১০. যক্খসংযুত্তং

১. ইন্দকসুত্তৰণ্ণনা

২৩৫. অত্তনো পরিণাযকত্তেন ইন্দো নাম মহেসক্খো, ইন্দোতি সমঞ্ঞা অস্সাতি কত্ৰা ‘‘ইন্দকো’’তিপি ৰুচ্চতি, তস্স ইন্দকস্স. ইন্দকূটে পব্বতে নিৰসতীতি ইন্দকূটনিৰাসী, তস্স ইন্দকূটনিৰাসিনো. বলিকম্মেহি যজিতব্বতো পূজিতব্বতো যক্খো, তস্স যক্খস্স. ইন্দস্স নিৰাসট্ঠানভূতং কূটং ইন্দকূটন্তি যক্খতো কূটেন নামং লদ্ধং. ইন্দকূটো ইন্দো উত্তরপদলোপেন যথা ‘‘কেলাসকূটো কেলাসো’’তি. ইন্দো যক্খোতি কূটতো যক্খেন নামং লদ্ধং. ন চেত্থ ইতরীতরনিস্সযদোসো অঞ্ঞমঞ্ঞূপলক্খণভাৰতো যথা তং ‘‘কাযকম্মট্ঠান’’ন্তি. রূপন্তি সকলং রূপক্খন্ধমাহ, ন রূপাযতনন্তি. ইমং সরীরং পেচ্চ অযং কিন্তি পটিলভতীতি চোদেতি.

কুতো আগচ্ছতীতি পরাধাররূপে জীৰে অত্তনি মাতুকুচ্ছিমোক্কন্তে রূপস্স সম্ভৰোতি কুতো নাম ঠানতো আগচ্ছতি. তেনাহ ‘‘ইমানি চ অট্ঠীনি ইমা চ মংসপেসিযো’’তিআদি. কথং ন্ৰযন্তি অযং কুচ্ছিসঙ্খাতে গব্ভরে কথং সজ্জতীতি পুচ্ছতি. ‘‘সীহানংৰ নদন্তানং, দাঠীনং গিরিগব্ভরে’’তিআদিনা (থেরগা. নিদানগাথা) গব্ভরো চ কুচ্ছিৰাচকো আগতো. তেনাহ ‘‘গব্ভরস্মিন্তি মাতুকুচ্ছিস্মি’’ন্তি. পুগ্গলৰাদীতি অত্তৰাদুপাদানো. যথা হি মচ্ছমংসং ভুত্তং ফেণং ৰিয হুত্ৰা ৰিলীযতি, ন চ পঞ্ঞাযতি সত্তভাৰেন অপ্পৰত্তনতো, এৰমেৰং যদি মাতুকুচ্ছিস্মিং গব্ভভাৰেন উপ্পন্নং রূপং সত্তো ন ভৰেয্য নো ৰড্ঢেয্য, ৰিলীযিত্ৰা গচ্ছেয্য, পঞ্ঞাযতি চ তং রূপং, তস্মা জীৰোতি ইমায লদ্ধিযা. এৰমাহাতি ‘‘রূপং…পে… গব্ভরস্মি’’ন্তি এৰমৰোচ. পঠমন্তি এতেসং পঞ্চন্নং পঠমং. তেনাহ ‘‘পঠমেন পটিসন্ধিৰিঞ্ঞাণেন সদ্ধি’’ন্তি. ‘‘জাতিউণ্ণংসূহীতি জাতিএল়কায উণ্ণংসূহী’’তি ৰদন্তি. ‘‘গব্ভং ফালেত্ৰা গহিতউণ্ণা জাতিউণ্ণা. তস্সা অংসূহি তীহি কতসুত্তগ্গে’’তি সংযুত্তভাণকানং অধিপ্পাযো.

অনাৰিলোতি অচ্ছো, সুপ্পসন্নোতি অত্থো. এৰংৰণ্ণপ্পটিভাগন্তি ৰুত্তপ্পমাণসণ্ঠানসম্পরিচ্ছিন্নং. কললং সম্পৰুচ্চতীতি অত্তভাৰো ভূতুপাদারূপসঙ্খাতো সন্তানৰসেন পৰত্তমানো কললং নামাতি কথীযতি.

কললাতি যথাৰুত্তকললরূপহেতু তং নিস্সায পচ্চযং কত্ৰা. মংসধোৰনউদকৰণ্ণন্তি ৰণ্ণতো মংসধোৰনউদকৰণ্ণং, সণ্ঠানতো পন ৰিলীনতিপুসদিসং.

পরিপক্কন্তি পরিপাককললভাৰতো পরিপাকং গতং সুপরিপাকং গতং. সমূহতন্তি সমূহভূতং সঙ্গতং. ৰিৰট্টমানন্তি পরিণমন্তং. তব্ভাৰন্তি করণে এতং উপযোগৰচনং, তব্ভাৰেন পরিণমন্তন্তি অত্থো. নিস্সক্কে ৰা উপযোগৰচনং, তব্ভাৰতো কললভাৰতো কললং ৰিপরিণমন্তং. অব্বুদং নাম জাযতি, অব্বুদং নাম সম্পজ্জতীতি অত্থো.

ৰিলীনতিপুসদিসা সণ্ঠানৰসেন, ৰণ্ণৰসেন পন সিতা অরত্তাৰ হোতীতি ৰদন্তি. মণ্ডন্তি দারিকানং তথা পীল়নতো নিব্বত্তমরিচপক্কস্স সারভূতং রসং. সব্বভাগেহি মুচ্চতীতি সো মণ্ডো কপালে অলগ্গো হুত্ৰা তস্স সব্বভাগেহি মুচ্ছিত্ৰা পিণ্ডিতো হুত্ৰা তিট্ঠতি. এৰরূপা পেসি হোতীতি সা পেসি গব্ভাসযে কত্থচি অলগ্গা যথাৰুত্তমণ্ডো ৰিয পিণ্ডিতো হুত্ৰা তিট্ঠতি. তেনাহ ‘‘ৰিলীনতিপুসদিসা’’তি.

পেসি নিব্বত্ততীতি এত্থ পেসীতি নিস্সক্কে পচ্চত্তৰচনন্তি আহ ‘‘ততো পেসিতো’’তি.

ঘনস্স সণ্ঠানং. নিব্বত্তং কম্মপচ্চযাতি তংসণ্ঠানং রূপধম্মনিব্বত্তিযা জাযতি. ‘‘জরামরণং অনিচ্চং সঙ্খতং পটিচ্চসমুপ্পন্ন’’ন্তি (সং. নি. ২.২০) হি ৰুত্তং.

পীল়কাতি পীল়কসদিসা মংসপিণ্ডা জাযন্তি.

সত্তমাদীনীতি আদি-সদ্দেন অট্ঠমসত্তাহতো পট্ঠায যাৰ একচত্তালীসা চতুত্তিংস সত্তাহানি সঙ্গণ্হাতি. পরিণতকালন্তি গব্ভস্স পরিণতকালং. নৰমাসতো বহি পরিপক্কো নাম হোতি কেসলোমাদিনিব্বত্তিতো. তেনাহ ‘‘দ্ৰাচত্তালীসে সত্তাহে এতানি জাযন্তী’’তি.

তস্সাতি গব্ভসেয্যকসত্তস্স. মাতুউদরপটলেন একাবদ্ধো হোতি যতো মাতরা পরিভুত্তআহারো আমাসযে পতিট্ঠিতে গব্ভস্স নাভিনাল়ানুসারেন গব্ভগতস্স সরীরং সম্পত্ৰা আহারকিচ্চং করোতি. আহারসমুট্ঠানরূপং সমুট্ঠাপেতীতি গব্ভগতস্স কাযে ওজায পচ্চযো হোতি. সা চ তং পচ্চযং লভিত্ৰা ওজট্ঠমকং রূপং সমুট্ঠাপেতি. এৰং মাতরা পরিভুত্তআহারপচ্চযেন গব্ভগতো দস মাসে যাপেতি অত্তনো নাভিনাল়ানুসারগতেনেৰ তেন যাৰ আহারসমুট্ঠানসত্তাহো, ততো পট্ঠায আহরণতো. কেচি পন ‘‘মাতরা পরিভুত্তআহারো বাহিরৰগ্গো ৰিয তস্স কাযং অভিসন্নেতি পরিসন্নেতি, তেন সো যাপেতী’’তি ৰদন্তি. কুচ্ছিগতং উদরপটলেন তিরোহিতত্তা বহি ঠিতন্তি ৰত্তব্বতং ন অরহতীতি ‘‘কুচ্ছিযা অব্ভন্তরগতো’’তি আহ. মাতুকুচ্ছিগতো নরোতি মাতু তিরোকুচ্ছিগতো. এৰং খোতি ইমিনা যথাৰুত্তাকারেন অযং সত্তো…পে… নিব্বত্ততি, তস্মা রূপং ন জীৰো. ন হি দিট্ঠিগতস্স সত্তাহক্কমেন ৰুড্ঢিপ্পত্তো ইচ্ছিতো অনিচ্চতাপত্তিতো.

ইন্দকসুত্তৰণ্ণনা নিট্ঠিতা.

২. সক্কনামসুত্তৰণ্ণনা

২৩৬. সক্কনামকোতি বলিপুত্তো ৰিয সক্কস্স ৰসেন গহিতনামো. ‘‘এসো কিরা’’তি পাঠো. ‘‘একো কিরা’’তিপি লিখন্তি. মারস্স পক্খে গতো মারপক্খিকো. যদঞ্ঞন্তি এত্থ যন্তি কিরিযাপরামসনং, তস্মা যং অঞ্ঞস্স অনুসাসনং, তং সমণস্স ন সাধূতি যোজনা. কারণেনাতি কারণমত্তেন সংৰাসো জাযতি. যেন কেনচি গহট্ঠেন ৰা পব্বজিতেন ৰা. তং কারণন্তরং সমাগতং পুরিসং সপ্পঞ্ঞো সম্বুদ্ধো অনুকম্পিতুং নারহতি ৰিসেসাধিগমাভাৰা, সতি পন তস্মিং সৰিসেসং পসাদো হোতীতি. মনসা চে…পে… ন তেন হোতি সংযুত্তো সিনেহৰসেন অনুকম্পা অনুদ্দযা তস্সা অসংকিলিট্ঠসভাৰত্তা.

সক্কনামসুত্তৰণ্ণনা নিট্ঠিতা.

