৪. ইন্দ্রিযসংযুত্তং

১. সুদ্ধিকৰগ্গো

১. সুদ্ধিকসুত্তৰণ্ণনা

৪৭১. চতুভূমক …পে… লব্ভন্তি কুসলাব্যাকতভাৰতো তেসং তিণ্ণং ইন্দ্রিযানং. ৰীরিযিন্দ্রিযসমাধিন্দ্রিযানি…পে… সব্বত্থ লব্ভন্তি কুসলত্তিকসাধারণত্তা. চতুভূমক …পে… ৰসেনাতি চতুভূমকধম্মপরিচ্ছেদৰসেন চেৰ কুসলাদীহি সব্বসঙ্গাহকধম্মপরিচ্ছেদৰসেন চ ৰুত্তন্তি অত্থো.

দুতিযসমণব্রাহ্মণসুত্তৰণ্ণনা

৪৭৭. দুক্খসচ্চৰসেনাতি দুক্খসচ্চভাৰেন ন পজানন্তি. তঞ্হি পরিঞ্ঞেয্যতায দুক্খসচ্চসঙ্গহং. সমুদযসচ্চৰসেনাতি তণ্হাৰিজ্জাদিং সদ্ধিন্দ্রিযস্স সমুদযসচ্চভাৰেন ন পজানন্তি. নিরোধন্তি সদ্ধিন্দ্রিযস্স অনুপাদায নিরোধনিমিত্তং নিব্বানং. পটিপদন্তি সদ্ধিন্দ্রিযনিরোধগামিনিং পটিপদং অরিযমগ্গং. সেসেসূতি ৰীরিযিন্দ্রিযাদীসু.

সুক্কপক্খেতি ‘‘সদ্ধিন্দ্রিযং পজানন্তী’’তিআদিনযপ্পৰত্তে অনৰজ্জপক্খে. অধিমোক্খৰসেন আৰজ্জনসমুদযাতি ‘‘অত্থি দিন্ন’’ন্তিআদিনযপ্পৰত্তপুব্বভাগভূতসদ্ধাধিমোক্খৰসেন আৰজ্জনুপ্পত্তিযা. তস্মা পঠমুপ্পন্না সদ্ধা এৰ হেত্থ ‘‘আৰজ্জন’’ন্তি ৰুত্তা, ন মনোদ্ৰারাৰজ্জনং. এস নযো সেসেসুপি. তস্মা পঠমুপ্পন্না আৰজ্জনা পগ্গহুপ্পত্তিট্ঠানানং তিক্খানং ৰীরিযিন্দ্রিযাদীনং পঠমুপ্পত্তিযা আৰজ্জনপরিযাযেন ৰুত্তাতি দট্ঠব্বং. দুব্বলা হি পঠমুপ্পন্না পগ্গহাভাৰতো ৰীরিযিন্দ্রিযাদীনং সমুদযোতি বলৰভাৰপ্পত্তৰীরিযিন্দ্রিযাদিকস্স আৰজ্জনট্ঠানিযানি হোন্তীতি তেসং সমুদযোতি ৰুত্তা, পুব্বে অধিমুচ্চনাদিৰসেন পৰত্তস্স আৰজ্জনস্স সমুদযাতি অত্থো. পুন ছন্দৰসেনাতি কত্তুকামতাকুসলচ্ছন্দৰসেন সদ্ধাদীনং উপ্পাদেতুকামতাকারপ্পৰত্তস্স ছন্দস্স ৰসেন. মনসিকারৰসেন আৰজ্জনসমুদযাতি সদ্ধিন্দ্রিযাদিৰসেন পৰত্তস্স দুব্বলস্স তস্স নিব্বত্তকযোনিসোমনসিকারৰসেন আৰজ্জনস্স উপ্পত্তিযা. এৰম্পীতি ‘‘অধিমোক্খৰসেনা’’তিআদিনা ৰুত্তাকারেনপি. ছসু সুত্তেসূতি দুতিযতো পট্ঠায ছসু সুত্তেসু. চতুসচ্চমেৰ কথিতং. অস্সাদগ্গহণেন হি সমুদযসচ্চং, আদীনৰগ্গহণেন দুক্খসচ্চং, নিস্সরণগ্গহণেন নিরোধমগ্গসচ্চানি গহিতানীতি. পঠমসুত্তে পন ইন্দ্রিযানং সরূপদস্সনমেৰাতি.

৮. দব্বসুত্তৰণ্ণনা

৪৭৮. সোতো আপজ্জীযতি এতেনাতি সোতাপত্তি, অনাগতং পতি পঠমমগ্গো. সোতোতি অরিযমগ্গসোতো দট্ঠব্বো. আপজ্জীযতীতিআদিতো পটিপজ্জীযতি. পঠমমগ্গপটিলাভনিমিত্তানি সোতাপন্নস্স অঙ্গানি ইধ ‘‘সোতাপত্তিযঙ্গানী’’তি ৰুত্তানি. তানি পন তীসু ঠানেসু সদ্ধা অরিযকন্তসীলঞ্চাতি ৰেদিতব্বানি. সৰিসযেতি সকৰিসযে. জেট্ঠকভাৰদস্সনত্থন্তি পধানভাৰদস্সনত্থং. যত্থ সদ্ধাদিইন্দ্রিযানং সাতিসযকিচ্চং, তেসং কিচ্চাতিরেকতং দস্সেতুন্তি অত্থো. ইদানি তমত্থং উপমাহি ৰিভাৰেতুং ‘‘যথা হী’’তিআদি ৰুত্তং. পত্ৰাতি অত্তনো কিচ্চাতিরেকট্ঠানং পটিলভিত্ৰা. পুব্বঙ্গমন্তি সদ্দহনকিচ্চেসু পুরেচারং ধোরয্হং. সেসানি ৰীরিযিন্দ্রিযাদীনি. তদন্ৰযানীতি তদনুগতানি তস্স সদ্ধিন্দ্রিযাদিকস্স পক্খিকানি. এস নযো সেসেসুপি. ঝানৰিমোক্খেতি ঝানসঙ্খাতে ৰিমোক্খে সমাধিপধানতায ঝানানং. এৰঞ্চ কত্ৰা ‘‘সোতাপত্তিযঙ্গানি পত্ৰা’’তি ইদঞ্চ ৰচনং সমত্থিতং হোতি. সদ্ধূপনিসঞ্হি সীলন্তি. অরিযসচ্চানি পত্ৰাতি চত্তারি সচ্চানি অভিসমেতব্বানি পাপুণিত্ৰা.

