৩. কোসলসংযুত্তং

১. পঠমৰগ্গো

১. দহরসুত্তৰণ্ণনা

১১২. ভগৰতা সদ্ধিং সম্মোদীতি ভগৰতো গুণে অজানন্তো কোসলরাজা অত্তনো খত্তিযমানেন কেৰলং ভগৰতা সদ্ধিং সম্মোদি. পঠমাগতে হি সত্থরি তস্স সম্মোদিতাকারং দস্সেতুং ‘‘যথা’’তিআদি ৰুত্তং. যথা খমনীযাদীনি পুচ্ছন্তোতি যথা ভগৰা ‘‘কচ্চি তে, মহারাজ, খমনীযং, কচ্চি যাপনীয’’ন্তিআদিনা তেন রঞ্ঞা সদ্ধিং পঠমং পৰত্তমোদো অহোসি পুব্বভাসিতায, তদনুকরণেন এৰং সোপি রাজা ভগৰতা সদ্ধিং সমপ্পৰত্তমোদো অহোসীতি যোজনা. তং পন সমপ্পৰত্তমোদনং উপমায দস্সেতুং ‘‘সীতোদকং ৰিযা’’তিআদি ৰুত্তং. তত্থ সম্মোদিতন্তি সংসন্দিতং একীভাৰন্তি সম্মোদনকিরিযায সমানতং একরূপতং, খমনীযন্তি ‘‘ইদং চতুচক্কং নৰদ্ৰারং সরীরযন্তং দুক্খবহুলতায সভাৰতো দুস্সহং, কচ্চি খমিতুং সক্কুণেয্য’’ন্তি পুচ্ছতি. যাপনীযন্তি পচ্চযাযত্তৰুত্তিকং চিরপবন্ধসঙ্খাতায যাপনায কচ্চি যাপেতুং সক্কুণেয্যং. সীসরোগাদিআবাধাভাৰেন কচ্চি অপ্পাবাধং. দুক্খজীৰিকাভাৰেন কচ্চি অপ্পাতঙ্কং. তংতংকিচ্চকরণে উট্ঠানসুখতায কচ্চি লহুট্ঠানং. তদনুরূপবলযোগতো কচ্চি বলং. সুখৰিহারসম্ভৰেন কচ্চি ফাসুৰিহারো অত্থীতি তত্থ তত্থ কচ্চি-সদ্দং যোজেত্ৰা অত্থো ৰেদিতব্বো. বলৰপ্পত্তা পীতি পীতিযেৰ. তরুণপীতি পামোজ্জং. সম্মোদনং জনেতি করোতীতি সম্মোদনীযং. সম্মোদিতব্বতো সম্মোদনীযন্তি ইমং পন অত্থং দস্সেন্তো ‘‘সম্মোদিতুং যুত্তভাৰতো’’তি আহ. সরিতব্বভাৰতোতি অনুস্সরিতব্বভাৰতো. ‘‘সরণীয’’ন্তি ৰত্তব্বে দীঘং কত্ৰা ‘‘সারণীয’’ন্তি ৰুত্তং.

সুয্যমানসুখতোতি আপাথমধুরতং আহ, অনুস্সরিযমানসুখতোতি ৰিমদ্দরমণীযতং. ব্যঞ্জনপরিসুদ্ধতাযাতি সভাৰনিরুত্তিভাৰেন তস্সা কথায ৰচনচাতুরিযমাহ, অত্থপরিসুদ্ধতাযাতি অত্থস্স নিরুপক্কিলেসতং. অনেকেহি পরিযাযেহীতি অনেকেহি কারণেহি. অদিট্ঠত্তাতি উপসঙ্কমনৰসেন অদিট্ঠত্তা. গুণাগুণৰসেনাতি গুণৰসেন গম্ভীরভাৰং ৰা অগুণৰসেন উত্তানভাৰং ৰা. ওৰট্টিকসারং কত্ৰাতি ওৰট্টিকায গহেতব্বসারৰত্থুং কত্ৰা. লোকনিস্সরণভৰোক্কন্তিপঞ্হন্তি লোকতো নিস্সটভাৰপঞ্হঞ্চেৰ আদিতো ভৰোক্কমনপঞ্হঞ্চ. সত্থু সম্মাসম্বুদ্ধতং পুচ্ছন্তো হি ‘‘কিং ভৰং গোতমো সব্বলোকতো নিস্সটো, সব্বসত্তেহি চ জেট্ঠো’’তি? পুচ্ছতি নাম. যথা হি সত্থু সম্মাসম্বুদ্ধতায লোকতো নিস্সটতা ৰিঞ্ঞাযতি, এৰং সব্বসত্তেহি জেট্ঠভাৰতো সেট্ঠভাৰতো. স্ৰাযমত্থো অগ্গপসাদসুত্তাদীহি (ইতিৰু. ৯০; অ. নি. ৪.৩৪) ৰিভাৰেতব্বো. কথং পন সম্বুদ্ধতা ৰিঞ্ঞাযতীতি? অৰিপরীতধম্মদেসনতো. অযমেত্থ সঙ্খেপো, ৰিত্থারো পন ৰিসুদ্ধিমগ্গসংৰণ্ণনাদীসু (ৰিসুদ্ধি. মহাটী. ১.১২৪) ৰুত্তনযেন ৰেদিতব্বো.

রাজা সত্থু অৰিপরীতধম্মদেসনং অজানন্তো ততো এৰস্স সম্মাসম্বোধিং অসদ্দহন্তো ‘‘ৰুড্ঢতরেসুপি চিরপব্বজিতেসু সম্মাসম্বুদ্ধভাৰে অলব্ভমানে তব্বিপরীতে কথং লব্ভেয্যা’’তি মঞ্ঞমানো ‘‘কিং পন ভৰং গোতমো’’তিআদিং ৰক্খতি. রাজা অত্তনো লদ্ধিযা ন পুচ্ছতি অত্তনো সম্মুখা তেহি অসম্মাসম্বুদ্ধভাৰস্সেৰ পটিঞ্ঞাতত্তা. যস্মা তে মুসাৰাদিতায অত্তনো উপট্ঠাকাদীনং ‘‘বুদ্ধা ময’’ন্তি পটিজানিংসু, তস্মা ৰুত্তং ‘‘লোকে মহাজনেন গহিতপটিঞ্ঞাৰসেন পুচ্ছতী’’তি. স্ৰাযমত্থো আগমিস্সতি. বুদ্ধসীহনাদন্তি বুদ্ধানং এৰ আৰেণিকং সীহনাদং. কামং মগ্গঞাণপদট্ঠানং সব্বঞ্ঞুতঞ্ঞাণং, সম্বোধিঞাণে পন গহিতে তং অত্থতো গহিতমেৰ হোতীতি ৰুত্তং ‘‘সব্বঞ্ঞুতঞ্ঞাণসঙ্খাতং সম্মাসম্বোধি’’ন্তি.

পব্বজ্জূপগমনেনাতি যায কাযচি পব্বজ্জায উপগমনমত্তেন সমণা, ন সমিতপাপতায. জাতিৰসেনাতি জাতিমত্তেন ব্রাহ্মণা, ন বাহিতপাপতায. পব্বজিতসমূহসঙ্খাতো সঙ্ঘোতি পব্বজিতসমূহতামত্তেন সঙ্ঘো, ন নিয্যানিকদিট্ঠিৰিসুদ্ধসীলসামঞ্ঞৰসেন সংহতত্তাতি অধিপ্পাযো. এতেসং অত্থীতি এতেসং সব্বঞ্ঞুপটিঞ্ঞাতানং পরিৰারভূতো অত্থি. স্ৰেৰাতি পব্বজিতসমূহসঙ্খাতো এৰ. কেচি পন ‘‘পব্বজিতসমূহৰসেন. সঙ্ঘিনো, গহট্ঠসমূহৰসেন গণিনো’’তি ৰদন্তি, তং তেসং মতিমত্তং গণে এৰ লোকে সঙ্ঘসদ্দস্স নিরুল়্হত্তা. আচারসিক্খাপনৰসেনাতি অচেলকৰতচরিযাদি-আচারসিক্খাপনৰসেন. পাকটাতি সঙ্ঘীআদিভাৰেন পকাসিতা. ‘‘অপ্পিচ্ছা’’তি ৰত্ৰা তত্থ লব্ভমানং অপ্পিচ্ছতং দস্সেতুং ‘‘অপিচ্ছতায ৰত্থম্পি ন নিৰাসেন্তী’’তি ৰুত্তং. ন হি তেসু সাসনিকেসু ৰিয সন্তগুণনিগুহনা অপ্পিচ্ছা লব্ভতীতি. যসোতি কিত্তিসদ্দো. তরন্তি এতেন সংসারোঘন্তি এৰং সম্মতত্তা তিত্থং ৰুচ্চতি লদ্ধীতি আহ ‘‘তিত্থকরাতি লদ্ধিকরা’’তি. সাধুসম্মতাতি ‘‘সাধূ’’তি সম্মতা, ন সাধূহি সম্মতাতি আহ ‘‘সন্তো…পে… পুথুজ্জনস্সা’’তি.

কপ্পকোলাহলন্তি কপ্পতো কোলাহলং, ‘‘কপ্পুট্ঠানং ভৰিস্সতী’’তি দেৰপুত্তেহি উগ্ঘোসিতমহাসদ্দো. ইমেতি পূরণাদযো. বুদ্ধকোলাহলন্তি দেৰতাহি ঘোসিতং বুদ্ধকোলাহলং. পযিরুপাসিত্ৰাতি পুরিসসুতিপরম্পরায সুত্ৰা. চিন্তামণিৰিজ্জা নাম পরচিত্তজানাপনৰিজ্জা. সা কেৰট্টসুত্তে ‘‘মণিকা’’তি আগতা, আদি-সদ্দেন গন্ধারিসম্ভৰৰিজ্জাদিং সঙ্গণ্হাতি. তত্থ গন্ধারিযা ৰিকুব্বনং দস্সেতি. অত্তভাৰেতি সরীরে. রাজুস্মাতি রাজতেজো.

সুক্কধম্মোতি অনৰজ্জধম্মো নিক্কিলেসতা. ইদং গহেত্ৰাতি ইদং পরম্মুখা ‘‘মযং বুদ্ধা’’তি ৰত্ৰা অত্তনো সম্মুখা ‘‘ন মযং বুদ্ধা’’তি তেহি ৰুত্তৰচনং গহেত্ৰা. এৰমাহাতি ‘‘যেপি তে, ভো গোতম…পে… নৰো চ পব্বজ্জাযা’’তি এৰং অৰোচ. অত্তনো পটিঞ্ঞং গহেত্ৰাতি ‘‘ন মযং বুদ্ধা’’তি তেসং অত্তনো পুরতো পৰত্তিতং পটিঞ্ঞং গহেত্ৰা. ঈদিসে ঠানে কিং-সদ্দো পটিসেধৰাচকো হোতীতি ৰুত্তং ‘‘কিন্তি পটিক্খেপৰচন’’ন্তি, কস্মা পটিজানাতীতি অত্থো?