৩. সূচিলোমসুত্তৰণ্ণনা

২৩৭. গযায অৰিদূরে ভৰো গামো ‘‘গযা’’তি ৰুত্তোতি আহ ‘‘গযায’’ন্তি, তেনাহ ‘‘গযায অৰিদূরে নিৰিট্ঠগামং উপনিসাযাতি অত্থো’’তি. গোচরগামনিদস্সনং হেতং. ইদং উপরি ইদং হেট্ঠাতি নত্থি উপ্পটিপাটিযো মঞ্চপাদানং দ্ৰীসু পস্সেসু দীঘভাৰেন. বলিকম্মত্থায কতং দেৰতাধিট্ঠানন্তি অধিপ্পাযেন দেৰট্ঠানে ঠপেন্তি. অট্ঠপাদমঞ্চসদিসো কির সো হেট্ঠুপরিপরিৰত্তেতব্বতো. কথিনসিব্বনসূচি কথিনসূচি. অপচ্চত্থরিত্ৰাতি কিঞ্চি সঙ্ঘিকসেনাসনস্স উপরি পটিচ্ছদনং অপচ্চত্থরিত্ৰা. গৰচ্ছিৰিজ্ঝিতং ৰিযাতি তেহি সূচিলোমেহি গৰচ্ছিজালং ৰিয গতং সব্বসো সমোহতং.

ইধাপি ‘‘খরসরীরো’’তি ৰত্ৰা খরসরীরং কথিনসূচিসদিসতায লোমস্সাতি তস্স তথাভাৰস্স কারণং দস্সেন্তো ‘‘সো কিরা’’তিআদিমাহ. অত্তনো হত্থেহীতি সঙ্ঘিকতেলসম্মক্খিতেহি অত্তনো সরীরং মক্খেসি. ইতীতি ৰুত্তাকারেন.

সমাগমট্ঠানন্তি যক্খসন্নিপাতট্ঠানং. সোতি সূচিলোমো যক্খো. মন্তি চ তমেৰ ৰদতি.

উট্ঠাপেত্ৰাতি উদ্ধগ্গা কত্ৰা. অপনামেসীতি যথা সো অত্তনো কাযং উপনেতুং ন সক্কোতি, তথা করোন্তো থোকং অপনামেসি. অমনুঞ্ঞোতি ফরুসতিক্খতায ন মনুঞ্ঞো. চিত্তং ৰা তে খিপিস্সামীতি ময্হং আনুভাৰেন তৰ চিত্তৰিক্খেপং ৰা করিস্সামি. যথা পন সো চিত্তৰিক্খেপং করেয্য, তং দস্সেতুং ‘‘যেসঞ্হী’’তিআদি ৰুত্তং. ভেরৰং ৰাতি ৰুত্তাকারেন অঞ্ঞথা ৰা ভযানকং দস্সনমত্তেনেৰ সত্তানং ভযং ছম্ভিতত্তং লোমহংসং উপ্পাদেতুং সমত্থং. ‘‘কথেন্তানংযেৰা’’তি ৰা পাঠো. তং দ্ৰীসু পাদেসু গহেত্ৰা পারং গঙ্গায খিপিস্সামীতি যোজনা.

কুতোনিদানাতি কস্মা কারণা? অট্ঠকথাযং পন সমাসপদমেতং, ৰিভত্তিঅলোপেন নিদ্দেসোতি দস্সেতুং ‘‘কিংনিদানা কিংপচ্চযা’’তি? অত্থো ৰুত্তো. চিত্তং ওস্সজন্তীতি কুসলচিত্তং পৰত্তিতুং অপ্পদানৰসেন পুরতো খিপন্তি. কুতো সমুট্ঠাযাতি মিচ্ছাৰিতক্কানং সমুট্ঠানং পুচ্ছতি?

কামরাগাদযো সুভনিমিত্তাদীসু অযোনিসোমনসিকারহেতূ. কামো পন অযোনিসোমনসিকারো চ নিযকজ্ঝত্তপরিযাপন্নোতি আহ ‘‘অযং অত্তভাৰো নিদানং এতেসন্তি ইতোনিদানা’’তিআদি. এৰমেৰাতি অট্ঠকথাযং কীল়াপসুতকুমারকা ৰিয মিচ্ছাৰিতক্কা দট্ঠব্বা, তেসং উপ্পত্তিট্ঠানভূতো লোকো ৰিয অযং অত্তভাৰলোকো. তেহি ওস্সজিযমানং ধঙ্কং ৰিয চিত্তং, তস্স পাদে বদ্ধদীঘসুত্তকং ৰিয তং দূরানুবন্ধং সংযোজনন্তি এৰং উপমায সংসন্দনং দট্ঠব্বং.

পাপৰিতক্কানং তংসম্পযুত্তকিলেসানঞ্চ তণ্হা ৰিসেসপচ্চযো তদভাৰেন তেসং অভাৰতোতি আহ ‘‘তণ্হাসিনেহতো জাতা’’তি. অত্তভাৰপরিযাপন্নত্তা ‘‘অত্তনি সম্ভূতা’’তি ৰুত্তং. তেন নেসং অনঞ্ঞহেতুকতং দস্সেতি, নিগ্রোধস্সেৰ খন্ধজাতীতি ইমিনা পন পুথুভাৰঞ্চ, ৰিসত্তাতিআদিনা দুব্বিনিস্সটতঞ্চ. ৰত্থুকামেসু রূপারম্মণাদীসু পুথূসু. পুথূ কিলেসকামা কামরূপতণ্হাদযো. তেহি কিলেসকামেহি করণভূতেহি. অত্তভাৰং খন্ধপঞ্চকং. যে ৰিপস্সনায যুত্তপযুত্তা যাথাৰতো জানন্তি.

যতোতি পচ্চত্তে নিস্সক্কৰচনন্তি আহ ‘‘যং নিদানমস্সা’’তি. ‘‘ৰিনোদেন্তী’’তি কত্তুনিদ্দেসেন যেন ন ৰিনোদেন্তি, তং কারণং বাধিতমেৰাতি আহ ‘‘মগ্গসচ্চেন ৰিনোদেন্তী’’তি. ৰিনোদনঞ্চেত্থ সন্তানতো নীহরণং বহিকরণং সব্বসো পহানং, পহীনে চ তস্মিং কিলেসে ওঘং তরন্তীতি দস্সেন্তো ‘‘দুত্তর’’ন্তিআদিমাহ. এতস্মিং অধিগতে ন পুন ভৰোতি অপুনব্ভৰো, নিব্বানন্তি আহ ‘‘অপুনব্ভৰসঙ্খাতস্সা’’তিআদি. যস্মা এত্থ ‘‘যে নং পজানন্তি, যতোনিদান’’ন্তি পদদ্ৰযেন দুক্খসমুদযসচ্চানি, ৰিনোদনগ্গহণেন মগ্গসচ্চং, অপুনব্ভৰগ্গহণেন নিরোধসচ্চং পকাসিতং, তস্মা ৰুত্তং ‘‘চত্তারি সচ্চানি পকাসেন্তো’’তি.

তস্মিংযেৰাতি যত্থ ঠিতো ‘‘রাগো চ দোসো চা’’তিআদিনা পঞ্হং পুচ্ছি, তস্মিংযেৰ পদেসে ঠিতো. দেসনানুসারেনাতি সত্থু সামুক্কংসিকধম্মদেসনায অনুস্সরণেন. ঞাণং পেসেত্ৰাতি ৰিপস্সনাপটিপাটিযা নিব্বানং পতি অনুবোধঞাণং পেসেত্ৰা পৰত্তেত্ৰা. সোতাপত্তিফলে পতিট্ঠিতোতি সহস্সনযপটিমণ্ডিতস্স পঠমমগ্গস্স অধিগমেন পঠমফলে পতিট্ঠিতো পটিলভতীতি যোজনা. ন কিলিট্ঠত্তভাৰে তিট্ঠন্তি মহানুভাৰত্তা অরিযধম্মস্স. সেতকণ্ডুপীল়কসূচিযোতি সেতভাৰং পত্ৰা কণ্ডুপীল়কা লোমসূচিযো সব্বা অনৰসেসা পতিতা পরিভট্ঠা অপগতা. ভুম্মদেৰতাপরিহারন্তি ভুম্মদেৰত্তভাৰন্তি.

সূচিলোমসুত্তৰণ্ণনা নিট্ঠিতা.

৪. মণিভদ্দসুত্তৰণ্ণনা

২৩৮. সুখং পটিলভতীতি দিট্ঠধম্মিকাদিভেদং সুখং অধিগচ্ছতি. নিচ্চমেৰ সেয্যো সতিমতো আযতিং হিতচরণতো. মণিভদ্দো ‘‘সতিমাপুগ্গলো সতোকারী সম্পতি ৰেরং নপ্পসৰতী’’তি অধিপ্পাযেন ‘‘ৰেরা চ পরিমুচ্চতী’’তি আহ. ভগৰা পন সতিমন্ততাসিদ্ধিযা ৰেরপরিমুচ্চনং ন অচ্চন্তিকং, নাপি একন্তিকং পটিপক্খেন পরতো চ অপ্পহীনত্তাতি তং নিসেধেন্তো ‘‘ৰেরা চ ন পরিমুচ্চতী’’তি ৰত্ৰা, যং অচ্চন্তিকং একন্তিকঞ্চ পরস্স ৰসেন ৰেরপরিমুচ্চনং, তং দস্সেন্তো ‘‘যস্সা’’তি গাথমাহ. করুণাযাতি অপ্পনাপ্পত্তায করুণায. করুণাপুব্বভাগেতি করুণাভাৰনায ৰসেন উপ্পাদিতপঠমজ্ঝানূপচারে. সোতি করুণাভাৰনং ভাৰেন্তো পুগ্গলো. মেত্তংসোতি মেত্তচিত্তং অংসো একো কুসলকোট্ঠাসো এতস্সাতি মেত্তংসো. তস্স কেনচীতি তস্স অরহতো করুণায মেত্তাভাৰনায চ সাতিসযত্তা তদভাৰেন কেনচি পুগ্গলেন সদ্ধিং ৰেরপ্পসঙ্গো নাম নত্থি. ইমিনা খীণাসৰেপি মেত্তাকরুণাভাৰনারহিতে কোচি অত্তনো চিত্তদোসেন ৰেরং করেয্য, ন পন তস্মিং মেত্তাকরুণাচেতোৰিমুত্তিসমন্নাগতে কোচি ৰেরং করেয্য. এৰং মহিদ্ধিকা ব্রহ্মৰিহারভাৰনাতি দস্সেতি.

মণিভদ্দসুত্তৰণ্ণনা নিট্ঠিতা.

৫. সানুসুত্তৰণ্ণনা

২৩৯. যক্খেন গহিতো হোতীতি যক্খেন অনুপৰিট্ঠো হোতি. তস্স যক্খগহণস্স কারণং মূলতো পভুতি ৰিত্থারতো দস্সেতুং ‘‘সো’’তিআদিমাহ. তস্স অন্তিমভৰিকত্তা আদিতো পট্ঠায অধিসীলসিক্খায সক্কচ্চং পূরণন্তি দস্সেতি ‘‘সো পব্বজিতকালতো’’তিআদিনা. পচ্চাহারন্তি পটিক্খেপং. ইমস্মিং সরভঞ্ঞেতি ইমস্মিং মম ধম্মভণনে. পত্তিন্তি পত্তিদানং. পিযা হোন্তি, তেনাহ ভগৰা ‘‘আকঙ্খেয্য চে, ভিক্খৰে, ভিক্খু ‘সব্রহ্মচারীনং পিযো চ অস্সং মনাপো চ গরু চ ভাৰনীযো চা’তি, সীলেস্ৰেৰস্স পরিপূরকারী’’তি (ম. নি. ১.৬৫). তথা চাহ ‘‘তস্মিং সামণেরে’’তিআদি.

