নিস্সগ্গিযকথা

৫৫১. খোমং কপ্পাসকোসেয্যং, সাণং ভঙ্গঞ্চ কম্বলং;

চীৰরং ছব্বিধং ৰুত্তং, জাতিতো পন কপ্পিযং.

৫৫২. দুকূলঞ্চেৰ পত্তুণ্ণং, চিনং সোমারপট্টকং;

ইদ্ধিজং দেৰদিন্নঞ্চ, তস্সেতং অনুলোমিকং.

৫৫৩. তিচীৰরং পরিক্খার-চোল়ঞ্চ মুখপুঞ্ছনং;

নিসীদনমধিট্ঠেয্য, পচ্চত্থরণমেৰ চ.

৫৫৪. একাহম্পি ৰিনা ভিক্খু, ন ৰসেয্য তিচীৰরং;

ন ৰসেয্য তথাধিট্ঠা, চাতুমাসং নিসীদনং.

৫৫৫. রজিত্ৰা কপ্পিযং বিন্দুং, দত্ৰা তত্থ তিচীৰরং;

উপপন্নং পমাণেন, অধিট্ঠাতব্বমেৰ তং.

৫৫৬. পচ্ছিমন্তেন সঙ্ঘাটি, দীঘসো মুট্ঠিপঞ্চকা;

মুট্ঠিত্তিকা চ তিরিযং, উত্তমন্তেন সা পন.

৫৫৭. সত্থুনো চীৰরূনাপি, ৰট্টতীতি পকাসিতা;

ইদমেৰুত্তরাসঙ্গে, পমাণং পরিদীপিতং.

৫৫৮. মুট্ঠিপঞ্চকং দীঘন্তং, পমাণং তিরিযন্ততো;

অড্ঢতেয্যং দ্ৰিহত্থং ৰা, সেসে অন্তরৰাসকে.

৫৫৯. অহতাহতকপ্পানং, সঙ্ঘাটি দিগুণা মতা;

একপট্টুত্তরাসঙ্গো, এৰমন্তরৰাসকো.

৫৬০. উতুদ্ধটানং পন চীৰরানং;

সঙ্ঘাটি ভিক্খুস্স চতুগ্গুণা ৰা;

দুৰেপি সেসা দিগুণাৰ ৰুত্তা;

যথাসুখং ৰট্টতি পংসুকূলং.

৫৬১. তীণিপি দ্ৰেপি চেকং ৰা, ছিন্দিতব্বং পহোতি চে;

সব্বেসু অপ্পহোন্তেসু, দেয্যমন্ৰাধিকম্পি ৰা.

৫৬২. অচ্ছিন্নং ৰা অনাদিন্নং, ধারেন্তস্স তিচীৰরং;

ভিক্খুনো দুক্কটং ৰুত্তং, দুব্ভোগেন চ সেৰতো.

৫৬৩. কুসিং অড্ঢকুসিঞ্চাপি, মণ্ডলং অড্ঢমণ্ডলং;

ৰিৰট্টং অনুৰিৰট্টং, বাহন্তম্পি চ ভিক্খুনো.

৫৬৪. দস্সেত্ৰাৰ ৰিধিং সব্বং, পঞ্চকাদিপ্পভেদকং;

ছিন্নং সমণসারুপ্পং, কাতব্বং তু তিচীৰরং.

৫৬৫. দানেনচ্ছিজ্জগাহেন, ৰিস্সাসগ্গহণেন চ;

হীনাযাৰত্তনেনাপি, সিক্খায চ পহানতো.

৫৬৬. পচ্চুদ্ধারৰিনাসেহি, লিঙ্গস্স পরিৰত্তনা;

সব্বং ভিজ্জতিধিট্ঠানং, ছিদ্দভাৰে তিচীৰরং.

৫৬৭. কনিট্ঠস্সঙ্গুলস্সেৰ, নখপিট্ঠিপ্পমাণকং;

ৰিনিৰিদ্ধং পনচ্ছিদ্দ-মধিট্ঠানৰিনাসনং.