৯-১০. পঠমৰিভঙ্গসুত্তাদিৰণ্ণনা

৪৭৯-৪৮০. নেপক্কং ৰুচ্চতি পঞ্ঞাতি আহ – ‘‘পঞ্ঞাযেতং নাম’’ন্তি. নিপাযতি সংকিলেসধম্মে ৰিসোসেতি নিক্খামেতীতি নিপকো, থিরতিক্খসতিপুগ্গলো, তস্স ভাৰো নেপক্কন্তি সতিযাপি নেপক্কভাৰো যুজ্জতেৰ. এৰঞ্হি ‘‘সতিনেপক্কেনা’’তি ইদং ৰচনং সমত্থিতং হোতি, সতিযা চ নেপক্কেনাতি এৰং ৰুচ্চমানেন সতিনিদ্দেসো নাম কতো হোতিযেৰ. অসুকং নাম সুত্তং ৰা কম্মট্ঠানং ৰা মে ভাসিতন্তি. ৰোস্সজ্জীযতি সঙ্খারগতং এতস্মিং অধিগতেতি ৰোস্সগ্গো, নিব্বানং. তং আরম্মণং করিত্ৰাতি আহ – ‘‘নিব্বানারম্মণং কত্ৰা’’তি. গচ্ছন্তিযাতি সঙ্খারানং উদযঞ্চ ৰযঞ্চ উদযব্বযং গচ্ছন্তিযা বুজ্ঝন্তিযা. তেনাহ ‘‘উদযব্বযপরিগ্গাহিকাযা’’তি. সদ্ধাসতিপঞ্ঞিন্দ্রিযানি পুব্বভাগানি ‘‘ইতিপি সো ভগৰা অরহং, চিরকতম্পি চিরভাসিতম্পি সরিতা অনুস্সরিতা, উদযত্থগামিনিযা পঞ্ঞাযা’’তি চ ৰুত্তত্তা. ‘‘আরদ্ধৰীরিযো ৰিহরতি, সো অনুপ্পন্নান’’ন্তিআদিনা চ ৰুত্তত্তা ৰীরিযিন্দ্রিযং মিস্সকং. ‘‘ৰোস্সগ্গারম্মণং করিত্ৰা’’তি ৰুত্তত্তা সমাধিন্দ্রিযং নিব্বত্তিতলোকুত্তরমেৰ. অযমেৰাতি য্ৰাযং নৰমে ৰুত্তো. অযমেৰ পুব্বভাগমিস্সকলোকুত্তরত্তধম্মপরিচ্ছেদো.

সুদ্ধিকৰগ্গৰণ্ণনা নিট্ঠিতা.

২. মুদুতরৰগ্গো

১. পটিলাভসুত্তৰণ্ণনা

৪৮১. সম্মপ্পধানে আরব্ভাতি সম্মপ্পধানে ভাৰনাৰসেন আরব্ভ. তেনাহ ‘‘ভাৰেন্তো’’তি. যথা ৰীরিযিন্দ্রিযনিদ্দেসে ‘‘চত্তারো সম্মপ্পধানে আরব্ভ ৰীরিযং পটিলভতী’’তি দেসনা আগতা, এৰং সতিন্দ্রিযনিদ্দেসে ‘‘চত্তারো সতিপট্ঠানে আরব্ভ সতিং পটিলভতী’’তি, তস্মা ‘‘সতিন্দ্রিযেপি এসেৰ নযো’’তি ৰুত্তং. সদ্ধিন্দ্রিযাদিনিদ্দেসেসু পন ন তথা দেসেতি.

২. পঠমসংখিত্তসুত্তৰণ্ণনা

৪৮২. ইন্দ্রিযানং তিক্খাদিভাৰো ৰিপস্সনাৰসেন ৰা মগ্গৰসেন ৰা ফলৰসেন ৰা গহেতব্বোতি ৰুত্তং ‘‘ততোতি…পে… ৰেদিতব্ব’’ন্তি. ননু চেত্থ মুদুভাৰো এৰ পাল়িযং গহিতোতি? সচ্চমেতং, তং পন তিক্খভাৰে অসতি ন হোতি তিক্খাদিভাৰোতি ৰুত্তং. যতো হি অযং মুদু, ইতো তং তিক্খন্তি ৰত্তব্বতং লভতি অপেক্খাসিদ্ধত্তা তিক্খমুদুভাৰানং পারাপারং ৰিয. ইদানি ‘‘ততো’’তিআদিনা সঙ্খেপতো ৰুত্তমত্থং ৰিত্থারতো দস্সেতুং ‘‘সমত্তানী’’তিআদি ৰুত্তং. তত্থ সমত্তানীতি সম্পন্নানি. ইতরং তস্সেৰ ৰেৰচনং. সমত্তানীতি ৰা পরিযত্তানি, সমত্তানীতি অত্থো. ‘‘ততো মুদুতরানি ধম্মানুসারীমগ্গস্সা’’তি কস্মা ৰুত্তং? ততোতি হি সোতাপত্তিমগ্গৰিপস্সনিন্দ্রিযানি অধিপ্পেতানিযেৰ, ‘‘ততো মুদুতরানী’’তি ৰুত্তপঠমমগ্গো ধম্মানুসারী ৰা সিযা সদ্ধানুসারী ৰাতি ব্যভিচরতি? নাযং দোসো, সোতাপত্তিমগ্গেকদেসৰসেনেৰ লদ্ধব্বপঠমমগ্গাপেক্খায ৰিপস্সনায ৰিভাগস্স অধিপ্পেতত্তা. যো হি সোতাপন্নো হুত্ৰা ইরিযাপথং অকোপেত্ৰা যথানিসিন্নোৰ সকদাগামিমগ্গং পাপুণাতি, তস্স ৰিপস্সনিন্দ্রিযানি সন্ধায অৰিভাগেন ৰুত্তং – ‘‘ততো মুদুতরানি সোতাপত্তিমগ্গস্স ৰিপস্সনিন্দ্রিযানি নামা’’তি. যো পন সোতাপন্নো হুত্ৰা কালন্তরেন সকদাগামী হোতি, তস্স সোতাপত্তিমগ্গত্থায পৰত্তানি ৰিপস্সনিন্দ্রিযানি নাম হোন্তি. সো চে ধম্মানুসারীগোত্তো, তস্স যথাৰুত্তৰিপস্সনিন্দ্রিযতো মুদুতরানীতি ‘‘ততো মুদুতরানি ধম্মানুসারীমগ্গস্সা’’তি ৰুত্তং. ৰিপস্সনিন্দ্রিযানি নামাতি আনেত্ৰা সম্বন্ধো. ধম্মানুসারীৰিপস্সনিন্দ্রিযতো সদ্ধানুসারীৰিপস্সনিন্দ্রিযানং মুদুভাৰস্স কারণং সযমেৰ ৰক্খতি. ধম্মেন পঞ্ঞায মগ্গসোতং অনুস্সরতীতি ধম্মানুসারী, পঞ্ঞুত্তরো অরিযো. সদ্ধায মগ্গসোতং অনুস্সরতীতি সদ্ধানুসারী, সদ্ধুত্তরো অরিযো.

এৰং ৰিপস্সনাৰসেন দস্সেত্ৰা মগ্গৰসেন দস্সেতুং ‘‘তথা’’তিআদি আরদ্ধং. সম্পযোগতো সভাৰতো চ অরহত্তমগ্গপরিযাপন্নানি অরহত্তমগ্গিন্দ্রিযানি. অরহত্তফলিন্দ্রিযানীতি এত্থাপি এসেৰ নযো.

ইদানি ফলৰসেন দস্সেতুং ‘‘সমত্তানি পরিপুণ্ণানী’’তিআদি ৰুত্তং. সোতাপত্তিমগ্গট্ঠপুগ্গলৰসেন নানত্তং জাতং, তস্মা তে দ্ৰেপি ইধ ততিযৰারে ন লব্ভন্তীতি অধিপ্পাযো. ধম্মানুসারীসদ্ধানুসারীনং নানত্তং কথং জাতন্তি আহ ‘‘আগমনেনপি মগ্গেনপী’’তি. তদুভযং দস্সেন্তো ‘‘সদ্ধানুসারীপুগ্গলো’’তিআদিমাহ. উদ্দিসাপেন্তোতি উদ্দেসং গণ্হন্তো.

