৫. সব্বঅনিচ্চৰগ্গৰণ্ণনা

৪৩-৫২. ঞাতপরিঞ্ঞা আগতা ৰিসযৰসেন তব্বিসযস্স ধম্মস্স জোতিতত্তা. ইতরা দ্ৰে তীরণপহানপরিঞ্ঞাপি আগতা এৰাতি ৰেদিতব্বা, তাসং অভিঞ্ঞেয্যধম্মৰিসযত্তা ঞাণস্স চ তীরণপহানপরিঞ্ঞাসম্ভৰতো. পরিঞ্ঞেয্যপদে তীরণপরিঞ্ঞাৰ আগতা, পহাতব্বপদে পহানপরিঞ্ঞাৰ আগতাতি যোজনা. ইতরাপি দ্ৰে গহিতাযেৰ তাহি ৰিনা অত্থসিদ্ধিযা অভাৰতো. পচ্চক্খং কাতব্বং আরম্মণতো অসম্মোহতো পটিৰিজ্ঝনেন. অৰুত্তাপি গহিতাযেৰ পরিজাননস্স যাৰদেৰ পহানত্থত্তা. একসভাৰেন ৰিনাভাৰো অনেকগ্গট্ঠো. উপসট্ঠরোগেন ৰিয অন্তো এৰ অভিহতসব্বতা উপহতট্ঠো.

সব্বঅনিচ্চৰগ্গৰণ্ণনা নিট্ঠিতা.

পঠমো পণ্ণাসকো.