ন উঞ্ঞাতব্বাতি ন গরহিতব্বা. গরহত্থো হি অযং উ-সদ্দো. ‘‘দহরো’’তি অধিকতত্তা ৰক্খমানত্তা চ ‘‘খত্তিযোতি রাজকুমারো’’তি ৰুত্তং. উরসা গচ্ছতীতি উরগো, যো কোচি সপ্পো, ইধ পন অধিপ্পেতং দস্সেতুং ‘‘আসীৰিসো’’তি আহ. সীলৰন্তং পব্বজিতং দস্সেতি সামঞ্ঞতো ‘‘ভিক্খূ’’তি ৰদন্তো. ইধ পন যস্মা ‘‘ভৰম্পি নো গোতমো’’তিআদিনা ভগৰন্তং উদ্দিস্স কথং সমুট্ঠাপেসি, তস্মা ভগৰা অত্তানং অব্ভন্তরং অকাসি. যদিপি ৰিসেসো সামঞ্ঞজোতনায ৰিভাৰিতো হোতি, সংসযুপ্পত্তিদীপকং নোতি ৰুত্তগ্গহণং পন তং পরিচ্ছিজ্জতীতি. তেনাহ ‘‘দেসনাকুসলতাযা’’তিআদি. ইদানি অৰঞ্ঞাপরিভৰে পযোগতো ৰিভাৰেতুং ‘‘এত্থ চা’’তিআদি ৰুত্তং. তত্থ অচিত্তীকতাকারৰসেন অৰঞ্ঞায পাকটভাৰো, ৰম্ভনৰসেন পরিভৰস্সাতি অধিপ্পাযেন কাযপযোগৰসেন অৰঞ্ঞা দস্সিতা, ৰচীপযোগৰসেন পরিভৰো, উভযং পন উভযত্থাপি পভেদতো গহিতং, অৰঞ্ঞপরিভৰানং দ্ৰিন্নম্পি উভযত্থ পরিগ্গহো. তং সব্বম্পীতি তং অৰঞ্ঞাদি সব্বম্পি. চতূসুপি তং ন কাতব্বমেৰ সম্পতি আযতিঞ্চ অনত্থাৰহত্তা.

তদত্থদীপনাতি তস্স আদিতো ৰুত্তস্স অত্থস্স দীপনা. ৰিসেসত্থদীপনাতি ততো ৰিসিট্ঠত্থদীপনা. খেত্তানং অধিপতীতি খত্তিযোতি নিরুত্তিনযেন সদ্দসিদ্ধি ৰেদিতব্বা. খেত্ততো ৰিৰাদা সত্তে তাযতীতি খত্তিযোতি লোকিযা কথযন্তি. ‘‘মহাসম্মতো, খত্তিযো, রাজা’’তি এৰমাগতেসু ইমেসু দুতিযং. অক্খরন্তি সমঞ্ঞা. সা হি উদযব্বযাভাৰতো ‘‘ন কদাচি খরতীতি অক্খর’’ন্তি ৰুত্তা. তেনাহ ‘‘নামগোত্তং ন জীরতী’’তি. জাতিসম্পন্নন্তি সম্পন্নজাতিং অতিৰিসুদ্ধজাতিং. তীণি কুলানীতি ব্রাহ্মণৰেস্সসুদ্দকুলানি. অতিক্কমিত্ৰাতি অত্তনো জাতিসম্পত্তিযা অভিভৰিত্ৰা.

কেৰলং নামপদং ৰুত্তং আখ্যাতপদং অপেক্খতেৰাতি আহ ‘‘ঠানং হীতি কারণং ৰিজ্জতী’’তি. উদ্ধটদণ্ডেনাতি সমন্ততো উব্ভতেন দণ্ডেন সাসনেন, বলৰং উপক্কমং গরুকং রাজানম্পি. তং খত্তিযং পরিৰজ্জেয্যাতি খত্তিযং অৰঞ্ঞাপরিভৰকরণতো ৰজ্জেয্য. তেনাহ ‘‘ন ঘট্টেয্যা’’তি.

উরগস্স চ নানাৰিধৰণ্ণগ্গহণে কারণং ৰদতি ‘‘যেন যেন হী’’তিআদিনা. বহুভক্খন্তি মহাভক্খং সব্বভক্খখাদকং. পাৰকং সোধনত্থেন অসুদ্ধস্সপি দহনেন. সোতি মগ্গো. কণ্হো ৰত্তনী ইমস্সাতি কণ্হৰত্তনী. মহন্তো অগ্গিক্খন্ধো হুত্ৰা. যাৰব্রহ্মলোকপ্পমাণোতি কপ্পৰুট্ঠানকালে অরঞ্ঞে অগ্গিনা গহিতে কালন্তরে এৰ কট্ঠতিণরুক্খাদিসম্ভৰোতি দস্সেতুং ‘‘জাযন্তি তত্থ পারোহা’’তি পাল়িযং ৰুত্তন্তি দস্সেন্তো ‘‘তত্থা’’তিআদিমাহ.

ডহিতুং ন সক্কোতি পচ্চক্কোসনাদিনা. ৰিনস্সন্তি সমণতেজসা ৰিনাসিতত্তা. ‘‘ন তস্সা’’তি এত্থ ন-কারং ‘‘ৰিন্দরে’’তি এত্থ আনেত্ৰা সম্বন্ধিতব্বন্তি আহ ‘‘ন ৰিন্দন্তী’’তি. ৰত্থুমত্তাৰসিট্ঠোতি ঠানমেৰ নেসং অৰসিস্সতি, সযং পন সব্বসো সহ ধনেন ৰিনস্সন্তীতি অত্থো.

‘‘সম্মদেৰ সমাচরে’’তি এত্থ যথা রাজাদীসু সম্মা সমাচরেয্য, তং ৰিভাগেন দস্সেন্তো ‘‘খত্তিযং তাৰা’’তিআদিমাহ. তং সুৰিঞ্ঞেয্যমেৰ. তিস্সো কুলসম্পত্তিযোতি খত্তিয-ব্রাহ্মণগহপতি-মহাসালকুলানি ৰদতি. পঞ্চ রূপিব্রহ্মলোকে, চত্তারো অরূপীব্রহ্মলোকেতি এৰং নৰ ব্রহ্মলোকে কম্মভৰৰিভাগেন, সেসানং গণনানং উপপত্তিভৰৰিভাগেন.

অভিক্কন্তন্তি অতিৰিয কমনীযং. সা পনস্সা কন্ততা অতিৰিয ইট্ঠতায মনৰড্ঢনতায সোভনতাযাতি আহ ‘‘অতিইট্ঠং অতিমনাপং অতিসুন্দরন্তি অত্থো’’তি. ‘‘অভিক্কন্ত’’ন্তি ৰচনং অপেক্খিত্ৰা নপুংসকনিদ্দেসো, ৰচনং পন ভগৰতো ধম্মদেসনাতি তথা ৰুত্তং. অত্থমত্তদস্সনং ৰা এতং, তস্মা অত্থৰসেন লিঙ্গৰিভত্তিৰিপরিণামো ৰেদিতব্বো. দুতিযপদেপি এসেৰ নযো.

অধোমুখঠপিতন্তি কেনচি অধোমুখং ঠপিতং. হেট্ঠামুখজাতন্তি সভাৰেনেৰ হেট্ঠামুখং জাতং. উগ্ঘাটেয্যাতি ৰিৰটং করেয্য. হত্থে গহেত্ৰাতি ‘‘পুরত্থাভিমুখো উত্তরাভিমুখো ৰা গচ্ছা’’তিআদীনি অৰত্ৰা হত্থে গহেত্ৰা নিস্সন্দেহং কত্ৰা ‘‘এস মগ্গো’’তি এৰং ৰত্ৰা ‘‘গচ্ছা’’তি ৰদেয্য. কাল়পক্খচাতুদ্দসীতি কাল়পক্খে চাতুদ্দসী. নিক্কুজ্জিতং উক্কুজ্জেয্যাতি আধেয্যস্স অনাধারভূতং ভাজনং তস্স আধারভাৰাপাদনৰসেন উক্কুজ্জেয্য. অঞ্ঞাণস্স অভিমুখত্তা হেট্ঠামুখজাততায সদ্ধম্মৰিমুখং, ততো এৰ অধোমুখভাৰেন অসদ্ধম্মে পতিতন্তি এৰং পদদ্ৰযং যথারহং যোজেতব্বং, ন যথাসঙ্খযং. কামং কামচ্ছন্দাদযোপি পটিচ্ছাদকা, মিচ্ছাদিট্ঠি পন সৰিসেসং পটিচ্ছাদিকাতি আহ ‘‘মিচ্ছাদিট্ঠিগহনপটিচ্ছন্ন’’ন্তি. তেনাহ ভগৰা – ‘‘মিচ্ছাদিট্ঠিপরমাহং, ভিক্খৰে, ৰজ্জং ৰদামী’’তি (অ. নি. ১.৩১০). সব্বাপাযগামিমগ্গো কুম্মগ্গো ‘‘কুচ্ছিতো মগ্গো’’তি কত্ৰা. সম্মাদিট্ঠিআদীনং উজুপটিপক্খতায মিচ্ছাদিট্ঠিআদযো অট্ঠ মিচ্ছত্তধম্মা মিচ্ছামগ্গো. তেনেৰ হি তদুভযপটিপক্খতং সন্ধায ‘‘সগ্গমোক্খমগ্গং আৰিকরোন্তেনা’’তি ৰুত্তং. সপ্পিআদিসন্নিস্সযো পদীপো ন তথা উজ্জলো, যথা তেলসন্নিস্সযোতি তেলপজ্জোতগ্গহণং. এতেহি পরিযাযেহীতি এতেহি নিক্কুজ্জিতুক্কুজ্জনপটিচ্ছন্নৰিৰরণাদিউপমোপমিতব্বপ্পকারেহি.

পসন্নাকারন্তি পসন্নেহি কাতব্বং সক্কারং. সরণন্তি পটিসরণং পরাযণং. অজ্জতাতি অজ্জাতি পদস্স ৰড্ঢনমত্তং হেত্থ তা-সদ্দো যথা ‘‘দেৰতা’’তি. পাণেহি উপেতন্তি পাণেহি সহ সরণং উপেতং. ‘‘যাৰ মে পাণা ধরন্তি, তাৰ সরণং গতমেৰ মং ধারেতূ’’তি আপাণকোটিকং অত্তনো সরণগমনং পৰেদেতি. তেনাহ ‘‘যাৰ মে’’তিআদি. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

দহরসুত্তৰণ্ণনা নিট্ঠিতা.