ৰুড্ঢিমন্ৰাযাতি যোব্বনপ্পত্তিযা অঙ্গপচ্চঙ্গানং পরিৰুড্ঢিমাগম্ম. কামসম্ভোগসমত্থতাৰসেন পরিপক্কিন্দ্রিযো. অনুযোজেত্ৰাৰাতি ৰিস্সজ্জেত্ৰাৰ, গিহিভাৰে ৰা অনুযোজেত্ৰাৰ. ‘‘পুব্বে তুয্হং পুত্তো সীলৰা কল্যাণধম্মো লজ্জী কুক্কুচ্চকো সিক্খাকামোতি সম্ভাৰিতো, ইদানি ততো অঞ্ঞথা জাতো’’তি ঘোসনাৰসেন দেৰতানং অন্তরে মাহেৰ মে লজ্জং উপ্পাদেয্য.

পাটিহারিযপক্খঞ্চাতি চাতুদ্দসীপঞ্চদসীঅট্ঠমীনং যথাক্কমং আদিতো অন্ততো আদিঅন্ততো চ পৰেসননিক্খমনৰসেন উপোসথসীলস্স পটি পটি অভিমুখং পচ্চাৰহিতব্বপক্খঞ্চ. তেরসিযাপীতি পরং সত্তমীনৰমীসুপীতি অত্থো. পৰেসভূতঞ্হি উপোসথসীলস্স সত্তমীসু সমাদিন্নং সীলং পটিপদং, নৰমীসু নিক্খমভূতন্তি আচরিযা. পোরাণট্ঠকথাযং পন পচ্চুগ্গমনানুগমনপরিযাযেন ৰুত্তন্তি আহ ‘‘মনুস্সা’’তিআদি. অড্ঢমাসন্তি সকলকালপক্খং. এৰঞ্হি ৰস্সৰাসস্স অনুগমনং গতং হোতি. সুট্ঠু সমাগতন্তি সুপরিসুদ্ধং সম্পন্নং কত্ৰা অত্তনো সন্তানং আগতং. তং পন অত্তনো চিত্তেন সমং পকারেহি যুত্তং হোতীতি আহ ‘‘সম্পযুত্ত’’ন্তি. অরহন্তানং অনুকরণেন সেট্ঠচরিযং. ‘‘ন তে হি যক্খা কীল়ন্তী’’তি অত্তনো পুত্তস্স কাযে অধিমুচ্চনং অত্তনো কীল়নং ৰিয হোতীতি কত্ৰা আহ.

উপাসিকা যথাৰুত্তউপোসথসীলেন সীলৰতী, সামণেরো পন অত্তনো সামণেরসীলেন সীলৰা. উপ্পতিত্ৰাতি আকাসে উপ্পতিত্ৰা. মোক্খো নত্থি দুক্খাৰহস্স কম্মস্স কতূপচিতত্তা.

দুৰিধেপি কামেতি ৰত্থুকামকিলেসকামে. কিলেসকামং পরিচ্চজন্তো এৰ হি ৰত্থুকামে পরিচ্চজতি নাম. ৰিব্ভমনৰসেন আগচ্ছতি ভিক্খায আহিণ্ডনাদিপব্বজিতকিচ্চতো. উপ্পব্বজিত্ৰা ৰিগতসীলস্স জীৰতো আনাপানমত্তেন জীৰন্তোপি সো মতকোৰ. ৰুত্তঞ্হেতং ‘‘মরণঞ্হেতং, সুনক্খত্ত, অরিযস্স ৰিনযে, যো সিক্খং পচ্চক্খায হীনাযাৰত্ততী’’তি (ম. নি. ৩.৪৫).

উণ্হট্ঠেনাতি সপরিল়াহট্ঠেন. অভিধাৰথাতি অভিধাৰতীতি ইমস্মিং অভিধাৰনকিচ্চে ভদ্দং তে হোতূতি ৰত্ৰা গিহিভাৰায অভিধাৰথ. নীহরিত্ৰাতি নিক্খামেত্ৰা. একাদসহি অগ্গীহি আদিত্তত্তা মহাডাহসদিসে. সল্লক্খেত্ৰাতি গিহিভাৰে আদীনৰং, পব্বজ্জায আনিসংসঞ্চ সল্লক্খেত্ৰা. হিরোত্তপ্পং পটিলভিত্ৰা ‘‘মম উপ্পব্বজিতুকামতং সব্রহ্মচারিনো জানিস্সন্তী’’তি. চতুন্নং পরিসানং চিত্তসঙ্খোভৰসেন সকলজম্বুদীপং খোভেত্ৰা.

সানুসুত্তৰণ্ণনা নিট্ঠিতা.

৬. পিযঙ্করসুত্তৰণ্ণনা

২৪০. পচ্চন্তেতি পরিযন্তে. পাটিযেক্কন্তি সঙ্গীতিকালে ৰিসুং. যমকৰগ্গাদিকা ব্রাহ্মণৰগ্গপরিযোসানা ছব্বীসতি ৰগ্গা এতিস্সাতি ছব্বীসতিৰগ্গা, তন্তীতি পাল়ি. উচ্চারপস্সাৰাদি এৰরূপং দুব্ভোজনং, ‘‘অসুচিজেগুচ্ছভাৰেন দুট্ঠু ভোজন’’ন্তি কত্ৰা, দুব্ভোজনগ্গহণেন ৰা ৰন্তগব্ভমলাদীনি অতিদিসতি. ছৰিআদীনি ছেত্ৰাতি ছৰিআদীনি অতিৰিজ্ঝ অতিৰিয পৰিসিত্ৰা. অট্ঠিমিঞ্জং আহচ্চ অট্ঠাসি পীতিসমুট্ঠানউল়ারোল়াররূপপ্পৰত্তিযা. তেনাহ ‘‘হদযঙ্গমনীযো হুত্ৰা’’তি.

ধম্মতায সমাদিণ্ণন্তি কস্সচি সন্তিকে অগ্গহেত্ৰা সযমেৰ তস্মিং খণে সংযতা হোমাতি যথাসংযতা. ততিযপদেনাতি ‘‘সিক্খেম সুসীল্য’’ন্তি ইমিনা পদেন. সেসাতি ৰুত্তাৰসেসা. তিস্সো অদিন্নাদানমিচ্ছাচারসুরাপানৰিরতিযো. গহিতা গোবলীবদ্দঞাযেন. ছাতকং দুব্ভিক্খঞ্চ এত্থাতি ছাতকদুব্ভিক্খা, জিঘচ্ছাদুব্ভিক্খাবহুলাযাতি অত্থো. পিসাচযক্খযোনিযাতি পেত্তিৰিসযসদিসযক্খযোনিযা অপি নাম মুচ্চেমাতি যোজনা.

পিযঙ্করসুত্তৰণ্ণনা নিট্ঠিতা.

৭. পুনব্বসুসুত্তৰণ্ণনা

২৪১. ৰসনট্ঠানগ্গহণেন রত্তিট্ঠানদিৰাট্ঠানাদযো সঙ্গণ্হাতি. দ্ৰাদসহত্থমত্তমেৰ গণ্হাতি পকতিসঞ্চরণূপচারমত্তব্যাপনতো. যথাপরিসন্তি পরিসানুরূপং, যত্থ যত্থ পরিসা তিট্ঠতি, তং তং ঠানং গচ্ছতি পরিসপরিযন্তিকত্তা. সত্থু মুখৰিকারাভাৰতো পৰেসানুঞ্ঞং সল্লক্খেন্তী ‘‘নূন অযং কতাধিকারা ভৰিস্সতী’’তি অনুমানসিদ্ধং উপনিস্সযং দিস্ৰা. একীভাৰগমনেনাতি হত্থপাসূপগমনেন পরিসায মিস্সীভাৰপ্পত্তিযা. পুত্তকাতি পুত্তপুত্তিযো. অনুকম্পাযঞ্হি ক-সদ্দো.

নিব্বানারম্মণেন অরিযমগ্গেন মুঞ্চিযমানা গন্থা ‘‘নিব্বানং আগম্ম পমুচ্চন্তী’’তি ৰুত্তা. ৰেলাতিক্কন্তাতি পমাণতো পরিচ্ছিন্দিতুং ন সক্কাতি আহ ‘‘পমাণাতিক্কন্তা’’তি. পিযাযনাতি আসীসনা. আসীসনং পেমৰসেন পেমৰত্থুনো এসনা পত্থনাৰ হোতীতি আহ ‘‘মগ্গনা পত্থনা’’তি. ততোতি পিযপুত্তাদিতো. পাণীনন্তি সামিঅত্থে পুথুৰচনং দুক্খসদ্দাপেক্খং. কে মোচেতীতি মোচনকিরিযায কম্মং পুচ্ছতি? ইভরো পন অত্থৰসেন ৰিভত্তিৰিপরিণামোতি ‘‘পাণিনেতি আহরিত্ৰা ৰত্তব্ব’’ন্তি আহ. অভিসম্বুধন্তি অভিসম্বুধন্তো. তেনাহ ‘‘অভিসম্বুদ্ধো’’তি. সদ্ধম্মস্সাতি উপযোগত্থে সামিৰচনন্তি আহ ‘‘সদ্ধম্মমেৰ অজানিত্ৰা’’তি.

পুত্তস্স অনুমোদনং করোন্তীতি পুত্তস্স পটিপত্তিঅনুমোদনং করোন্তী. উগ্গতাতি এত্থ কললে ৰট্টদুক্খে নিমুজ্জমানা ততো সীসং উক্খিপিতুং অসক্কোন্তি অজ্জ বুদ্ধানুভাৰেন পঞ্ঞাসীসং উক্খিপিতা উগ্গতা. পুন ৰিনিপাতাভাৰতো সম্মদেৰ উগ্গতত্তা সমুগ্গতা. তথাভূতা সাসনেপি উগ্গতা সমুগ্গতা জাতা. চতুসচ্চপটিৰেধভাৰন্তি চতুসচ্চপটিৰেধস্স অত্থিভাৰং. কণ্ডুকচ্ছুআদীতি আদি-সদ্দেন জেগুচ্ছঅসাতাদিং সঙ্গণ্হাতি. দিব্বসম্পত্তিং পটিলভতি পৰত্তিযং সম্পত্তিদাযিনো কম্মস্স কতোকাসত্তা. তুণ্হী উত্তরিকে হোহীতি মাতু-ৰচনং সম্পটিচ্ছিত্ৰা তস্স ৰিসেসাধিগমস্স অৰিবন্ধকরণসম্মাপযোগেন যথালদ্ধৰিসেসায মাতুযা ৰসেন যস্মা ধীতা দিট্ঠধম্মিকসম্পত্তিলাভী, তস্মা ৰুত্তং ‘‘মাতু আনুভাৰেনেৰা’’তি.

