৯. ৰনসংযুত্তং

১. ৰিৰেকসুত্তৰণ্ণনা

২২১. সংৰেজেতুকামাতি অত্থতো সংৰেগং উপ্পাদেতুকামা. তথাভূতা নং কিলেসসঙ্গণিকাদিতো ৰিৰেচেতুকামা নাম হোতীতি ৰুত্তং ‘‘ৰিৰেকং পটিপজ্জাপেতুকামা’’তি. বাহিরেসূতি গোচরজ্ঝত্ততো বহিভূতেসু. পুথুত্তারম্মণেসূতি রূপাদিনানারম্মণেসু. চরতীতি পৰত্ততি. ত্ৰং জনোতি ত্ৰং অত্তনো কিলেসেহি জননতো ৰিসুং জাতো তাদিসে এৰ অঞ্ঞস্মিং জনে ইমং অযোনিসোমনসিকারৰসেন পৰত্তমানং ছন্দরাগং ৰিনযস্সু ৰিনোদেহি. সতং তং সারযামসেতি নিয্যানিকসাসনে পব্বজিত্ৰা সত্থু সন্তিকে কম্মট্ঠানং গহেত্ৰা অরঞ্ঞৰাসেন চ সতিমন্তং পণ্ডিতং তং মযম্পি যথাউপ্পন্নং ৰিতক্কং ৰিনোদনায সারযাম, সতং ৰা সপ্পুরিসানং কিলেসৰিগমনধম্মং পটিপজ্জিত্ৰা ৰসন্তং তং সারযাম ৰট্টদুক্খং. পাতালন্তি মোহপাতালং কিলেসরজো, তদেৰ ‘‘পাতাল’’ন্তি ৰুত্তং. মা অৰহরীতি হেট্ঠা দুগ্গতিসোতং মা উপনেসি. সিতন্তি সম্বন্ধং. তেনাহ ‘‘সরীরলগ্গ’’ন্তি. ৰিৰেকমাপন্নোতি কিলেসৰিৰেকং সমথৰিপস্সনাভাৰনমাপন্নো. উত্তমৰীরিযন্তি উস্সোল়্হিলক্খণপ্পত্তং ৰীরিযং, চতুব্বিধং সমপ্পধানৰীরিযং ৰা সম্পত্তং. পগ্গয্হাতি আরোপেত্ৰা. পরমৰিৰেকন্তি পরমং সমুচ্ছেদৰিৰেকং.

ৰিৰেকসুত্তৰণ্ণনা নিট্ঠিতা.

২. উপট্ঠানসুত্তৰণ্ণনা

২২২. কাযদরথো হোতিযেৰ নিযমেন, ন চিত্তদরথো তস্স মগ্গেনেৰ সমুগ্ঘাটিতত্তা.

জরাতুরোতি জরাভিভৰনেন আতুরোযেৰ. পদদ্ৰযেপি এসেৰ নযো. উপরিট্ঠতায পরিতো দীঘপুথুলতায অতিৰিয ৰিজ্ঝতীতি সত্তিসল্লগ্গহণং. এৰং হিস্স তণ্হাসল্লস্স সদিসতা. অৰিজ্জায পন সম্মোহাপাদনেন দুক্খাপাদনেন চ ৰিসসদিসতা. রুপ্পতোতি ৰিকারং আপাদিযমানস্স পীল়িযমানস্সাতি অত্থোতি আহ ‘‘ঘট্টিযমানস্সা’’তি.

পব্বজিতন্তি সসন্তানতো পব্বজিতং ৰা রাগাদিমলতো পব্বজিতং ৰা. তস্মাতি যস্মা থেরস্সেৰেতং ৰচনং, তস্মা অযং ইদানি ৰুচ্চমানো এত্থ গাথায অত্থো. দেৰতায হীতিআদি ৰুত্তস্সেৰ অত্থস্স পাকটকরণং. এত্থাতি সেসগাথাসু. অত্থস্স ৰুত্তনযত্তা ‘‘অনুত্তানপদৰণ্ণনা’’তি আহ. ৰিনযাতি হেতুম্হি নিস্সক্কৰচনন্তি তস্স হেতুম্হি করণৰচনেন অত্থমাহ ‘‘ৰিনযেনা’’তি. তথা ‘‘সমতিক্কমা’’তি এত্থাপি. পরমপরিসুদ্ধং সংকিলেসসমুচ্ছিন্দনতো. আরদ্ধৰীরিযন্তি সম্ভাৰিতৰীরিযং. সম্ভাৰনঞ্চস্স পগ্গণ্হনং পরিপূরণঞ্চাতি আহ ‘‘পগ্গহিতৰীরিযং পরিপুণ্ণৰীরিয’’ন্তি.