২. পুরিসসুত্তৰণ্ণনা

১১৩. পুরিমসুত্তেতি পুরিমসুত্তদেসনাযং. তত্থ হি উপসঙ্কমন্তৰেলায সত্থু গুণে অজানন্তো কেৰলং সম্মোদনং করোতি. দেসনং সুত্ৰা পন সত্থু গুণে ঞত্ৰা সরণঙ্গতত্তা ইধ ইমস্মিং সমাগমে অভিৰাদেসি পঞ্চপতিট্ঠিতেন ৰন্দি. অত্তানং অধি অজ্ঝত্তং, অৰিজহেন অত্তানং অধিকিচ্চ উদ্দিস্স পৰত্তধম্মা অজ্ঝত্তং একজ্ঝং গহণৰসেন, ভুম্মত্থে চেতং পচ্চত্তৰচনং. কামঞ্চাযং অজ্ঝত্তসদ্দো গোচরজ্ঝত্তৰিসযজ্ঝত্তঅজ্ঝত্তজ্ঝত্তেসু পৰত্ততি. তে পনেত্থ ন যুজ্জন্তীতি ৰুত্তং ‘‘নিযকজ্ঝত্ত’’ন্তি, নিযকসঙ্খাতঅজ্ঝত্তধম্মেসূতি অত্থো. তেনাহ ‘‘অত্তনো সন্তানে’’তি. লুব্ভনলক্খণোতি গিজ্ঝনলক্খণো, আরম্মণে দল়্হগ্গহণসভাৰোতি অত্থো. দুস্সনলক্খণোতি কুজ্ঝনলক্খণো, ব্যাপজ্জনসভাৰোতি অত্থো. মুয্হনলক্খণোতি অঞ্ঞাণলক্খণো, আরম্মণে সভাৰসম্মোহভাৰোতি অত্থো. ৰিহেঠেন্তীতি অত্থনাসনঅনত্থুপ্পাদনেহি ৰিবাধেন্তি. ততো এৰ যথা সগ্গমগ্গেসু ন দিস্সতি, এৰং করোন্তীতি আহ ‘‘নাসেন্তি ৰিনাসেন্তী’’তি. অত্তনি সম্ভূতাতি সন্তানে নিব্বত্তা.

পুরিসসুত্তৰণ্ণনা নিট্ঠিতা.

৩. জরামরণসুত্তৰণ্ণনা

১১৪. অঞ্ঞত্র জরামরণাতি জরামরণেন ৰিনা. জরামরণৰিরহিতো জাতো নাম অত্থি নু খোতি পুচ্ছতি. পাল়িযং জাতস্সাতি পচ্চত্তে সামিৰচনং. মহাসালাতি ইমিনা র-কারস্স ল-কারং কত্ৰা ‘‘মহাসালা’’তি ৰুত্তন্তি দস্সেতি যথা ‘‘পুরত্থিযোতি পুলত্থিযো’’তি. মহাসারপ্পত্তাতি মহন্তং ৰিভৰসারং পত্তা. কোটিসতং ধনং, অযমেৰ ৰা পাঠো. ‘‘কুম্ভং নাম দস অম্বণানী’’তি ৰদন্তি. ইস্সরাতি ৰিভৰিস্সরিযেন ইস্সরা. সুৰণ্ণরজতভাজনাদীনন্তি আদি-সদ্দেন ৰত্থসেয্যাৰসথাদিং সঙ্গণ্হাতি. অসাধারণধনানং নিধানগতত্তা ‘‘অনিধানগতস্সা’’তি ৰুত্তং. তুট্ঠিকরণস্সাতি পাসাদসিৰিকাদিসুখসাধনস্স.

আরকা কিলেসেহীতি নিরুত্তিনযেন সদ্দসিদ্ধিমাহ. আরকাতি চ সব্বসো সমুচ্ছিন্নত্তা তেহি দূরেতি অত্থো. রাগাদীনং হতত্তা, পাপকরণে রহাভাৰতো, অনুত্তরদক্খিণেয্যতাদিপচ্চযা চ অরহং. কামঞ্চাযং সংযুত্তৰণ্ণনা, অভিধম্মনযো এৰ পন নিপ্পরিযাযোতি আহ ‘‘চত্তারো আসৰা’’তি ব্রহ্মচরিযৰাসন্তি মগ্গব্রহ্মচরিযৰাসং. ৰুট্ঠাতি ৰুট্ঠৰন্তো. চতূহি মগ্গেহি করণীযন্তি পচ্চেকং চতূহি মগ্গেহি কত্তব্বং পরিঞ্ঞাপহানসচ্ছিকিরিযভাৰনাভিসমযং. এৰং গতং সোল়সৰিধং হোতি. ওসীদাপনট্ঠেন ভারা ৰিযাতি ভারা. তেনাহ ‘‘ভারা হৰে পঞ্চক্খন্ধা’’তিআদি (সং. নি. ৩.২২). অত্তপটিবদ্ধতায অত্তনো অৰিজহনতো পরমত্থদেসনায চ পরমত্থো অরহত্তং. কামঞ্চাযমত্থো সব্বসমিদ্ধিসসন্ততিপরিযাপন্নো অনৰজ্জধম্মো সম্ভৰতি অকুপ্পসভাৰা, অপরিহানধম্মেসু পন অগ্গভূতে অরহত্তে সাতিসযো, ন ইতরেসূতি ‘‘অরহত্তসঙ্খাতো’’তিআদি ৰুত্তং. ওরম্ভাগিযুদ্ধম্ভাগিযৰিভাগং দসৰিধম্পি ভৰেসু সংযোজনং কিলেসকম্মৰিপাকৰট্টপচ্চযো হুত্ৰা নিস্সরিতুং অপ্পদানৰসেন বন্ধতীতি ভৰসংযোজনং. সতিপি হি অঞ্ঞেসং তপ্পক্খিযভাৰেন ৰিনা সংযোজনানি তেসং তপ্পচ্চযভাৰো অত্থি, ভৰনিযামো ওরম্ভাগিযুদ্ধম্ভাগিযসঙ্গহিতোতি তংতংভৰনিব্বত্তককম্মনিযামো চ হোতি, ন চ উপচ্ছিন্নসংযোজনস্স কতানিপি কম্মানি ভৰং নিব্বত্তেন্তীতি তেসংযেৰ সংযোজনট্ঠো দট্ঠব্বো. সম্মা কারণেহি জানিত্ৰাতি ঞাযেন দুক্খাদীসু সো যথা জানিতব্বো; তথা জানিত্ৰা, পুব্বকালকিরিযাৰিমুত্তা হি অপরকালকিরিযা চ যথা সম্ভৰতি, তং দস্সেতুং ‘‘মগ্গপঞ্ঞাযা’’তিআদি ৰুত্তং.

ভিজ্জনসভাৰো খণাযত্তত্তা. নিক্খিপিতব্বসভাৰো মরণধম্মত্তা. অযং কাযো উস্মাযুৰিঞ্ঞাণাপগমো ছড্ডনীযধম্মো, যস্মিং যং পতিট্ঠিতং, তং তস্স সন্তানগতৰিপ্পযুত্তন্তি কত্ৰা ৰত্তব্বতং অরহতীতি আহ ‘‘খীণাসৰস্স হি অজীরণধম্মোপি অত্থী’’তিআদি. তেনাহ ভগৰা ‘‘ইমস্মিংযেৰ ব্যামমত্তে কল়েৰরে সসঞ্ঞিম্হি সমনকে লোকঞ্চ পঞ্ঞপেমি লোকসমুদযঞ্চ লোকনিরোধঞ্চা’’তিআদি (সং. নি. ১.১০৭; অ. নি. ৪.৪৫). অস্স খীণাসৰস্স, ‘‘জীরণধম্ম’’ন্তি যথাৰুত্তং অজীরণধম্মং ঠপেত্ৰা জীরণধম্মং দস্সেন্তো ‘‘তেসংপাযং কাযো ভেদনধম্মো’’তি এৰমাহ. জরং পত্তস্সেৰ হিস্স ভেদননিক্খিপিতব্বতানিযতে অত্থে সুত্তদেসনা পৰত্তা. অত্থস্স উপ্পত্তি অট্ঠুপ্পত্তি, সা এতস্স অত্থীতি অট্ঠুপ্পত্তিকো. কির-সদ্দো অনুস্সৰত্থো, তেন অনুস্সৰাগতোযমত্থো, ন অট্ঠকথাগতোতি দীপেতি. তেনাহ ‘‘ৰদন্তী’’তি. যেনাযং অত্থো হেতুনা অট্ঠুপ্পত্তিকো, তং দস্সেতুং ‘‘সিৰিকসালাযং নিসীদিত্ৰা কথিত’’ন্তি ৰুত্তং. ‘‘ৰিহরতি জেতৰনে’’তি নিদানৰচনেন যথা ন ৰিরুজ্ঝতি, তথা ৰেদিতব্বং. ননু ইমস্স সুত্তস্স পুচ্ছাৰসিকো নিক্খেপোতি? সচ্চমেতং, সুত্তেকদেসং পন সন্ধায অট্ঠুপ্পত্তিকতাৰচনং. কেচি পন ‘‘যানং আরুহিত্ৰা রাজা আগতো, রঞ্ঞো আরোহনীযরথং দস্সেত্ৰা ৰুত্ত’’ন্তিপি ৰদন্তি.

সরীরে ফেণপিণ্ডসমে কিং ৰত্তব্বং? সব্ভি সদ্ধিন্তি সাধূহি সহ পৰেদযন্তি. ন হি কদাচি সাধূনং সাধূহি সহ কত্তব্বা হোন্তি, তস্মা সীদনসভাৰানং কিলেসানং ভিজ্জনপ্পত্তত্তা নিব্বানং সব্ভীতি ৰুচ্চতি. পুরিমপদস্সাতি ‘‘সতঞ্চ ধম্মো ন জরং উপেতী’’তি পদস্স. কারণং দস্সেন্তো ব্যতিরেকৰসেন. সতং ধম্মো নিব্বানং কিলেসেহি সংসীদনভিজ্জনসভাৰো ন হোতি, তস্মা তং আগম্ম জরং ন উপেতি. কিলেসা পন তন্নিমিত্তকা, এৰমযং ৰুত্তকারণতো জরং ন উপেতীতি. তেনাহ ‘‘ইদ’’ন্তিআদি. সুন্দরাধিৰচনং ৰা এতং ‘‘সব্ভী’’তি পদং অপাপতাদীপনতো, সব্ভিধম্মভূতন্তি অত্থো. তেনাহ ‘‘ৰিরাগো তেসং অগ্গমক্খাযতি (ইতিৰু. ৯০; অ. নি. ৪.৩৪), ন তেন ধম্মেন সমত্থি কিঞ্চী’’তি (খু. পা. ৬.৪; সু. নি. ২২৭) চ.