মগ্গো তিক্খো হোতি উপনিস্সযিন্দ্রিযানং তিক্খৰিসদভাৰতো. তেনাহ ‘‘সূরং ঞাণং ৰহতী’’তি. অসঙ্খারেনাতি সরসেনেৰ. অপ্পযোগেনাতি তস্সেৰ ৰেৰচনং. ধম্মানুসারীপুগ্গলো হি আগমনম্হি কিলেসে ৰিক্খম্ভেন্তো অপ্পদুক্খেন অপ্পকসিরেন অকিলমন্তোৰ ৰিক্খম্ভেতুং সক্কোতি. সদ্ধানুসারীপুগ্গলো পন দুক্খেন কসিরেন কিলমন্তো হুত্ৰা ৰিক্খম্ভেতুং সক্কোতি, তস্মা ধম্মানুসারিস্স পুব্বভাগমগ্গক্খণে কিলেসচ্ছেদকঞাণং অদন্ধং তিখিণং হুত্ৰা ৰহতি, যথা নাম তিখিণেন অসিনা কদলিং ছিন্দন্তস্স ছিন্নট্ঠানং মট্ঠং হোতি, অসি খিপ্পং ৰহতি, সদ্দো ন সুয্যতি, বলৰৰাযামকিচ্চং ন হোতি, এৰরূপা ধম্মানুসারিনো পুব্বভাগভাৰনা হোতি, সদ্ধানুসারিনো পন পুব্বভাগক্খণে কিলেসচ্ছেদকঞাণং দন্ধং ন তিখিণং অসূরং হুত্ৰা ৰহতি, যথা নাম নাতিতিখিণেন অসিনা কদলিং ছিন্দন্তস্স ছিন্নট্ঠানং ন মট্ঠং হোতি, অসি সীঘং ন ৰহতি, সদ্দো সুয্যতি, বলৰৰাযামকিচ্চং ইচ্ছিতব্বং হোতি, এৰরূপা সদ্ধানুসারিনো পুব্বভাগভাৰনা হোতি. এৰং সন্তেপি কিলেসক্খযে নানত্তং নত্থি. তেনাহ ‘‘কিলেসক্খযে পনা’’তিআদি. অৰসেসা চ কিলেসা খীযন্তি সংযোজনক্খযায যোগত্তা.

৩. দুতিযসংখিত্তসুত্তৰণ্ণনা

৪৮৩. ততোতি ফলতো ফলৰেমত্ততায চরিযমানত্তা. ইন্দ্রিযৰেমত্ততা সদ্ধাদীনং ইন্দ্রিযানং নানত্তেন. ফলনানত্তন্তি অরহত্তফলাদিনানত্তং. পুগ্গলনানত্তন্তি অনাগামিআদিপুগ্গলনানত্তং.

৪. ততিযসংখিত্তসুত্তৰণ্ণনা

৪৮৪. সীলক্খন্ধাদীহি সদ্ধিন্দ্রিযাদীহি চ পরিতো পূরণেন পরিপূরং অরহত্তমগ্গং করোন্তো নিপ্ফত্তিতো অরহত্তফলং আরাধেতি নিপ্ফাদেতি. তযো পদেসমগ্গেতি সীলক্খন্ধাদীনং অপারিপূরিযা একদেসভূতে তযো হেট্ঠিমমগ্গে. পদেসং হেট্ঠিমফলত্তযং. চতূসূতি ইমস্মিং ৰগ্গে পঠমাদীসু চতূসু সুত্তেসু. কামঞ্চেত্থ ততিযে ‘‘ততোতি ফলৰসেন নিস্সক্ক’’ন্তি ৰুত্তং, চতুত্থে ‘‘পরিপূরং পরিপূরকারী আরাধেতি, পদেসং পদেসকারী’’তি, ‘‘চতূসুপি সুত্তেসু মিস্সকানেৰ ইন্দ্রিযানি কথিতানী’’তি পন ৰচনতো ৰিপস্সনাৰসেনপি যোজনা লব্ভতেৰাতি দট্ঠব্বং.

৫-৭. পঠমৰিত্থারসুত্তাদিৰণ্ণনা

৪৮৫-৪৮৭. ৰিপস্সনাৰসেন নিস্সক্কং ৰেদিতব্বং, ন মগ্গফলৰসেন, ইমস্মিং সুত্তে সব্বসোৰ ৰিপস্সনিন্দ্রিযানং এৰ অধিপ্পেতত্তা. ইদানি তমত্থং পাকটং কাতুং ‘‘পরিপুণ্ণানি হী’’তিআদি ৰুত্তং. অৰিহাদীসু পঞ্চসু সুদ্ধাৰাসেসু তত্থ তত্থ আযুৰেমজ্ঝং অনতিক্কমিত্ৰা অন্তরা কিলেসপরিনিব্বানেন পরিনিব্বাযনতো অন্তরাপরিনিব্বাযী, অসঙ্খারেন অপ্পযোগেন সরসতোৰ পরিনিব্বাযনতো অসঙ্খারপরিনিব্বাযী, তব্বিপরিযাযতো সসঙ্খারপরিনিব্বাযী, উদ্ধং ৰাহিভাৰেন উদ্ধমস্স তণ্হাসোতং ৰট্টসোতং ৰাতি উদ্ধংসোতো, উদ্ধং ৰা গন্ত্ৰা পটিলভিতব্বতো উদ্ধমস্স মগ্গসোতন্তি উদ্ধংসোতো, অকনিট্ঠভৰং গচ্ছতীতি অকনিট্ঠগামীতি এৰমেত্থ সদ্দত্থো দট্ঠব্বো.

ইমস্মিং পন ঠানেতি ‘‘ৰিপস্সনাৰসেন নিস্সক্ক’’ন্তি ৰুত্তট্ঠানে. অরহত্তমগ্গেযেৰ ঠত্ৰাতি ইমস্মিংযেৰ ভৰে অরহত্তমগ্গেযেৰ, ন ৰিপস্সনায চ ঠত্ৰা. পঞ্চ নিস্সক্কানি নীহরিতব্বানীতি ‘‘ততো মুদুতরেহি অন্তরাপরিনিব্বাযী হোতী’’তিআদীনি পঞ্চ নিস্সক্কানি নিদ্ধারেত্ৰা কথেতব্বানি. ইদানি তমত্থং ৰিৰরন্তো ‘‘অরহত্তমগ্গস্স হী’’তিআদিমাহ. তত্থ অৰিহাদীসু উপ্পজ্জিত্ৰা উপ্পন্নসমনন্তরায পরিনিব্বাযনতো পঠমঅন্তরাপরিনিব্বাযী. তত্থ আযুপ্পমাণৰেমজ্ঝং অপ্পত্ৰাৰ পরিনিব্বাযনতো দুতিযঅন্তরাপরিনিব্বাযী, আযুৰেমজ্ঝং পত্ৰা পরিনিব্বাযনতো ততো পরং ততিযঅন্তরাপরিনিব্বাযী ৰেদিতব্বো. ‘‘পঞ্চ নিস্সক্কানী’’তি কস্মা ৰুত্তং? ননু অসঙ্খারসসঙ্খারপরিনিব্বাযীতি ৰত্তব্বন্তি? ন ৰত্তব্বন্তি দস্সেন্তো আহ ‘‘অসঙ্খারপরিনিব্বাযিস্স সসঙ্খারপরিনিব্বাযিনোপি এতেৰ পঞ্চ জনা’’তি.