উপট্ঠানসুত্তৰণ্ণনা নিট্ঠিতা.

৩. কস্সপগোত্তসুত্তৰণ্ণনা

২২৩. ছেতন্তি মিগানং জীৰিতং ছেতং. তেনাহ ‘‘মিগলুদ্দক’’ন্তি. রোহিতমিগন্তি লোহিতৰণ্ণং খুদ্দকমিগং, ‘‘মহারোহিতমিগ’’ন্তি কেচি. সত্থু সন্তিকে কম্মট্ঠানং গহেত্ৰা তস্স জনপদস্স সুলভভিক্খতায তত্থ গন্ত্ৰা ৰিহরতীতি ইমমত্থং সন্ধায ‘‘পঠমসুত্তে ৰুত্তনযেনেৰা’’তি ৰুত্তং. অযং পন থেরো পঞ্চাভিঞ্ঞো ৰিপস্সনাকম্মিকো. ঠত্ৰাতি পদানুবন্ধনৰসেন গমনং উপচ্ছিন্দিত্ৰা থেরস্স আসন্নট্ঠানে ঠত্ৰা. তস্স ৰচনং সোতুং আরদ্ধো. অঙ্গুট্ঠকং জালাপেসীতি অধিট্ঠানবলেন দণ্ডদীপিকং ৰিয অত্তনো অঙ্গুট্ঠকং জালাপেসি. অক্খীহিপি পস্সতি অঙ্গুট্ঠকং জালমানং. কণ্ণেহিপি সুণাতি তেন ৰুচ্চমানং ধম্মং একদেসেন. চিত্তং পনস্স ধাৰতীতি সম্বন্ধো. এতস্সপীতি লুদ্দকস্সপি.

অপ্পপঞ্ঞন্তি এত্থ অপ্প-সদ্দো ‘‘অপ্পহরিতে’’তিআদীসু ৰিয অভাৰত্থোতি আহ ‘‘নিপ্পঞ্ঞ’’ন্তি. কারণজাননসমত্থেনাতি ইমিনা কারণেন সত্তানং সুখং, ইমিনা দুক্খন্তি এৰং সমাচরমানেন কারণং জানিতুং সমত্থেন কম্মস্সকতঞাণসম্পযুত্তচিত্তেনাতি অত্থো. সুণাতীতি কেৰলং সৰনমত্তৰসেন সুণাতি, ন তদত্থৰসেন. তেনাহ ‘‘অত্থমস্স ন জানাতী’’তি. কারণরূপানীতি সভাৰকারণানি. কিং মে ইমিনাতি? ‘‘ইদং পপঞ্চ’’ন্তি পহায. ৰীরিযং পগ্গয্হাতি চতুব্বিধং সম্মপ্পধানং ৰীরিযং পগ্গণ্হিত্ৰা.

কস্সপগোত্তসুত্তৰণ্ণনা নিট্ঠিতা.

৪. সম্বহুলসুত্তৰণ্ণনা

২২৪. সম্বহুলাতি সুত্তন্তনযেন সম্বহুলা. সুত্তন্তে সজ্ঝাযিংসূতি সুত্তন্তিকা. ৰিনযং ধারেন্তীতি ৰিনযধরা. যুঞ্জন্তীতি ৰাসধুরে যোগং করোন্তি. ঘটেন্তীতি তত্থ ৰাযামং করোন্তি. করোন্তানংযেৰ অরুণো উগ্গচ্ছতীতি সম্বন্ধো.

কোমেতি কিং ইমে? তেনাহ ‘‘কহং ইমে’’তি? ৰজ্জিভূমিং ৰজ্জিরট্ঠং গতাতি ৰজ্জিভূমিযা. তেনাহ ‘‘ৰজ্জিরট্ঠাভিমুখা গতা’’তি. নত্থি এতেসং নিকেভং নিবদ্ধনিৰাসট্ঠানন্তি অনিকেতা তেনাহ ‘‘অগেহা’’তি. উতু এৰ সপ্পাযং, উতুৰসেন ৰা কাযচিত্তানং কল্লত্তা সপ্পাযং. এস নযো সেসেসুপি.