পুনব্বসুসুত্তৰণ্ণনা নিট্ঠিতা.

৮. সুদত্তসুত্তৰণ্ণনা

২৪২. করণীযেনাতি এত্থ করণীযন্তি ৰাণিজ্জকম্মং অধিপ্পেতন্তি তং ৰিৰরন্তো ‘‘অনাথপিণ্ডিকো চা’’তিআদিমাহ. ৰিক্কীযতীতি ৰিক্কযং গচ্ছতি. তথেৰ করোতীতি যথা রাজগহসেট্ঠিনা সাৰত্থিং গন্ত্ৰা কতং, তথেৰ রাজগহং গন্ত্ৰা করোতি. স্ৰাযন্তি অনাথপিণ্ডিকো.

তং দিৰসন্তি যং দিৰসং অনাথপিণ্ডিকো, গহপতি, রাজগহসমীপং উপগতো, তং দিৰসং. পণ্ণন্তি সাসনং. ন সুণীতি অসুণন্তো ‘‘পণ্ণং ন সুণী’’তি ৰুত্তো. ধম্মগারৰেন হি সো সেট্ঠি অঞ্ঞং কিচ্চং তিণাযপি ন মঞ্ঞি. তেনাহ ‘‘ধম্মস্সৰনত্থাযা’’তিআদি. দারকরূপানন্তি দারকানং. অনত্থন্তরকরো হি রূপ-সদ্দো যথা ‘‘গোরূপান’’ন্তি. পঞ্চৰণ্ণন্তি খুদ্দিকাদিভেদং পঞ্চপ্পকারং পীতিং পটিলভি. অনুক্কমেন হি তা এতস্স সম্ভৰন্তি. ‘‘সীসেন উট্ঠায…পে… গচ্ছতী’’তি পদং পীতিসমুট্ঠানরূপৰসেন লক্খেত্ৰা ৰুত্তং.

সিৰথিকায ৰসতীতি সিৰথিকায সমীপে ৰসতি. সুসানস্সাসন্নট্ঠানে হি সো ৰিহারো. অথস্সাতি অথস্স অনাথপিণ্ডিকস্স ‘‘অকালো…পে… উপসঙ্কমিস্সামী’’তি এতং অহোসি. বুদ্ধগতায সতিযাতি অঞ্ঞং কিঞ্চি অচিন্তেত্ৰা বুদ্ধগতায এৰ সতিযা সযনৰরগতো নিপজ্জি. তেন ৰুত্তং ‘‘তং দিৰস’’ন্তিআদি.

বলৰপ্পসাদোতি বুদ্ধারম্মণা বলৰতী সদ্ধা. পীতিআলোকোতি পুরিমবুদ্ধেসু চিরকালং পরিচযং গতস্স বলৰতো পসাদস্স ৰসেন ‘‘বুদ্ধো’’তি নামং সৰনমত্তেন উপ্পন্নায উল়ারায পীতিযা সমুট্ঠাপিতো ৰিপস্সনোভাসসদিসো সাতিসযো আলোকো হোতি চিত্তপচ্চযউতুসমুট্ঠানো. তেনাহ ‘‘সব্বতমং ৰিগচ্ছী’’তিআদি. ‘‘দেৰতা হি কতা’’তিপি ৰদন্তি, পুরিমো এৰেত্থ যুত্তো.

অমনুস্সাতি অধিগতৰিসেসা দেৰতা. তা হি সেট্ঠিস্স সম্পত্তিং পচ্চক্খতো পস্সিংসু. তেনাহ ‘‘অযং মহাসেট্ঠী’’তিআদি. অল্লসরীরন্তি তাৰদেৰ ছড্ডিতং অচ্ছিন্নং ৰা কল়েৰরং. অপরম্পীতি মতং কুথিতকুণপং. পরিকিরিংসূতি সমন্ততো ওসরিতা অহেসুং. আলোকো অন্তরধাযিপীতিৰেগস্স মন্দভাৰেন তংসমুট্ঠানরূপানং দুব্বলভাৰতো.

ইমিনাৰাতি অধিকারেন সহস্সপদেন এৰ সম্বন্ধিতব্বানি. পদং ৰীতিহরতি এত্থাতি পদৰীতিহারো, পদৰীতিহারট্ঠানং. সমগমনেতি দুতৰিলম্বিতং অকত্ৰা সমগমনে. ততোতি তেসু সোল়সভাগেসু. একো কোট্ঠাসোতি যথাৰুত্তং পদৰীতিহারপদেসং সোল়সধা ভিন্নস্স একো ভাগো. পৰত্তচেতনাতি যথাৰুত্তকলাসঙ্খাতস্স পদেসস্স লঙ্ঘনধাৰনপৰত্তচেতনা. পদং ৰা ৰীতিহরতি এতেনাতি পদৰীতিহারো, তথাপৰত্তা কুসলচেতনা. ‘‘তস্সা ফলং সোল়সধা কত্ৰা’’তি ৰদন্তি. পতিট্ঠহন্তস্স ৰসেন গহিতন্তি যোজনা. ৰিৰট্টনিস্সিতায এৰ রতনত্তযপূজায ধম্মস্সৰনস্স সিক্খাপদসমাদানস্স সরণগমনস্স চ অত্থায গচ্ছতোপি ৰসেন ৰট্টতি. পঠমং ৰুত্তগমনং লোকুত্তরৰিসেসাধিগমস্স একন্তিকং, দুতিযং অনেকন্তিকন্তি ‘‘ৰট্টতিযেৰা’’তি সাসঙ্কৰচনং.

সোতি অনাথপিণ্ডিকো সেট্ঠি. অনুযুত্তাতি অনুগামিনো সহাযা. তেৰ সন্ধায ৰদতি. ‘‘সিৰকো অমনুস্সো’’তি অপরে. ন কেৰলং ‘‘অনুযুত্তাপি মে অত্থি, কস্মা ভাযামী’’তি এৰং সূরো অহোসি? অথ খো বুদ্ধগতায তিক্খৰিসদসভাৰেন সব্বং পরিস্সযং মদ্দিত্ৰাপি অগমাসীতি দস্সেতুং ‘‘অপিচা’’তিআদি ৰুত্তং. পক্খন্দনলক্খণা হি সদ্ধা, তায যুত্তকো সপ্পুরিসোপি সদ্ধম্মগুণৰসেন সব্বং পরিস্সযং মদ্দিত্ৰা পক্খন্দতীতি দট্ঠব্বং.

সব্বকামসমিদ্ধতা পরিচ্চাগসীলতা উল়ারজ্ঝাসযতা পরদুক্খাপনযকামতা পরেসং হিতেসিতা পরসম্পত্তিপমোদনাতি এৰমাদীনং মহাগুণানং ৰসেন নিচ্চকালং অনাথানং পিণ্ডদাযকত্তা ‘‘অনাথপিণ্ডিকো’’তি এৰং উপ্পন্নং নামং. এৰমাহাতি ‘‘এহি সুদত্তা’’তি এৰং আহ.

কিলেসপরিনিব্বানেনাতি সব্বসো রাগাদিকিলেসৰূপসমেন. কিলেসৰূপসমন্তি সব্বসো সব্বেসং কিলেসানং ৰূপসমং অগ্গমগ্গেন পত্ৰা. অনুপুব্বিকথন্তি দানাদিকথং. সা হি অনুপুব্বেন কথেতব্বত্তা ‘‘অনুপুব্বিকথা’’তি ৰুচ্চতি. তং সন্ধায ৰুত্তং – ‘‘অথ খো ভগৰা অনুপুব্বিং কথং কথেসি. সেয্যথিদং – দানকথং সীলকথং সগ্গকথং কামানং আদীনৰং ওকারং সংকিলেসং নেক্খম্মে আনিসংসং পকাসেসী’’তি (চূল়ৰ. ৩০৫). মত্থকেতি অনুপুব্বিকথায উপরি পরতো. চত্তারি সচ্চানি পকাসেসীতি যথা মহাসেট্ঠি সহস্সনযপটিমণ্ডিতে সোতাপত্তিফলে পতিট্ঠাতি, এৰং পৰত্তিনিৰত্তিযো সহ হেতুনা ৰিভজন্তো চত্তারি অরিযসচ্চানি পকাসেসীতি.

সুদত্তসুত্তৰণ্ণনা নিট্ঠিতা.

৯. পঠমসুক্কাসুত্তৰণ্ণনা

২৪৩. রথিকন্তি রচ্ছং. গহেত্ৰাতি গন্ত্ৰা. সিঙ্ঘাটকন্তি অঞ্ঞত্থ তিকোণা রচ্ছা ৰুচ্চতি. ইধ পন ‘‘চতুক্ক’’ন্তি ৰুত্তং. ‘‘মধুপীকা’’তি এত্থ মধু-সদ্দেন মধুৰিসেসো ৰুচ্চতীতি আহ ‘‘গন্ধমধুপানং পীতা ৰিযা’’তি. সামঞ্ঞজোতনা হি ৰিসেসে তিট্ঠতীতি গন্ধমধূতি চ অতিৰিয মধুরো মদনিযো একো মধুৰিসেসো. তেনাহ ‘‘অসঞ্ঞী হুত্ৰা সযতেৰা’’তি.

ন পটিৰানীযং ন অপনেতব্বন্তি অপ্পটিৰানীযং. তেনাহ ‘‘বাহিরকঞ্হী’’তিআদি. যং কিঞ্চি সন্তপণীতভাৰাৰহং ন সেচনন্তি অসেচনকং. ততো এৰ অনাসিত্তকং. ওজৰন্তন্তি বহুসম্মতওজৰন্তসদিসতায ওজৰন্তং. তেনাহ ‘‘যথা হী’’তিআদি. ধম্মতাযাতি অত্তনো সভাৰেনেৰ. মধুরো ইট্ঠো. পিৰন্তী ৰিযাতি সুক্কায ভিক্খুনিযা উপনীযমানং সদ্ধম্মামতরসং অত্তনো সোতঞ্জলিং পূরেত্ৰা ওদহন্তীৰ. ৰলাহকতো আগতং ৰলাহকং.

পঠমসুক্কাসুত্তৰণ্ণনা নিট্ঠিতা.

১০. দুতিযসুক্কাসুত্তৰণ্ণনা

২৪৪. বহুং ৰত পুঞ্ঞং পসৰতি সব্বগন্থৰিমুত্তিযা সীলসমন্নাগতেন অগ্গদক্খিণেয্যায সুক্কায থেরিযা ভোজনস্স দিন্নত্তা.

দুতিযসুক্কাসুত্তৰণ্ণনা নিট্ঠিতা.