তীণি নিস্সক্কানীতি ‘‘ততো মুদুতরেহি সোতাপন্নো হোতী’’তিআদীনি তীণি নিস্সক্কপদানি. ইধ সকদাগামী ন গহিতো, সো অনাগামিমগ্গে ঠত্ৰা নীহরিতব্বো, অনাগামিমগ্গস্স ৰিপস্সনিন্দ্রিযেহি মুদুতরেহি সকদাগামী হোতি. সকদা…পে… মুদুতরানীতি ইদং সকদাগামিমগ্গস্স ৰিপস্সনিন্দ্রিযেহি একবীজিসঙ্খাতসোতাপন্নৰিপস্সনিন্দ্রিযানি মুদুতরানি হোন্তীতি তীণি কত্ৰা ৰুত্তং. ধম্মানুসারীতিআদিদ্ৰযং কোলংকোলাদিদ্ৰযেন গহিতং হোতীতি. সকদাগামিমগ্গস্স হীতিআদি ৰুত্তস্সেৰ অত্থস্স ৰিৰরণং. সেসং হেট্ঠা ৰুত্তনযমেৰ. ছট্ঠসত্তমানি ৰুত্তনযানেৰাতি ছট্ঠসত্তমানি সুত্তানি দুতিযততিযেসু ৰুত্তনযানেৰ. তত্থ পন মিস্সকানি ইন্দ্রিযানি কথিতানি, ইধ পুব্বভাগৰিপস্সনিন্দ্রিযানি কথিতানীতি অযমেৰ ৰিসেসো.

৮. পটিপন্নসুত্তৰণ্ণনা

৪৮৮. তন্তি মগ্গফলৰসেন নিস্সক্কং. পাল়িযং ৰুত্তমেৰ ‘‘অরহত্তফলসচ্ছিকিরিযায পটিপন্নো হোতী’’তিআদিনা. অট্ঠহীতি চতূহি ফলেহি চতূহি চ মগ্গেহীতি অট্ঠহি. বহিভূতো ন অন্তোভাৰো. লোকুত্তরানেৰ ইন্দ্রিযানি কথিতানি মগ্গফলচিত্তুপ্পাদপরিযাপন্নত্তা.

৯-১০. সম্পন্নসুত্তাদিৰণ্ণনা

৪৮৯-৪৯০. ইন্দ্রিযসম্পন্নোতি এত্থ সম্পন্নসদ্দো পরিপূরিঅত্থোতি আহ ‘‘পরিপুণ্ণিন্দ্রিযো’’তি. মিস্সকানি ইন্দ্রিযানি কথিতানি সামঞ্ঞতোৰ দেসিতত্তা.

মুদুতরৰগ্গৰণ্ণনা নিট্ঠিতা.

৩. ছল়িন্দ্রিযৰগ্গো

২. জীৰিতিন্দ্রিযসুত্তৰণ্ণনা

৪৯২. ইত্থিভাৰেতি ইত্থিতায. ইন্দট্ঠং করোতি তথাসত্তজনসামঞ্ঞকারণভাৰতো. ইত্থিযা এৰ ইন্দ্রিযং ইত্থিন্দ্রিযং. এস নযো পুরিসিন্দ্রিযে. জীৰিতেতি সহজাতধম্মানং জীৰনে পালনে পৰত্তনে. ৰট্টিন্দ্রিযানীতি ৰট্টহেতুভূতানি ইন্দ্রিযানি. ইমেসু হি উপাদিন্নইন্দ্রিযেসু সতি ৰট্টং ৰত্ততি পঞ্ঞাযতি.

৩. অঞ্ঞিন্দ্রিযসুত্তৰণ্ণনা

৪৯৩. অজানিতপুব্বং ধম্মন্তি চতুসচ্চধম্মমাহ, তথা তেসংযেৰ ঞাতধম্মানন্তি. অযং পনেত্থ অত্থো – আজানাতীতি অঞ্ঞা, পঠমমগ্গেন ঞাতমনতিক্কমিত্ৰা জানাতীতি অত্থো. সোতাপন্নাদীনং ছঅরিযানং এতং নামং. অঞ্ঞস্স ইন্দ্রিযানি অঞ্ঞিন্দ্রিযানি. অঞ্ঞাতাৰীসূতি আজানিতৰন্তেসু. যস্মা অগ্গফলধম্মেসু ঞাণকিচ্চং সাতিসযং, তস্মা তং কিচ্চং সেসধম্মেসুপি সমারোপেত্ৰা ৰুত্তং ‘‘অঞ্ঞাতাৰীসু অরহত্তফলধম্মেসূ’’তি. তত্থ তত্থ তেসু তেসু মগ্গফলেসু. তেন তেনাকারেনাতি অনঞ্ঞাতজাননাদিআকারেন.

৪. একবীজিসুত্তৰণ্ণনা

৪৯৪. ৰিপস্সনতো নিস্সক্কন্তি ৰিপস্সনিন্দ্রিযেহি নিস্সক্কং. ইদানি তমেৰ সঙ্খেপতো ৰুত্তমত্থং ৰিৰরন্তো ‘‘সমত্তানী’’তিআদিমাহ. তীণি নিস্সক্কানি এৰমিধ পঞ্চ নিস্সক্কানি নীহরিতব্বানি একবীজিআদিৰিভাৰনতো. তেনাহ ‘‘সকদাগামিমগ্গস্স হী’’তিআদি. সোতাপত্তিমগ্গস্স ৰিপস্সনিন্দ্রিযানি নাম তেনত্তভাৰেন সকদাগামিমগ্গং পত্তুং গচ্ছন্তস্স সোতাপন্নস্স ৰিপস্সনিন্দ্রিযানি. পঞ্চপি তে সোতাপত্তিমগ্গস্স ভেদাযেৰাতি ‘‘সকদাগামিমগ্গে ঠত্ৰা নীহরিতব্বানী’’তি ৰুত্তং.

একবীজীতি এত্থ খন্ধবীজং নাম কথিতং. যস্স হি সোতাপন্নস্স একং খন্ধবীজং অত্থি, একং অত্তভাৰগ্গহণং, সো একবীজি নাম. তেনাহ – ‘‘সোতাপন্নো হুত্ৰা’’তিআদি. মানুসকং ভৰন্তি ইদং পনেত্থ দেসনামত্তং, দেৰভৰং নিব্বত্তেতীতিপি ৰত্তুং ৰট্টতিযেৰ. ভগৰতা গহিতনামানেতানি. এত্তকঞ্হি পমাণং গতো সত্তক্খত্তুপরমো নাম হোতি, এত্তকং কোলংকোলো, এত্তকং একবীজীতি ভগৰতা এতেসং নামং গহিতং.