সম্বহুলসুত্তৰণ্ণনা নিট্ঠিতা.

৫. আনন্দসুত্তৰণ্ণনা

২২৫. অতিৰেলন্তি অতিবহুকালং. ভিক্খুনা নাম উপগতানং উপনিসিন্নকথামত্তং ৰত্ৰা গন্থধুরেহি ৰাসধুরেহি ৰা যুত্তপযুত্তচিত্তেন ভৰিতব্বং, নাতিৰেলং তেসং সঞ্ঞত্তিবহুলেন. থেরো পন তদা কেনচি কারণেন বহুৰেলং গিহিসঞ্ঞত্তিবহুলো অহোসি, তং সন্ধায ৰুত্তং ‘‘অতিৰেল’’ন্তিআদি. ইদানি তমত্থং ৰিভাৰেতুং ‘‘ভগৰতী’’তিআদি ৰুত্তং. তন্তি তং তাদিসং সঞ্ঞাপনং সন্ধায এতং ‘‘অতিৰেলং গিহিসঞ্ঞত্তিবহুলো’’তি ৰচনং ৰুত্তং. ভিক্খুসঙ্ঘস্স কথং সুত্ৰাতি সঙ্ঘস্স মজ্ঝে নিসীদিত্ৰা থেরেন কথিতত্তা ৰুত্তং. সত্থুসাসনন্তি পিটকত্তযং ৰদতি.

পসক্কিযাতি উপসক্কিত্ৰা গন্ত্ৰা. তং পন তত্থ অজ্ঝোগাহনং হোতীতি আহ ‘‘পৰিসিত্ৰা’’তি. সঙ্খারদুক্খতো নিব্বিন্নহদযস্স সব্বসঙ্খারৰিনিস্সটং নিব্বানং যাথাৰতো পচ্চৰেক্খন্তস্স সম্মদেৰ সমস্সাসকরং হুত্ৰা উপট্ঠহন্তং তং উপরি অধিগমায উস্সুক্কং করোন্তো নিব্বানং হদযে নিক্খিপতি নামাতি আহ – ‘‘নিব্বানং…পে… ওপেতি নামা’’তি. নিব্বানং…পে… আরম্মণতো ওপেতি নামাতি আনেত্ৰা সম্বন্ধো. অত্থৰিরহিতা ‘‘বিল়িবিল়ী’’তি পৰত্তকিরিযা বিল়িকা, অযং পন গিহিসঞ্ঞত্তিকথা থেরস্স অত্তনো সামঞ্ঞত্থঅসাধনতো দেৰতায বিল়িকা ৰিযাতি বিল়িবিল়িকাতি ৰুত্তা.

আনন্দসুত্তৰণ্ণনা নিট্ঠিতা.

৬. অনুরুদ্ধসুত্তৰণ্ণনা

২২৬. অনন্তরে অত্তভাৰেতি অতীতানন্তরে দেৰত্তভাৰে. থেরো হি তাৰতিংসদেৰলোকা চৰিত্ৰা ইধূপপন্নো. অগ্গমহেসীতি কাচি পরিচারিকা দেৰধীতা চিত্তপণিধানমত্তেন ইদানিপি দেৰকাযে ভৰিস্সতি উপচিতকুসলধম্মত্তাতি মঞ্ঞমানা তস্মিং ৰত্তমানং ৰিয কথেন্তী ‘‘সোভসী’’তি আহ. এৰং অতীতম্পিস্স দিব্বসোতং পচ্চুপ্পন্নং ৰিয মঞ্ঞেয্য নাতিচিরকালত্তাতি দস্সেন্তো ‘‘পুব্বেপি সোভসী’’তি আহ. সুগতিনিরযাদিদুগ্গতিযা ৰসেন দুগ্গতা এতরহীতি অধিপ্পাযো. পটিপত্তিদুগ্গতিযা কামেসু সম্মুচ্ছিতভাৰতো.

