৬. ব্রহ্মলোকসুত্তৰণ্ণনা

১৭৭. পচ্চেকং দ্ৰারবাহন্তি পচ্চেকং দ্ৰারবাহং. পচ্চেক-সদ্দো চেত্থ আৰুত্তিৰসেন ৰেদিতব্বো; ‘‘পচ্চেকং পচ্চেক’’ন্তি আহ ‘‘একেকো একেক’’ন্তি. তেসু হি একো পচ্চেকব্রহ্মা গন্ধকুটিযা একদ্ৰারবাহং নিস্সায ঠিতো, অপরো অঞ্ঞং. পচ্চেকব্রহ্মাতি চ একচারী ব্রহ্মা, ন পরিসচারী ব্রহ্মাতি অত্থো. সমিদ্ধি নাম সগ্গে সুখুপকরণেহি, ব্রহ্মানঞ্চ ঝানং সুখুপকরণন্তি ঝানসুখেন সমিদ্ধোতি. সম্পত্তিযা ৰেপুল্লপ্পত্ততা ব্রহ্মানঞ্চ অভিঞ্ঞাগুণেহি ৰেপুল্লপ্পত্তীতি আহ ‘‘ফীতোতি অভিঞ্ঞাপুপ্ফেহি সুপুপ্ফিতো’’তি. অসহন্তোতি নসহন্তো নরোচেন্তো.

সতপদন্তি সতসদ্দো. রূপৰসেনাতি রূপসদ্দৰসেন, রূপসদ্দেন সদ্ধিন্তি অত্থো. তথা পন্তিৰসেনাতি এত্থাপি. একচ্চেতি একে মিগারী, তেসং ব্যগ্ঘীনিসারূপকানং পঞ্চসতানীতি অত্থো. ‘‘কস্স অঞ্ঞস্স উপট্ঠানং গমিস্সামী’’তি ৰিমানসম্পত্তিযং ৰিম্হযক্খিকো অহঙ্কারৰসেন ৰদতি. রণন্তি নিন্দন্তি এতেহীতি রণা, দোসা. ৰিরোধিপচ্চযসন্নিপাতে ৰিকারুপ্পত্তি রুপ্পনং রূপস্স পৰেধনন্তি আহ ‘‘সীতাদীহি চ নিচ্চং পৰেধিত’’ন্তি. সুমেধো সুন্দরপঞ্ঞো সো সত্থা রূপে ন রমতি, কিং পন মন্দপঞ্ঞো রূপে সরণঞ্চ পৰেধিতঞ্চ অপস্সন্তো রমসীতি অধিপ্পাযো.

ব্রহ্মলোকসুত্তৰণ্ণনা নিট্ঠিতা.