দ্ৰে তযো ভৰেতি দেৰমনুস্সেসু এৰ দ্ৰে তযো ভৰে. সম্বোধিচতুসচ্চধম্মো পরং অযনং নিস্সযো গতি এতস্সাতি সম্বোধিপরাযণো. কুলতো কুলং গচ্ছতীতি কোলংকোলো. সোতাপত্তিফলসচ্ছিকিরিযতো পট্ঠায হি নীচকুলে উপ্পত্তি নাম নত্থি, মহাভোগেসু কুলেসু এৰ নিব্বত্ততীতি অত্থো. কেৰলোপি হি কুল-সদ্দো মহাভোগকুলমেৰ ৰদতি. দ্ৰে ৰা তীণি ৰা কুলানীতি দেৰমনুস্সৰসেন দ্ৰে ৰা তযো ৰা ভৰেতি অযম্পি মিস্সকভৰেন কথিতো. জাতস্স কুমারস্স ৰিয অরিযায জাতিযা জাতস্স নামমেতং, যদিদং নিযতোতি সত্তক্খত্তুপরমাদিকোতি চ সমঞ্ঞাতি দস্সেন্তো আহ ‘‘ভগৰতা গহিতনামৰসেনেৰা’’তিআদি.

যদি পুব্বহেতুনিযমতো সোতাপন্নো চ নিযতোতি সোতাপত্তিমগ্গতো উদ্ধং তিণ্ণং মগ্গানং উপনিস্সযাভাৰতো পুব্বহেতুকিচ্চং নত্থীতি সোতাপত্তিমগ্গস্স উপনিস্সযভাৰো আপজ্জতি. যদি তস্সপি পুব্বহেতুউপনিস্সযো সিযা, তাৰ নিযমতো সোতাপত্তিমগ্গুপ্পত্তিতো পুব্বে এৰ নিযমিতো, যাৰঞ্চ অকনিট্ঠং তস্স পুব্বহেতু নাম, অহেতুকতা আপন্না, ইচ্চস্স অহেতু অপ্পচ্চযা নিপ্ফত্তি পাপুণাতি. কিঞ্চ হেতু চে? নিযমতো সোতাপন্নো চ নিযতোতি পঠমমগ্গাধিগমেনেৰ অনুক্কমেন উপরি তিণ্ণং মগ্গানং কিচ্চানি নিপ্ফজ্জন্তি, এৰং সত্তক্খত্তুপরমতাদিনিযমে সতি সত্তমভৰাদিতো উদ্ধং পৰত্ততায দুক্খস্স মূলভূতা কিলেসা পঠমমগ্গেনেৰ খীণাতি উপরি তযো মগ্গা অকিচ্চা সিযুং. তেনাহ ‘‘পঠমমগ্গস্স উপনিস্সযো কতো নামা’’তিআদি.

যদি উপরি তযো মগ্গা সত্তক্খত্তুপরমাদিতং নিযমেন্তি, ততো চ অঞ্ঞো সোতাপন্নো নত্থীতি সোতাপত্তিমগ্গস্স অকিচ্চকতা নিপ্পযোজনতা আপজ্জেয্য. অথ সক্কাযদিট্ঠিআদিপ্পহানং তস্স কিচ্চং, তেসং তেসং পহানেন সত্তক্খত্তুপরমাদিনিযমতায. ভৰিতব্বং, যাৰ উপরিমগ্গা এৰ হোন্তীতি সত্তভৰাদিতো উদ্ধমপৰত্তনতো তেন ৰিনানেন সক্কাযদিট্ঠিআদিপ্পহানেন চ তেন ৰিনা ভৰিতব্বন্তি আহ – ‘‘পঠমমগ্গে অনুপ্পন্নেৰ উপরি তযো মগ্গা উপ্পন্নাতি আপজ্জতী’’তি. তিণ্ণং মগ্গানন্তি উপরি তিণ্ণং মগ্গানং. ৰিপস্সনা নিযমেতীতি যুজ্জতীতি ৰুত্তমত্থং ৰিৰরন্তো ‘‘সচে হী’’তিআদিমাহ.

সোতাপন্নো ৰট্টজ্ঝাসযো. তত্রেকচ্চে পাকটে পঞ্ঞাতে দস্সেন্তো ‘‘অনাথপিণ্ডিকো’’তিআদিমাহ. ইধট্ঠকৰোকিণ্ণসুক্খৰিপস্সকস্সাতি যো ইমস্মিং কামভৰে ঠিতো মনুস্সদেৰৰসেন ৰোকিণ্ণভৰূপপত্তিকো সুক্খৰিপস্সকো চ, তস্স ৰসেন. নামং কথিতন্তি সত্তক্খত্তুপরমোতি নামং কথিতং. কেচি পন ‘‘কামভৰে সত্তক্খত্তুংযেৰ উপ্পজ্জতি, ন ততো’’তি ৰদন্তি, তং ৰীমংসিতব্বং.

সোধেস্সামীতি জম্বুদীপে কেনচি তেপিটকেন ভিক্খুনা সদ্ধিং পিটকত্তযমেৰ ময্হং উগ্গহপরিপুচ্ছাৰসেন সোধেয্যামীতি পরতীরং জম্বুদীপং গতো. যো ভিক্খু সক্কোতীতি যোজনা. অনিচ্চানুপস্সনাদীসু একমুখেন অভিনিৰিট্ঠেনপি অভিধম্মপরিযাযেন তীহি এৰ ৰিমোক্খেহি মগ্গং লভতীতি অভিনিৰেসভেদেন তযো পুগ্গলা সুঞ্ঞততো ৰুট্ঠিতা, তথা তযো অপ্পণিহিততো ৰুট্ঠিতাতি ছ হোন্তি, তেৰ সদ্ধাধুরপঞ্ঞাধুরৰসেন দ্ৰাদস সকদাগামিনো. তথা অরহন্তো, তযো অন্তরাপরিনিব্বাযিনো একো উপহচ্চপরিনিব্বাযী একো উদ্ধংসোতো অকনিট্ঠগামীতি পঞ্চ, তে অসঙ্খারসসঙ্খারপরিনিব্বাযিভেদেন দসাতি অৰিহাদীসু চতূসুপি চত্তালীস, অকনিট্ঠে পন উদ্ধংসোতো নত্থীতি অট্ঠচত্তালীস অনাগামিনো. ৰিপস্সনা কথিতা সম্মসনচারস্স কথিতত্তা.

৫-১০. সুদ্ধকসুত্তাদিৰণ্ণনা

৪৯৫-৫০০. যথা চক্খুস্স সহজাততদিন্দ্রিযনিস্সিতধম্মেসু অধিপতেয্যং অনুৰত্তনীযত্তা, এৰং তংদ্ৰারিকধম্মেসুপি অধিপতেয্যং তেহি অনুৰত্তনীযত্তাতি ৰুত্তং – ‘‘অধিপতেয্যসঙ্খাতেন ইন্দট্ঠেনা’’তি. এস নযো সেসিন্দ্রিযাদীসুপি. চতুসচ্চৰসেন কথিতানি সভাৰাদিৰিভাৰনস্স কথিতত্তা.

ছল়িন্দ্রিযৰগ্গৰণ্ণনা নিট্ঠিতা.