পতিট্ঠহন্তোতি নিৰিসন্তো. অট্ঠহি কারণেহীতি চিরকালপরিভাৰনায ৰিরুল়্হমূলেহি অযোনিসোমনসিকারাদিপচ্চযমূলকেহি ৰুচ্চমানেহি অট্ঠহি কারণেহি. রত্তো রাগৰসেনাতি সভাৰতো সঙ্কপ্পতো চ যথাসমীহিতে ইট্ঠাকারে সক্কাযে সঞ্জাতরাগৰসা রত্তো গিদ্ধো গধিতো. পতিট্ঠাতীতি ওরুয্হ তিট্ঠতি. দুট্ঠো দোসৰসেনাতি সভাৰতো সঙ্কপ্পতো চ যথাসমীহিতে অনিট্ঠাকারে সক্কাযে সঞ্জাতদোসৰসেন দুট্ঠো রুপিতচিত্তো. মূল়্হো মোহৰসেনাতি অসমপেক্খনেন মূল়্হো মুয্হনৰসেন. ৰিনিবদ্ধোতি অহংকারেন ৰিসেসতো নিবন্ধনতো মানৰত্থুস্মিং বন্ধিতো. মানৰসেনাতি তেন তেন মঞ্ঞনাকারেন. পরামট্ঠোতি ধম্মসভাৰং নিচ্চাদিৰসেন পরতো আমট্ঠো. দিট্ঠিৰসেনাতি মিচ্ছাদস্সনৰসেন. থামগতোতি রাগাদিকিলেসৰসেন থামং থিরভাৰং উপগতো. অনুসযৰসেনাতি মগ্গেন অপ্পহীনতায অনু অনু সন্তানে সযনৰসেন. অপ্পহীনট্ঠো হি তেসং অনুসযট্ঠো. অনিট্ঠঙ্গতোতি সংসযিতো. ৰিক্খেপগতোতি ৰিক্খিত্তভাৰং উপগতো. উদ্ধচ্চৰসেনাতি চিত্তস্স উদ্ধতভাৰৰসেন. তাপীতি তাপি দেৰকঞ্ঞাযো. এৰং পতিট্ঠিতাৰাতি যথাৰুত্তনযেন রত্তভাৰাদিনা সক্কাযস্মিং পতিট্ঠিতা এৰ. নরদেৰানন্তি পুরিসভূতদেৰানং.

পটিগন্তুন্তি অপেক্খাৰসেন ততো অপগন্তুং অপেক্খং ৰিস্সজ্জেতুং. দুস্সন্তন্তি দসন্তং, ‘‘ৰত্থ’’ন্তি কেচি. সূচিং যোজেত্ৰাতি সিব্বনসুত্তেন সূচিং যোজেত্ৰা পাসে চ পৰেসেত্ৰা. মনাপকাযে দেৰনিকাযে জাতা মনাপকাযিকা. তেসং পভাৰং দস্সেতুং ‘‘মনসা’’তিআদি ৰুত্তং. সমজ্জন্তি সংহিতং. গমনভাৰন্তি গমনজ্ঝাসযং. ৰিক্খীণোতি ৰিচ্ছিন্দনৰসেন খীণো. দেৰতানং উত্তরিমনুস্সধম্মারোচনে দোসো নত্থীতি তাসং পুন অনাগমনত্থং অরহত্তং ব্যাকাসি.

অনুরুদ্ধসুত্তৰণ্ণনা নিট্ঠিতা.

৭. নাগদত্তসুত্তৰণ্ণনা

২২৭. অতিকালেনাতি অতিৰিয পুব্বণ্হকালেন, কালস্সেৰাতি অত্থো. কোটিসম্মুঞ্জনিযাতি সম্মুঞ্জনিকোটিযা, সম্মুঞ্জনিযা একদেসেনেৰাতি অত্থো. ইমিনা সম্মজ্জনে অমনাপকারিতং দস্সেতি. মজ্ঝন্হিকে ৰীতিৰত্তেতি গিহিসংসগ্গৰসেন কালং ৰীতিনামেন্তো মজ্ঝন্হে বহুৰীতিৰত্তে. অঞ্ঞেহি ভিক্খূহীতি নাতিকালং পৰিট্ঠেহি. নিস্সক্কৰচনঞ্চেতং. ভাযামি নাগদত্তন্তি তস্স পটিপত্তিং ভাযিতব্বং কত্ৰা দেৰতা ৰদন্তী পটিপত্তিযং নিযোজেতি. সুপ্পগব্ভন্তি কাযপাগব্বিযাদীহি অতিৰিয সমন্নাগতং.

নাগদত্তসুত্তৰণ্ণনা নিট্ঠিতা.

