পাটিদেসনীযকথা

১৮৩০. যো চন্তরঘরং ভিক্খু, পৰিট্ঠায তু হত্থতো;

অঞ্ঞাতিকায যং কিঞ্চি, তস্স ভিক্খুনিযা পন.

১৮৩১. সহত্থা পটিগ্গণ্হেয্য, খাদনং ভোজনম্পি ৰা;

গহণে দুক্কটং ভোগে, পাটিদেসনিযং সিযা.

১৮৩২. রথিকাযপি ৰা ব্যূহে, সন্ধিসিঙ্ঘাটকেসু ৰা;

হত্থিসালাদিকে ঠত্ৰা, গণ্হতোপি অযং নযো.

১৮৩৩. রথিকায সচে ঠত্ৰা, দেতি ভিক্খুনি ভোজনং;

আপত্তি অন্তরারামে, ঠত্ৰা গণ্হাতি ভিক্খু চে.

১৮৩৪. এত্থন্তরঘরং তস্সা, পৰিট্ঠায হি ৰাক্যতো;

ভিক্খুস্স চ ঠিতট্ঠানং, নপ্পমাণন্তি ৰণ্ণিতং.

১৮৩৫. তস্মা ভিক্খুনিযা ঠত্ৰা, আরামাদীসু দেন্তিযা;

ৰীথিযাদীসু চে ঠত্ৰা, ন দোসো পটিগণ্হতো.

১৮৩৬. যামকালিকসত্তাহ-কালিকং যাৰজীৰিকং;

আহারত্থায গহণে, অজ্ঝোহারে চ দুক্কটং.

১৮৩৭. আমিসেন অসম্ভিন্ন-রসং সন্ধায ভাসিতং;

পাটিদেসনিযাপত্তি, সম্ভিন্নেকরসে সিযা.

১৮৩৮. একতোউপসম্পন্ন-হত্থতো পটিগণ্হতো;

কালিকানং চতুন্নম্পি, আহারত্থায দুক্কটং.

১৮৩৯. ঞাতিকাযপি অঞ্ঞাতি-সঞ্ঞিনো ৰিমতিস্স ৰা;

দুক্কটং ঞাতিসঞ্ঞিস্স, তথা অঞ্ঞাতিকায ৰা.

১৮৪০. দাপেন্তিযা অনাপত্তি, দদমানায ৰা পন;

নিক্খিপিত্ৰান্তরারামা-দীসু ঠত্ৰাপি দেন্তিযা.

১৮৪১. গামতো নীহরিত্ৰা ৰা, দেতি চে বহি ৰট্টতি;

‘‘পচ্চযে সতি ভুঞ্জা’’তি, দেতি চে কালিকত্তযং.

১৮৪২. হত্থতো সামণেরীনং, সিক্খমানায ৰা তথা;

ইদং এল়কলোমেন, সমুট্ঠানং সমং মতং.

পঠমপাটিদেসনীযকথা.

১৮৪৩. অৰুত্তে ‘‘অপসক্কা’’তি, একেনাপি চ ভিক্খুনা;

সচেজ্ঝোহরণত্থায, আমিসং পটিগণ্হতি.

১৮৪৪. গহণে দুক্কটং ভোগে, পাটিদেসনিযং সিযা;

একতোউপসম্পন্নং, ন ৰারেন্তস্স দুক্কটং.

১৮৪৫. তথেৰানুপসম্পন্না-যুপসম্পন্নসঞ্ঞিনো;

তত্থ ৰেমতিকস্সাপি, হোতি আপত্তি দুক্কটং.

১৮৪৬. অনাপত্তিত্তনো ভত্তং, পদাপেতি ন দেতি চে;

তথা অঞ্ঞস্স ভত্তং ৰা, ন দাপেতি পদেতি চে.

১৮৪৭. যং ন দিন্নং তং দাপেতি, ন দিন্নং যত্থ ৰাপি চ;

তত্থ তম্পি চ সব্বেসং, সমং দাপেতি ভিক্খুনী.

১৮৪৮. ৰোসাসন্তী ঠিতা সিক্খ-মানা ৰা সামণেরিকা;

ভোজনানি চ পঞ্চেৰ, ৰিনা, উম্মত্তকাদিনো.

১৮৪৯. কথিনেন সমুট্ঠানং, সমানন্তি পকাসিতং;

ক্রিযাক্রিযমিদং ৰুত্তং, তিচিত্তঞ্চ তিৰেদনং.

দুতিযপাটিদেসনীযকথা.