৫৬৮. একো তন্তুপি অচ্ছিন্নো, অধিট্ঠানং ন ভিন্দতি;

সেতভাৰং করোন্তেন, ধোতম্পি রজকেন ৰা.

৫৬৯. পঠমং অগ্গল়ং দত্ৰা, পচ্ছা ছিন্দতি রক্খতি;

ঘটেত্ৰা কোটিযো দ্ৰে ৰা, পচ্ছা ছিন্দতি রক্খতি.

৫৭০. চতুরট্ঠঙ্গুলা ওরং, একদ্ৰিন্নং তিরীযতো;

তিণ্ণম্পি দীঘতো ছিদ্দং, ভিন্দতেৰ ৰিদত্থিযা.

৫৭১. নিসীদনস্স দীঘেন, ভৰন্তি দ্ৰে ৰিদত্থিযো;

ৰিত্থারেন দিযড্ঢা চ, সুগতস্স ৰিদত্থিযা.

৫৭২. হোন্তি কণ্ডুপ্পটিচ্ছাদি, তিরিযং দ্ৰে ৰিদত্থিযো;

দীঘতোপি চতস্সোৰ, সুগতস্স ৰিদত্থিযা.

৫৭৩. দীঘতো সুগতস্সেৰ, ভৰন্তি ছ ৰিদত্থিযো;

ৰিত্থারেনড্ঢতেয্যাৰ, সিযা ৰস্সিকসাটিকা.

৫৭৪. মুনিনা তীসু এতেসু, করোন্তস্স তদুত্তরিং;

অধিকচ্ছেদনং তস্স, পাচিত্তিযমুদীরিতং.

৫৭৫. মুখপুঞ্ছনচোল়স্স, পচ্চত্থরণকস্স ৰা;

পমাণং অপ্পমাণেন, ন চেৰ পরিদীপিতং.

৫৭৬. সদসং অদসং সব্বং, পচ্চত্থরণচীৰরং;

মহন্তং খুদ্দকং এক-মনেকম্পি চ ৰট্টতি.

৫৭৭. মুখপুঞ্ছনচোল়েকং, দ্ৰেপি ৰট্টন্তি সব্বথা;

সদসং অদসং ৰাপি, সদসংৰ নিসীদনং.

৫৭৮. অদসা রজিতাযেৰ, ৰট্টতাদিন্নকপ্পকা;

ৰুত্তা কণ্ডুপ্পটিচ্ছাদি, তথা ৰস্সিকসাটিকা.

৫৭৯. গণনং ৰা পমাণং ৰা, ন পরিক্খারচোল়কে;

পমাণগণনাতীতি, ভণন্তি পকতঞ্ঞুনো.

৫৮০. সুগতট্ঠঙ্গুলাযামং, চতুরঙ্গুলৰিত্থতং;

ৰিকপ্পনুপগং হোতি, পচ্ছিমং নাম চীৰরং.

৫৮১. পরিস্সাৰপটং পত্ত-পোত্থকত্থৰিকাদিকং;

অধিট্ঠেয্য পরিক্খার-চোল়ং পচ্ছিমচীৰরং.

৫৮২. বহূনি একতো কত্ৰা, অধিট্ঠাতুম্পি ৰট্টতি;

মাতুআদীনমত্থায, ঠপিতে নত্থি দোসতা.

৫৮৩. ৰস্সমাসে অধিট্ঠেয্য, চতুরো ৰস্সসাটিকং;

পুন পচ্চুদ্ধরিত্ৰা তং, ৰিকপ্পেয্য ততো পরং.

৫৮৪. তাৰ কণ্ডুপ্পটিচ্ছাদিং, যাৰ রোগো ন সম্মতি;

অধিট্ঠহিত্ৰা ততো উদ্ধং, উদ্ধরিত্ৰা ৰিকপ্পযে.

৫৮৫. ‘‘ইমং কণ্ডুপ্পটিচ্ছাদিং, ইমমন্তরৰাসকং;

অধিট্ঠামী’’তিধিট্ঠেয্য, সেসেসুপি অযং নযো.

