১৩. ঝানসংযুত্তং

১. সমাধিমূলকসমাপত্তিসুত্তৰণ্ণনা

৬৬২. সমাধিকুসলোতি সমাধিস্মিং কুসলো. তযিদং সমাধিকোসল্লত্তং সহ ঝানঙ্গযোগেন চতুব্বিধো ঝানসমাধি, তস্মা তং তং ৰিভাগং জানন্তস্স সিদ্ধং হোতীতি আহ – ‘‘পঠমং ঝান’’ন্তিআদি. তত্থ ৰিতক্কৰিচারপীতিসুখেকগ্গতাৰসেন পঠমং পঞ্চঙ্গিকং, পীতিসুখেকগ্গতাৰসেন দুতিযং তিৰঙ্গিকং, সুখেকগ্গতাৰসেন ততিযং দুৰঙ্গিকং, উপেক্খেকগ্গতাৰসেন চতুত্থং দুৰঙ্গিকমেৰাতি এৰং তস্মিং তস্মিং ঝানে তংতংঅঙ্গানং ৰৰত্থানে কুসলো. সমাপত্তিকুসলোতি সমাপজ্জনে কুসলো. হাসেত্ৰাতি তোসেত্ৰা. কল্লং কত্ৰাতি সমাধানস্স পটিপক্খধম্মানং দূরীকরণেন সহকারীকারণঞ্চ সমাধানেন সমাপজ্জনে চিত্তং সমত্থং কত্ৰা. সেসপদানীতি সেসা তযো কোট্ঠাসা. ততিযাদীসু নযেসু অকুসলোপি ঝানত্থায পটিপন্নত্তা ‘‘ঝাযীতেৰা’’তি ৰুত্তো.

সমাধিমূলকসমাপত্তিসুত্তৰণ্ণনা নিট্ঠিতা.

২-৫৫. সমাধিমূলকঠিতিসুত্তাদিৰণ্ণনা

৬৬৩-৭১৬. দুতিযাদিসুত্তেসু ঠিতিকুসলোতি এত্থ অন্তোগধহেতুঅত্থো ঠিতি-সদ্দো, তস্মিঞ্চ পন কুসলোতি অত্থোতি আহ – ‘‘ঝানং ঠপেতুং অকুসলো’’তি. সত্তট্ঠঅচ্ছরামত্তন্তি সত্তট্ঠঅচ্ছরামত্তং খণং ঝানং ঠপেতুং ন সক্কোতি অধিট্ঠানৰসীভাৰস্স অনিপ্ফাদিতত্তা. যথাপরিচ্ছেদেন কালেন ৰুট্ঠাতুং ন সক্কোতি ৰুট্ঠানৰসীভাৰস্স অনিপ্ফাদিতত্তা. কল্লং জাতং অস্সাতি কল্লিতং, তস্মিং কল্লিতে কল্লিতভাৰেন কসিণারম্মণেসু ‘‘ইদং নাম অসুকস্সা’’তি ৰিসযৰসেন সমাপজ্জিতুং অসক্কোন্তো ন সমাধিস্মিং আরম্মণকুসলো. ন সমাধিস্মিং গোচরকুসলোতি সমাধিস্মিং নিপ্ফাদিতব্বে তস্স গোচরে কম্মট্ঠানসঞ্ঞিতে পৰত্তিট্ঠানে ভিক্খাচারগোচরে চ সতিসম্পজঞ্ঞৰিরহিতো অকুসলো. কেচি পন ‘‘কম্মট্ঠানগোচরো পঠমজ্ঝানাদিকং, ‘এৰং সমাপজ্জিতব্বং, এৰং বহুলীকাতব্ব’ন্তি অজানন্তো তত্থ অকুসলো নামা’’তি ৰদন্তি. কম্মট্ঠানং অভিনীহরিতুন্তি কম্মট্ঠানং ৰিসেসভাগিযতায অভিনীহরিতুং অকুসলো. সক্কচ্চকারীতি চিত্তীকারী. সাতচ্চকারীতি নিযতকারী. সমাধিস্স উপকারকধম্মাতি অপ্পনাকোসল্লা. সমাপত্তিআদীহীতি আদি-সদ্দেন সক্কচ্চকারিপদাদীনংযেৰ সঙ্গহো দট্ঠব্বো চতুক্কানং ৰুত্তত্তা. তেনাহ ‘‘যোজেত্ৰা চতুক্কা ৰুত্তা’’তি. লোকিযজ্ঝানৰসেনেৰ কথিতং ‘‘সমাধিকুসলো’’তিআদিনা নযেন দেসনায পৰত্তত্তা. ন হি লোকুত্তরধম্মেসু অকোসল্লং নাম লব্ভতি. যদি অকোসল্লং, ন কুসলসদ্দেন ৰিসেসিতব্বতা সিযাতি.

সমাধিমূলকঠিতিসুত্তাদিৰণ্ণনা নিট্ঠিতা.

ঝানসংযুত্তৰণ্ণনা নিট্ঠিতা.

নিট্ঠিতা চ সারত্থপ্পকাসিনিযা

সংযুত্তনিকায-অট্ঠকথায খন্ধৰগ্গৰণ্ণনা.