জরামরণসুত্তৰণ্ণনা নিট্ঠিতা.

৪. পিযসুত্তৰণ্ণনা

১১৫. রহসি গতস্সাতি জনসম্বাধতো অপক্কন্তস্স. নিলীনস্স তেনেৰ জনৰিৰেকেন একমন্তং নিসজ্জায একীভাৰেন পটিসল্লীনস্স ৰিয. তেনাহ ‘‘একীভূতস্সা’’তি. সব্বঞ্ঞুভাসিতং করোন্তো আহ তস্স ৰচনং ‘‘এৰমেত’’ন্তি সম্পটিচ্ছিত্ৰা তস্স ৰচনং তথাপচ্চনুভাসন্তো. অন্তকেনাধিপন্নত্তা এৰ খেত্তৰত্থুহিরঞ্ঞসুৰণ্ণাদি মানুসং ভৰং জহতো. অনুগন্তি অনুগতং, তমেৰ অনুগামীতি অত্থো. নিচযন্তি উপরূপরি ৰড্ঢিযা নিচিতভূতং. সম্পরাযিকন্তি সম্পরায হিতং.

পিযসুত্তৰণ্ণনা নিট্ঠিতা.

৫. অত্তরক্খিতসুত্তৰণ্ণনা

১১৬. পীদহনন্তি সংযমনং. কম্মপথভেদং অপ্পত্তস্সাতি সুপিনকালো ৰিয পৰত্তিমত্ততায কম্মপথৰিসেসং অগতস্স. কম্মস্সাতি অকুসলকম্মস্স. সংৰরন্তি সংৰরভাৰং দস্সেতি, ইতরস্স পন সংৰরভাৰো পুরিমেহি তীহি পদেহি দস্সিতোৰাতি. ওত্তপ্পম্পি গহিতমেৰ তদৰিনাভাৰতো. ন হি পাপজিগুচ্ছনং পাপউত্রাসরহিতং, উত্রাসো ৰা পাপজিগুচ্ছনরহিতো অত্থীতি.

অত্তরক্খিতসুত্তৰণ্ণনা নিট্ঠিতা.

৬. অপ্পকসুত্তৰণ্ণনা

১১৭. উল়ারসদ্দো সেট্ঠে বহুকে চ দিস্সতীতি আহ ‘‘পণীতে চ বহুকে চা’’তি. মানমজ্জনেনাতি মানৰসেন মদপ্পত্তিযা. অতিক্কমন্তি সাধুমরিযাদৰীতিক্কমলক্খণং দোসং. কূটো পাসো.

অপ্পকসুত্তৰণ্ণনা নিট্ঠিতা.

৭. অড্ডকরণসুত্তৰণ্ণনা

১১৮. যস্মা কামনিমিত্তং সত্তো সম্পজানমুসা ভাসতি, তস্মা কামা তস্স পতিট্ঠা পচ্চযো কারণন্তি আহ ‘‘কামহেতূ’’তিআদি. ভদ্রমুখসীসেন ৰিটটুভং ভদ্রোপচারেন উপচরতীতি অত্থো, ৰিনিচ্ছযো করীযতি এত্থাতি অড্ডকরণং, ৰিনিচ্ছযট্ঠানং. খিপ্পন্তি কূটং, মচ্ছখিপ্পন্তিপি ৰট্টতি. ওড্ডিতন্তি ওড্ডনৰসেন ফলং পাপিতং.

অড্ডকরণসুত্তৰণ্ণনা নিট্ঠিতা.

৮. মল্লিকাসুত্তৰণ্ণনা

১১৯. ‘‘কস্মা পুচ্ছতী’’তি? পুচ্ছাকারণং চোদেত্ৰা সমুদযতো পট্ঠায দস্সেতুং ‘‘অযং কির মল্লিকা’’তিআদি ৰুত্তং. মালারামং গন্ত্ৰাতি অত্তনো পিতু মালারামং রক্খণত্থঞ্চেৰ অৰসেসপুপ্ফগ্গহণত্থঞ্চ গন্ত্ৰা. কাসিগামেতি কাসিরট্ঠস্স গামে. সো কির গামো মহাকোসলরাজেন অত্তনো ধীতুযা পতিঘরং গচ্ছন্তিযা পুপ্ফমূলত্থায দিন্নো, তংনিমিত্তং. ভাগিনেয্যেন অজাতসত্তুনা. তস্সাতি রঞ্ঞো পসেনদিস্স. সাতি মল্লিকা. নিৰত্তিতুন্তি তস্সা ধম্মতায নিৰত্তিতুং তস্সা ৰচনং পটিক্খিপিতুং. নেৰজ্ঝগাতি ৰত্তমানত্থে অতীতৰচনন্তি আহ ‘‘নাধিগচ্ছতী’’তি. পুথু অত্তাতি তেসং সত্তানং অত্তা.

মল্লিকাসুত্তৰণ্ণনা নিট্ঠিতা.

৯. যঞ্ঞসুত্তৰণ্ণনা

১২০. থূণন্তি যঞ্ঞূপত্থম্ভং. উপনীতানি যঞ্ঞং যজিতুং আরম্ভায. এত্তাৰতাতি ‘‘ইধ, ভন্তে…পে… রুদমানা পরিকম্মানি করোন্তী’’তি এত্তকেন পাঠেন. সন্নিট্ঠানন্তি ‘‘নং ইত্থিং লভিস্সামি নু খো, ন নু খো লভিস্সামী’’তি নিচ্ছযং অৰিন্দন্তো ন ঞাযন্তো. ফেণুদ্দেহকন্তি যথা যত্থ কুথিতে ফেণং উদ্দেহতি ন উপধীযতি, এৰং অনেকৰারং ফেণং উট্ঠাপেত্ৰা. তং দিৰসন্তি তস্মিং রঞ্ঞা নিদ্দং অলভিত্ৰা দুক্খসেয্যদিৰসে. আলোকং ওলোকেত্ৰাতি লোহকুম্ভিমুখৰট্টিসীসে পত্তে তত্থ মহন্তং আলোকং ওলোকেত্ৰা. অত্তানো ৰচনং রঞ্ঞো পৰত্তিঞাপনত্থং. মহাসদ্দো উদপাদি ‘‘এৰরূপং যঞ্ঞং রাজা কারাপেতী’’তি. ৰত্তুকামো অহোসি, ৰত্তুঞ্চ পন অৰিসহন্তো ‘‘স’’ ইতি ৰত্ৰা লোহকুম্ভিযং নিমুগ্গো. ইমং গাথং ৰত্তুকামো অহোসীতি অযং পনেত্থ সম্বন্ধো. এস নযো সেসপদদ্ৰযেপি. ধম্মভেরিং চরাপেসুং ‘‘কোচি কঞ্চি পাণং মা হনতূ’’তি. সো ইত্থিসামিকো পুরিসো সোতাপত্তিফলে পতিট্ঠহি অত্তনো উপনিস্সযসম্পত্তিযা সত্তু চ দেসনাৰিলাসসম্পত্তিযা, রাজা পন মহাবোধিনিরুজ্ঝনসভাৰত্তা কিঞ্চি ৰিসেসং নাধিগচ্ছি.

সঙ্গহৰত্থূনীতি লোকস্স সঙ্গহকারণানি. নিপ্ফন্নসস্সতো নৰভাগে কস্সকস্স দত্ৰা রঞ্ঞং একভাগগ্গহণং দসমভাগগ্গহণং. এৰং কস্সকা হট্ঠতুট্ঠা সস্সানি সম্পাদেন্তীতি আহ ‘‘সস্সসম্পাদনে মেধাৰিতাতি অত্থো’’তি. ততো ওরভাগে কির ছভাগগ্গহণং জাতং. ছমাসিকন্তি ছন্নং ছন্নং মাসানং পহোনকং. পাসেতীতি পাসগতে ৰিয করোতি. ৰাচায পিযস্স পিযকরস্স কম্মং ৰাচাপেয্যং. সব্বসো রট্ঠস্স ইদ্ধাদিভাৰতো খেমং. নিরব্বুদং চোরিযাভাৰতো. ইদঞ্হি রট্ঠং অচোরিযং নিরগ্গল়ন্তি ৰুচ্চতি অপারুতঘরভাৰতো.

উদ্ধংমূলকং কত্ৰাতি উম্মূলং কত্ৰা. দ্ৰীহি পরিযঞ্ঞেহীতি মহাযঞ্ঞস্স পুব্বভাগে পচ্ছা চ পৰত্তেতব্বেহি দ্ৰীহি পরিৰারযঞ্ঞেহি. সত্তৰীসতি…পে… নস্সাতি সত্তৰীসাধিকানং তিণ্ণং পসুসতানং দ্ৰাৰীসতিযা অস্সাদীহি চ সট্ঠিঅধিকদ্ৰিসতআরঞ্ঞকপসূহি চ সদ্ধিং সম্পিণ্ডিতানং পন নৰাধিকছসতপসূনং মারণেন ভেরৰস্স পাপভীরুকানং ভযাৰহস্স. তথা হি ৰদন্তি –

‘‘ছসতানি নিযুজ্জন্তি, পসূনং মজ্ঝিমে হনি,

অস্সমেধস্স যঞ্ঞস্স, অধিকানি নৰাপি চা’’তি.

সম্মন্তি যুগচ্ছিদ্দে পক্খিপিতব্বদণ্ডকং. পাসেন্তীতি খিপন্তি. সংহারিমেহীতি সকটেহি ৰহিতব্বেহি যূপেহি. পুব্বে কির একো রাজা সম্মাপাসং যজন্তো সরস্সতিনদীতীরে পথৰিযা ৰিৰরে দিন্নে নিমুগ্গোযেৰ অহোসি. অন্ধবালব্রাহ্মণা গতানুগতিগতা ‘‘অযং তস্স সগ্গগমনমগ্গো’’তি সঞ্ঞায তত্থ সম্মাপাসযঞ্ঞং পট্ঠপেন্তি. তেন ৰুত্তং ‘‘নিমুগ্গোকাসতো পভুতী’’তি. অযূপো অপ্পকদিৰসো যাগো, সযূপো বহুদিৰসং সাধেয্যো সত্রযাগো. মন্তপদাভিসঙ্খতানং সপ্পিমধূনং ৰাজমিতি সমঞ্ঞা, হিরঞ্ঞসুৰণ্ণগোমহিং সাদিসত্তরসকদক্খিণস্স. সারগব্ভকোট্ঠাগারাদীসু নত্থেত্থ অগ্গল়ন্তি নিরগ্গল়ো. তত্থ কির যঞ্ঞে অত্তনো সাপতেয্যং অনৰসেসতো অনিগূহিত্ৰা নিয্যাতীযতি. মহারম্ভাতি বহুপসুঘাতকম্মা. অট্ঠকথাযং পন ‘‘ৰিৰিধা যত্থ হঞ্ঞরে’’তি ৰক্খমানত্তা ‘‘মহাকিচ্চা’’তি অত্থো ৰুত্তো, ইধ ‘‘মহারম্ভাতি পপঞ্চৰসেন অজেল়কা’’তিআদি ৰুত্তন্তি ‘‘বহুপসুঘাতকম্মা’’তি অত্থো ৰুত্তো. নিরারম্ভাতি এত্থাপি ৰুত্তনযেন অত্থো ৰেদিতব্বো. অনুগতং কুলন্তি অনুকুলং, কুলানুগতন্তি অত্থো ৰেদিতব্বো. তেনাহ ‘‘যং নিচ্চভত্তাদি…পে… অত্থো’’তি.