১১. চীরাসুত্তৰণ্ণনা

২৪৫. একাদসমং উত্তানমেৰ দসমেন সদিসত্তা. তত্থ হি ভোজনং উপাসকস্স আভতং, ইধ চীৰরদানন্তি অযমেৰ ৰিসেসো.

চীরাসুত্তৰণ্ণনা নিট্ঠিতা.

১২. আল়ৰকসুত্তৰণ্ণনা

২৪৬. আল়ৰিযন্তি ইত্থিলিঙ্গৰসেন তং রট্ঠম্পি নগরম্পি ৰুচ্চতি. রট্ঠে অধিপ্পেতেপি ন এত্থ বহুৰচনং তথারুল়্হিযা অভাৰতো. তঞ্চ ভৰনন্তি তঞ্চ আল়ৰকস্স যক্খস্স ভৰনং. তত্থাতি আল়ৰকস্স ভৰনে. ‘‘অথ খো আল়ৰকো যক্খো যেন ভগৰা তেনুপসঙ্কমী’’তি এত্থ তস্মিং পাঠপদেসে. অযমনুপুব্বিকথাতি অযং ইদানি ৰুচ্চমানা অনুপুব্বতো আগতা কথা. আল়ৰিযা ইস্সরোতি আল়ৰো, আল়ৰকোতি চ রাজা ৰুত্তো. কদাচি চোরপটিবাহনত্থং, কদাচি উস্সাহসত্তিৰিভাৰনৰসেন পটিরাজনিসেধনত্থং, কদাচি লক্খযোগ্যৰিনিযোগৰসেন ব্যাযামকরণত্থঞ্চ. মিগানং ৰননতো ৰসনতো ৰানতো ৰা ‘‘মিগৰা’’তি লদ্ধসমঞ্ঞং মিগৰং. তস্সেৰাতি রঞ্ঞো এৰ. মিগোতি একো এণিমিগো. তিযোজনন্তি অচ্চন্তসংযোগে উপযোগৰচনং. উদকং ৰিয পৰিসিত্ৰা ঠিতন্তি যথা পরিস্সমপ্পত্তো উদকং পৰিসিত্ৰা ঠিতো নিরস্সাসো হোতি, এৰং ৰিয ঠিতং. মূলন্তি সমীপং. যক্খং দিস্ৰাৰ রঞ্ঞো ভযং ছম্ভিতত্তং ঊরুত্থম্ভং অহোসি, তস্মা রাজা পলাযিতুং নাসক্খি. তেন ৰুত্তং ‘‘খাদিতুং উপগতো’’তি. অথ রাজা দ্ৰিধা ছিন্নং মিগং দত্ৰা অত্তানং মোচেতুকামো অহোসি. যক্খো ‘‘ননু মম হত্থগতকালতো পট্ঠায মিগোপি মম সন্তকো, তত্থ কিন্নাম তে কেরাটিযমিদং দত্ৰা অত্তনো মোচন’’ন্তি রাজানং ন মুঞ্চি. অথ রাজা তস্স তাদিসং পটিঞ্ঞাতং অকাসি. তেন ৰুত্তং ‘‘রাজা তেন সদ্ধি’’ন্তিআদি. ভৰনং অনুপগতন্তি ইদং মম ভৰনং অনুপগতং. অননুঞ্ঞাতন্তি উপগতেন সামিভূতেন অননুঞ্ঞাতঞ্চ. এতেন উপগতং তং, ইদানি তাদিসেন অনুঞ্ঞাতঞ্চ খাদিতুং লভামীতি দস্সেতি.

মচ্চুপথেতি মচ্চুগোচরে. আসন্নমরণতায এৰমাহংসু.

তং আল়ৰককুমারং আদায পক্কমিংসূতি যোজনা. তস্স রঞ্ঞো মহেসী আল়ৰককুমারস্স মাতাতি ৰুত্তা. দেৰিসহস্সানং ৰিপ্পলপন্তীনন্তি ৰচনং পরিণামেতব্বং.

দেসনাপরিযোসানেতি যক্খং দমেত্ৰা পচ্চাগন্ত্ৰা নগরদ্ৰারসমীপে রুক্খমূলে নিসিন্নেন ভগৰতা সরাজিকায মহতিযা পরিসায দেসিতদেসনায পরিযোসানে. সোতি ভগৰা. ভৰনে এৰাতি ৰিমানে এৰ. ভগৰাপি পস্সতি পকতিচক্খুনাৰ নিগ্রোধস্স উপরি নিব্বত্তত্তা.

তত্রাতি তস্মিং ‘‘রোসেতুকামতাযা’’তি ৰচনে. তেসন্তি সাতাগিরিহেমৰতানং. কালদীপদেসকুলজনেত্তিআযুপ্পমাণৰিসযং পঞ্চমহাৰিলোকিতং. ‘‘সীতং ব্যপগতং হোতি, উণ্হঞ্চ উপসম্মতী’’তিআদিনা (বু. ৰং. ২.৮৩) আগতানি দ্ৰত্তিংস পুব্বনিমিত্তানি. কটিপ্পদেসৰত্থিকোসকণ্ণতো তিধা. সদ্দোতি আল়ৰকস্স উগ্ঘোসিতসদ্দো.

ইমিনা পসঙ্গেন সকলজম্বুদীপং ব্যাপেত্ৰা পৰত্তে অপরেপি তযো সদ্দে যথা এতে, এৰং আল়ৰকস্স উগ্ঘোসিতসদ্দোপীতি দস্সেতুং ‘‘চত্তারো’’তিআদি ৰুত্তং. ওসক্কন্তেতি পরিহাযমানে.

চুণ্ণেন্তাতি চুণ্ণেতুং সমত্থতং সন্ধায ৰুত্তং, ন পন চুণ্ণনৰসেন ৰুত্তং. তেনাহ ‘‘মা কস্সচী’’তিআদি. উস্সাৰবিন্দুমত্তম্পীতি উস্সাৰপতনমত্তম্পি. খুরপ্পং সল্লং.

সেট্ঠানীতি অজেয্যেন অপ্পটিহতভাৰেন উত্তমানি. দুস্সাৰুধন্তি আৰুধকিচ্চকরং উত্তরিযং দুস্সং. ইমানি কির সক্কাদীনং পুঞ্ঞানুভাৰেন নিব্বত্তানি অপ্পটিহতপ্পভাৰানি পটিপক্খৰিধমনযুত্তানি অৰজ্ঝানি আৰুধানি. তেনাহ ‘‘যদি হী’’তিআদি.

অসনিৰিচক্কং ৰিযাতি অসনিমণ্ডলং ৰিয.

পিত্তন্তি অলগদ্দপিত্তং. ভিন্দেয্যাতি আসিঞ্চেয্য. সুখন্তি সুকরং. মুদুভূতচিত্তৰৰত্থানকরণত্থন্তি মুদুভূতং অত্তনো চিত্তে ৰৰত্থানস্স করণত্থং.

এৰং ৰুত্তেতি ‘‘ন খ্ৰাহ’’ন্তি এৰং ৰুত্তে. ভগৰতো সাসনে ঠিতে পযিরুপাসিত্ৰা উগ্গহিতং ভগৰন্তং পযিরূপাসিত্ৰা উগ্গহিতমেৰ নামাতি আহ ‘‘কস্সপং…পে... উগ্গহেসু’’ন্তি. পুট্ঠপঞ্হাতি সম্মাসম্বুদ্ধেন পুট্ঠপঞ্হা. যস্মা বুদ্ধৰিসযে পুট্ঠপঞ্হা, তস্মা বুদ্ধৰিসযাৰ হোন্তি.

পটিসেধেত্ৰাতি ৰাচায অসক্কুণেয্যভাৰেনেৰ পটিসেধেত্ৰা. ‘‘যদাকঙ্খসী’’তি পদসন্ধিৰসেন নিদ্দেসোতি আহ ‘‘যদি আকঙ্খসী’’তি. তেন তুয্হং পুচ্ছং তাৰ সুত্ৰা ৰিস্সজ্জেস্সন্তি দস্সেতি. তেনাহ ‘‘ন মে’’তিআদি. দুতিযৰিকপ্পে দ-কারো পদসন্ধিকরোতি আহ ‘‘যং আকঙ্খসী’’তি. ‘‘পুচ্ছ, আৰুসো, সুত্ৰা জানিস্সামী’’তি অৰত্ৰা সব্বঞ্ঞুবুদ্ধস্স অনিযমেত্ৰা ৰচনং সব্বৰিসযং হোতীতি আহ ‘‘সব্বং তে’’তিআদি.

কিং সূতি এত্থ কিন্তি পুচ্ছাযং, সূতি সংসযে, কিং নূতি অত্থো? ইধাতি ইমস্মিং লোকে. তস্মা ৰিত্তন্তি যস্মা ৰিত্তিকরণতো ৰিত্তং. সুকতন্তি সুট্ঠু সক্কচ্চং কতং. সুখন্তি ইট্ঠফলং. তত্থ যং পধানং, তং দস্সেতুং ‘‘কাযিকচেতসিকং সাত’’ন্তিআদি ৰুত্তং. নিস্সন্দফলঞ্হি তগ্গহণেন গহিতমেৰ হোতি. অপ্পেতীতি পাপেতি. অতিসযত্থজোতনো তর-সদ্দোতি আহ ‘‘অতিসযেন সাদূ’’তি. রসসঞ্ঞিতায ইট্ঠানং রাগাদিধম্মানং. কেন পকারেনাতি কথং-সদ্দস্স অত্থমাহ. কথংজীৰিন্তি যদি সমাসপদমেতং, ‘‘কথ’’ন্তি সানুনাসিকা কতাতি আহ ‘‘গাথাবন্ধসুখত্থ’’ন্তিআদি.

সদ্ধীধ ৰিত্তন্তি একদেসেন সমুদাযদস্সনং সমুদ্দপব্বতনিদস্সনং ৰিয. ইতি-সদ্দো আদিঅত্থো দট্ঠব্বো. ‘‘ৰিত্তিকরণতো ৰিত্ত’’ন্তি ৰুত্তমত্থং সন্ধায হেতূপমাহি যোজেত্ৰা দস্সেতুং ‘‘যথা হী’’তিআদি ৰুত্তং. তেন সুখাৰহনতো, দুক্খপটিবাহনতো, দালিদ্দিযূপসমনতো, রতনপটিলাভহেতুতো, লোকসন্ততিআৰহনতো চ সদ্ধা ৰিত্তং যথা তং হিরঞ্ঞসুৰণ্ণাদীনি. তেনাহ ‘‘এৰ’’ন্তিআদি. ননু চেতনা সম্মাদিট্ঠিআদযো চ সাতিসযং ৰিপাকসুখং আৰহন্তি, তং কথং সদ্ধা আৰহতীতি? সদ্ধাধুরভাৰসভাৰতো. তেনাহ ‘‘সদ্ধাধুরেন পটিপন্নান’’ন্তি. তস্স চ সেসপদেসুপি যোজেতব্বং.

