.

ততিযচতুত্থানি.

১৮৮৮. কাযপ্পচালকং কত্ৰা, বাহুসীসপ্পচালকং;

গচ্ছতো দুক্কটং হোতি, তথেৰ চ নিসীদতো.

১৮৮৯. কাযং বাহুঞ্চ সীসঞ্চ, পগ্গহেত্ৰা উজুং পন;

গন্তব্বমাসিতব্বঞ্চ, সমেনিরিযাপথেন তু.

১৮৯০. নিসীদনেন যুত্তেসু, তীসু ৰাসূপগস্স হি;

অনাপত্তীতি ঞাতব্বং, ৰিঞ্ঞুনা ৰিনযঞ্ঞুনা.

দুতিযো ৰগ্গো.

১৮৯১. খম্ভং কত্ৰা সসীসং ৰা, পারুপিত্ৰান গচ্ছতো;

দুক্কটং মুনিনা ৰুত্তং, তথা উক্কুটিকায ৰা.

১৮৯২. হত্থপল্লত্থিকাযাপি, দুস্সপল্লত্থিকায ৰা;

তস্সন্তরঘরে হোতি, নিসীদন্তস্স দুক্কটং.

১৮৯৩. দুতিযে চ চতুত্থে চ, ছট্ঠে ৰাসূপগস্স তু;

অনাপত্তীতি সারুপ্পা, ছব্বীসতি পকাসিতা.

ছট্ঠং.

১৮৯৪. সক্কচ্চং সতিযুত্তেন, ভিক্খুনা পত্তসঞ্ঞিনা;

পিণ্ডপাতো গহেতব্বো, সমসূপোৰ ৰিঞ্ঞুনা.

১৮৯৫. সূপো ভত্তচতুব্ভাগো, ‘‘সমসূপো’’তি ৰুচ্চতি;

মুগ্গমাসকুলত্থানং, সূপো ‘‘সূপো’’তি ৰুচ্চতি.

১৮৯৬. অনাপত্তি অসঞ্চিচ্চ, গিলানস্স রসেরসে;

তথেৰ ঞাতকাদীনং, অঞ্ঞত্থায ধনেন ৰা.

সত্তমট্ঠমনৰমানি.

১৮৯৭. অন্তোলেখাপমাণেন, পত্তস্স মুখৰট্টিযা;

পূরিতোৰ গহেতব্বো, অধিট্ঠানূপগস্স তু.

১৮৯৮. তত্থ থূপীকতং কত্ৰা, গণ্হতো যাৰকালিকং;

যং কিঞ্চি পন ভিক্খুস্স, হোতি আপত্তি দুক্কটং.

১৮৯৯. অধিট্ঠানূপগে পত্তে, কালিকত্তযমেৰ চ;

সেসে থূপীকতং সব্বং, ৰট্টতেৰ ন সংসযো.

১৯০০. দ্ৰীসু পত্তেসু ভত্তং তু, গহেত্ৰা পত্তমেককং;

পূরেত্ৰা যদি পেসেতি, ভিক্খূনং পন ৰট্টতি.

১৯০১. পত্তে পক্খিপ্পমানং যং, উচ্ছুখণ্ডফলাদিকং;

ওরোহতি সচে হেট্ঠা, ন তং থূপীকতং সিযা.

১৯০২. পুপ্ফতক্কোলকাদীনং, ঠপেত্ৰা চে ৰটংসকং;

দিন্নং অযাৰকালিত্তা, ন তং থূপীকতং সিযা.

১৯০৩. ৰটংসকং তু পূৰস্স, ঠপেত্ৰা ওদনোপরি;

পিণ্ডপাতং সচে দেন্তি, ইদং থূপীকতং সিযা.

১৯০৪. ভত্তস্সূপরি পণ্ণং ৰা, থালকং ৰাপি কিঞ্চিপি;

ঠপেত্ৰা পরিপূরেত্ৰা, সচে গণ্হাতি ৰট্টতি.

১৯০৫. পটিগ্গহেতুমেৰস্স, তং তু সব্বং ন ৰট্টতি;

গহিতং সুগহিতং, পচ্ছা, ভুঞ্জিতব্বং যথাসুখং.

ততিযো ৰগ্গো.

১৯০৬. পঠমং দুতিযং ৰুত্ত-নযং তু ততিযে পন;

উপরোধিমদস্সেত্ৰা, ভোত্তব্বং পটিপাটিযা.

১৯০৭. অঞ্ঞেসং অত্তনো ভত্তং, আকিরং পন ভাজনে;

নত্থোমসতি চে দোসো, তথা উত্তরিভঙ্গকং.

ততিযং.

১৯০৮. চতুত্থে যং তু ৰত্তব্বং, ৰুত্তং পুব্বে অসেসতো;

পঞ্চমে মত্থকং দোসো, মদ্দিত্ৰা পরিভুঞ্জতো.

১৯০৯. অনাপত্তি গিলানস্স, পরিত্তেপি চ সেসকে;

একতো পন মদ্দিত্ৰা, সংকড্ঢিত্ৰান ভুঞ্জতো.

