পাচিত্তিযকথা

৮৮৯. সম্পজানমুসাৰাদে, পাচিত্তিযমুদীরিতং;

দৰা রৰা ভণন্তস্স, ন দোসুম্মত্তকাদিনো.

৮৯০. অঞ্ঞত্থাপত্তিযো পঞ্চ, মুসাৰাদস্স কারণা;

সমুট্ঠানাদযো সব্বে, অদিন্নাদানতুল্যকা.

সম্পজানমুসাৰাদকথা.

৮৯১. জাতিআদীসু ৰুত্তেসু, দসস্ৰক্কোসৰত্থুসু;

ভূতেন ৰা অভূতেন, যেন কেনচি ৰত্থুনা.

৮৯২. যায কাযচি ভাসায, হত্থমুদ্দায ৰা পন;

পারাজিকমনাপন্নং, ভিক্খুমাপন্নমেৰ ৰা.

৮৯৩. অঞ্ঞত্রঞ্ঞাপদেসেন, ওমসন্তস্স ভিক্খুনো;

তত্থ পাচিত্তিযাপত্তি, সম্বুদ্ধেন পকাসিতা.

৮৯৪. তেহেৰঞ্ঞাপদেসেন, পাল়িমুত্তপদেহিপি;

সব্বত্থানুপসম্পন্নং, অক্কোসন্তস্স দুক্কটং.

৮৯৫. অনক্কোসিতুকামস্স, কেৰলং দৰকম্যতা;

ৰদতো পন সব্বত্থ, দুব্ভাসিতমুদীরিতং.

৮৯৬. পৰিট্ঠানুপসম্পন্ন-ট্ঠানে ইধ চ ভিক্খুনী;

অনাপত্তি পুরক্খত্ৰা, অত্থধম্মানুসাসনিং.

৮৯৭. ৰদতো পন ভিক্খুস্স, সমুট্ঠানাদযো নযা;

অনন্তরসমা ৰুত্তা, দুক্খা হোতেত্থ ৰেদনা.

ওমসৰাদকথা.

৮৯৮. আপত্তি ভিক্খুপেসুঞ্ঞে, দুৰিধাকারতো সিযা;

অত্তনো পিযকামস্স, পরভেদত্থিনোপি ৰা.

৮৯৯. অক্কোসন্তস্স পরিযায-পাল়িমুত্তনযেহি চ;

ৰচনস্সুপসংহারে, হোতি আপত্তি দুক্কটং.

৯০০. তথা অনুপসম্পন্ন-অক্কোসং হরতোপি চ;

ঠিতা অনুপসম্পন্ন-ট্ঠানে ইধ চ ভিক্খুনী.

৯০১. ন চেৰ পিযকামস্স, ন চ ভেদত্থিনোপি ৰা;

পাপানং গরহত্থায, ৰদন্তস্স চ ভিক্খুনো.

৯০২. তথা উম্মত্তকাদীনং, অনাপত্তীতি দীপিতা;

সমুট্ঠানাদযো সব্বে, অদিন্নাদানসাদিসা.

পেসুঞ্ঞকথা.

৯০৩. ঠপেত্ৰা ভিক্খুনিং ভিক্খুং, অঞ্ঞেন পিটকত্তযং;

ধম্মং সহ ভণন্তস্স, তস্স পাচিত্তিযং সিযা.

৯০৪. রাজোৰাদাদযো ৰুত্তা, মহাপচ্চরিযাদিসু;

অনারুল়্হেসু সঙ্গীতিং, আপত্তিজনকাতি হি.

৯০৫. দুক্কটং হোতি ভিক্খুস্মিং, তথা ভিক্খুনিযাপি চ;

ভিক্খুস্সানুপসম্পন্ন-সঞ্ঞিনো ৰিমতিস্স ৰা.

৯০৬. একতো উদ্দিসাপেতি, সজ্ঝাযং ৰা করোতি যো;

ভণন্তং পগুণং গন্থং, ওপাতেতি চ যো পন.