৪. সুখিন্দ্রিযৰগ্গো

১-৫. সুদ্ধিকসুত্তাদিৰণ্ণনা

৫০১-৫০৫. যথা চক্খু দস্সনে অধিপতেয্যট্ঠেন চক্খুন্দ্রিযং, এৰং সুখৰেদনা সুখনে অধিপতেয্যট্ঠেন সুখিন্দ্রিযং. এস নযো সেসেসুপি. সেসং তেভূমকন্তি সেসং ভূমিত্তযৰসেন তেভূমকং.

৬. পঠমৰিভঙ্গসুত্তৰণ্ণনা

৫০৬. কাযিকন্তি অযমস্স নিস্সযৰসেন নিদ্দেসোতি আহ – ‘‘কাযপসাদৰত্থুক’’ন্তি. সরূপনিদ্দেসো সুখং সুখিন্দ্রিযস্স সরূপন্তি. সাদনীযট্ঠেন ধম্মপদানি অত্তনি অস্সাদযতীতি সাতং, মধুরং. ৰেদযিতন্তি ৰেদিযনং, অনুভৰনন্তি অত্থো. অঞ্ঞধম্মৰিসিট্ঠোতি ফস্সাদীহি অঞ্ঞেহি ধম্মেহি ৰিসদিসো. কাযিকন্তি পসাদকাযসন্নিস্সিতং. চেতসিকন্তি চেতোসন্নিস্সিতং, তেন ৰুত্তং ‘‘এত্থ পনা’’তিআদি. কাযপসাদ…পে… নত্থি, তস্মা ‘‘চত্তারো পসাদকাযে ৰত্থুং কত্ৰা’’তি ৰুত্তং.

৯. কট্ঠোপমসুত্তৰণ্ণনা

৫০৯. দ্ৰিন্নং অরণীনন্তি অধরুত্তরারণীনং. কিঞ্চি দ্ৰযং সঙ্ঘট্টিতমত্তং হুত্ৰা ন সমোধানগতং হোতীতি তংনিৰত্তনত্থং ‘‘সঙ্ঘট্টনসমোধানা’’তি ৰুত্তং. পুনপ্পুনং সঙ্ঘট্টনেন হি তেজোপাতুভাৰো. অধরারণী ৰিয ৰত্থারম্মণং অসতিপি ৰাযামে তজ্জসম্ফস্সপচ্চযতো. উত্তরারণী ৰিয ফস্সো ৰত্থারম্মণাদিফস্সেন পৰত্তনতো. সঙ্ঘট্টো ৰিয ফস্সসঙ্ঘট্টনং অরণিদ্ৰযসঙ্ঘট্টনা ৰিয ফস্সস্সেৰ ৰত্থারম্মণেসু সঙ্ঘট্টনাকারেন পৰত্তিতো. অগ্গি ৰিয ৰেদনা অনুদহনট্ঠেন খণিকাৰাযঞ্চ. ৰত্থারম্মণং ৰা উত্তরারণী ৰিয ইন্ধনাপাতগহণাদীসু উস্সাহস্স ৰিয পৰত্তিসম্ভৰতো. ফস্সো অধরারণী ৰিয নিরুস্সাহনিরীহতাৰসেন অত্তসাধনতো.

১০. উপ্পটিপাটিকসুত্তৰণ্ণনা

৫১০. রসনং ভঞ্জনং নিরুজ্ঝনং রসো. যো যো ধম্মানং রসো যথাধম্মরসো, তেন যথাধম্মরসেন. পটিপাটিযাতি কমেন, উভযেনপি ধম্মানং পহানক্কমেনাতি ৰুত্তং হোতি. ইমস্মিং ইন্দ্রিযৰিভঙ্গেতি ইমস্মিং ইন্দ্রিযসংযুত্তসঞ্ঞিতে ইন্দ্রিযৰিভঙ্গে. অদেসিতত্তাতি সেসসুত্তানি ৰিয ‘‘সুখিন্দ্রিয’’ন্তিআদিনা অদেসিতত্তা ইদং উপ্পটিপাটিকসুত্তং নাম. ৰলিযা খরসম্ফস্সায ফুট্ঠস্স. তন্তি কণ্টকৰেদনাদিং. এতস্স দুক্খিন্দ্রিযস্স.

তেসং তেসন্তি দোমনস্সিন্দ্রিযাদীনং. কারণৰসেনেৰাতি তংতংঅসাধারণকারণৰসেন. তেসঞ্হি ৰিসেসকারণং দস্সেন্তো ‘‘পত্তচীৰরাদীনং ৰা’’তি আহ.

একতোৰাতি পুনপ্পুনং পদুদ্ধারণং অকত্ৰা একজ্ঝমেৰ. দুতিযজ্ঝানাদীনং উপচারক্খণে এৰ নিরুজ্ঝন্তীতি আনেত্ৰা সম্বন্ধো. তেসং দুক্খিন্দ্রিযদোমনস্সাদীনং. অতিসযনিরোধোতি সুট্ঠু পহানং উজুপ্পটিপক্খেন ৰূপসমো. নিরোধোযেৰাতি নিরোধমত্তমেৰ. নানাৰজ্জনেতি যেন আৰজ্জনেন অপ্পনাৰীথি হোতি, ততো ভিজ্জাৰজ্জনে, অনেকাৰজ্জনে ৰা. অপ্পনাৰীথিযঞ্হি উপচারো একাৰজ্জনো, ইতরো অনেকাৰজ্জনো অনেকক্খত্তুং পৰত্তনতো. ৰিসমনিসজ্জায উপ্পন্নকিলমথো ৰিসমাসনুপতাপো. পীতিফরণেনাতি পীতিযা ফরণরসত্তা. পীতিসমুট্ঠানানং ৰা পণীতরূপানং কাযস্স ব্যাপনতো ৰুত্তং. তেনাহ ‘‘সব্বো কাযো সুখোক্কন্তো হোতী’’তি. ৰিতক্কৰিচারপচ্চযেপীতি পি-সদ্দো অট্ঠানপযুত্তো, সো ‘‘পহীনস্সা’’তি এত্থ আনেত্ৰা সম্বন্ধিতব্বো ‘‘পহীনস্সপি দোমনস্সিন্দ্রিযস্সা’’তি. এতং দোমনস্সিন্দ্রিযং উপ্পজ্জতীতি সম্বন্ধো. ‘‘তস্স ময্হং অতিচিরং ৰিতক্কযতো ৰিচারযতো কাযোপি কিলমি, চিত্তম্পি ৰিহঞ্ঞী’’তি চ ৰচনতো কাযচিত্তখেদানং ৰিতক্কৰিচারপচ্চযতা ৰেদিতব্বা. ৰিতক্কৰিচারভাৰে উপ্পজ্জতি দোমনস্সিন্দ্রিযন্তি আনেত্ৰা সম্বন্ধিতব্বং. তত্থস্স সিযা উপ্পত্তীতি তত্থ দুতিযজ্ঝানুপচারে অস্স দোমনস্সস্স উপ্পত্তি ভৰেয্য. ‘‘তত্থস্স সিযা উপ্পত্তী’’তি ইদং পরিকপ্পৰচনং উপচারক্খণে দোমনস্সস্স সুপ্পহীনভাৰদস্সনত্থং. তথা হি ৰুত্তং ‘‘ন ত্ৰেৰ দুতিযজ্ঝানে পহীনপচ্চযত্তা’’তি. পহীনম্পি সোমনস্সিন্দ্রিযং পীতি ৰিয ন দূরেতি কত্ৰা ‘‘আসন্নত্তা’’তি ৰুত্তং. নানাৰজ্জনুপচারে পহীনম্পি পহানঙ্গং পটিপক্খেন অৰিহতত্তা অন্তরন্তরা উপ্পজ্জেয্যাতি ইমমত্থং দস্সেন্তো ‘‘অপ্পনাপ্পত্তাযা’’তিআদিমাহ. ‘‘তাদিসায আসেৰনায ইচ্ছিতব্বত্তা যথা মগ্গৰীথিতো পুব্বে দ্ৰে তযো জৰনৰারা সদিসানুপস্সনাৰ পৰত্তন্তি, এৰমিধাপি অপ্পনাৰারতো পুব্বে দ্ৰে তযো জৰনৰারা উপেক্খাসহগতাৰ পৰত্তন্তী’’তি ৰদন্তি. অপরিসেসন্তি সুৰিক্খম্ভিতন্তি কত্ৰা ৰিক্খম্ভনেন অনৰসেসং.

