পারাজিককথা

পঠমপারাজিককথা

৬. তিৰিধে তিলমত্তম্পি, মগ্গে সেৰনচেতনো;

অঙ্গজাতং পৰেসেন্তো, অল্লোকাসে পরাজিতো.

৭. পৰেসনং পৰিট্ঠং ৰা, ঠিতমুদ্ধরণম্পি ৰা;

সসিক্খো সাদিযন্তো সো, ঠপেত্ৰা কিরিযং চুতো.

৮. সন্থতেনঙ্গজাতেন, সন্থতং ৰা অসন্থতং;

মগ্গং পন পৰেসেন্তো, তথেৰাসন্থতেন চ.

৯. উপাদিন্নেনুপাদিন্নে, অনুপাদিন্নকেন ৰা;

ঘট্টিতে অনুপাদিন্নে, সচে সাদিযতেত্থ সো.

১০. হোতি পারাজিকক্খেত্তে, পৰিট্ঠে তু পরাজিতো;

খেত্তে থুল্লচ্চযং তস্স, দুক্কটঞ্চ ৰিনিদ্দিসে.

১১. মতে অক্খাযিতে চাপি, যেভুয্যক্খাযিতেপি চ;

মেথুনং পটিসেৰন্তো, হোতি পারাজিকো নরো.

১২. যেভুয্যক্খাযিতে চাপি, উপড্ঢক্খাযিতেপি চ;

হোতি থুল্লচ্চযাপত্তি, সেসে আপত্তি দুক্কটং.

১৩. নিমিত্তমত্তং সেসেত্ৰা, খাযিতেপি সরীরকে;

নিমিত্তে মেথুনং তস্মিং, সেৰতোপি পরাজযো.

১৪. উদ্ধুমাতাদিসম্পত্তে, সব্বত্থাপি চ দুক্কটং;

খাযিতাক্খাযিতং নাম, সব্বং মতসরীরকে.

১৫. ছিন্দিত্ৰা পন তচ্ছেত্ৰা, নিমিত্তুপ্পাটিতে পন;

ৰণসঙ্খেপতো তস্মিং, সেৰং থুল্লচ্চযং ফুসে.

১৬. ততো মেথুনরাগেন, পতিতায নিমিত্ততো;

তাযং উপক্কমন্তস্স, দুক্কটং মংসপেসিযং.

১৭. নখপিট্ঠিপ্পমাণেপি, মংসে ন্হারুম্হি ৰা সতি;

মেথুনং পটিসেৰন্তো, জীৰমানে পরাজিতো.

১৮. কণ্ণচ্ছিদ্দক্খিনাসাসু, ৰত্থিকোসে ৰণেসু ৰা;

অঙ্গজাতং পৰেসেন্তো, রাগা থুল্লচ্চযং ফুসে.

১৯. অৰসেসসরীরস্মিং, উপকচ্ছূরুকাদিসু;

ৰসা মেথুনরাগস্স, সেৰমানস্স দুক্কটং.

২০. অস্সগোমহিসাদীনং, ওট্ঠগদ্রভদন্তিনং;

নাসাসু ৰত্থিকোসেসু, সেৰং থুল্লচ্চযং ফুসে.

২১. তথা সব্বতিরচ্ছানং, অক্খিকণ্ণৰণেসুপি;

অৰসেসসরীরেসু, সেৰমানস্স দুক্কটং.

২২. তেসং অল্লসরীরেসু, মতানং সেৰতো পন;

তিৰিধাপি সিযাপত্তি, খেত্তস্মিং তিৰিধে সতি.

২৩. বহি মেথুনরাগেন, নিমিত্তং ইত্থিযা পন;

নিমিত্তেন ছুপন্তস্স, তস্স থুল্লচ্চযং সিযা.

২৪. কাযসংসগ্গরাগেন, নিমিত্তেন মুখেন ৰা;

নিমিত্তং ইত্থিযা তস্স, ছুপতো গরুকং সিযা.

২৫. তথেৰোভযরাগেন, নিমিত্তং পুরিসস্সপি;

নিমিত্তেন ছুপন্তস্স, হোতি আপত্তি দুক্কটং.

২৬. নিমিত্তেন নিমিত্তং তু, তিরচ্ছানগতিত্থিযা;

থুল্লচ্চযং ছুপন্তস্স, হোতি মেথুনরাগতো.

২৭. কাযসংসগ্গরাগেন, তিরচ্ছানগতিত্থিযা;

নিমিত্তেন নিমিত্তস্স, ছুপনে দুক্কটং মতং.

২৮. অঙ্গজাতং পৰেসেত্ৰা, তমাৰট্টকতে মুখে;

তত্থাকাসগতং কত্ৰা, নীহরন্তস্স দুক্কটং.

২৯. তথা চতূহি পস্সেহি, ইত্থিযা হেট্ঠিমত্তলং;

অছুপন্তং পৰেসেত্ৰা, নীহরন্তস্স দুক্কটং.