৮. কুলঘরণীসুত্তৰণ্ণনা

২২৮. ওগাহপ্পত্তোতি ৰিস্সাসৰসেন অনুপ্পৰেসং পত্তো. অঞ্ঞতরং কুলন্তি তস্মিং কুলে জাযম্পতিং সন্ধায ৰদতি. ‘‘বহূপকারং মে এতং কুলং চিরং সপ্পাযাহারদানাদিনা; তস্মা ইধাহং অগ্গদক্খিণেয্যো জাতো; ইমেসংযেৰ দেয্যধম্মপটিগ্গণ্হনেন পুঞ্ঞং ৰড্ঢেস্সামী’’তি চিন্তেসি. তেনাহ ‘‘অঞ্ঞত্থ গন্ত্ৰা কিং করিস্সামী’’তিআদি. সাতি দেৰতা. উভোপেতেতি তং ভিক্খুঞ্চ ঘরণিঞ্চ সন্ধায ৰদতি. পটিগাধপ্পত্তাতি পটিগাধং পত্তা অঞ্ঞমঞ্ঞস্মিং পতিট্ঠিতৰিস্সাসেন.

ৰিস্সমপ্পত্তিৰসেন সন্তিট্ঠন্তি এত্থাতি সণ্ঠানং, ৰিস্সমনট্ঠানং. সমাগন্ত্ৰাতি সন্নিপতিত্ৰা. পটিঞ্ঞূদাহরণেহি মন্তযতীতি মন্তনং, ঞাপকং কারণং. পটিলোমসদ্দাতি পটিলোমভাৰেন পতিতত্তা অসচ্চৰিভাৰনা পটিকূলসদ্দা. তেন কারণেনাতি তেন কারণপটিরূপকেন মিচ্ছাৰচনেন. ন মঙ্কুহোতব্বং অকারকভাৰতো. সদ্দেন পরিতস্সতীতি পরেহি অত্তনি পযুত্তমিচ্ছাসদ্দমত্তেন পরিতস্সনসীলো. ৰতং ন সম্পজ্জতীতি যথাসমাদিন্নৰতং লহুচিত্ততায ন পারিপূরিং গচ্ছতি. সম্পন্নৰতোতি পরিপুণ্ণসীলাদিৰতগুণো

কুলঘরণীসুত্তৰণ্ণনা নিট্ঠিতা.

৯. ৰজ্জিপুত্তসুত্তৰণ্ণনা

২২৯. ৰজ্জিরট্ঠে রাজপুত্তোতি ৰজ্জিরট্ঠে জাতসংৰদ্ধো ৰজ্জিরাজপুত্তো. সব্বরত্তিচারোতি ছণসম্পত্তিযা ইতো চিতো চরন্তেহি অনুভৰিতব্বনক্খত্তমহো. তেনাহ ‘‘কত্তিকনক্খত্তং ঘোসেত্ৰা’’ তিআদি. একাবদ্ধং হোতীতি যস্মা চাতুমহারাজিকদেৰা তস্মিং দিৰসে নক্খত্তং ঘোসেত্ৰা অত্তনো পুঞ্ঞানুভাৰসিদ্ধায দিব্বসম্পত্তিযা মহন্তং নক্খত্তকীল়াসুখং অনুভৰন্তি, তস্মা তং তেহি একাবদ্ধং ৰিয হোতি. ভেরিআদিতূরিযানন্তি ভেরিমুদিঙ্গসঙ্খপণৰৰীণাদিতূরিযানং. তাল়িতানন্তি আরদ্ধলযানুরূপং পহটানং. ৰীণাদীনন্তি ৰীণাৰেণুগোমুখীআদীনং. ৰাদিতানন্তি যথারদ্ধমুচ্ছনানুরূপং সঙ্ঘট্টিতানং. অভাসীতি তেন সদ্দেন আকড্ঢিযমানহদযো অযোনিসো উম্মুজ্জিত্ৰা ‘‘মহতী ৰত মে জানী’’তি অনুত্থুনন্তো অভাসি. ছড্ডিতদারুকং ৰিযাতি ৰনে ছড্ডিতনিরত্থককল়িঙ্গরং ৰিয. লামকতরোতি নিহীনতরো. দেৰতা পঠমপ্পিতং আণিং পটাণিযা নীহরন্তী ৰিয তেন ভিক্খুনা ৰুত্তমত্থং অপনেন্তী ‘‘তস্স তে বহুকা পিহযন্তী’’তি অৰোচাতি ৰুত্তন্তি দস্সেন্তো ‘‘থেরো’’তিআদিমাহ. সগ্গং গচ্ছন্তানং যথা নেরযিকা পিহযন্তি, এৰং সম্মাপটিপন্নস্স তুয্হং বহূ পিহযন্তি, তস্মা ত্ৰং ‘‘পাপিযো’’তি অত্তানং মা মঞ্ঞিত্থাতি অধিপ্পাযো.

