সঙ্ঘাদিসেসকথা

৩২৫. মোচেতুকামতাচিত্তং, ৰাযামো সুক্কমোচনং;

অঞ্ঞত্র সুপিনন্তেন, হোতি সঙ্ঘাদিসেসতা.

৩২৬. পরেনুপক্কমাপেত্ৰা, অঙ্গজাতং পনত্তনো;

সুক্কং যদি ৰিমোচেতি, গরুকং তস্স নিদ্দিসে.

৩২৭. সঞ্চিচ্চুপক্কমন্তস্স, অঙ্গজাতং পনত্তনো;

থুল্লচ্চযং সমুদ্দিট্ঠং, সচে সুক্কং ন মুচ্চতি.

৩২৮. সঞ্চিচ্চুপক্কমন্তস্স, আকাসে কম্পনেনপি;

হোতি থুল্লচ্চযং তস্স, যদি সুক্কং ন মুচ্চতি.

৩২৯. ৰত্থিং কীল়ায পূরেত্ৰা, পস্সাৰেতুং ন ৰট্টতি;

নিমিত্তং পন হত্থেন, কীল়াপেন্তস্স দুক্কটং.

৩৩০. তিস্সন্নং পন ইত্থীনং, নিমিত্তং রত্তচেতসা;

পুরতো পচ্ছতো ৰাপি, ওলোকেন্তস্স দুক্কটং.

৩৩১. একেনেকং পযোগেন, দিৰসম্পি চ পস্সতো;

নাপত্তিযা ভৰে অঙ্গং, উম্মীলননিমীলনং.

৩৩২. অমোচনাধিপ্পাযস্স, অনুপক্কমতোপি চ;

সুপিনন্তেন মুত্তস্মিং, অনাপত্তি পকাসিতা.

সুক্কৰিসট্ঠিকথা.

৩৩৩. আমসন্তো মনুস্সিত্থিং, কাযসংসগ্গরাগতো;

‘‘মনুস্সিত্থী’’তি সঞ্ঞায, হোতি সঙ্ঘাদিসেসিকো.

৩৩৪. লোমেনন্তমসো লোমং, ফুসন্তস্সাপি ইত্থিযা;

কাযসংসগ্গরাগেন, হোতি আপত্তি ভিক্খুনো.

৩৩৫. ইত্থিযা যদি সম্ফুট্ঠো, ফস্সং সেৰনচেতনো;

ৰাযমিত্ৰাধিৰাসেতি, হোতি সঙ্ঘাদিসেসতা.

৩৩৬. একেন পন হত্থেন, গহেত্ৰা দুতিযেন ৰা;

তত্থ তত্থ ফুসন্তস্স, একাৰাপত্তি দীপিতা.

৩৩৭. অগ্গহেত্ৰা ফুসন্তস্স, যাৰ পাদঞ্চ সীসতো;

কাযা হত্থমমোচেত্ৰা, একাৰ দিৰসম্পি চ.

৩৩৮. অঙ্গুলীনং তু পঞ্চন্নং, গহণে একতো পন;

একাযেৰ সিযাপত্তি, ন হি কোট্ঠাসতো সিযা.

৩৩৯. নানিত্থীনং সচে পঞ্চ, গণ্হাত্যঙ্গুলিযো পন;

একতো পঞ্চ সঙ্ঘাদি-সেসা হোন্তিস্স ভিক্খুনো.

৩৪০. ইত্থিযা ৰিমতিস্সাপি, পণ্ডকাদিকসঞ্ঞিনো;

কাযেন ইত্থিযা কায-সম্বদ্ধং ফুসতোপি ৰা.

৩৪১. পণ্ডকে যক্খিপেতীসু, তস্স থুল্লচ্চযং সিযা;

দুক্কটং কাযসংসগ্গে, তিরচ্ছানগতিত্থিযা.

৩৪২. ভিক্খুনো পটিবদ্ধেন, কাযেন পন ইত্থিযা;

কাযেন পটিবদ্ধঞ্চ, ফুসন্তস্সপি দুক্কটং.