যঞ্ঞসুত্তৰণ্ণনা নিট্ঠিতা.

১০. বন্ধনসুত্তৰণ্ণনা

১২১. ইদন্তি ‘‘ইধ, ভন্তে’’তিআদিকং ৰচনং. তে ভিক্খূ আরোচেসুন্তি সম্বন্ধো. তেসূতি তেসু রঞ্ঞা বন্ধাপিতমনুস্সেসু. সুকতকারণন্তি সুকারণকিরিযং আরোচেসুং, ন কেৰলং তেসং মনুস্সানং বন্ধাপিতভাৰং. ইদানি তমত্থং ৰিত্থারতো দস্সেতুং ‘‘রঞ্ঞো কিরা’’তিআদি ৰুত্তং. অট্ঠৰঙ্কোতি অট্ঠংসো. অন্তোঘরচারিনোতি অন্তেপুরৰাসিনো.

উক্কট্ঠেতি যুদ্ধে. মন্তীসূতি গুত্তমন্তীসু. অকুতূহলন্তি সঞ্ঞতং. পিযন্তি পিযাযিতব্বং. অন্নপানম্হি মধুরে অভুত্তে উপ্পন্নে. অত্থেতি অত্থে কিচ্চে জাতে থিরন্তি ন কথেন্তি কাযবলমত্তেন অপনেতুং সক্কুণেয্যত্তা. সুট্ঠু রত্তরত্তাতি অতিৰিয রত্তা এৰ হুত্ৰা রত্তা. সারত্তেনাতি সারভাৰেন সারভাৰসঞ্ঞায. ওহারিনন্তি হেট্ঠা হরণসীলন্তি আহ ‘‘চতূসু অপাযেসু আকড্ঢনক’’ন্তি. সিথিলন্তি সিথিলাকারং, ন পন সিথিলং. তেনাহ ভগৰা ‘‘দুপ্পমুঞ্চ’’ন্তি.

বন্ধনসুত্তৰণ্ণনা নিট্ঠিতা.

পঠমৰগ্গৰণ্ণনা নিট্ঠিতা.

২. দুতিযৰগ্গো

১. সত্তজটিলসুত্তৰণ্ণনা

১২২. পুব্বারামসঙ্খাতেতি সাৰত্থিনগরস্স পুব্বদিসায কতত্তা পুব্বারামেতি সঙ্খং গতে. তত্রাতি ‘‘মিগারমাতুযা পাসাদে’’তি তস্মিং সংখিত্তৰচনে. অযং ইদানি ৰুচ্চমানা অনুপুব্বিকথা আদিতো পট্ঠায অনুক্কমকথা. পত্থনং অকাসি তস্স ভগৰতো অগ্গুপট্ঠাযিকং একং উপাসিকং দিস্ৰা তং ঠানন্তরং আকঙ্খন্তী. মেণ্ডকপুত্তস্সাতি মেণ্ডকসেট্ঠিপুত্তস্স. মাতিট্ঠানে ঠপেসি তস্সা উপকারং গরুভাৰঞ্চ দিস্ৰা. তায কারিতে পাসাদেতি তায মহাউপাসিকায মহালতাপসাধনং ৰিস্সজ্জেত্ৰা নৰহি কোটীহি করীসমত্তে ভূমিভাগে কারিতে সহস্সগব্ভপটিমণ্ডিতে পাসাদে.

পরূল়্হকচ্ছাতি পরূল়্হকচ্ছলোমা. কমণ্ডলুঘটিকাদিং পব্বজিতপরিক্খারং. নগ্গভোগ্গনিস্সিরিকানন্তি নগ্গানঞ্চেৰ ভোগ্গানঞ্চ নিস্সিরিকানঞ্চ. তে হি অনিৰত্থৰত্থতায নগ্গা চেৰ, অচেলকৰতাদিনা ভোগ্গসরীরতায ভোগ্গা, সোভারহিততায নিস্সিরিকা চ. অত্তনা দিট্ঠসুতং পটিচ্ছাদেত্ৰা ন কথেয্যুন্তি অকারণমেতং তেসং রঞ্ঞা পযুত্তচরপুরিসভাৰতো. এৰং কতে পন তে ‘‘অঞ্ঞেপি পব্বজিতা অত্থীতি অযং জানাতী’’তি মঞ্ঞেয্যুন্তি কোহঞ্ঞচিত্তো এৰং অকাসীতি সক্কা ৰিঞ্ঞাতুং. তথা হি তেনত্থেন অপরিতোসমানো ‘‘অপিচা’’তিআদিমাহ.

কাসিকচন্দনন্তি উজ্জলচন্দনং. তং কির ৰণ্ণৰসেন সমুজ্জলং হোতি পভস্সরং, তদত্থমেৰ নং সণ্হতরং করোন্তি. তেনাহ ‘‘কাসিকচন্দনন্তি সণ্হচন্দন’’ন্তি. ৰণ্ণগন্ধত্থাযাতি ৰণ্ণসোভত্থঞ্চেৰ সুগন্ধভাৰত্থঞ্চ. ৰণ্ণগন্ধত্থাযাতি ছৰিরাগকরণত্থঞ্চেৰ সুগন্ধত্থায চ. ‘‘গিহিনা’’তিআদীহি পদেহি এৰং পমাদৰিহারিনা তযা অরহন্তো দুৰিঞ্ঞেয্যাতি দস্সেতি.

সংৰাসো নাম ইধ কালেন উপসঙ্কমনন্তি দস্সেন্তো ‘‘উপসঙ্কমন্তেনা’’তি আহ. কাযৰাচাহি অসংযতেনপি সংযতাকারো, অসংৰুতিন্দ্রিযেনপি সংৰুতিন্দ্রিযাকারো. পরিগ্গহেস্সামীতি ৰীমংসিস্সামি ‘‘পরিসুদ্ধং নু খো, নো’’তি. সপ্পঞ্ঞেনাতি সীলপরিগ্গণ্হনপঞ্ঞায সপ্পঞ্ঞেন. জানিতুং ন সক্কোতি সভাৰস্স সতো সীলস্স অনুপধারণতো.

কথনেনাতি অপরাপরং কথনেন. তথা হি ৰক্খতি ‘‘একচ্চস্স হী’’তিআদি. অরিযৰোহারোতি দিট্ঠাদিলক্খণেন ৰোহরিতো ‘‘দিট্ঠং অদিট্ঠ’’ন্তিআদিনা পৰুত্তসদ্দৰোহারো. তস্স পন কারণমেৰ গণ্হন্তো ‘‘এত্থ চেতনা’’তি আহ. এস নযো অনরিযৰোহারেপি. পরমত্থতো হি সচ্চৰাচাদযো মুসাৰাদাদযো চেতনালক্খণাতি. পঞ্ঞত্তিৰোহারো তথা তথা ৰোহরিতব্বতো এৰমাহ ‘‘সংৰোহারেন খো, মহারাজ, সোচেয্যং ৰেদিতব্ব’’ন্তি.

ঞাণথামোতি ঞাণগুণবলং, যেন ঠানুপ্পত্তিকপটিভানাদিনা অচ্চাযিককিচ্চকরণীযানি নিট্ঠাপেতি. সংকথাযাতি অত্থৰীমংসনৰসেন পৰত্তায সম্মাকথায. উপ্পিলৰতি লহুকভাৰতো. হেট্ঠাচরকাতি অৰচরকা. যে অনুপৰিসিত্ৰা পরেসং রহস্সৰীমংসনৰসেন পৰত্তা, তেসু ওচরকৰোহারোতি ৰুত্তং ‘‘চরা হী’’তিআদি.

ৰণ্ণসণ্ঠানেনাতি ৰণ্ণেন ৰা সণ্ঠানেন ৰা ৰণ্ণপোক্খরতায ৰা সণ্ঠানসম্পত্তিযা ৰা. সুজানো পেসলো ৰিস্সসেতি যোজনা. লহুকদস্সনেনাতি পরিত্তদস্সনেন ৰিজ্জুকেন ৰিয. পরিক্খারভণ্ডকেনাতি পব্বজিতপরিক্খারভূতেন ভণ্ডকেন. লোহড্ঢমাসোতি লোহমযো উপড্ঢগ্ঘনকমাসো.

সত্তজটিলসুত্তৰণ্ণনা নিট্ঠিতা.

২. পঞ্চরাজসুত্তৰণ্ণনা

১২৩. রূপাতি রূপসঙ্খাতা কামগুণা. তে পন নীলাদিৰসেন অনেকভেদভিন্নাপি রূপাযতনত্তা চক্খুৰিঞ্ঞেয্যতং নাতিৰত্তন্তীতি আহ ‘‘নীলপীতাদিভেদং রূপারম্মণ’’ন্তি. তো-সদ্দোপি দা-সদ্দো ৰিয কালত্থো হোতীতি আহ ‘‘যতোতি যদা’’তি. মনং আপযতি ৰড্ঢেতীতি মনাপং, মনোরমং. মনাপনিপ্ফত্তিতন্তি তস্স পুগ্গলস্স মনসা পিযাযিতং, তস্স অগ্গভাৰেন পরিযন্তং পরমং কোটিং কত্ৰা পৰত্তিতন্তি অত্থো. পুগ্গলমনাপন্তি আরম্মণসভাৰং অচিন্তেত্ৰা পুগ্গলস্স ৰসেন মনাপভাৰেনেৰ ইট্ঠতায ইট্ঠন্তি. সম্মুতীতি সমঞ্ঞা. পুগ্গলমনাপং নাম সঞ্ঞাৰিপল্লাসৰসেন ৰিপরীতম্পি গণ্হাতি ইতরসভাৰতোতি আহ ‘‘যং একস্স…পে… ইট্ঠং কন্ত’’ন্তি. ইদানি তং জিৰ্হাৰিঞ্ঞেয্যৰসেন যোজেত্ৰা দস্সেন্তো ‘‘পচ্চন্তৰাসীন’’ন্তিআদিমাহ. ইদং পুগ্গলমনাপন্তি ইদং যথাৰুত্তং জিৰ্হাৰিঞ্ঞেয্যং ৰিয অঞ্ঞম্পি এৰংজাতিকং তেন তেন পুগ্গলেন মনাপন্তি গহেতব্বারম্মণং পুগ্গলমনাপং নাম.

