৮. সঙ্খধমসুত্তৰণ্ণনা

৩৬০. ‘‘যো কোচি পুরিসো পাণাতিপাতী মুসাৰাদী, সব্বো সো আপাযিকো’’তি ৰত্ৰা পুন ‘‘যংবহুলং যংবহুলং করোতি, তেন দুগ্গতিং গচ্ছতী’’তি ৰদন্তো অত্তনাৰ অত্তনো ৰাদং ভিন্দতি. এৰং সন্তেতি যদি বহুসো কতেন পাপকম্মেন আপাযিকো, ‘‘যো কোচি পাণমতিপাতেতী’’তিআদিৰচনং মিচ্ছাতি. চত্তারি পদানীতি ‘‘যো কোচি পাণমতিপাতেতী’’তিআদিনা নযেন ৰুত্তা চত্তারো অত্থকোট্ঠাসা. দিট্ঠিযা পচ্চযা হোন্তি ‘‘অত্থি খো পন মযা’’তিআদিনা অযোনিসো উম্মুজ্জন্তস্স. বলসম্পন্নোতি সমত্থো. সঙ্খধমকোতি সঙ্খস্স ধমনকিচ্চে ছেকো. অদুক্খেনাতি সুখেন. উপচারোপি অপ্পনাপি ৰট্টতি উভিন্নং সামঞ্ঞৰচনভাৰতো. অপ্পমাণকতভাৰো লব্ভতেৰ. তথা হি তং কিলেসানং ৰিক্খম্ভনসমত্থতায দীঘসন্তানতায ৰিপুলফলতায চ ‘‘মহগ্গত’’ন্তি ৰুচ্চতি.

ন ওহীযতীতি যস্মিং সন্তানে কামাৰচরকম্মং, মহগ্গতকম্মঞ্চ কতূপচিতং ৰিপাকদানে লদ্ধাৰসরং হুত্ৰা ঠিতং, তেসু কামাৰচরকম্মং ইতরং নীহরিত্ৰা সযং তত্থ ওহীযিত্ৰা অত্তনো ৰিপাকং দাতুং ন সক্কোতি, মহগ্গতকম্মমেৰ পন ইতরং পটিবাহিত্ৰা অত্তনো ৰিপাকং দাতুং সক্কোতি গরুভাৰতো. তেনাহ ‘‘তং কামাৰচরকম্ম’’ন্তিআদি. কিলেসৰসেনাতি পাপকম্মস্স মূলভূতকিলেসৰসেন. পাণাতিপাতাদযো হি দোসমোহলোভাদিমূলকিলেসসমুট্ঠানা. কিলেসৰসেনাতি ৰা কম্মকিলেসৰসেন. ৰুত্তঞ্হেতং – ‘‘পাণাতিপাতো খো, গহপতিপুত্ত, কম্মকিলেসো’’তিআদি (দী. নি. ৩.২৪৫). যথানুসন্ধিনাৰ গতন্তি যথানুসন্ধিসঙ্খাতঅনুসন্ধিনা ওসানং গতং সংকিলেসসম্মুখেন উট্ঠিতায ৰোদানধম্মৰসেন নিট্ঠাপিতত্তা.

সঙ্খধমসুত্তৰণ্ণনা নিট্ঠিতা.