৩৪৩. ইত্থীনং ইত্থিরূপঞ্চ, দারুলোহমযাদিকং;

তাসং ৰত্থমলঙ্কারং, আমসন্তস্স দুক্কটং.

৩৪৪. তত্থজাতফলং খজ্জং, মুগ্গাদিং তত্থজাতকং;

ধঞ্ঞানি পন সব্বানি, আমসন্তস্স দুক্কটং.

৩৪৫. সব্বং ধমনসঙ্খাদিং, পঞ্চঙ্গতুরিযম্পি চ;

রতনানি চ সব্বানি, আমসন্তস্স দুক্কটং.

৩৪৬. সব্বমাৰুধভণ্ডঞ্চ, জিযা চ ধনুদণ্ডকো;

অনামাসমিদং সব্বং, জালঞ্চ সরৰারণং.

৩৪৭. সুৰণ্ণপটিবিম্বাদি, চেতিযং আরকূটকং;

অনামাসন্তি নিদ্দিট্ঠং, কুরুন্দট্ঠকথায হি.

৩৪৮. সব্বং ওনহিতুং ৰাপি, ওনহাপেতুমেৰ ৰা;

ৰাদাপেতুঞ্চ ৰাদেতুং, ৰাদিতং ন চ ৰট্টতি.

৩৪৯. ‘‘করিস্সামুপহার’’ন্তি, ৰুত্তেন পন ভিক্খুনা;

পূজা বুদ্ধস্স কাতব্বা, ৰত্তব্বাতি চ ৰিঞ্ঞুনা.

৩৫০. সযং ফুসিযমানস্স, ইত্থিযা পন ধুত্তিযা;

অৰাযমিত্ৰা কাযেন, ফস্সং পটিৰিজানতো.

৩৫১. অনাপত্তি অসঞ্চিচ্চ, অজানন্তস্স ভিক্খুনো;

মোক্খাধিপ্পাযিনো চেৰ, তথা উম্মত্তকাদিনো.

৩৫২. পঠমেন সমানাৰ, সমুট্ঠানাদযো পন;

কাযসংসগ্গরাগস্স, তথা সুক্কৰিসট্ঠিযা.

কাযসংসগ্গকথা.

৩৫৩. দুট্ঠুল্লৰাচস্সাদেন, ইত্থিযা ইত্থিসঞ্ঞিনো;

দ্ৰিন্নঞ্চ পন মগ্গানং, ৰণ্ণাৰণ্ণৰসেন চ.

৩৫৪. মেথুনযাচনাদীহি, ওভাসন্তস্স ভিক্খুনো;

ৰিঞ্ঞুং অন্তমসো হত্থ-মুদ্দাযপি গরুং সিযা.

৩৫৫. ‘‘সিখরণীসি, সম্ভিন্না, উভতোব্যঞ্জনা’’তি চ;

অক্কোসৰচনেনাপি, গরুকং তু সুণন্তিযা.

৩৫৬. পুনপ্পুনোভাসন্তস্স, একৰাচায ৰা বহূ;

গণনায চ ৰাচানং, ইত্থীনং গরুকা সিযুং.

৩৫৭. সা চে নপ্পটিজানাতি, তস্স থুল্লচ্চযং সিযা;

আদিস্স ভণনে চাপি, উব্ভজাণুমধক্খকং.

৩৫৮. উব্ভক্খকমধোজাণু-মণ্ডলং পন উদ্দিসং;

ৰণ্ণাদিভণনে কায-পটিবদ্ধে চ দুক্কটং.

৩৫৯. থুল্লচ্চযং ভৰে তস্স, পণ্ডকে যক্খিপেতিসু;

অধক্খকোব্ভজাণুম্হি, দুক্কটং পণ্ডকাদিসু.

৩৬০. উব্ভক্খকমধোজাণু-মণ্ডলেপি অযং নযো;

সব্বত্থ দুক্কটং ৰুত্তং, তিরচ্ছানগতিত্থিযা.