ৰজ্জিপুত্তসুত্তৰণ্ণনা নিট্ঠিতা.

১০. সজ্ঝাযসুত্তৰণ্ণনা

২৩০. নিস্সরণপরিযত্তিৰসেনাতি অদ্ধা ইমং পরিযত্তিং নিস্সায ৰট্টদুক্খতো নিস্সরিতুং লব্ভাতি এৰং নিস্সরণপরিযত্তিৰসেন. সজ্ঝাযনতোতি ৰিমুত্তাযতনসীসে ঠত্ৰা সজ্ঝাযনতো. ইদানি তস্স নিস্সরণপরিযত্তিৰসেন সজ্ঝাযনকরণং, পটিপত্তিৰসেন ৰত্তপটিৰত্তকরণং, ৰিপস্সনাভাৰনঞ্চ দস্সেতুং ‘‘সো কিরা’’তিআদি ৰুত্তং. অরহত্তং পত্তদিৰসে পটিপত্তিকিত্তনায পুরিমদিৰসেসুপি তথা পটিপজ্জি, ৰিপস্সনং পন উস্সুক্কাপেতুং নাসক্খীতি দস্সেতি. কালং অতিৰত্তেতীতি ইদং ‘‘সঙ্কসাযতী’’তি পদস্স অত্থৰচনং. থেরস্সাতি সজ্ঝাযকত্থেরস্স.

ধম্মপদানীতি সীলাদিধম্মক্খন্ধদীপকানি পদানি. তেনাহ ‘‘সব্বম্পি বুদ্ধৰচনং অধিপ্পেত’’ন্তি. ন গণ্হাসি উদ্দেসন্তি অধিপ্পাযো. পাল়িযং ‘‘ভিক্খূহি সংৰসন্তো’’তি ইমিনা তেসং ধম্মস্সৰনত্থাযপি ধম্মো পরিযাপুণিতব্বোতি দস্সেতি. ৰিরজ্জতি এতেনাতি ৰিরাগো, অরিযমগ্গো. জানিত্ৰাতি পরিঞ্ঞাভিসমযৰসেন দিট্ঠসুতাদিং যাথাৰতো জানিত্ৰা পটিৰিজ্ঝিত্ৰা. ৰিস্সজ্জনন্তি পহানং. ন বুদ্ধৰচনস্স ৰিস্সজ্জনং. ভণ্ডাগারিকপরিযত্তিযাপি অনুঞ্ঞাতত্তা পগেৰ নিস্সরণত্থায, তত্থ পন মত্তা জানিতব্বাতি দস্সেন্তো ‘‘এত্তাৰতা’’তিআদিমাহ.

সজ্ঝাযসুত্তৰণ্ণনা নিট্ঠিতা.

১১. অকুসলৰিতক্কসুত্তৰণ্ণনা

২৩১. অকুসলে ৰিতক্কেতি অকোসল্লসম্ভূতট্ঠেন অকুসলে মিচ্ছাৰিতক্কে. যোনি ৰুচ্চতি উপাযো, তস্মা অসুভাদিকে সুভাদিৰসেন মনসিকারো অযোনিসোমনসিকারোতি আহ ‘‘অনুপাযমনসিকারেনা’’তি. পাসাদিককম্মট্ঠানন্তি পসাদাৰহং বুদ্ধানুস্সতিআদিকম্মট্ঠানং. বলৰপীতিঞ্চ সুখঞ্চাতি নীৰরণৰিক্খম্ভনতো বলৰন্তং উপচারজ্ঝানসহগতং পীতিঞ্চ সুখঞ্চ.

অকুসলৰিতক্কসুত্তৰণ্ণনা নিট্ঠিতা.

১২. মজ্ঝন্হিকসুত্তৰণ্ণনা

২৩২. নন্দনৰগ্গেতি নন্দনৰগ্গৰণ্ণনাযং তত্থ ইধাপি গাথায ৰিসেসাভাৰতো. যদি এৰং কস্মা তত্থ সঙ্গীতং ইধ গহিতন্তি? দেৰতাপটিসংযুত্ততং উপাদায দেৰতাসংযুত্তে সঙ্গহিতম্পি অট্ঠুপ্পত্তিযা পটিসংযুত্তত্তা ইধ গহিতং.