তথত্তাযাতি তথভাৰায পঠমজ্ঝানসমঙ্গিতায. সা পনস্স উপ্পাদনেন ৰা উপ্পন্নস্স সমাপজ্জনেন ৰা হোতীতি ৰুত্তং ‘‘উপ্পাদনত্থায সমাপজ্জনত্থাযা’’তি. দ্ৰীসূতি নৰমদসমেসু সুত্তন্তেসু.

সুখিন্দ্রিযৰগ্গৰণ্ণনা নিট্ঠিতা.

৫. জরাৰগ্গো

১. জরাধম্মসুত্তৰণ্ণনা

৫১১. পমুখে, পাসাদস্স চ পচ্ছিমভাগে আতপো পচ্ছাতপো, তস্মিং পচ্ছাতপে. সো হি পাসাদস্স পমুখভাৰেন কতো. কিং পন ভগৰতো ৰজিরসারং সরীরং ওতাপেতব্বং হোতীতি আহ – ‘‘সম্মাসম্বুদ্ধস্সা’’তিআদি. অযঞ্চ ইমং সুত্তং দেসিতসমযে. ন সক্কোতি ব্যামপ্পভায কাযচি পভায অনভিভৰনীযত্তা. কিঞ্চাপি বুদ্ধাভা সূরিযাভায অনভিভৰনীযা, ঘম্মসভাৰতায পন রস্মীনং পরিতো ফরন্তী সূরিযাভা তিখিণা উণ্হাতি আহ ‘‘রস্মিতেজ’’ন্তি. ইদানি তমত্থং উপমায ৰিভাৰেতুং ‘‘যথেৰ হী’’তিআদি ৰুত্তং.

সুৰণ্ণাৰট্টং ৰিযাতি অচ্ছে সুৰণ্ণপত্তে ৰিনিৰত্তআৰট্টং ৰিয. গরহণচ্ছরিযং নাম কিরেতং ‘‘অচ্ছরিযমেতং অৰিসিচ্ছেফলৰদ’’ন্তিআদীসু ৰিয. ন এৰমেতরহীতি অত্তনো পাকটৰসেন ৰদতি, ন ইতরেসম্পীতি. সিরাজালাতি সিরাসন্তানা. এৰরূপং ন হোতীতি অঞ্ঞেসং পাকতিকসত্তানং ৰুত্তাকারং ৰিয ন হোতি পুঞ্ঞসম্ভারস্স উল়ারতমত্তা ৰিপচ্চনস্স পরিযন্তগতত্তা. তেনাহ ‘‘অঞ্ঞেসং অপাকট’’ন্তি. ৰলিযাৰট্টকন্তি অপ্পকং ৰলিযাৰট্টং. তেনাহ ‘‘কেসগ্গপ্পমাণ’’ন্তি. সব্বানীতি সিরাজালানি. পুরতো ৰঙ্কোতি থোকং পুরতো নতমত্তং সন্ধাযাহ. তেন ৰুত্তং ‘‘স্ৰাযং অঞ্ঞেসং অপাকটো’’তি. নযগ্গাহতোতি অনুমানতো. ধী তন্তি ধী-সদ্দযোগে উপযোগৰচনং. ধীতি জিগুচ্ছনত্থে নিপাতো. ধিক্কারোতি জিগুচ্ছাপযোগো. তং ফুসতূতি তুয্হং পাপুণাতু.

২. উণ্ণাভব্রাহ্মণসুত্তৰণ্ণনা

৫১২. অঞ্ঞমঞ্ঞস্সাতি অঞ্ঞো অঞ্ঞস্স. ন পচ্চনুভোতি অত্তনো অৰিসযভাৰতো. ইদানি তং অঞ্ঞৰিসযতং অন্ৰযতো ব্যতিরেকতো ৰিভাৰেতুং ‘‘সচে হী’’তিআদি ৰুত্তং.

ৰিসযানি পটিসরন্তি এত্থাতি পটিসরণং. ইন্দ্রিযৰিঞ্ঞাণানি হি অসতিপি তাদিসে অধিপ্পাযে অত্তনো আরম্মণস্স যাথাৰতো সম্পজাননতো পৰেদনৰিজাননানি করোন্তানি ৰিয পৰত্তন্তি, তথা লোকস্স অঞ্ঞত্থ সিদ্ধিতো. তেনাহ ভগৰা – ‘‘মনো পটিসরণং, মনোৰ নেসং গোচরৰিসযং পচ্চনুভোতী’’তি মনোদ্ৰারিকজৰনমনো হি সৰিসেসং মনোৰিসযং পচ্চনুভোতি, পঞ্চদ্ৰারিকজৰনমনো মননমত্তমেৰ পচ্চনুভৰতি. রজ্জনাদিগ্গহণঞ্চেত্থ নিদস্সনমত্তং, তস্মা সদ্দহনাদিপি গহিতমেৰাতি দট্ঠব্বং, পঞ্চদ্ৰারপ্পৰত্তিৰসেন তথা ৰুত্তং. একস্মিং পন দ্ৰারেতি চক্খুদ্ৰারে.

দুব্বলভোজকাতি অপ্পানুভাৰা রাজভোগ্গা. আযন্তি ভোগুপ্পত্তিট্ঠানং. যোত্তবন্ধাদিনিমিত্তং লদ্ধব্বকহাপণো যোত্তকহাপণো. অদ্দুবন্ধাদিনিমিত্তং গহেতব্বকহাপণো অদ্দুকহাপণো. মাঘাতঘোসনায কতায হিংসানিমিত্তং গহেতব্বকহাপণো মাপহারকহাপণো. তস্স পরিমাণং দস্সেতুং ‘‘অট্ঠকহাপণো’’তিআদি ৰুত্তং. সতৰত্থুকন্তি সতকরীসৰত্থুকং.