ইদানি যং হিরঞ্ঞসুৰণ্ণাদি সদ্ধাৰিত্তস্স ওপম্মং, তং হীনং, সদ্ধাৰিত্তমেৰ উত্তমন্তি পাল়িযং সেট্ঠগ্গহণং কতন্তি দস্সেতুং ‘‘যস্মা পনা’’তিআদি ৰুত্তং. পরলোকং গতং অনুগচ্ছতীতি অনুগামিকং. অঞ্ঞেহি ন সাধারণন্তি অনঞ্ঞসাধারণং. সব্বসম্পত্তিহেতূতি সব্বাসং সীলসম্পদাদীনং লোকিযলোকুত্তরানং সম্পত্তীনং হেতু. অনত্থায হোতি অনুপাযপটিপত্তিতো. তস্মা অনুগামিকত্তা. অনঞ্ঞসাধারণত্তা সব্বসম্পত্তিহেতুভাৰতো হিরঞ্ঞাদিৰিত্তনিদানত্তা চ সদ্ধাৰিত্তমেৰ সেট্ঠং. উক্কট্ঠপরিচ্ছেদদেসনা যথা ‘‘সত্থা দেৰমনুস্সান’’ন্তি.

‘‘দসকুসলধম্মো’’তি ইমিনা একচ্চানংযেৰ দানাদিধম্মানং সঙ্গহো, ন সব্বেসন্তি অসঙ্গহিতসঙ্গণ্হনত্থং ‘‘দানসীলভাৰনাধম্মো ৰা’’তি ৰুত্তং. ‘‘সুখ’’ন্তি তিৰিধস্সপি সুখস্স সাধারণগ্গহণমেতন্তি তং সৰিসেসলদ্ধং পুগ্গলৰসেন দস্সেন্তো ‘‘সোণসেট্ঠি…পে… আৰহতী’’তি আহ. যো সো পদুমৰতিযা দেৰিযা পুত্তো মহাপদুমো নাম রাজা দিব্বসুখসদিসং রজ্জসুখমনুভৰিত্ৰা পচ্ছা পচ্চেকবুদ্ধো হুত্ৰা নিব্বানসুখমনুভৰি, তং নিদস্সনভাৰেন গহেত্ৰা আহ ‘‘মহাপদুমাদীনং ৰিয নিব্বানসুখঞ্চ আৰহতী’’তি.

অত্থুদ্ধারনযেন সচ্চসদ্দং সংৰণ্ণেন্তো ‘‘অনেকেসু অত্থেসু দিস্সতী’’তি আহ. ৰাচাসচ্চে দিস্সতি সচ্চসদ্দো ‘‘ভণে’’তি ৰুত্তত্তাতি অধিপ্পাযো. ৰিরতিসচ্চে দিস্সতি. ৰেরমণীসু হি পতিট্ঠিতা সমণব্রাহ্মণা ‘‘সচ্চে ঠিতা’’তি ৰুচ্চন্তি. অত্তাকারম্পি ৰত্থুং ইদমেৰ সচ্চং মোঘমঞ্ঞন্তি পৰত্তিযাকারং উপাদায দিট্ঠি এৰ সচ্চন্তি দিট্ঠিসচ্চং, তস্মিং দিট্ঠিসচ্চে দিস্সতীতি যোজনা. ব্রাহ্মণসচ্চানীতি পরমত্থব্রহ্মানং সচ্চানি, যানি ‘‘সব্বে পাণা অৰজ্ঝা, সব্বে কামা অনিচ্চা, সব্বে ভৰা অনিচ্চা, নাহং ক্ৰচনি কস্সচি কিঞ্চনতস্মি’’ন্তিআদিনা (অ. নি. ৪.১৮৫) চতুক্কনিপাতে আগতানি. পরমত্থভূতং সচ্চং নিব্বানং. অব্ভন্তরং কত্ৰাতি অন্তোগধমেৰ কত্ৰা, তেহি সদ্ধিন্তি অত্থো পরমত্থসচ্চানম্পি সাদুতরত্তা. যস্সানুভাৰেনাতি যস্স ৰাচাসচ্চস্স আনুভাৰেন.

উদকম্হি ধাৰতীতি উদকপিট্ঠিযং অভিজ্জমানাযং পথৰিযা ৰিয ধাৰতি গচ্ছতি মহাকপ্পিনরাজা ৰিয. ৰিসম্পি সচ্চেন হনন্তি পণ্ডিতাতি কণ্হদীপাযনাদযো ৰিয. সচ্চেনাতি মচ্ছজাতকে বোধিসত্তস্স ৰিয সচ্চেন দেৰো থনযং পৰস্সতি. সচ্চে ঠিতাতি ৰিরতিসচ্চে ৰাচাসচ্চে চ ঠিতা তযোপি বোধিসত্তা. নিব্বুতিন্তি নিব্বানং পত্থযন্তি. সাদুতরন্তি সাততরং ইট্ঠতরৰিপাকদানতো.

রসানন্তি নিদ্ধারণত্থে সামিৰচনং. নিদ্ধারণঞ্চ কোচি কুতোচি কেনচি ইমন্তি কস্সচি ৰচনং ন সাধেতীতি দস্সেন্তো ‘‘যে ইমে’’তিআদিমাহ. তেন হি নিব্বানং রসসমুদাযতো সাদুতরতাৰিসেসেন নিদ্ধারীযতি. তত্থ যে ইমে ৰুচ্চন্তীতি যোজনা. সাযনীযধম্মাতি জিৰ্হায সাযিতব্বা ধম্মা. রসাযতনং রসোতি আহ ‘‘মূলরসো খন্ধরসো’’তিআদি. ফলরসন্তি ফলস্স রসং, ফলং পীল়েত্ৰা তাপেত্ৰা গহেতব্বরসন্তি অত্থো. অরসরূপোতি আচাররহিতসভাৰো. রূপস্স অস্সাদনৰসেন উপ্পজ্জনকসুখধম্মা রূপরসা. এস নযো সদ্দরসাদীসু. সদ্দরসোতি ব্যঞ্জনসম্ভূতো রসো. ৰিমুত্তিরসোতি ৰিমুত্তিসম্পত্তিকো রসো. অত্থরসোতি অত্থস্স পটিৰিজ্ঝনৰসেন উপ্পজ্জনকসুখং অত্থরসো, তথা ধম্মরসো ৰেদিতব্বো. রূপাচারাতিআদীসু রসগ্গহণেন ফলরসং ৰদতি. সো হি ফলস্স রূপো চ, রসিতব্বতো আসাদেতব্বতো রসো চাতি ‘‘রূপরসো’’তি ৰুচ্চতি. আচারো পন সামগ্গীরসহেতুতায ‘‘রসো’’তি ৰুত্তো. সচ্চং হৰেতি এত্থ হৰেতি একংসত্থে নিপাতো, একংসত্থো চ অৰধারণমেৰাতি আহ ‘‘সচ্চমেৰ সাদুতর’’ন্তিআদি. সরীরমুপব্রূহেন্তি, ন চিত্তং. ননু চ সুখুপ্পত্তিপযোজনত্তা চিত্তম্পি উপব্রূহেন্তীতি? ন, সুখস্স সরীরব্রূহনং পটিচ্চ উপ্পন্নত্তা. ৰিরতিসচ্চৰাচাতি সচ্চৰিসেসেন সম্পজ্জনং ৰদতি. চিত্তমুপব্রূহেতি পদালিকায ৰিরতিৰাচায সচ্চরসে সতি সমথৰিপস্সনাদীহি চিত্তপরিব্রূহনস্স সম্ভৰতো মগ্গফলানিসংসং গণ্হাতি. অসংকিলেসিকঞ্চ সুখমাৰহতি ৰিৰট্টসন্নিস্সিতত্তা. ৰিমুত্তিরসোতি ফলসুখং ৰদতি নিব্বানসুখম্পি ৰা. পরমত্থসচ্চরসো নাম নিব্বানরসো. তথা হি তং ‘‘অচ্চুতিরসং অস্সাসকরণরস’’ন্তিপি ৰুচ্চতি. তেন পরিভাৰিতত্তাতি ৰিমুত্তিরসস্স সাদুতরভাৰদস্সনত্থং. এৰং সন্তেপি ‘‘ৰিমুত্তিরসপরিভাৰিতত্তা’’তি এতেন কামং ৰিমুত্তিরসো ৰা পরমত্থসচ্চরসো ৰা সাদুতররসাতি দস্সেতি. তদধিগমূপাযভূতন্তি তস্স পরমত্থসচ্চস্স অধিগমূপাযভূতং. অত্থঞ্চ ধম্মঞ্চাতি ফলঞ্চ কারণঞ্চ নিস্সায পৰত্তিতো অত্থরসা ধম্মরসা চ সাদূ, ততোপি পরমত্থসচ্চমেৰ সাদুরসন্তি অধিপ্পাযো.

লোকুত্তরং লোকিযঞ্চ অত্থং অজানন্তো অন্ধো, লোকিযত্থমেৰ জানন্তো একচক্খু, উভযং জানন্তো দ্ৰিচক্খু. পরহিতং অত্তহিতঞ্চ অজানন্তো অন্ধো, অত্তহিতমেৰ জানন্তো একচক্খু, উভযত্থং জানন্তো দ্ৰিচক্খু. সো দ্ৰিচক্খুপুগ্গলো পঞ্ঞাজীৰী. তং পন গহট্ঠপব্বজিতৰসেন ৰিভজিত্ৰা দস্সেতুং ‘‘গহট্ঠো ৰা’’তিআদি ৰুত্তং. গহট্ঠপটিপদং আরাধেত্ৰা চাতি যোজনা. আরাধেত্ৰাতি চ সাধেত্ৰাতি অত্থো.

পুরিমনযেনেৰাতি কস্সপসম্মাসম্বুদ্ধৰিস্সজ্জিতনযেনেৰ. কিঞ্চাপীতি অনুজাননসন্দস্সনত্থে নিপাতো. কিং অনুজানাতীতি? গাথায চতূহি পদেহি ৰুত্তেসু অত্থেসু একস্স অত্থস্স সিদ্ধিযং ইতরেসম্পি সিদ্ধিং অনুজানাতি. তেনাহ ‘‘যো চতুব্বিধমোঘং…পে… পরিসুজ্ঝতী’’তি. কিং সন্দস্সেতীতি? যেসং পাপধম্মানং বলৰভাৰেন ওঘতরণাদি ন সিজ্ঝতি, তেসং পটিপক্খানং নিস্সন্দেহৰসেন সন্দস্সনং. তেনাহ ‘‘এৰং সন্তেপী’’তিআদি. ওঘতরণন্তি ওঘতরণপটিপত্তিং. অসদ্দহন্তোতি এৰং পটিপজ্জন্তো ইমায পটিপত্তিযা ওঘং তরতীতি ন সদ্দহন্তো. ন পক্খন্দতীতি পক্খন্দনলক্খণায সদ্ধায ন উগ্ঘাটীযতীতি ন ওতরতি. চিত্তৰোস্সগ্গেনাতি যথাকামাচারৰসেন চিত্তস্স ৰোস্সজ্জনেন. পমত্তো পমাদং আপন্নো. তত্থেৰাতি কামেসু এৰ. ৰিসত্তত্তা লগ্গত্তা. ৰোকিণ্ণোতি ৰিসেৰিতো. তস্মাতি ৰুত্তস্স চতুব্বিধস্সপি অত্থস্স হেতুভাৰেন পচ্চামসনং. তপ্পটিপক্খন্তি অস্সদ্ধিযাদীনং পটিপক্খং সদ্ধাদীনং ওকাসত্তা.