৯০৭. তস্স চানুপসম্পন্ন-সন্তিকে গণ্হতোপি চ;

উদ্দেসং তু অনাপত্তি, ভণনে তেন একতো.

৯০৮. ৰাচতো চ সমুট্ঠাতি, ৰাচাচিত্তদ্ৰযাপি চ;

সমুট্ঠানমিদং ৰুত্তং, পদসোধম্মসঞ্ঞিতং.

পদসোধম্মকথা.

৯০৯. সব্বচ্ছন্নপরিচ্ছন্নে, নিপজ্জেয্য সচে পন;

যেভুয্যেন পরিচ্ছন্নে, ছন্নে সেনাসনেপি ৰা.

৯১০. তিস্সন্নং পন রত্তীনং, উদ্ধং যো পন রত্তিযং;

ঠপেত্ৰা ভিক্খুং অঞ্ঞেন, তস্স পাচিত্তিযং সিযা.

৯১১. ৰত্থুং যং পন নিদ্দিট্ঠং, মেথুনস্স পহোনকং;

আপত্যন্তমসো তেন, তিরচ্ছানগতেনপি.

৯১২. নিপন্নে উপসম্পন্নে, ইতরো চে নিপজ্জতি;

ইতরস্মিং নিপন্নে ৰা, সচে ভিক্খু নিপজ্জতি.

৯১৩. উভিন্নং উট্ঠহিত্ৰা ৰা, নিপজ্জনপযোগতো;

আপত্তানুপসম্পন্ন-গণনাযপি ৰা সিযা.

৯১৪. সচে পিধায ৰা গব্ভং, নিপজ্জতিপিধায ৰা;

আপত্তত্থঙ্গতে সূরিযে, চতুত্থদিৰসে সিযা.

৯১৫. দিযড্ঢহত্থুব্বেধেন, পাকারচযনাদিনা;

পরিক্খিত্তম্পি তং সব্বং, পরিক্খিত্তন্তি ৰুচ্চতি.

৯১৬. ভিক্খুস্সন্তমসো দুস্স-কুটিযং ৰসতোপি চ;

সহসেয্যায আপত্তি, হোতীতি পরিদীপিতো.

৯১৭. সব্বচ্ছন্নপরিচ্ছন্ন-যেভুয্যাদিপ্পভেদতো;

সত্ত পাচিত্তিযানেত্থ, দট্ঠব্বানি সুবুদ্ধিনা.

৯১৮. অড্ঢচ্ছন্নপরিচ্ছন্নে, দুক্কটং পরিদীপিতং;

সব্বচূল়পরিচ্ছন্ন-ছন্নাদীহিপি পঞ্চধা.

৯১৯. অনাপত্তি দিরত্তং ৰা, তিরত্তং ৰসতো সহ;

অরুণস্স পুরেযেৰ, ততিযায চ রত্তিযা.

৯২০. নিক্খমিত্ৰা ৰসন্তস্স, পুন সদ্ধিঞ্চ ভিক্খুনো;

তথা সব্বপরিচ্ছন্ন-সব্বচ্ছন্নাদিকেপি চ.

৯২১. এৰং অনুপসম্পন্নে, নিপন্নেপি নিসীদতো;

সেসা এল়কলোমেন, সমুট্ঠানাদযো সমা.

সহসেয্যকথা.

৯২২. সচে তদহুজাতায, অপি যো মানুসিত্থিযা;

সহসেয্যং পকপ্পেয্য, তস্স পাচিত্তিযং সিযা.

৯২৩. দিস্সমানকরূপায, যক্খিযা পেতিযা সহ;

রত্তিযং যো নিপজ্জেয্য, দেৰিযা পণ্ডকেন ৰা.

৯২৪. মেথুনৰত্থুভূতায, তিরচ্ছানগতিত্থিযা;

ৰত্থূনং গণনাযস্স, হোতি আপত্তি দুক্কটং.