১৮৫০. সেক্খন্তি সম্মতে ভিক্খু, লদ্ধসম্মুতিকে কুলে;

ঘরূপচারোক্কমনা, পুব্বেৰ অনিমন্তিতো.

১৮৫১. অগিলানো গহেত্ৰা চে, পরিভুঞ্জেয্য আমিসং;

গহণে দুক্কটং ভোগে, পাটিদেসনিযং সিযা.

১৮৫২. যামকালিকসত্তাহ-কালিকে যাৰজীৰিকে;

গহণে পরিভোগে চ, হোতি আপত্তি দুক্কটং.

১৮৫৩. অসেক্খসম্মতে সেক্খ-সম্মতন্তি চ সঞ্ঞিনো;

তত্থ ৰেমতিকস্সাপি, তথেৰ পরিদীপিতং.

১৮৫৪. অনাপত্তি গিলানস্স, গিলানস্সাৰসেসকে;

নিমন্তিতস্স ৰা ভিক্খা, অঞ্ঞেসং তত্থ দীযতি.

১৮৫৫. ঘরতো নীহরিত্ৰা ৰা, দেন্তি চে যত্থ কত্থচি;

নিচ্চভত্তাদিকে ৰাপি, তথা উম্মত্তকাদিনো.

১৮৫৬. অনাগতে হি ভিক্খুম্হি, ঘরতো পঠমং পন;

নীহরিত্ৰা সচে দ্ৰারে, সম্পত্তে দেন্তি ৰট্টতি.

১৮৫৭. ভিক্খুং পন চ দিস্ৰাৰ, নীহরিত্ৰান গেহতো;

ন ৰট্টতি সচে দেন্তি, সমুট্ঠানেল়কূপমং.

ততিযপাটিদেসনীযকথা.

১৮৫৮. গহট্ঠেনাগহট্ঠেন, ইত্থিযা পুরিসেন ৰা;

আরামং উপচারং ৰা, পৰিসিত্ৰা সচে পন.

১৮৫৯. ‘‘ইত্থন্নামস্স তে ভত্তং, যাগু ৰা আহরীযতি’’;

এৰমারোচিতং ৰুত্তং, পটিসংৰিদিতন্তি হি.

১৮৬০. আহরীযতু তং পচ্ছা, যথারোচিতমেৰ ৰা;

তস্স ৰা পরিৰারম্পি, অঞ্ঞং কত্ৰা বহুং পন.

১৮৬১. যাগুযা ৰিদিতং কত্ৰা, পূৰং ভত্তং হরন্তি চে;

ইদম্পি ৰিদিতং ৰুত্তং, ৰট্টতীতি কুরুন্দিযং.

১৮৬২. কুলানি পন অঞ্ঞানি, দেয্যধম্মং পনত্তনো;

হরন্তি তেন সদ্ধিং চে, সব্বং ৰট্টতি তম্পি চ.

১৮৬৩. অনারোচিতমেৰং যং, যং আরামমনাভতং;

তং অসংৰিদিতং নাম, সহধম্মিকঞাপিতং.

১৮৬৪. যং অসংৰিদিতং কত্ৰা, আভতং পন তং বহি;

আরামং পন পেসেত্ৰা, কারাপেত্ৰা তমাহরে.

১৮৬৫. গন্ত্ৰা ৰা অন্তরামগ্গে, গহেতব্বং তু ভিক্খুনা;

সচে এৰমকত্ৰা তং, আরামে উপচারতো.

১৮৬৬. গহেত্ৰাজ্ঝোহরন্তস্স, গহণে দুক্কটং সিযা;

অজ্ঝোহারপযোগেসু, পাটিদেসনিযং মতং.

১৮৬৭. পটিসংৰিদিতেযেৰ, অসংৰিদিতসঞ্ঞিনো;

তত্থ ৰেমতিকস্সাপি, হোতি আপত্তি দুক্কটং.

১৮৬৮. পটিসংৰিদিতে তস্স, গিলানস্সাৰসেসকে;

বহারামে গহেত্ৰা ৰা, অন্তোযেৰস্স ভুঞ্জতো.

১৮৬৯. তত্থজাতফলাদীনি, অনাপত্তেৰ খাদতো;

সমুট্ঠানাদযো সব্বে, কথিনেন সমা মতা.

চতুত্থপাটিদেসনীযকথা.

ইতি ৰিনযৰিনিচ্ছযে পাটিদেসনীযকথা নিট্ঠিতা.