৩৬১. অত্থধম্মপুরেক্খারং, কত্ৰা ওভাসতোপি চ;

ৰদতোপি অনাপত্তি, পুরক্খত্ৰানুসাসনিং.

৩৬২. তথা উম্মত্তকাদীনং, সমুট্ঠানাদযো নযা;

অদিন্নাদানতুল্যাৰ, ৰেদনেত্থ দ্ৰিধা মতা.

দুট্ঠুল্লৰাচাকথা.

৩৬৩. ৰণ্ণং পনত্তনো কাম-পারিচরিযায ভাসতো;

তস্মিংযেৰ খণে সা চে, জানাতি গরুকং সিযা.

৩৬৪. নো চে জানাতি সা যক্খি-পেতিদেৰীসু পণ্ডকে;

হোতি থুল্লচ্চযং তস্স, সেসে আপত্তি দুক্কটং.

৩৬৫. চীৰরাদীহি অঞ্ঞেহি, ৰত্থুকামেহি অত্তনো;

নত্থি দোসো ভণন্তস্স, পারিচরিযায ৰণ্ণনং.

৩৬৬. ইত্থিসঞ্ঞা মনুস্সিত্থী, পারিচরিযায রাগিতা;

ওভাসো তেন রাগেন, খণে তস্মিং ৰিজাননং.

৩৬৭. পঞ্চঙ্গানি ইমানেত্থ, ৰেদিতব্বানি ৰিঞ্ঞুনা;

সমুট্ঠানাদযোপ্যস্স, অনন্তরসমা মতা.

অত্তকামপারিচরিযকথা.

৩৬৮. পটিগ্গণ্হাতি সন্দেসং, পুরিসস্সিত্থিযাপি ৰা;

ৰীমংসতি গরু হোতি, পচ্চাহরতি চে পন.

৩৬৯. ‘‘যস্সা হি সন্তিকং গন্ত্ৰা, আরোচেহী’’তি পেসিতো;

তমদিস্ৰা তদঞ্ঞস্স, অৰস্সারোচকস্স সো.

৩৭০. ‘‘আরোচেহী’’তি ৰত্ৰা তং, পচ্চাহরতি চে পন;

ভিক্খু সঙ্ঘাদিসেসম্হা, সঞ্চরিত্তা ন মুচ্চতি.

৩৭১. ‘‘মাতরা রক্খিতং ইত্থিং, গচ্ছ ব্রূহী’’তি পেসিতো;

পিতুরক্খিতমঞ্ঞং ৰা, ৰিসঙ্কেতোৰ ভাসতো.

৩৭২. পটিগ্গণ্হনতাদীহি, তীহি অঙ্গেহি সংযুতে;

সঞ্চরিত্তে সমাপন্নে, গরুকাপত্তিমাদিসে.

৩৭৩. দ্ৰীহি থুল্লচ্চযং ৰুত্তং, পণ্ডকাদীসু তীহিপি;

একেনেৰ চ সব্বত্থ, হোতি আপত্তি দুক্কটং.

৩৭৪. চেতিযস্স চ সঙ্ঘস্স, গিলানস্স চ ভিক্খুনো;

গচ্ছতো পন কিচ্চেন, অনাপত্তি পকাসিতা.

৩৭৫. মনুস্সত্তং তথা তস্সা, ননালংৰচনীযতা;

পটিগ্গণ্হনতাদীনং, ৰসা পঞ্চঙ্গিকং মতং.

৩৭৬. ইদঞ্হি ছসমুট্ঠানং, অচিত্তকমুদীরিতং;

অলংৰচনীযত্তং ৰা, পণ্ণত্তিং ৰা অজানতো.

৩৭৭. গহেত্ৰা সাসনং কায-ৰিকারেনূপগম্ম তং;

ৰীমংসিত্ৰা হরন্তস্স, গরুকং কাযতো সিযা.

৩৭৮. সুত্ৰা যথানিসিন্নোৰ, ৰচনং ইত্থিযা পুন;

তং তত্থেৰাগতস্সেৰ, আরোচেন্তস্স ৰাচতো.