লোকে পটিৰিভত্তং নত্থি, ৰিভজিত্ৰা দস্সনেন লোকেন মধুরজাতেনপি পটিৰিভত্তং কত্ৰা গহেতুং ন সক্কুণেয্যাতি অধিপ্পাযো. তেনাহ ‘‘ৰিভজিত্ৰা পন দস্সেতব্ব’’ন্তি. দিব্বকপ্পম্পীতি দেৰলোকপরিযাপন্নসদিসম্পি অমনাপং উপট্ঠাতি উল়ারপণীতারম্মণপরিচযতো. মজ্ঝিমানং পন…পে… ৰিভজিতব্বং তেসং মনাপস্স মনাপতো, অমনাপস্স অমনাপতো উপট্ঠানতো. তত্থপি ইট্ঠানিট্ঠপরিচ্ছেদো নিপ্পরিযাযতো এৰং ৰেদিতব্বোতি দস্সেন্তো আহ ‘‘তঞ্চ পনেত’’ন্তিআদি. তঞ্চ পনেতং ইট্ঠানিট্ঠভূতং আরম্মণং কামাৰচরজৰনেসু অকুসলস্স ৰসেন যেভুয্যেন পৰত্ততীতি কত্ৰা তত্থ ‘‘রজ্জতি দুস্সতী’’তি অকুসলস্সেৰ পৰত্তি দস্সিতা. সেসকামাৰচরস্সপি ৰসেন পৰত্তি লব্ভতেৰ. তথা হি তং অপ্পটিকূলেপি পটিকূলাকারতো, পটিকূলেপি অপ্পটিকূলাকারতো পৰত্ততীতি. ৰিপাকচিত্তং ইট্ঠানিট্ঠং পরিচ্ছিন্দতি, ন সক্কা ৰিপাকং ৰঞ্চেতুন্তি. কুসলকম্মং হি একন্ততো ইট্ঠমেৰ, অকুসলকম্মঞ্চ অনিট্ঠমেৰ, তস্মা তত্থ উপ্পজ্জমানং ৰিপাকচিত্তং যথাসভাৰতো পৰত্ততীতি.

যং পন সম্মোহৰিনোদনিযং ‘‘কুসলকম্মজং অনিট্ঠং নাম নত্থী’’তি এত্তকমেৰ ৰুত্তং, তং পন নিদস্সনমত্তং দট্ঠব্বং. তেন সোভনং অকুসলকম্মজম্পি একচ্চানং সত্তানং ইট্ঠন্তি অনুঞ্ঞাতং সিযা. কুসলকম্মজং পন সব্বেসং ইট্ঠমেৰাতি ৰদন্তি. তিরচ্ছানগতানং কেসঞ্চি মনুস্সরূপং অমনাপং, যতো তে দিস্ৰাৰ পলাযন্তি. মনুস্সা চ দেৰতানং রূপং দিস্ৰা ভাযন্তি, তেসম্পি ৰিপাকৰিঞ্ঞাণং তং রূপং আরব্ভ কুসলৰিপাকমেৰ উপ্পজ্জতি, তাদিসস্স পন পুঞ্ঞস্স অভাৰা ন তেসং তত্থ অভিরতি হোতীতি দট্ঠব্বং. কুসলকম্মজস্স পন অনিট্ঠস্স অভাৰো ৰিয অকুসলকম্মজস্স সোভনস্স ইট্ঠস্স অভাৰো ৰত্তব্বো. হত্থিআদীনম্পি হি অকুসলকম্মজং মনুস্সানং অকুসলৰিপাকস্সেৰ আরম্মণং, কুসলকম্মজং পন পৰত্তে সমুট্ঠিতং কুসলৰিপাকস্স, ইট্ঠারম্মণেন ৰোমিস্সকত্তা অপ্পকং অকুসলকম্মজং বহুলং অকুসলৰিপাকুপ্পত্তিযা কারণং ন ভৰিস্সতীতি সক্কা ৰত্তুং. ইদানি তমেৰ ৰিপাকৰসেন ইট্ঠানিট্ঠারম্মণৰৰত্থানং ৰিভাৰেতুং ‘‘কিঞ্চাপি হী’’তিআদি ৰুত্তং. তযিদং সম্মুতিমনাপসংৰিভাগত্থং ৰুত্তং, ইধ পন ন তথা ৰিভত্তন্তি আহ ‘‘ভগৰা পনা’’তিআদি.

সো উপাসকো চন্দনঙ্গলগামে জাতত্তা ‘‘চন্দনঙ্গলিকো’’তি পঞ্ঞাযতি, ‘‘চন্দনৰিলাসো’’তি কেচি. তস্স উপাসকস্স পটিভানং উদপাদীতি যোজনা. তে রাজানো হতপ্পভে হতসোভে দিস্ৰাতি সম্বন্ধো. উদকাভিসিত্তেতি উদকেন অভিসিঞ্চিতে. অঙ্গারে ৰিযাতি অঙ্গারক্খণে ৰিয.

কালস্সেৰাতি পগেৰ. অৰিগতগন্ধং তঙ্খণৰিকসিততায. ঈদিসং ৰচনন্তি ‘‘অচ্ছাদেসী’’তি এৰরূপং ৰচনন্তি.

পঞ্চরাজসুত্তৰণ্ণনা নিট্ঠিতা.

৩. দোণপাকসুত্তৰণ্ণনা

১২৪. ‘‘দোণপাককুর’’ন্তি এত্থ ৰিভত্তিলোপং কত্ৰা নিদ্দেসোতি আহ ‘‘দোণপাকং কুর’’ন্তি. দোণস্সাতি চতুন্নং আল়্হকানং, সোল়সনাল়ীনন্তি অত্থো. তদুপিযন্তি তদনুরূপং, তস্স ৰুত্তপরিমাণস্স অনুচ্ছৰিকন্তি অত্থো. পুব্বেতি তংদিৰসতো পুরিমতরদিৰসেসু. বলৰাতি মহা. ভত্তপরিল়াহোতি ভত্তসম্মদহেতুকো. অস্স রঞ্ঞো উভোসু পস্সেসু গহিততালৰণ্টা বীজন্তি যমকতালৰণ্টেহি. ফাসুৰিহারন্তি ভোজনে মত্তঞ্ঞুতায লদ্ধব্বসুখৰিহারং. ভোজনমত্তঞ্ঞূ হি সুখৰিহারো হোতি. তেনাহ ‘‘তনুকস্স ভৰন্তি ৰেদনা, সণিকং জীরতি আযু পালয’’ন্তি.

তনুকস্সাতি তনুকা অস্স পুগ্গলস্স, ভুত্তপচ্চযা ৰিসভাগৰেদনা ন হোন্তীতি অত্থো. সণিকন্তি মন্দং মুদুকং, অপরিস্সযমেৰাতি অত্থো. জীরতীতি পরিভুত্তাহারো পচ্চতি. আযুপালযন্তি নিরোধো অৰেদনো জীৰিতং রক্খন্তো. অথ ৰা সণিকং জীরতীতি সো ভোজনে মত্তঞ্ঞূ পুগ্গলো পরিমিতাহারতায সণিকং চিরেন জীরতি জরং পাপুণাতি জীৰিতং পালেন্তো.

পরিযাপুণিত্ৰাতি এত্থ যথা সব্বং সো পরিযাপুণি, ততো পরঞ্চ যথা পটিপজ্জি, তং দস্সেতুং ‘‘রঞ্ঞা সদ্ধি’’ন্তিআদি ৰুত্তং. তাৰতকে তণ্ডুলে হারেয্যাসি তদুপিযঞ্চ ব্যঞ্জনন্তি আনেত্ৰা সম্বন্ধো.

পুরিসভাগো এসাতি মজ্ঝিমেন পুরিসেন ভুঞ্জিতব্বভাগো এসো, যদিদং নাল়িকোদনমত্তং. সল্লিখিতসরীরতাতি ভমং আরোপেত্ৰা উল্লিখিতস্স ৰিয সব্বপরিল়াহৰূপসমস্স পুথুলতাপগতসরীরস্স. সীলং সম্পরাযিকত্থোতি ৰুত্তং, কুতো পনেত্থ সীলন্তি আহ ‘‘ভোজনে’’তিআদি. সীলঙ্গং নাম হোতীতি চতুপারিসুদ্ধিসীলস্স অৰযৰো একো ভাগো হোতি.

দোণপাকসুত্তৰণ্ণনা নিট্ঠিতা.

৪. পঠমসঙ্গামসুত্তৰণ্ণনা

১২৫. ৰেদেন ঞাণেন ঈহতি ইরিযতীতি ৰেদেহী, কোসলরাজভগিনী অজাতসত্তুনো মাতা, সা কির সম্পজঞ্ঞজাতিকা. তেনাহ ‘‘পণ্ডিতাধিৰচন’’ন্তি, চত্তারি অঙ্গানি এতিস্সন্তি চতুরঙ্গিনী. দ্ৰিন্নং রজ্জানন্তি কাসিকরজ্জমগধরজ্জানং অন্তরে, সো পন গামো কাসিকরজ্জো.

পাপাতি লামকা নিহীনাচারা. মেজ্জতি সিনিয্হতীতি মেত্তি, সা এতেসু অত্থীতি মিত্তা. সহ অযন্তি পৰত্তন্তীতি সহাযা. সম্পৰঙ্কন্তি সুট্ঠু ওনতং. জযকারণং দিস্ৰা আহ, তথা হি ‘‘অজ্জ ইমং রত্তিং দুক্খং সেতী’’তি কালপরিচ্ছেদৰসেন ৰুত্তং. ৰেরিঘাতো নাম ৰেরিপুগ্গলে সতীতি আহ ‘‘ৰেরিপুগ্গলং লভতী’’তি.

পঠমসঙ্গামসুত্তৰণ্ণনা নিট্ঠিতা.