মজ্ঝন্হিকসুত্তৰণ্ণনা নিট্ঠিতা.

১৩. পাকতিন্দ্রিযসুত্তৰণ্ণনা

২৩৩. তেরসমে যং ৰত্তব্বং, তং ৰিত্থারিতমেৰাতি যোজনা. জন্তুদেৰপুত্তসুত্তেতি জন্তুদেৰপুত্তসুত্তসংৰণ্ণনায. ‘‘তত্থ সঙ্গীতং ইধাপী’’তিআদি অনন্তরসুত্তৰণ্ণনাযং ৰুত্তনযমেৰ.

পাকতিন্দ্রিযসুত্তৰণ্ণনা নিট্ঠিতা.

১৪. গন্ধত্থেনসুত্তৰণ্ণনা

২৩৪. গন্ধারম্মণং উপনিজ্ঝাযতীতি গন্ধসঙ্খাতং আরম্মণং উপেচ্চ নিজ্ঝাযতি, রূপারম্মণেন ৰিয ৰিঞ্ঞাণেন রূপং, গন্ধারম্মণেন তং উপেচ্চ নিজ্ঝাযতি পচ্চক্খতো, যাথাৰতো সভাৰতো পটিৰিজ্ঝতীতি অত্থো. উপসিঙ্ঘিস্সতীতি তণ্হাৰসেন উপগন্ত্ৰা সিঙ্ঘিস্সতি.

একঙ্গমেতং থেয্যানন্তি আরম্মণৰসেন থেয্যৰত্থূসু ৰিভজিযমানেসু একমঙ্গমেতং গন্ধারম্মণন্তি আহ ‘‘থেনিতব্বান’’ন্তিআদি. ওজাপেক্খায থেয্যায পৰত্তমানায ধম্মারম্মণতাপি তস্সা সিযা, সা পন ন মধুরা থেয্যকতা চাতি ‘‘পঞ্চকোট্ঠাসান’’ন্তি ৰুত্তং. কামঞ্চ তং গন্ধারম্মণং কেনচি পরিগ্গহিতং ন হোতীতি আদিযিতুং সক্কা, সত্থারা পন অননুঞ্ঞাতত্তা ন যুত্তো তস্স পরিভোগো. যং পন তেন ভিক্খুনা ৰুত্তং ‘‘ন হরামি ন ভঞ্জামী’’তি, তস্সপি অযমেৰ পরিহারো. ৰণ্ণীযতি ফলং এতেনাতি ৰণ্ণং, কারণন্তি ৰুত্তং ‘‘ৰণ্ণেনাতি কারণেনা’’তি.

তস্মিন্তি তস্মিং ভিক্খুস্মিং. আকিণ্ণকম্মন্তোতি তণ্হাদিট্ঠিআদিৰসেন অকুসলকম্মন্তো দিট্ঠিমোহতণ্হাদিৰসেন আদিতো পট্ঠায কুসলকম্মানং পটিক্খেপনতো. দিট্ঠিৰসেন চ কথিনকক্খল়খরিগতত্তা ‘‘অখীণকম্মন্তো কক্খল়কম্মন্তো’’তি ৰুত্তং.

আকিণ্ণলুদ্দোতি আকিণ্ণো হুত্ৰা কক্খল়ো. তেনাহ ‘‘বহুপাপো’’তিআদি. মক্খিতোতি লিত্তো. তন্তি দেৰতাচোদনং. তস্মাতি অতিক্কম্ম ঠিতত্তা‘‘ত্ৰঞ্চারহামি ৰত্তৰে’’তি এৰমাহ.

গৰেসন্তস্স অত্তনো সন্তানে উপ্পাদনৰসেন পরিযেসন্তস্স. অনেকযোজনাযামৰিত্থারং গগনতলং ব্যাপেত্ৰা উপ্পন্নৰলাহককূটপ্পমাণং ৰিয. সুদ্ধোতি সীলেন পরিসুদ্ধো অযন্তি জানাসি. সুগতিন্তি সুন্দরনিব্বত্তিং. তেন নিব্বানস্সপি সঙ্গহো সিদ্ধো.

গন্ধত্থেনসুত্তৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

ৰনসংযুত্তৰণ্ণনায লীনত্থপ্পকাসনা সমত্তা.