৫৮৬. ‘‘ইমং কণ্ডুপ্পটিচ্ছাদিং, এত’’ন্তি চ অসম্মুখে;

ৰত্ৰা পচ্চুদ্ধরেয্যেৰং, সেসেসুপি ৰিচক্খণো.

৫৮৭. আভোগং মনসা কত্ৰা, কাযেন ফুসনাকতং;

ৰচসাধিট্ঠিতঞ্চাতি, অধিট্ঠানং দ্ৰিধা মতং.

৫৮৮. ইতি সব্বমিদং ৰুত্তং, তেচীৰরিকভিক্খুনো;

তথা ৰত্ৰাৰধিট্ঠেয্য, তং পরিক্খারচোল়িকো.

৫৮৯. তিচীৰরং পরিক্খার-চোল়ং কাতুম্পি ৰট্টতি;

এৰং চুদোসিতে ৰুত্তো, পরিহারো নিরত্থকো.

৫৯০. ন, তেচীৰরিকস্সেৰ, ৰুত্তত্তা তত্থ সত্থুনা;

তং পরিক্খারচোল়স্স, তস্মা সব্বম্পি ৰট্টতি.

৫৯১. ‘‘অধিট্ঠেতি ৰিকপ্পেতি, অনাপত্তী’’তি এত্থ চ;

অধিট্ঠাতব্বকস্সেৰ, ৰিকপ্পনৰিধানতো.

৫৯২. ভিক্খুস্সেৰং করোন্তস্স, ন দোসো উপলব্ভতি;

এৰঞ্চ ন সিযা কস্মা, মুখপুঞ্ছনকাদিকং.

৫৯৩. মুখপুঞ্ছনকাদীনং, তেসং কিচ্চৰিধানতো;

অকিচ্চস্সামিকস্সস্স, অধিট্ঠানং তু যুজ্জতি.

৫৯৪. নিধানমুখমেতন্তি, মহাপচ্চরিযং পন;

ৰুত্তত্তা চ নিসেধেতুং, ন সক্কা ৰিনযঞ্ঞুনা.

৫৯৫. চীৰরং পরিপুণ্ণন্তি, নিদানুপ্পত্তিতোপি চ;

নিধানমুখমেতন্তি, ৰেদিতব্বং ৰিভাৰিনা.

৫৯৬. কুসৰাকাদিচীরানি, কম্বলং কেসৰালজং;

থুল্লচ্চযং ধারযতো-লূকপক্খাজিনক্খিপে.

৫৯৭. কদলেরকদুস্সেসু, অক্কদুস্সে চ পোত্থকে;

দুক্কটং তিরিটে ৰাপি, ৰেঠনে কঞ্চুকেপি চ.

৫৯৮. সব্বনীলকমঞ্জেট্ঠ-কণ্হলোহিতপীতকে;

মহানামমহারঙ্গ-রত্তেসুপি চ দুক্কটং.

৫৯৯. অচ্ছিন্নদসকে দীঘ-ফলপুপ্ফদসেসু চ;

অচ্ছিন্নচীৰরস্সেত্থ, নত্থি কিঞ্চি অকপ্পিযং.

৬০০. অধিট্ঠেতি ৰিকপ্পেতি, ৰিস্সজ্জেতি ৰিনস্সতি;

অন্তোদসাহং ৰিস্সাসে, অনাপত্তি পকাসিতা.

৬০১. কথিনং নাম নামেন, সমুট্ঠানমিদং পন;

অচিত্তমক্রিযং ৰুত্তং, তিচিত্তঞ্চ তিৰেদনং.

পঠমকথিনকথা.

৬০২. গামাদীসু পদেসেসু, তিপঞ্চসু তিচীৰরং;

ঠপেত্ৰা একরত্তম্পি, সঙ্ঘসম্মুতিযা ৰিনা.

৬০৩. ভিক্খুনো পন তেনস্স, ৰিপ্পৰত্থুং ন ৰট্টতি;

হোতি নিস্সগ্গিযং ৰিপ্প-ৰসতো অরুণুগ্গমে.