৯২৫. ইধেকদিৰসেনেৰ, আপত্তি পরিদীপিতা;

সেসো অনন্তরে ৰুত্ত-সদিসোৰ ৰিনিচ্ছযো.

দুতিযসহসেয্যকথা.

৯২৬. উদ্ধং ছপ্পঞ্চৰাচাহি, ৰিঞ্ঞুং পুরিসৰিগ্গহং;

ৰিনা ধম্মং ভণন্তস্স, হোতি পাচিত্তি ইত্থিযা.

৯২৭. গাথাপাদো পনেকোৰ, একৰাচাতি সঞ্ঞিতো;

পদসোধম্মং নিদ্দিট্ঠং, ধম্মমট্ঠকথম্পি ৰা.

৯২৮. ছন্নং উপরি ৰাচানং, পদাদীনং ৰসা পন;

দেসেন্তস্স সিযাপত্তি, পদাদিগণনায চ.

৯২৯. নিম্মিনিত্ৰা ঠিতেনাপি, সদ্ধিং পুরিসৰিগ্গহং;

যক্খেনপি চ পেতেন, তিরচ্ছানগতেনপি.

৯৩০. ঠিতস্স মাতুগামস্স, ধম্মং যো পন ভাসতি;

ছন্নং উপরি ৰাচানং, তস্স পাচিত্তিযং সিযা.

৯৩১. পুরিসে ইত্থিসঞ্ঞিস্স, ৰিমতিস্স চ পণ্ডকে;

উত্তরি ছহি ৰাচাহি, ৰদতো হোতি দুক্কটং.

৯৩২. ইত্থিরূপং গহেত্ৰান, ঠিতানং ভাসতোপি চ;

দুক্কটং যক্খিপেতীনং, তিরচ্ছানগতিত্থিযা.

৯৩৩. পুরিসে সতি ৰিঞ্ঞুস্মিং, সযং উট্ঠায ৰা পুন;

দেসেন্তস্স নিসীদিত্ৰা, মাতুগামস্স ৰা তথা.

৯৩৪. অঞ্ঞিস্সা পুন অঞ্ঞিস্সা, ইত্থিযা ভণতোপি চ;

ছহি পঞ্চহি ৰাচাহি, অনাপত্তি পকাসিতা.

৯৩৫. পদসোধম্মতুল্যাৰ, সমুট্ঠানাদযো মতা;

অযমেৰ ৰিসেসোতি, ক্রিযাক্রিযমিদং পন.

ধম্মদেসনাকথা.

৯৩৬. মহগ্গতং পণীতং ৰা, আরোচেন্তস্স ভিক্খুনো;

ঠপেত্ৰা ভিক্খুনিং ভিক্খুং, ভূতে পাচিত্তিযং সিযা.

৯৩৭. নো চে জানাতি সো ৰুত্তং, আরোচেন্তস্স ভিক্খুনো;

পরিযাযৰচনে চস্স, হোতি আপত্তি দুক্কটং.

৯৩৮. অনাপত্তি তথারূপে, কারণে সতি ভাসতো;

সব্বস্সপি চ সীলাদিং, ৰদতো আদিকম্মিনো.

৯৩৯. উম্মত্তকপদং এত্থ, ন ৰুত্তং তদসম্ভৰা;

ভূতারোচনকং নাম, সমুট্ঠানমিদং মতং.

৯৪০. কাযতো ৰাচতো কায-ৰাচতো চ তিধা সিযা;

কুসলাব্যাকতেহেৰ, দ্ৰিচিত্তঞ্চ দ্ৰিৰেদনং.

ভূতারোচনকথা.

৯৪১. আপত্তিং পন দুট্ঠুল্লং, আরোচেন্তস্স ভিক্খুনো;

আপত্তানুপসম্পন্নে, ঠপেত্ৰা ভিক্খুসম্মুতিং.