৫. দুতিযসঙ্গামসুত্তৰণ্ণনা

১২৬. সুণাথাতি ‘‘ৰত্ৰা’’তি ৰচনসেসো. উপকপ্পতীতি সম্ভৰতি. সয্হং হোতীতি কাতুং সক্কা হোতি. ‘‘যদা চঞ্ঞে’’তি চ-কারো নিপাতমত্তন্তি আহ ‘‘যদা অঞ্ঞে’’তি. ৰিলুম্পন্তীতি ৰিনাসং অচ্ছিন্দনং করোন্তি. ৰিলুম্পীযতীতি ৰিলুত্তপরসন্তকস্স অসকত্তা পুগ্গলো দিট্ঠধম্মিকং কম্মফলং পটিসংৰেদেন্তো ৰিয সযম্পি পরেন ৰিলুম্পীযতি, ধনজানিং পাপুণাতি. ‘‘কারণ’’ন্তি হি মঞ্ঞতীতি পাপকিরিযং অত্তনো হিতাৰহং কারণং কত্ৰা মঞ্ঞতি. জযন্তো পুগ্গলো ‘‘ইদং নাম জিনামী’’তি মঞ্ঞমানো সযম্পি ততো পরাজযং পাপুণাতি. ঘট্টেতারন্তি পাপকম্মৰিপাকং. কম্মৰিৰট্টেনাতি কম্মস্স ৰিৰট্টনেন, পচ্চযলাভেন লদ্ধাৰসরেন ৰিৰট্টেত্ৰা ৰিগমিতেন কম্মেনাতি অত্থো.

দুতিযসঙ্গামসুত্তৰণ্ণনা নিট্ঠিতা.

৬. মল্লিকাসুত্তৰণ্ণনা

১২৭. একচ্চাতি পণ্ডিতা সপঞ্ঞা. সেয্যাতি ৰরা. গাথাসুখত্থং সসুরসদ্দলোপং কত্ৰা ‘‘সস্সুদেৰা’’তি ৰুত্তন্তি আহ ‘‘সস্সুসসুরদেৰতা’’তি. দিসাজেট্ঠকাতি চতূসুপি দিসাসু জেট্ঠকসীসেন হি লোকং ৰদতি. তাদিসাযাতি তথারূপায মেধাৰিতাদিগুণৰুত্তিযা. সুভরিযাযাতি সুখেত্তভূতায সুন্দরিত্থিযাতি অত্থো.

মল্লিকাসুত্তৰণ্ণনা নিট্ঠিতা.

৭. অপ্পমাদসুত্তৰণ্ণনা

১২৮. সমধিগ্গয্হাতি সম্মা অতিৰিয গহেত্ৰা, ঞাযেন ৰিসেসতো গণ্হিত্ৰা. কারাপকঅপ্পমাদোতি তিণ্ণং পুঞ্ঞকিরিযৰত্থূনং পৰত্তকঅপ্পমাদো. সমৰধানন্তি সমৰরোধং অন্তোগধং. উপক্খেপন্তি বহি অহুত্ৰা পক্খিপিতব্বতং. সেসপদজাতানি ৰিয অৰ…পে… ধম্মা সপ্পদেসত্তা. অপ্পমাদে সমোধানং গচ্ছন্তি তস্স নিপ্পদেসত্তা. অগ্গং সেট্ঠং মহন্তং সেসধম্মানং অপ্পমাদো. পটিলাভকট্ঠেনাতি অধিগমহেতুতায. লোকিযোপি সমানোতি কামাৰচরোপি সমানো. মহগ্গতানুত্তরানং পুব্বভাগে পৰত্তঅপ্পমাদো হি ইধাধিপ্পেতো.

পসংসন্তি পণ্ডিতাতি যোজনা. অপ্পমাদস্স পাসংসভাৰে একন্ততো কত্তব্বতায পন ‘‘এতানী’’তিআদিনা কারণং আহ. ইমিস্সা যোজনায ‘‘পুঞ্ঞকিরিযাসূ’’তি পদস্স ‘‘অপ্পমত্তো’’তি ইমিনা সম্বন্ধো. যস্মা পণ্ডিতা অপ্পমাদং পসংসন্তি, যস্মা চ পুঞ্ঞকিরিযাসু অপ্পমত্তো উভো অত্থে অধিগ্গণ্হাতি, তস্মা আযুআদীনি পত্থযন্তেন অপ্পমাদোৰ কাতব্বোতি. দুতিযযোজনায পন পণ্ডিতা অপ্পমাদং পসংসন্তি. কত্থ? পুঞ্ঞকিরিযাসু. কস্মাতি চে? অপ্পমত্তোতিআদি. তেনাহ ‘‘যস্মা…পে… অত্থো’’তি. অত্থপটিলাভাতি দিট্ঠধম্মিকাদিহিতপটিলাভা.

অপ্পমাদসুত্তৰণ্ণনা নিট্ঠিতা.

৮. কল্যাণমিত্তসুত্তৰণ্ণনা

১২৯. সীলাদিগুণসমন্নাগতো কল্যাণো ভদ্দকো মিত্তো এতস্সাতি কল্যাণমিত্তো, তস্স ধম্মো কল্যাণমিত্তস্সেৰ স্ৰাখাতো নাম হোতি সুত্ৰা কত্তব্বকিচ্চস্স সাধনতো. তেনাহ ‘‘অত্থং পূরেতী’’তি. ইতরস্সাতি পাপমিত্তস্স. তেনাতি অত্থপূরণেন. এতন্তি ‘‘সো চ খো কল্যাণমিত্তস্সা’’তি এতং ৰচনং. দেসনাধম্মোতি পরিযত্তিধম্মো. সো হি কল্যাণমিত্ততো পচ্চক্খতো লদ্ধব্বো, ইতরে তদুপনিস্সযা পচ্চত্তপুরিসকারেহি, তেন লদ্ধব্বো কল্যাণমিত্তোতি এৰমত্থো গহেতব্বো. সাৰকবোধিসত্তৰসেন হেসা দেসনা আগতা. ন হি সেসবোধিসত্তানং পরোপদেসেন পযোজনং অত্থি.

উপড্ঢং কল্যাণমিত্ততোতি ব্রহ্মচরিযং চরন্তস্স উপড্ঢগুণো কল্যাণমিত্ততো লদ্ধব্বো. উপড্ঢং পচ্চত্তপুরিসকারতোতি ইতরং উপড্ঢং ঞাণং পটিপজ্জন্তস্স অত্তনো পুরিসকারতো. লোকেপি পাকটোযমত্থো ‘‘আচরিযতো উপড্ঢং, পচ্চত্তপুরিসকারতো উপড্ঢং লদ্ধব্বা তেৰিজ্জতা’’তি, তস্মা থেরো তথা চিন্তেসি. নিপ্পদেসন্তি অনৰসেসতো. ততোতি কল্যাণমিত্ততো. উপড্ঢং আগচ্ছতীতি উপড্ঢগুণো পটিপজ্জন্তং উপগচ্ছতি. বহূহি পুরিসেহি. ৰিনিব্ভোগো ৰিৰেচনং নত্থি একজ্ঝং অত্থস্স ৰিৰেচেতুং অসক্কুণেয্যত্তা. এসাতি পরতোঘোসপচ্চত্তপুরিসকারতো চ সিজ্ঝমানো অত্থো. এত্তকন্তি এত্তকো ভাগো. যদি ন সক্কা লদ্ধুং, অথ কস্মা উপড্ঢন্তি ৰুত্তন্তি আহ ‘‘কল্যাণমিত্ততাযা’’তিআদি. সম্মাদিট্ঠিআদীসু ন সক্কা লদ্ধুং. অসক্কুণেয্যে সকলম্পি ন সম্ভৰতি পরতোঘোসমত্তেন তেসং অসিজ্ঝনতো, পধানহেতুভাৰদীপনত্থং পন ‘‘সকলমেৰা’’তি ৰুত্তং. পুব্বভাগপটিলাভঙ্গন্তি পুব্বভাগে পটিলদ্ধব্বকারণং কল্যাণমিত্তস্স উপদেসেন ৰিনা তেন উত্তরি ৰিসেসতো অলদ্ধব্বতো. অত্থতোতি পরমত্থতো. ‘‘কল্যাণমিত্তং…পে… চত্তারো খন্ধা’’তি ৰত্ৰা সুত্ৰাতি অত্থো. তে পন সীলাদযো সঙ্খারক্খন্ধপরিযাপন্নাতি আহ ‘‘সঙ্খারক্খন্ধোতিপি ৰদন্তিযেৰা’’তি.

মাহেৰন্তি মা অহ এৰন্তি ছেদো, অহাতি নিপাতমত্তং, মাতি পটিসেধে নিপাতো. তেনাহ ‘‘মা এৰং অভণী’’তি. ‘‘মাহেৰং আনন্দা’’তি ৰদতো ভগৰতো ইমস্মিং ঠানে তাদিসস্স নাম তে, আনন্দ, কল্যাণমিত্তগুণে সেৰতো ৰত্তুং যুত্তং অযাথাৰতোতি ধম্মভণ্ডাগারিকস্স যথাভূতগুণকিত্তনমুখেন পটিক্খেপো যুত্তোতি দস্সেন্তো ‘‘বহুস্সুতো’’তিআদিমাহ. ইদন্তি ইদং ৰচনং ভগৰা আহাতি সম্বন্ধো. সকলমেৰ হীতি এত্থ হি-সদ্দো হেতুঅত্থো. তেন ‘‘মাহেৰ’’ন্তি তস্স পটিক্খেপস্স কারণং জোতিতং, ন সরূপতো ৰুত্তং. ‘‘কল্যাণমিত্তস্সেত’’ন্তিআদিনা পন তং সরূপতো দস্সিতন্তি আহ ‘‘ইদানি…পে… আদিমাহা’’তি. পাটিকঙ্খিতব্বন্তি ইচ্ছনট্ঠেন পাটিকঙ্খিতব্বং, ন পটিকঙ্খানিমিত্তেনাতি আহ ‘‘অৰস্সংভাৰীতি অত্থো’’তি.