৬০৪. চীৰরং নিক্খিপিত্ৰান, ন্হাযন্তস্সেৰ রত্তিযং;

অরুণে উট্ঠিতে কিং নু, কাতব্বং তেন ভিক্খুনা.

৬০৫. দুক্কটং মুনিনা ৰুত্তং, নিস্সগ্গিযনিৰাসনে;

তব্ভযা পন সো ভিক্খু, নগ্গো গচ্ছতি দুক্কটং.

৬০৬. অচ্ছিন্নচীৰরট্ঠানে, ঠিতত্তা পন ভিক্খুনো;

ন তস্সাকপ্পিযং নাম, চীৰরং অত্থি কিঞ্চিপি.

৬০৭. নিগাসেত্ৰা গহেত্ৰা চ, গন্ত্ৰা ভিক্খুস্স সন্তিকং;

নিস্সজ্জিত্ৰা পনাপত্তি, দেসেতব্বাৰ ৰিঞ্ঞুনা.

৬০৮. পরস্স নিস্সজ্জিত্ৰা তং, দুক্কটং পরিভুঞ্জতো;

পযোগে চ পযোগে চ, হোতি পারুপনাদিসু.

৬০৯. অনাপত্তি তমঞ্ঞস্স, ভিক্খুনো পরিভুঞ্জতো;

অদেন্তস্স চ নিস্সট্ঠং, দুক্কটং পরিযাপুতং.

৬১০. থেরে চ দহরে মগ্গং, গচ্ছন্তেসু উভোসুপি;

পত্তচীৰরমাদায, ওহীনে দহরে পন.

৬১১. অসম্পত্তে গরুং তস্মিং, উগ্গচ্ছত্যরুণো যদি;

হোতি নিস্সগ্গিযং ৰত্থং, ন পস্সম্ভতি নিস্সযো.

৬১২. মুহুত্তং ৰিস্সমিত্ৰান, গচ্ছন্তে দহরে পন;

হোতি নিস্সগ্গিযং ৰত্থং, পস্সম্ভতি চ নিস্সযো.

৬১৩. সুতা ধম্মকথা যস্মিং, উগ্গচ্ছত্যরুণো যদি;

হোতি নিস্সগ্গিযং ৰত্থং, পস্সম্ভতি চ নিস্সযো.

৬১৪. পচ্চুদ্ধারে অনাপত্তি, লদ্ধসম্মুতিকস্সপি;

অন্তোযেৰারুণে তং ৰা, ৰিস্সজ্জেতি ৰিনস্সতি.

৬১৫. পঠমেন সমানাৰ, সমুট্ঠানাদযো নযা;

অপচ্চুদ্ধরণং এত্থ, অক্রিযাতি ৰিসেসিতং.

দুতিযকথিনকথা.

৬১৬. অকালচীৰরং মাস-পরমং নিক্খিপে সতি;

পচ্চাসায ততো উদ্ধং, ঠপেতুং ন চ ৰট্টতি.

৬১৭. দসাহাতিক্কমোযেৰ;

পঠমে কথিনে ইধ;

মাসস্সাতিক্কমো ৰুত্তো;

সেসো তেন সমো মতো.

ততিযকথিনকথা.

৬১৮. ভিক্খু ভিক্খুনিযা ভুত্তং, ৰত্থং অঞ্ঞাতিকায যো;

ধোৰাপেতি রজাপেতি, আকোটাপেতি চে ততো.

৬১৯. তস্স নিস্সগ্গিযাপত্তি, পঠমেন পকাসিতা;

তথা সেসেহি চ দ্ৰীহি, দীপিতং দুক্কটদ্ৰযং.

৬২০. সিক্খমানায ৰা হত্থে, ধোৰনত্থায দেতি চে;

সা হুত্ৰা উপসম্পন্না, পচ্ছা ধোৰতি সো নযো.

৬২১. সামণেরনিদ্দেসেপি, লিঙ্গং চে পরিৰত্ততি;

ভিক্খুনীসুপসম্পজ্জ, ধোতে নিস্সগ্গিযং সিযা.