৩০. উপ্পাটিতোট্ঠমংসেসু, বহি নিক্খন্তকেসু ৰা;

দন্তেসু ৰাযমন্তস্স, তস্স থুল্লচ্চযং সিযা.

৩১. অট্ঠিসঙ্ঘট্টনং কত্ৰা, মগ্গে দুৰিধরাগতো;

সুক্কে মুত্তেপি ৰামুত্তে, ৰাযমন্তস্স দুক্কটং.

৩২. ইত্থিং মেথুনরাগেন, আলিঙ্গন্তস্স দুক্কটং;

হত্থগ্গাহপরামাস-চুম্বনাদীস্ৰযং নযো.

৩৩. অপদে অহযো মচ্ছা, কপোতা দ্ৰিপদেপি চ;

গোধা চতুপ্পদে হেট্ঠা, ৰত্থু পারাজিকস্সিমে.

৩৪. সেৰেতুকামতাচিত্তং, মগ্গে মগ্গপ্পৰেসনং;

ইদমঙ্গদ্ৰযং ৰুত্তং, পঠমন্তিমৰত্থুনো.

৩৫. দুক্কটং পঠমস্সেৰ, সামন্তমিতি ৰণ্ণিতং;

সেসানং পন তিণ্ণম্পি, থুল্লচ্চযমুদীরিতং.

৩৬. ‘‘অনাপত্তী’’তি ঞাতব্বং, অজানন্তস্স ভিক্খুনো;

তথেৰাসাদিযন্তস্স, জানন্তস্সাদিকম্মিনো.

৩৭. ৰিনযে অনযূপরমে পরমে;

সুজনস্স সুখানযনে নযনে;

পটু হোতি পধানরতো ন রতো;

ইধ যো পন সারমতে রমতে.

৩৮. ইমং হিতৰিভাৰনং ভাৰনং;

অৰেদি সুরসম্ভৰং সম্ভৰং;

স মারবল়িসাসনে সাসনে;

সমো ভৰতুপালিনা পালিনা.

ইতি ৰিনযৰিনিচ্ছযে পঠমপারাজিককথা নিট্ঠিতা.

দুতিযপারাজিককথা

৩৯. আদিযন্তো হরন্তোৰ-হরন্তো ইরিযাপথং;

ৰিকোপেন্তো তথা ঠানা, চাৰেন্তোপি পরাজিতো.

৪০. তত্থ নানেকভণ্ডানং, পঞ্চকানং ৰসা পন;

অৰহারা দসেৰেতে, ৰিঞ্ঞাতব্বা ৰিভাৰিনা.

৪১. সাহত্থাণত্তিকো চেৰ, নিস্সগ্গো অত্থসাধকো;

ধুরনিক্খেপনঞ্চাতি, ইদং সাহত্থপঞ্চকং.

৪২. পুব্বসহপযোগো চ, সংৰিদাহরণম্পি চ;

সঙ্কেতকম্মং নেমিত্তং, পুব্বযোগাদিপঞ্চকং.

৪৩. থেয্যপসয্হপরিকপ্প-পটিচ্ছন্নকুসাদিকা;

অৰহারা ইমে পঞ্চ, ৰেদিতব্বাৰ ৰিঞ্ঞুনা.

৪৪. ৰত্থুকালগ্ঘদেসে চ, পরিভোগঞ্চ পঞ্চপি;

ঞত্ৰা এতানি কাতব্বো, পণ্ডিতেন ৰিনিচ্ছযো.

৪৫. দুতিযং ৰাপি কুদ্দালং, পিটকং পরিযেসতো;

গচ্ছতো থেয্যচিত্তেন, দুক্কটং পুব্বযোগতো.

৪৬. তত্থজাতককট্ঠং ৰা, লতং ৰা ছিন্দতো পন;

দুক্কটং উভযত্থাপি, ৰুত্তং সহপযোগতো.

৪৭. পথৰিং খণতো ৰাপি, ব্যূহতো পংসুমেৰ ৰা;

আমসন্তস্স ৰা কুম্ভিং, হোতি আপত্তি দুক্কটং.

৪৮. মুখে পাসং পৰেসেত্ৰা, খাণুকে বদ্ধকুম্ভিযা;

বন্ধনানং ৰসা ঞেয্যো, ঠানভেদো ৰিজানতা.

৪৯. দ্ৰে ঠানানি পনেকস্মিং, খাণুকে বদ্ধকুম্ভিযা;

ৰলযং রুক্খমূলস্মিং, পৰেসেত্ৰা কতায ৰা.

৫০. উদ্ধরন্তস্স খাণুং ৰা, ছিন্দতো সঙ্খলিম্পি ৰা;

থুল্লচ্চযং ততো কুম্ভিং, ঠানা চাৰেতি চে চুতো.

৫১. পঠমং পন কুম্ভিং ৰা, উদ্ধরিত্ৰা তথা পুন;

ঠানা চাৰেতি খাণুং ৰা, সঙ্খলিং ৰাপি সো নযো.

৫২. ইতো চিতো চ ঘংসন্তো, মূলে সারেতি রক্খতি;

ৰলযং খেগতং তত্থ, করোন্তোৰ পরাজিতো.