চতুত্থপঞ্চমানি.

১৯১০. যো ভিয্যোকম্যতাহেতু, সূপং ৰা ব্যঞ্জনম্পি ৰা;

পটিচ্ছাদেয্য ভত্তেন, তস্স চাপত্তি দুক্কটং.

ছট্ঠং.

১৯১১. ৰিঞ্ঞত্তিযং তু ৰত্তব্বং, অপুব্বং নত্থি কিঞ্চিপি;

অট্ঠমে পন উজ্ঝানে, গিলানোপি ন মুচ্চতি.

১৯১২. ‘‘দস্সামি দাপেস্সামী’’তি, ওলোকেন্তস্স ভিক্খুনো;

অনাপত্তীতি ঞাতব্বং, ন চ উজ্ঝানসঞ্ঞিনো.

অট্ঠমং.

১৯১৩. মহন্তং পন মোরণ্ডং, কুক্কুটণ্ডঞ্চ খুদ্দকং;

তেসং মজ্ঝপ্পমাণেন, কত্তব্বো কবল়ো পন.

১৯১৪. খজ্জকে পন সব্বত্থ, মূলখাদনিযাদিকে;

ফলাফলে অনাপত্তি, গিলানুম্মত্তকাদিনো.

নৰমং.

১৯১৫. অদীঘো পন কাতব্বো, আলোপো পরিমণ্ডলো;

খজ্জতুত্তরিভঙ্গস্মিং, অনাপত্তি ফলাফলে.

দসমং.

চতুত্থো ৰগ্গো.

১৯১৬. অনাহটে মুখদ্ৰারং, অপ্পত্তে কবল়ে পন;

অত্তনো চ মুখদ্ৰারং, ৰিৰরন্তস্স দুক্কটং.

পঠমং.

১৯১৭. মুখে চ সকলং হত্থং, পক্খিপন্তস্স দুক্কটং;

মুখে চ কবল়ং কত্ৰা, কথেতুং ন চ ৰট্টতি.

১৯১৮. ৰচনং যত্তকেনস্স, পরিপুণ্ণং ন হোতি হি;

মুখস্মিংতত্তকে সন্তে, ব্যাহরন্তস্স দুক্কটং.

১৯১৯. মুখে হরীতকাদীনি, পক্খিপিত্ৰা কথেতি যো;

ৰচনং পরিপুণ্ণং চে, কথেতুং পন ৰট্টতি.

দুতিযততিযানি.

১৯২০. যো পিণ্ডুক্খেপকং ভিক্খু, কবল়চ্ছেদকম্পি ৰা;

মক্কটো ৰিয গণ্ডে ৰা, কত্ৰা ভুঞ্জেয্য দুক্কটং.

চতুত্থপঞ্চমছট্ঠানি.

১৯২১. নিদ্ধুনিত্ৰান হত্থং ৰা, ভত্তং সিত্থাৰকারকং;

জিৰ্হানিচ্ছারকং ৰাপি, তথা ‘‘চপু চপূ’’তি ৰা.

১৯২২. অনাদরৰসেনেৰ, ভুঞ্জতো হোতি দুক্কটং;

সত্তমে অট্ঠমে নত্থি, দোসো কচৰরুজ্ঝনে.

সত্তমদসমানি.

পঞ্চমো ৰগ্গো.

১৯২৩. কত্ৰা এৰং ন ভোত্তব্বং, সদ্দং ‘‘সুরু সুরূ’’তি চ;

হত্থনিল্লেহকং ৰাপি, ন চ ৰট্টতি ভুঞ্জিতুং.

১৯২৪. ফাণিতং ঘনযাগুং ৰা, গহেত্ৰা অঙ্গুলীহি তং;

মুখে অঙ্গুলিযো ভোত্তুং, পৰেসেত্ৰাপি ৰট্টতি.

১৯২৫. ন পত্তো লেহিতব্বোৰ, একাযঙ্গুলিকায ৰা;

একওট্ঠোপি জিৰ্হায, ন চ নিল্লেহিতব্বকো.

চতুত্থং.

১৯২৬. সামিসেন তু হত্থেন, ন চ পানীযথালকং;

গহেতব্বং, পটিক্খিত্তং, পটিক্কূলৰসেন হি.

১৯২৭. পুগ্গলস্স চ সঙ্ঘস্স, গহট্ঠস্সত্তনোপি চ;

সন্তকো পন সঙ্খো ৰা, সরাৰং ৰাপি থালকং.

১৯২৮. তস্মা ন চ গহেতব্বং, গণ্হতো হোতি দুক্কটং;

অনামিসেন হত্থেন, গহণং পন ৰট্টতি.

পঞ্চমং.

১৯২৯. উদ্ধরিত্ৰাপি ভিন্দিত্ৰা, গহেত্ৰা ৰা পটিগ্গহে;

নীহরিত্ৰা অনাপত্তি, ছড্ডেন্তস্স ঘরা বহি.