৯. সূকসুত্তৰণ্ণনা

৯. সূকন্তি সালিযৰাদীনং ৰালমাহ. সো হি নিকন্তকসদিসো পটিমুখগতং হত্থং ৰা পাদং ৰা ভিন্দতি, তস্মা ভেদং ইচ্ছন্তেন উদ্ধগ্গং কত্ৰা ঠপিতং সম্মাপণিহিতং নাম, তথা অট্ঠপিতং মিচ্ছাপণিহিতং নামাতি ৰুত্তং. মিচ্ছাপণিহিতাযাতি কম্মস্সকতপঞ্ঞায মিচ্ছাঠপনং নাম – ‘‘ইমে সত্তা কম্মৰসেন সুখদুক্খং পচ্চনুভৰন্তি, তং পন কম্মং ইস্সরস্স ইচ্ছাৰসেন ব্রহ্মা নিম্মিনাতী’’তিআদিনা মিচ্ছাপকপ্পনং. কেচি পন ‘‘নত্থি দিন্নন্তিআদিনা নযেন পৰত্তি, তস্স ৰা ঞাণস্স অপ্পৰত্তী’’তি ৰদন্তি. মগ্গভাৰনাযাতি এত্থাপি মিচ্ছামগ্গস্স পৰত্তনং, অরিযমগ্গস্স ৰা অপ্পৰত্তনং মিচ্ছাঠপনং. তেনাহ ‘‘অপ্পৰত্তিতত্তা’’তি. অৰিজ্জং ভিন্দিস্সতীতি অৰিজ্জং সমুচ্ছিন্দিস্সতি. মগ্গনিস্সিতং কত্ৰা মগ্গে এৰ পক্খিপিত্ৰা. তঞ্হি ঞাণং মগ্গস্স মূলকারণং মগ্গে সিদ্ধে তস্স কিচ্চস্স মত্থকপ্পত্তিতো. ‘‘সম্মাপণিহিতায দিট্ঠিযা সম্মাপণিহিতায মগ্গভাৰনাযা’’তি ৰুত্তত্তা মিস্সকমগ্গো কথিতো. ছৰিভেদসদিসো চেত্থ অৰিজ্জাভেদো, লোহিতুপ্পাদসদিসো লোকুত্তরমগ্গভাৰো দট্ঠব্বো.

সূকসুত্তৰণ্ণনা নিট্ঠিতা.