৫৩. জাতং ছিন্দতি চে রুক্খং, দুক্কটং কুম্ভিমত্থকে;

সমীপে ছিন্দতো তস্স, পাচিত্তিযমতত্থজং.

৫৪. অন্তোকুম্ভিগতং ভণ্ডং, ফন্দাপেতি সচে পন;

অপব্যূহেতি তত্থেৰ, তস্স থুল্লচ্চযং সিযা.

৫৫. হরন্তো কুম্ভিযা ভণ্ডং, মুট্ঠিং ছিন্দতি অত্তনো;

ভাজনে ৰা গতং কত্ৰা, হোতি ভিক্খু পরাজিতো.

৫৬. হারং ৰা পন পামঙ্গং, সুত্তারুল়্হং তু কুম্ভিযা;

ফন্দাপেতি যথাৰত্থুং, ঠানা চাৰেতি চে চুতো.

৫৭. সপ্পিআদীসু যং কিঞ্চি, পিৰতো পাদপূরণং;

একেনেৰ পযোগেন, পীতমত্তে পরাজযো.

৫৮. কত্ৰাৰ ধুরনিক্খেপং, পিৰন্তস্স পুনপ্পুনং;

সকলম্পি চ তং কুম্ভিং, পিৰতো ন পরাজযো.

৫৯. সচে খিপতি যং কিঞ্চি, ভণ্ডকং তেলকুম্ভিযং;

তং পাদগ্ঘনকং তেলং, ধুৰং পিৰতি তাৰদে.

৬০. হত্থতো মুত্তমত্তেৰ, থেয্যচিত্তো ৰিনস্সতি;

আৰিঞ্জেত্ৰাপি ৰা কুম্ভিং, তেলং গাল়েতি চে তথা.

৬১. তেলস্সাকিরণং ঞত্ৰা, খিত্তং রিত্তায কুম্ভিযা;

পীতং তেলঞ্চ তং ভণ্ডং, উদ্ধরন্তোৰ ধংসিতো.

৬২. তত্থেৰ ভিন্দতো তেলং, ছড্ডেন্তস্স তথেৰ চ;

ঝাপেন্তস্স অভোগং ৰা, করোন্তস্স চ দুক্কটং.

ভূমট্ঠকথা.

৬৩. ঠপিতং পত্থরিত্ৰা চ, সাটকত্থরণাদিকং;

ৰেঠেত্ৰা উদ্ধরন্তস্স, মুত্তে ঠানা পরাভৰো.

৬৪. ওরিমন্তেন ৰা ফুট্ঠ-মোকাসং পারিমন্ততো;

পারাজিকমতিক্কন্তে, কড্ঢতো উজুকম্পি ৰা.

থলট্ঠকথা.

৬৫. পুরতো মুখতুণ্ডঞ্চ, কলাপগ্গঞ্চ পচ্ছতো;

দ্ৰীসু পস্সেসু পক্খন্তো, হেট্ঠা পাদনখা তথা.

৬৬. উদ্ধঞ্চাপি সিখগ্গন্তি, গগনে গচ্ছতো পন;

মোরস্স ছ পরিচ্ছেদা, ৰেদিতব্বা ৰিভাৰিনা.

৬৭. ভিক্খু ‘‘সস্সামিকং মোরং, গহেস্সামী’’তি খেগতং;

হত্থং ৰাপি পসারেতি, পুরতো ৰাস্স তিট্ঠতি.

৬৮. মোরোপি গগনে পক্খে, চারেতি ন চ গচ্ছতি;

দুক্কটং গমনচ্ছেদে, আমসন্তস্স চেৰ তং.

৬৯. ঠানা মোরমমোচেন্তো, ফন্দাপেতি সচে পন;

এৰং ফন্দাপনে তস্স, থুল্লচ্চযমুদীরিতং.

৭০. অগ্গহেত্ৰা গহেত্ৰা ৰা, হত্থেন পন অত্তনো;

ঠানা চাৰেতি চে মোরং, সযং ঠানা চুতো সিযা.

৭১. ফুট্ঠোকাসং মুখগ্গেন, কলাপগ্গেন ৰা পন;

কলাপগ্গেন ৰা ফুট্ঠং, মুখতুণ্ডেন ভিক্খু চে.

৭২. অতিক্কামেয্য যো মোরং, ঠানা চাৰেতি নাম সো;

এসেৰ চ নযো পাদ-সিখাপক্খেসু দীপিতো.

৭৩. গগনে পন গচ্ছন্তো, করে মোরো নিলীযতি;

তং করেনেৰ চারেন্তো, ফন্দাপেতীতি ৰুচ্চতি.

৭৪. সচে গণ্হাতি তং মোরং, ইতরেন করেন সো;

চাৰিতত্তা পন ঠানা, ভিক্খু ঠানা চুতো সিযা.

৭৫. ইতরং পন মোরস্স, উপনেতি সচে করং;

ন দোসো তত্থ উড্ডেত্ৰা, সযমেৰ নিলীযতি.