৩৭৯. অজানন্তস্স পণ্ণত্তিং, কাযৰাচাহি তং ৰিধিং;

করোতো হরতো ৰাপি, গরুকং কাযৰাচতো.

৩৮০. জানিত্ৰাপি করোন্তস্স, গরুকাপত্তিযো তথা;

সচিত্তকেহি তীহেৰ, সমুট্ঠানেহি জাযরে.

সঞ্চরিত্তকথা.

৩৮১. সযংযাচিতকেহেৰ, কুটিকং অপ্পমাণিকং;

অত্তুদ্দেসং করোন্তস্স, তথাদেসিতৰত্থুকং.

৩৮২. হোন্তি সঙ্ঘাদিসেসা দ্ৰে, সারম্ভাদীসু দুক্কটং;

সচে একৰিপন্না সা, গরুকং এককং সিযা.

৩৮৩. পুরিসং যাচিতুং কম্ম-সহাযত্থায ৰট্টতি;

মূলচ্ছেজ্জৰসেনেৰ, যাচমানস্স দুক্কটং.

৩৮৪. অৰজ্জং হত্থকম্মম্পি, যাচিতুং পন ৰট্টতি;

হত্থকম্মম্পি নামেতং, কিঞ্চি ৰত্থু ন হোতি হি.

৩৮৫. গোণমাযাচমানস্স, ঠপেত্ৰা ঞাতকাদিকে;

দুক্কটং তস্স নিদ্দিট্ঠং, মূলচ্ছেজ্জেন তেসুপি.

৩৮৬. ‘‘গোণং দেমা’’তি ৰুত্তেপি, গহেতুং ন চ ৰট্টতি;

সকটং দারুভণ্ডত্তা, গহেতুং পন ৰট্টতি.

৩৮৭. ৰাসিফরসুকুদ্দাল-কুঠারাদীস্ৰযং নযো;

অনজ্ঝাৰুত্থকং সব্বং, হরাপেতুম্পি ৰট্টতি.

৩৮৮. ৰল্লিআদিম্হি সব্বস্মিং, গরুভণ্ডপ্পহোনকে;

পরেসং সন্তকেযেৰ, হোতি আপত্তি দুক্কটং.

৩৮৯. পচ্চযেসু হি তীস্ৰেৰ, ৰিঞ্ঞত্তি ন চ ৰট্টতি;

ততিযে পরিকথোভাস-নিমিত্তানি চ লব্ভরে.

৩৯০. ‘‘অদেসিতে চ ৰত্থুস্মিং, পমাণেনাধিকং কুটিং;

করিস্সামী’’তি চিন্তেত্ৰা, অরঞ্ঞং গচ্ছতোপি চ.

৩৯১. ফরসুং ৰাপি ৰাসিং ৰা, নিসেন্তস্সাপি দুক্কটং;

ছিন্দতো দুক্কটং রুক্খং, তস্স পাচিত্তিযা সহ.

৩৯২. এৰং পুব্বপযোগস্মিং, কুটিকারকভিক্খুনো;

যথাপযোগমাপত্তিং, ৰিনযঞ্ঞূ ৰিনিদ্দিসে.

৩৯৩. যা পন দ্ৰীহি পিণ্ডেহি, নিট্ঠানং তু গমিস্সতি;

হোতি থুল্লচ্চযং তেসু, পঠমে দুতিযে গরু.

৩৯৪. অনাপত্তি সচঞ্ঞস্স, দেতি ৰিপ্পকতং কুটিং;

তথা ভূমিং সমং কত্ৰা, ভিন্দতোপি চ তং কুটিং.

৩৯৫. গুহং লেণং করোন্তস্স, তিণপণ্ণচ্ছদম্পি ৰা;

ৰাসাগারং ঠপেত্ৰান, অঞ্ঞস্সত্থায ৰা তথা.

৩৯৬. দেসাপেত্ৰাৰ ভিক্খূহি, ৰত্থুং পন চ ভিক্খুনো;

ক্রিযতোৰ সমুট্ঠাতি, করোতো অপ্পমাণিকং.