এতাযাতি গাথাযং ইমিনা পদেনাতি সম্বন্ধো. সপ্পুরিসসংসেৰো সদ্ধম্মস্সৰনং যোনিসোমনসিকারো ধম্মানুধম্মপটিপত্তীতি ইমেসং সোতাপত্তিমগ্গাধিগমস্স অঙ্গানং আসন্নকারণং সদ্ধিন্দ্রিযন্তি আহ ‘‘সোতাপত্তিযঙ্গপদট্ঠানং সদ্ধিন্দ্রিয’’ন্তি. ৰুত্তঞ্হেতং – ‘‘সদ্ধাজাতো উপসঙ্কমতি, উপসঙ্কমন্তো পযিরুপাসতি, পযিরুপাসন্তো সোতং ওদহতি, ওহিতসোতো ধম্মং সুণাতী’’তিআদি (ম. নি. ২.১৮৩, ৪৩২). দিট্ঠোঘং তরতি এতেনাতি দিট্ঠোঘতরণং, দিট্ঠোঘস্স তরণং. কামঞ্চেত্থ ‘‘তরতি ওঘ’’ন্তি ৰুত্তং, ৰত্তমানসমীপেপি পন ৰত্তমানং ৰিয ৰোহরণং যুত্তং দিট্ঠোঘস্স তিণ্ণভাৰস্স একন্তিকত্তাতি ‘‘সোতাপন্নঞ্চ পকাসেতী’’তি ৰুত্তং. এস নযো সেসেসুপি. দিট্ঠিৰিচিকিচ্ছাদিপটিপত্তন্তরাযকরানং পাপধম্মানং সমুচ্ছিন্নত্তা সোতাপন্নো…পে… অপ্পমাদেন সমন্নাগতো. ‘‘সোতাপত্তি…পে… তরতী’’তি এত্তকে ৰুত্তে সকিদেৰ ইমস্স লোকস্স আগমনম্পি গহিতং সিযাতি তন্নিৰত্তনত্থং ‘‘আরাধেত্ৰা…পে… অৰসেস’’ন্তি ৰুত্তং. ননু ‘‘অৰসেস’’ন্তি ৰুত্তত্তা সোতাপত্তিমগ্গেন অতিণ্ণং অনৰসেসং ভৰোঘৰত্থু গহিতমেৰ সিযাতি? ন, উপরি দ্ৰীহি মগ্গেহি তরিতব্বানং তেসং পরতো দ্ৰিন্নং পহানৰসেন ৰুচ্চমানত্তা. অপৰাদৰিসযম্পি পরিহরতি – ‘‘এৰং এসা চোদনা অত্তনো ৰিসযে ন পতিট্ঠাতী’’তি. অনাদিকালভাৰত্তা কামসঞ্ঞায কামোঘতরণং মহতা এৰ ৰীরিযেন সাধেতব্বন্তি আহ ‘‘ৰীরিযেনা’’তি. ততিযং মগ্গং আরাধেত্ৰা. কামোঘস্স ৰত্থু কামোঘৰত্থু, কামগুণেহি সদ্ধিং সব্বো কামভৰো. কামোঘসঞ্ঞিতন্তি কামোঘসঙ্খাতং. কামনট্ঠেন কামো চ সো দুক্খো চাতি কামদুক্খং. অস্সাদনট্ঠেন কামো এৰ সঞ্ঞাতি কামসঞ্ঞা, সব্বসো সমুচ্ছিন্নত্তা ৰিগতা কামসঞ্ঞা এতিস্সাতি ৰিগতকামসঞ্ঞা. সব্বেসং রাগাদিমলানং মূলভূতত্তা সত্তসন্তানস্স ৰিসেসতো মলীনসভাৰাপাদনতো পরমং উক্কংসগতং মলন্তি পরমমলং, অৰিজ্জা. তেনাহ ভগৰা – ‘‘অৰিজ্জাপরমং মল’’ন্তি (ধ. প. ২৪৩).

পঞ্ঞাপদং গহেত্ৰাতি যথাৰুত্তং পঞ্ঞাপদং হদযে ঠপেত্ৰা. তপ্পসঙ্গেন অত্তনো পটিভানেন সব্বেহি ৰিয উগ্গহিতনিযামেন. সব্বত্থেৰাতি পঞ্চসুপি ঠানেসু. অত্থযুত্তিপুচ্ছাতি পঞ্ঞাদিঅত্থসমধিগমস্স যুত্তিযা কারণস্স পুচ্ছা. তেনাহ ‘‘অযং হী’’তিআদি. পঞ্ঞাদিঅত্থং ঞত্ৰাতি পঞ্ঞাধন-কিত্তি-মিত্ত-অভিসম্পরাযসঙ্খাতং অত্থং সরূপতো সচ্চপটিৰেধনিপ্ফাদনেন ঞাণেন জানিত্ৰা. ননু এস লোকুত্তরং সোতাপত্তিমগ্গফলপঞ্ঞং তদধিগমূপাযং লোকিযপঞ্ঞঞ্চ অভিভৰিত্ৰা ঠিতো, সো কস্মা তত্থ অত্থযুত্তিং পুচ্ছতীতি? সচ্চমেতং, উপরি পন সমাধিস্স যুত্তিং পুচ্ছিতুকামো পঞ্ঞায সেট্ঠভাৰতো, তস্স চ একদেসেনেৰ অধিগতত্তা তমেৰ আদিং কত্ৰা পুচ্ছতি. ‘‘কায যুত্তিযা’’তিআদি অত্থৰণ্ণনং অতিদিস্সতি ‘‘এস নযো ধনাদীসূ’’তি. তত্থাপি অত্থযুত্তিপুচ্ছাভাৰো পন ‘‘সব্বত্থেৰা’’তি ইমিনা ৰিভাৰিতোতি.

সদ্ধাসুস্সূসাঅপ্পমাদউট্ঠানসঙ্খাতেহি চতূহি কারণেহি. কাযসুচরিতাদিভেদেন আজীৰট্ঠমকসীলভূতেন. সমথৰিপস্সনাভূতেন নিপ্পরিযাযেন বোধিপক্খিযে এৰ গণ্হন্তো ‘‘অপরভাগে’’তি আহ. পরিযাযবোধিপক্খিযা পন ৰিসেসতো ৰুট্ঠানগামিনিৰিপস্সনাকালেপি লব্ভন্তি. পুব্বভাগেতি ৰা তরুণৰিপস্সনাকালং. ততো পুব্বসাধনঞ্চ সন্ধায ‘‘অপরভাগে’’তি পুনাহ, ততো পরন্তি অত্থো. ধম্মন্তি পটিপত্তিধম্মং. ন সদ্ধামত্তকেনেৰ পঞ্ঞং লভতীতি যোজনা. যদি এৰং কস্মা ‘‘সদ্দহানো’’তি ৰুত্তন্তি আহ ‘‘যস্মা পনা’’তিআদি. কিং ৰুত্তং হোতীতিআদিনা ৰুত্তমেৰ অত্থং ৰিৰরতি. ন কেৰলং সুস্সূসামত্তেন পঞ্ঞাপটিলাভো, অথ খো অপ্পমাদেন পঞ্ঞং লভতীতি দস্সেতুং পাল়িযং ‘‘অপ্পমত্তো ৰিচক্খণো’’তি ৰুত্তন্তি তদত্থং দস্সেন্তো ‘‘এৰ’’ন্তিআদিমাহ.

ইদানি সদ্ধাদীনং পঞ্ঞাপটিলাভস্স তংতংৰিসেসপচ্চযানি নীহরিত্ৰা দস্সেতুং ‘‘এৰ’’ন্তি ৰুত্তং. সুস্সূসাযাতি সোতুকামতায. সা অত্থতো উপসঙ্কমনাদি. পঞ্ঞাধিগমূপাযন্তি পরিযত্তিধম্মমাহ. তেনাহ ‘‘সুণাতী’’তি. গহিতং ন পমুস্সতি, সতিঅৰিপ্পৰাসলক্খণো হি অপ্পমাদোতি. ন কেৰলং যাথাৰতো গহণকোসল্লমেৰ ৰিচক্খণতা, অথ খো যাথাৰতো পঞ্ঞাসম্পৰেধনঞ্চাতি আহ ‘‘ৰিত্থারিকং করোতী’’তি. ইদানি পঞ্ঞাপটিলাভহেতুং মত্থকং পাপেত্ৰা দস্সেতুং ‘‘সুস্সূসায ৰা’’তিআদি ৰুত্তং. অত্থমুপপরিক্খতীতি সুতকতানং ধম্মানং পাল়িঅত্থূপপরিক্খাপুব্বকং রূপারূপৰিভাগং পরমত্থং সলক্খণতো সামঞ্ঞলক্খণতো চ উপপরিক্খতি ৰীমংসতি. অনুপুব্বেনাতি এৰং ঞাতপরিঞ্ঞং পত্ৰা তীরণপরিঞ্ঞায ততো অনুক্কমেন তীরণপরিঞ্ঞং পহানপরিঞ্ঞঞ্চ মত্থকং পাপেন্তো মগ্গপ্পটিপাটিযা পরমত্থসচ্চভূতং নিব্বানং সচ্ছিকরোতি.

