৩. পেসলসুত্তৰণ্ণনা

২১১. এতেসন্তি এতেসং মহল্লকানং. ন পাল়ি আগচ্ছতি অপ্পগুণভাৰতো. ন চ পাল়ি উপট্ঠাতি, একায পাল়িযা সতি পাল়িগতিযা তথা তথা উপট্ঠানম্পি নেসং নত্থীতি ৰদতি. ন অট্ঠকথাতি এত্থাপি এসেৰ নযো. সিথিলধনিতাদিতংতংব্যঞ্জনবুদ্ধিং অহাপেত্ৰা উচ্চারণং পদব্যঞ্জনমধুরতা. অতিক্কমিত্ৰা মঞ্ঞতি অঞ্ঞে ভিক্খূ. হীল়নৰসেন অভিভৰিত্ৰা পটিভানসুতেন অত্তানং পসংসতি সম্ভাৰেতি. মানস্স পৰত্তিতায সহজাতনিস্সযাদিপচ্চযধম্মা তংসহভুধম্মা. মানৰসেন ৰিপ্পটিসারী অহুৰা. মা অহোসীতি যোজনা. ৰণ্ণভণনন্তি পরেহি কিরিযমানং গুণাভিত্থৰং. অখিলোতি পঞ্চচেতোখিলরহিতো. নিস্সেসং নৰৰিধন্তি নৰৰিধম্পি মানং কস্সচি একদেসস্সপি অসেসতো. ৰিজ্জাযাতি অগ্গমগ্গৰিজ্জায. অচ্চন্তমেৰ সমিততায ৰূপসমিততায সমিতাৰী.

পেসলসুত্তৰণ্ণনা নিট্ঠিতা.