৯৪২. সঙ্ঘাদিসেসমাপন্নো, মোচেত্ৰা অসুচিং অযং;

ঘটেত্ৰা ৰত্থুনাপত্তিং, ৰদন্তস্সেৰ ৰজ্জতা.

৯৪৩. ইধ সঙ্ঘাদিসেসাৰ, দুট্ঠুল্লাপত্তিযো মতা;

তস্মা সুদ্ধস্স দুট্ঠুল্লং, ৰদং পাচিত্তিযং ফুসে.

৯৪৪. অদুট্ঠুল্লায দুট্ঠুল্ল-সঞ্ঞিনো ৰিমতিস্স ৰা;

আপত্তিযোপি ৰা সেসা, আরোচেন্তস্স দুক্কটং.

৯৪৫. তথা অনুপসম্পন্নে, দুট্ঠুল্লং পঞ্চধা মতং;

অজ্ঝাচারমদুট্ঠুল্লং, আরোচেতুং ন ৰট্টতি.

৯৪৬. ৰত্থুং ৰা পন আপত্তিং, আরোচেন্তস্স কেৰলং;

অনাপত্তীতি ঞাতব্বং, ভিক্খুসম্মুতিযা তথা.

৯৪৭. এৰমুম্মত্তকাদীনং, সমুট্ঠানাদযো নযা;

অদিন্নাদানতুল্যাৰ, ৰেদনা দুক্খৰেদনা.

দুট্ঠুল্লারোচনকথা.

৯৪৮. খণেয্য ৰা খণাপেয্য, পথৰিং যো অকপ্পিযং;

ভেদাপেয্য চ ভিন্দেয্য, তস্স পাচিত্তিযং সিযা.

৯৪৯. সযমেৰ খণন্তস্স, পথৰিং পন ভিক্খুনো;

পহারস্মিং পহারস্মিং, পাচিত্তিযমুদীরিতং.

৯৫০. আণাপেন্তস্স একাৰ, দিৰসং খণতোপি চ;

পুনপ্পুনাণাপেন্তস্স, ৰাচতো ৰাচতো সিযা.

৯৫১. ‘‘খণ পোক্খরণিং ৰাপিং, আৰাটং খণ কূপকং’’;

ইচ্চেৰং তু ৰদন্তস্স, কোচি দোসো ন ৰিজ্জতি.

৯৫২. ‘‘ইমং খণ চ ওকাসং, ইধ পোক্খরণিং খণ;

ইমস্মিং খণ ওকাসে’’, ৰত্তুমেৰং ন ৰট্টতি.

৯৫৩. ‘‘কন্দং খণ কুরুন্দং ৰা, থূণং খণ চ খাণুকং;

মূলং খণ চ তালং ৰা’’, এৰং ৰদতি ৰট্টতি.

৯৫৪. ‘‘ইমং মূলং ইমং ৰল্লিং, ইমং তালং ইমং নল়ং;

খণা’’তি নিযমেত্ৰান, ৰত্তুং পন ন ৰট্টতি.

৯৫৫. উস্সিঞ্চিতুং সচে সক্কা, ঘটেহি তনুকদ্দমো;

ভিক্খুনা অপনেতব্বো, বহলং ন চ ৰট্টতি.

৯৫৬. ভিজ্জিত্ৰা নদিযাদীনং, পতিতং তোযসন্তিকে;

তটং ৰট্ঠং ৰিকোপেতুং, চাতুমাসম্পি ৰট্টতি.

৯৫৭. সচে পততি তোযস্মিং, দেৰে ৰুট্ঠেপি ৰট্টতি;

চাতুমাসমতিক্কন্তে, তোযে দেৰো হি ৰস্সতি.

৯৫৮. পাসাণপিট্ঠিযং সোণ্ডিং, খণন্তি যদি তত্থ তু;

রজং পততি চে পুব্বং, পচ্ছা দেৰোভিৰস্সতি.