মগ্গসতীতি অরিযমগ্গসতি. ভাৰনমনুযুঞ্জন্তস্স হি জৰনমনো উস্সক্কিত্ৰাৰ মগ্গসতিং পটিসরতি তপ্পরিযোসানত্তা. তন্তি নিব্বানং. সাতি ফলৰিমুত্তি. পটিসরতি অগ্গমগ্গসতিযা. ফলৰিমুত্তি নিব্বানন্তি উভযং মগ্গস্স সিদ্ধাযেৰাতি. আরম্মণৰসেন নত্থি এতস্স পটিসরণন্তি অপ্পটিসরণং অসঙ্খতামতস্স সন্তিনিচ্চসভাৰত্তা. সযং পন সব্বেসংযেৰ অরিযানং পটিসরণং. তেনাহ ‘‘নিব্বানং অরহতো গতী’’তি (পরি. ৩৩৯). নিব্বানং অনুপৰিট্ঠং নিব্বাননিস্সযত্তা. ন ততো পরং গচ্ছতি গতস্স অঞ্ঞস্স তাদিসস্স অভাৰা. নিব্বানং পরি সব্বসো ওসানন্তি নিব্বানপরিযোসানং.

মূলজাতা জাতমূলা. ততো এৰ পতিট্ঠিতা. কা পনস্সাতি আহ ‘‘মগ্গেন আগতসদ্ধা’’তি. মগ্গো দল়্হায অসংহারিযসদ্ধায মূলং দিট্ঠিসম্পযুত্তানি চেৰ ৰিচিকিচ্ছাচিত্তঞ্চাতি পঞ্চ অকুসলচিত্তানি সমুচ্ছেদৰসেন পহীনানি. পঞ্চ নীৰরণানীতি এত্থ অপাযগমনীযানি পঠমমগ্গেনেৰ পহীনানি, ইতরানি ৰিক্খম্ভনৰসেন ঝানেন পহীনানীতি পঞ্চসু ওরম্ভাগিযকিলেসসংযোজনেসু একদেসৰিগমেনেৰ বহিদ্ধাসংযোজনো ৰিয জাতোতি ৰুত্তং ‘‘ঝানঅনাগামিট্ঠানে ঠিতো’’তি. তেনাহ ‘‘সো অপরিহীন…পে… নিব্বাযেয্যা’’তি.

৫. পঠমপুব্বারামসুত্তৰণ্ণনা

৫১৫. পুব্বকোট্ঠকে এৰং আগতসুত্তং আদিং কত্ৰা ফলিন্দ্রিযানেৰ কথিতানি অগ্গফলৰসেন দেসনায আগতত্তা.

১০. আপণসুত্তৰণ্ণনা

৫২০. উপরি সহ ৰিপস্সনায তযো মগ্গাতি ৰিপস্সনায সহ সোতাপত্তিফলতো উপরি তযো মগ্গা. মগ্গাধিগমেন ইদানি পচ্চক্খভূতত্তা ‘‘ইমে খো তে ধম্মা’’তি ৰুত্তা. তত্থ যং অগ্গভূতং, তস্স ৰসেন দস্সেতুং ‘‘অরহত্তফলিন্দ্রিযং নামা’’তি ৰুত্তং ইন্দ্রিযভাৰসামঞ্ঞেন একজ্ঝং কত্ৰা. অতিৰিজ্ঝিত্ৰা পস্সামীতি সচ্ছিকত্ৰা যাথাৰতো পস্সামি. চতূহি ইন্দ্রিযেহীতি ৰীরিযিন্দ্রিযাদীহি চতূহি ইন্দ্রিযেহি. সা ৰিপস্সনামগ্গফলসহগতা সিযাতি মিস্সকা ৰুত্তা.

জরাৰগ্গৰণ্ণনা নিট্ঠিতা.

৬. সূকরখতৰগ্গো

১. সালসুত্তৰণ্ণনা

৫২১. সূরভাৰেনাতি অতিসূরভাৰেন. বুজ্ঝনত্থাযাতি সচ্চপটিৰেধায.

২. মল্লিকসুত্তৰণ্ণনা

৫২২. চত্তারি ইন্দ্রিযানীতি পঞ্ঞিন্দ্রিযং ঠপেত্ৰা সেসানি চত্তারি. ‘‘অরিযঞাণং লোকুত্তর’’ন্তি ৰুত্তং মগ্গঞাণং কত্ৰা. অরিয-সদ্দো পন যথা তথা ৰিসুদ্ধেপি হোতীতি তাদিসং সন্ধায ৰুত্তং ‘‘তম্পি পনা’’তিআদি. যথা হি চত্তারিন্দ্রিযানি মিস্সকানি, এৰং পঞ্ঞিন্দ্রিযম্পি মিস্সকন্তি ৰুচ্চমানে ন কোচি ৰিরোধোতি অধিপ্পাযেনাহ ‘‘তম্পি পন…পে… ৰট্টতী’’তি.

৩. সেখসুত্তৰণ্ণনা

৫২৩. ন সক্কোতি ইন্দ্রিযানং অপরিপক্কত্তা. অত্থীতি পজানাতি নযগ্গাহেন, ন পচ্চক্খতো. ন হি অরিযাপি অনধিগতং মগ্গফলং পচ্চৰেক্খিতুং সক্কোন্তি.

৬. পতিট্ঠিতসুত্তৰণ্ণনা

৫২৬. সাসৰেসূতি চতুরাসৰৰিনিমুত্তেসু সেসধম্মেসু আরম্মণেসু. তেসুপি উপ্পজ্জনকঅনত্থতো চিত্তং রক্খতি নাম.

৮. সূকরখতসুত্তৰণ্ণনা

৫২৮. তং সন্ধাযাতি তং সূকরখতলেণং সন্ধায. এতং ‘‘সূকরখতায’’ন্তি ৰচনং ৰুত্তং. ভাৰনপুংসকন্তি ভাৰজোতকং নপুংসকৰচনং যথা ‘‘ৰিসমং ৰাতা ৰাযন্তি, একমন্তং নিসীদী’’তি. কিচ্চপটিপত্তি তেসং সংকাসনট্ঠেন সপতিসো, সপতিসো এৰ সপ্পতিস্সো, সজেট্ঠকোতি আহ ‘‘সপ্পতিস্সোতি সজেট্ঠকো’’তি.

সূকরখতৰগ্গৰণ্ণনা নিট্ঠিতা.

৭. বোধিপক্খিযৰগ্গৰণ্ণনা

৫৩১-৬৫০. সত্তানং ফলানং হেতুভূতানি ‘‘ইমেসং খো, ভিক্খৰে, পঞ্চন্নং ইন্দ্রিযানং ভাৰিতত্তা’’তিআদিনা ৰুত্তানি, পঞ্চিন্দ্রিযানিযেৰ ফলূপচারেন ‘‘সত্ত ফলানী’’তি ৰুত্তানি. তানি চ পুব্বভাগানি ‘‘ইমেসং, ভিক্খৰে, পঞ্চন্নং ইন্দ্রিযানং ভাৰিতত্তা…পে… সত্তানিসংসা পাটিকঙ্খা’’তি ৰচনতো. তেসন্তি সত্তানং ফলানং. ‘‘দ্ৰিন্নং ফলানং অঞ্ঞতরং ফল’’ন্তি এৰং অতীতসুত্তে ৰুত্তানি হেট্ঠা দ্ৰে ফলানি নামাতি ৰদন্তি. যেহি পন ইন্দ্রিযেহি অঞ্ঞত্র পন অন্তরাপরিনিব্বাযিং সেসানি ফলানি হোন্তি, তানি চত্তারি সপুব্বভাগানি লোকুত্তরানীতি ৰুত্তং সিযা.

ইন্দ্রিযসংযুত্তৰণ্ণনা নিট্ঠিতা.