৩-১৫. ধম্মৰাদীপঞ্হসুত্তাদিৰণ্ণনা

৩১৬-৩২৮. পহায গতত্তাতি অরিযমগ্গেন জহিত্ৰা ঞাণগমনেন গতত্তা. সুট্ঠু গতাতি সম্মা গতা পটিপন্নাতি সুগতা. পরিজাননত্থন্তি তীহি পরিঞ্ঞাহি পরিজাননত্থং. দুক্খসঙ্খাতোতি ‘‘দুক্খ’’ন্তি সঙ্খাতব্বো ৰিদিতব্বো চ দুক্খসভাৰো ধম্মো দুক্খদুক্খতা. যস্মা দুক্খৰেদনাৰিনিমুত্তসঙ্খতধম্মে সুখৰেদনায চ যথা ইধ সঙ্খারদুক্খতা ৰিপরিণামদুক্খতাতি দুক্খপরিযাযো নিরুপ্পতেৰ, তস্মা দুক্খসভাৰো ধম্মো একেন দুক্খসদ্দেন ৰিসেসেত্ৰা ৰুত্তো ‘‘দুক্খদুক্খতা’’তি. সেসপদদ্ৰযেতি সঙ্খারদুক্খতা ৰিপরিণামদুক্খতাতি এতস্মিং পদদ্ৰযে. সঙ্খারভাৰেন দুক্খসভাৰো সঙ্খারদুক্খতা. সুখস্স ৰিপরিণামনেন দুক্খসভাৰো ৰিপরিণামদুক্খতা.

ধম্মৰাদীপঞ্হসুত্তাদিৰণ্ণনা নিট্ঠিতা.