ইমানি সদ্ধাদীনি চত্তারি কারণানি মত্থকং পাপেত্ৰা দস্সেন্তো আহ ‘‘দেসকালাদীনি অহাপেত্ৰা’’তি. যস্মিং দেসে যস্মিং কালে যে চ সহাযকে নিস্সায যং কিচ্চং তিরেতব্বং, তানি দেসকালাদীনি অনতিক্কমিত্ৰা অত্তনো অভিৰুড্ঢিং ইচ্ছন্তেন ‘‘অযং নাম দেসো, যত্থাহং এতরহি ৰসামি, অযং কালো, ইমে মিত্তা, ইমে অমিত্তা, ইমে আযৰযা, অহঞ্চ এদিসো জাতি-কুল-পদেস-বলভোগ-পরিৰারাদীহি, তং কিচ্চং ইদানি আরদ্ধব্বং, ইদানি নারদ্ধব্ব’’ন্তি সব্বং উপপরিক্খিত্ৰা পটিপজ্জিতব্বং. এৰং পটিপজ্জন্তো হি লোকিযস্স ধনস্স পটিরূপাধিগমূপাযং করোতি নাম. লোকুত্তরস্স পন সীলৰিসোধনাদিৰসেন ৰেদিতব্বং. ৰহিতব্বভাৰেন ধুরো ৰিযাতি ধুরো, ভারো. ইধ পন ধুরসম্পগ্গহো উত্তরপদলোপেন ধুরো, ৰীরিযং. সো সাতিসযো এতস্স অত্থীতি ধুরৰা. ‘‘উট্ঠাতা’’তি পদেন কাযিকৰীরিযস্স ৰক্খমানত্তা ‘‘চেতসিকৰীরিযৰসেনা’’তি ৰিসেসিতং. অনিক্খিত্তধুরো ধোরয্হভাৰতো. তিণা ভিয্যো ন মঞ্ঞতীতি তিণং ৰিয পরিভৰন্তো অতিভুয্য ৰত্ততীতি অত্থো. আদিনা নযেনাতি এত্থ আদি-সদ্দেন –

‘‘করং পুরিসকিচ্চানি, সো সুখা ন ৰিহাযতি; (দী. নি. ৩.২৫৩);

‘‘ন দিৰা সোপ্পসীলেন, রত্তিমুট্ঠানদেস্সিনা;

নিচ্চং মত্তেন সোণ্ডেন, সক্কা আৰসিতুং ঘর’’ন্তি চ. (দী. নি. ৩.২৫৩); –

এৰমাদীনং সঙ্গহো. অসিথিলপরক্কমো অনলসভাৰতো. একমূসিকাযাতি একায মতমূসিকায. নচিরস্সেৰাতি চতুমাসব্ভন্তরেযেৰ. চতুসতসহস্সসঙ্খং চূল়ন্তেৰাসী ৰিযাতি কাকণিকড্ঢকহাপণ-সোল়স-কহাপণ-চতুৰীসতি-কহাপণ-সতহরণক্কমেন দ্ৰে সতসহস্সানি, চূল়কমহাসেট্ঠিনো ধীতুলাভৰসেন দ্ৰে সতসহস্সানীতি এৰং চতুসতসহস্সসঙ্খং ধনং একমূলেন যথা চূল়ন্তেৰাসী ৰিন্দি, এৰং অঞ্ঞোপি পতিরূপকারী ধুরৰা উট্ঠাতা ৰিন্দতে ধনং. অযঞ্চ অত্থো চূল়কসেট্ঠিজাতকেন দীপেতব্বো. ৰুত্তঞ্হেতং –

‘‘অপ্পকেনপি মেধাৰী, পাভতেন ৰিচক্খণো;

সমুট্ঠাপেতি অত্তানং, অণুং অগ্গিংৰ সন্ধম’’ন্তি. (জা. ১.১.৪);

ৰত্তং কত্ৰাতি অধিট্ঠানৰত্তং কত্ৰা. ‘‘সচ্চৰাদী ভূতৰাদী’’তি কিত্তিং পপ্পোতীতি যোজনা. ইচ্ছিতপত্থিতন্তি যেহি মিত্তং ইচ্ছতি, তেহি ইতরং পত্থিতং. মিত্তানি গন্থতীতি মিত্তভাৰং ঘটেতি. দানস্স পিযভাৰকরণতো ‘‘দদং পিযো হোতী’’তি ৰুত্তং. যং দানং একন্ততো মিত্তভাৰাৰহং, তং দস্সেন্তো ‘‘দুদ্দদং ৰা দদং তং গন্থতী’’তি আহ. দদন্তি চ লক্খণৰচনমেতন্তি আহ ‘‘দানমুখেন ৰা’’তিআদি.

আল়ৰকস্স অজ্ঝাসযানুরূপং গহট্ঠৰসেন ৰিস্সজ্জেন্তো. সদ্ধা এতস্স অত্থীতি সদ্ধো, তস্স সদ্ধস্স. ঘরমেসিনোতি ঘরাৰাসসঙ্খাতং ঘরং এসন্তস্স. ঘরাৰাসসন্নিস্সিতত্তা ‘‘ঘর’’ন্তি কামগুণা ৰুচ্চন্তীতি আহ ‘‘পঞ্চ কামগুণে’’তি. ‘‘এতে চতুরো ধম্মা’’তিআদিনা গহিতা অনন্তরগাথায ৰুত্তধম্মা এৰাতি দস্সেন্তো ‘‘ৰুত্তপ্পকারং সচ্চ’’ন্তিআদিমাহ. তত্থ ‘‘ইমে কুসলা, ইমে অকুসলা’’তিআদিনা তে অত্থে যাথাৰতো ধারণতো উপধারণতো ধম্মো. সঞ্ঞা চিত্তচেতসিকানং ধারণং, অৰিচ্ছেদতো সন্ধারণতো কুসলসন্তানং ধারেতীতি ধিতি, ৰীরিযং. চজতি এতেনাতি চাগো, দানং. পচ্চযৰেকল্লতো ফলুপ্পাদনসমত্থতাৰসেন সন্তি.

অঞ্ঞেপীতি ইতো যথাৰুত্তধম্মসমুদাযতো অঞ্ঞেপি ধম্মা যদি সন্তি, তে ধম্মে পুচ্ছস্সূতি. কিলেসে, কাযৰাচাদিকে ৰা দমেতীতি দমো, পঞ্ঞা. উট্ঠহতি উস্সহতি এতেনাতি উট্ঠানং, ৰীরিযং. এত্থাতি এতিস্সা পুচ্ছায. সদ্ধিন্তি সঙ্খেপতো ভাৰত্থপদানং বন্ধনেন সহ. একমেকং পদন্তি পঞ্ঞাদিকমেকেকং পদং. ‘‘পঞ্ঞা ইমস্মিং ঠানে পঞ্ঞাতি ধম্মোতি চ আগতা’’তিআদিনা পঞ্ঞাদিঅত্থস্স উদ্ধরণং অত্থুদ্ধারো. তস্স তস্স অত্থস্স ‘‘পঞ্ঞা পজাননা’’তিআদিনা (ধ. স. ১৬) ৰেৰচনপদানং উদ্ধরণং পদুদ্ধারো. পজানাতীতি পঞ্ঞা, ধারেতীতি ধম্মো, দমেতীতি দমোতি এৰং পদস্স কথনং পদৰণ্ণনা.

অজ্জাতি ৰা এতরহি. যথাৰুত্তেন পকারেনাতি ‘‘সদ্দহানো অরহত’’ন্তিআদিনা ৰুত্তপ্পকারেন. সচ্চসম্পটিৰেধাৰগহণং ৰা যথাৰুত্তেন পকারেন দিট্ঠসচ্চতায ইধলোকপরলোকত্থং যাথাৰতো জানন্তো. এৰঞ্চ যক্খো সত্থু দেসনানুভাৰসিদ্ধং পঞ্হং পুচ্ছনেন অত্তনো পটিলাভসম্পত্তিং ৰিভাৰেন্তো ‘‘কথংসু লভতে পঞ্ঞ’’ন্তিআদিমাহাতি আচরিযা. সম্পরাযিকোতি এত্থ চ-সদ্দো লুত্তনিদ্দিট্ঠো, তেন ‘‘দিট্ঠধম্মিকো চা’’তি অযমত্থো ৰুত্তো এৰাতি দস্সেন্তো ‘‘যো অত্থো…পে… দস্সেতী’’তি আহ. অরীযতি ফলং এতস্মাতি অত্থো, কারণং. ৰিচক্খণে সপযোজনতায.

তস্স ঞাণস্সাতি তস্স অত্থস্স আৰিভাৰনস্স ঞাণস্স. গুণৰিসেসেহি চ সদিসস্সপি অঞ্ঞস্স অভাৰতো অগ্গদক্খিণেয্যো বুদ্ধো ভগৰা. তেনাহ –

‘‘নযিমস্মিং লোকে পরস্মিং ৰা পন,

বুদ্ধেন সেট্ঠোৰ সমোৰ ৰিজ্জতি;

আহুনেয্যানং পরমাহুতিং গতো,

পুঞ্ঞত্থিকানং ৰিপুলফলেসিন’’ন্তি. (ৰি. ৰ. ১০৪৭);

সহিতপটিপত্তিন্তি পঞ্ঞাসঙ্গাহিকং অত্তনো পটিপত্তিং. সুন্দরা বোধি সুবোধি, বুদ্ধস্স সুবোধি বুদ্ধসুবোধি, সা এৰ বুদ্ধসুবোধিতা. ধম্মস্সৰনত্থং সন্নিপতিতদেৰতাহি সঙ্ঘুট্ঠসাধুকারসদ্দুট্ঠানঞ্চ.

সতপুঞ্ঞলক্খণন্তি সতসহস্সকপ্পে পুঞ্ঞসম্ভারস্স কতত্তা তেসং পুঞ্ঞানং ৰসেন সতপুঞ্ঞলক্খণং অনেকপুঞ্ঞনিব্বত্তলক্খণং. অভিনন্দিযতায সব্বেহি অঙ্গেহি সমুপেতং সমন্নাগতং. কতপুঞ্ঞভাৰং ব্যঞ্জেন্তীতি ব্যঞ্জনানি, অঙ্গপচ্চঙ্গানি. তেসং পরিপুণ্ণত্তা পরিপুণ্ণব্যঞ্জনং. তং যক্খো…পে… পূরেসীতি গাথাপূরণত্থমেৰ হি ভগৰা তথারূপানি অকাসি. অব্যাধিতাতি অরোগা. ‘‘অব্যথিতা’’তি কেচি পঠন্তি, সযসন্তাসরহিতাতি অত্থো.

‘‘হত্থযো’’তি ৰত্তব্বে ‘‘হত্থকো’’তি ৰুত্তং. আল়ৰিনগরন্তি আল়ৰিনগরৰাসিনো ৰদতি. ভৰতি হি তত্রট্ঠতায তং-সদ্দো যথা ‘‘গামো আগতো, মঞ্চা উক্কুট্ঠিং করোন্তী’’তি. এককোলাহলেন ৰত্তমানেন.

সম্পিণ্ডিত্ৰাতি সন্নিপতিত্ৰা. কামং সম্ভারো তেন কতোতি নত্থি, যুদ্ধত্থং পন বহুসো উস্সাহস্স কতত্তা ‘‘যুদ্ধমাদিং কত্ৰা’’তি ৰুত্তং. তমেৰ আল়ৰকসুত্তং কথেসি তস্সা এৰ দেসনায সন্নিপতিতপরিসায সপ্পাযত্তা. তেনাহ ‘‘কথাপরি…পে… অহোসী’’তি. চতূহি ৰত্থূহীতি চতূহি সঙ্গহৰত্থূহি. পরিসন্তি অত্তনো পরিসং. ‘‘ইতরঞ্চা’’তিপি ৰদন্তি.

আল়ৰকসুত্তৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

যক্খসংযুত্তৰণ্ণনায লীনত্থপ্পকাসনা সমত্তা.