ইধাতি অন্তোগধাৰধারণপদং, ইধেৰাতি অত্থো. ইমস্মিংযেৰ হি সাসনে অরিযমগ্গভাৰনা, ন অঞ্ঞত্থ. আদিপদানংযেৰাতি তস্মিং তস্মিং ৰাক্যে আদিতো এৰ ৰুত্তসম্মাদিট্ঠিআদিপদানংযেৰ. সম্মাদস্সনলক্খণাতি চতুন্নং অরিযসচ্চানং পরিঞ্ঞাভিসমযাদিৰসেন সম্মদেৰ দস্সনসভাৰা. সম্মাঅভিরোপনলক্খণোতি নিব্বানসঙ্খাতে আরম্মণে সম্পযুত্তধম্মে সম্মদেৰ আরোপনসভাৰো. সম্মাপরিগ্গহণলক্খণাতি মুসাৰাদাদীনং ৰিসংৰাদনাদিকিচ্চতায লূখানং অপরিগ্গাহকানং পটিপক্খভাৰতো পরিগ্গাহকসভাৰা সম্মাৰাচা সিনিদ্ধভাৰেন সম্পযুত্তধম্মে সম্মাৰাচাপচ্চযং সুভাসিতসোতারঞ্চ পুগ্গলং পরিগ্গণ্হাতীতি সম্মাপরিগ্গহণলক্খণা. যথা কাযিককিরিযা কিঞ্চি কত্তব্বং সমুট্ঠাপেতি, সযঞ্চ সমুট্ঠহনং ঘটনং হোতি, তথা সম্মাকম্মন্ত সঙ্খাতা ৰিরতিপীতি সমুট্ঠাপনলক্খণা দট্ঠব্বা, সম্পযুত্তধম্মানং ৰা উক্খিপনং সমুট্ঠাপনং কাযিককিরিযায ভারুক্খিপনং ৰিয. জীৰমানস্স সত্তস্স, সম্পযুত্তধম্মানং ৰা, জীৰিতপ্পৰত্তিযা আজীৰস্সেৰ ৰা সুদ্ধি ৰোদানং. যথা উপ্পন্নুপ্পন্নানং ৰজ্জানং ধম্মেন পহানানুপ্পাদঅত্থলাভাদিপরিৰুড্ঢি হোতি, এৰং সম্পযুত্তানং পগ্গহণসভাৰোতি সম্মাপগ্গহলক্খণো সম্মাৰাযামো. কাযৰেদনাচিত্তধম্মেসু সুভসুখনিচ্চঅত্তগাহানঞ্চ ৰিধমনৰসেন সম্মাপতিট্ঠানসভাৰাতি সম্মাউপট্ঠানলক্খণা সম্মাসতি. সম্পযুত্তধম্মানং সম্মা সমাদহনং একগ্গতাকরণং সভাৰো এতস্সাতি সম্মাসমাধানলক্খণো সম্মাসমাধি. তীণি কিচ্চানি হোন্তি পটিপক্খধম্মেসু, আরম্মণধম্মেসু, সম্পযুত্তধম্মেসু চ একস্মিংযেৰ খণে পৰত্তিৰিসেসভূতানি. ইদানি তানি সরূপতো দস্সেতুং ‘‘সেয্যথিদ’’ন্তিআদি ৰুত্তং. সদ্ধিন্তি ইমিনা ‘‘অঞ্ঞেহী’’তি ৰুত্তকিলেসা মিচ্ছাদিট্ঠিযা সহ একট্ঠা ৰা অনেকট্ঠা ৰাতি দস্সেতি. পজহতি পহায নং পটিৰিজ্ঝতি. নিরোধন্তি নিব্বানং আরম্মণং করোতি সচ্ছিকিরিযাপটিৰেধেন পটিৰিজ্ঝতি.

ন কেৰলং মগ্গধম্মা ৰুত্তনযেনেৰ, অথ খো অপরেনপি নযেন ৰেদিতব্বাতি দস্সেন্তো ‘‘অপিচা’’তিআদিমাহ. নানাখণা পুনপ্পুনং উপ্পজ্জনতো. নানারম্মণা অনিচ্চানুপস্সনাদিভাৰতো. একক্খণা সকিদেৰ উপ্পজ্জনতো. একারম্মণা নিব্বানৰিসযত্তা. চত্তারি নামানি লভতি পরিঞ্ঞাভিসমযাদিৰসেন পৰত্তিযা. তীণি নামানি লভতি কামসঙ্কপ্পাদীনং পহানৰসেন পৰত্তিযা. পটিপক্খপহানৰসেন হিস্স নামত্তযলাভো. এস নযো সেসেসুপি. ৰিরতিযোপি হোন্তি চেতনাযোপি পুব্বভাগেপি ৰিক্খম্ভনৰসেন পৰত্তনতো. মগ্গক্খণে পন ৰিরতিযোৰ পটিপক্খসমুচ্ছিন্দনস্স মগ্গকিচ্চত্তা. ন হি চেতনা মগ্গসভাৰা. সম্মপ্পধানসতিপট্ঠানৰসেনাতি চতুব্বিধসম্মপ্পধানচতুব্বিধসতিপট্ঠানৰসেন চত্তারি নামানি লভতি অনুপ্পন্নাকুসলানুপ্পাদনাদীনং কুসলানঞ্চ ৰড্ঢনতো. পুব্বভাগেপি মগ্গক্খণেপীতি যথা পুব্বভাগে পঠমজ্ঝানাদিৰসেন নানা. এৰং মগ্গক্খণেপি. ন হি একোপি চ মগ্গসমাধি পঠমজ্ঝানসমাধিআদিনামানি লভতি সম্মাদিট্ঠিআদীনং ৰিয কিচ্চৰসেন ভেদাভাৰতো. তেনাহ ‘‘মগ্গক্খণেপি সম্মাসমাধিযেৰা’’তি.

ঞত্ৰা ঞাতব্বাতি সম্বন্ধো. ৰুদ্ধি নাম ৰেপুল্লং ভিয্যোভাৰো পুনপ্পুনং উপ্পাদো এৰাতি আহ ‘‘পুনপ্পুনং জনেতী’’তি. অভিনিব্বত্তেতীতি অভিৰড্ঢং পাপেন্তো নিব্বত্তেতি. ৰিৰিত্ততাতি ৰিৰিত্তভাৰো. সো হি ৰিৰেচনীযতো ৰিৰিচ্চতি, যং ৰিৰিচ্চিত্ৰা ঠিতং, তদুভযম্পি ইধ ৰিৰিত্তভাৰসামঞ্ঞেন ‘‘ৰিৰিত্ততা’’তি ৰুত্তং. তেসু পুরিমো ৰিৰেচনীযতো ৰিৰিচ্চমানতায ৰিৰিচ্চনকিরিযায সমঙ্গী ধম্মসমূহো তায এৰ ৰিৰিচ্চনকিরিযায ৰসেন ৰিৰেকোতি গহিতো. ইতরো সব্বসো ততো ৰিৰিত্তসভাৰতায. তত্থ যস্মিং ধম্মপুঞ্জে সম্মাদিট্ঠি পৰত্ততি, তং যথাৰুত্তায ৰিৰিচ্চমানতায ৰিৰেকসঙ্খাতং নিস্সাযেৰ পৰত্ততি, ইতরং পন তংনিন্নতাতংআরম্মণতাহীতি ৰুত্তং ‘‘ৰিৰেকং নিস্সিতং, ৰিৰেকে ৰা নিস্সিত’’ন্তি.

যথা ৰা ৰিৰেকৰসেন পৰত্তং ঝানং ‘‘ৰিৰেকজ’’ন্তি ৰুত্তং, এৰং ৰিৰেকৰসেন পৰত্তা সম্মাদিট্ঠি ‘‘ৰিৰেকনিস্সিতা’’তি দট্ঠব্বা. নিস্সযো চ ৰিপস্সনামগ্গানং ৰসেন মগ্গফলানং ৰেদিতব্বো. অসতিপি তাসং পুব্বাপরভাৰে ‘‘পটিচ্চসমুপ্পাদো’’তি এত্থ পচ্চযানং সমুপ্পাদনং ৰিয অভিন্নধম্মাধারা নিস্সযভাৰনা সম্ভৰন্তি. তস্স তদঙ্গ-সমুচ্ছেদনিস্সরণৰিৰেকনিস্সিততং ৰত্ৰা পটিপ্পস্সদ্ধিৰিৰেকনিস্সিততায অৰচনং অরিযমগ্গভাৰনায ৰুচ্চমানত্তা. ভাৰিতমগ্গস্স হি যে সচ্ছিকাতব্বা ধম্মা. তেসং কিচ্চং পটিপ্পস্সদ্ধিৰিৰেকো. অজ্ঝাসযতোতি ‘‘নিব্বানং সচ্ছিকরিস্সামী’’তি মহন্তঅজ্ঝাসযতো. যদিপি হি ৰিপস্সনাক্খণে সঙ্খারারম্মণং চিত্তং, সঙ্খারেসু পন আদীনৰং সুট্ঠু, দিস্ৰা তপ্পটিপক্খে নিব্বানে নিন্নতায অজ্ঝাসযতো নিস্সরণৰিৰেকনিস্সিতো হোতি, উণ্হাভিভূতস্স পুগ্গলস্স সীতনিন্নচিত্ততা ৰিয. কেচি পন ‘‘যথা সভাৰতো, যথা অজ্ঝাসযতো নিস্সরণৰিৰেকনিস্সিততা, এৰং পটিপ্পস্সদ্ধিৰিৰেকনিস্সিততাপি সিযা’’তি ৰদন্তি. যদগ্গেন হি নিব্বাননিন্নতা সিযা, তদগ্গেন ফলনিন্নতাপি সিযা ‘‘কুদাস্সু নামাহং তদাযতনং উপসম্পজ্জ ৰিহরেয্য’’ন্তি অজ্ঝাসযসম্পত্তিযা ভাৰতো. যস্মা পহানৰিনযো ৰিয রাগনিরোধোপি ইধাধিপ্পেতৰিৰেকেন অত্থতো নিব্বিসিট্ঠো, তস্মা ৰুত্তং এস নযো ৰিরাগনিস্সিতাদীসূতি. তেনাহ ‘‘ৰিৰেকত্থা এৰ হি ৰিরাগাদযো’’তি.

ৰোস্সগ্গসদ্দো পরিচ্চাগত্থো পক্খন্দনত্থো চাতি ৰোস্সগ্গস্স দুৰিধতা ৰুত্তা. ৰোস্সজ্জনঞ্হি পহানং, ৰিস্সট্ঠভাৰেন নিরাসঙ্কপৰত্তি চ, তস্মা ৰিপস্সনাক্খণে তদঙ্গৰসেন, মগ্গক্খণে সমুচ্ছেদৰসেন পটিপক্খস্স পহানং ৰোস্সগ্গো, তথা ৰিপস্সনাক্খণে তংনিন্নভাৰেন, মগ্গক্খণে আরম্মণকরণেন ৰিস্সট্ঠসভাৰতা ৰোস্সগ্গোতি ৰেদিতব্বং. তেনেৰাহ ‘‘তত্থ পরিচ্চাগৰোস্সগ্গো’’তিআদি. অযং সম্মাদিট্ঠীতি অযং মিস্সকৰসেন ৰুত্তা সম্মাদিট্ঠি. যথাৰুত্তেন পকারেনাতি তদঙ্গপ্পহানসমুচ্ছেদপ্পহানপকারেন তংনিন্নতদারম্মণকরণপ্পকারেন চ.

পুব্বে ৰোস্সগ্গৰচনস্সেৰ অত্থস্স ৰুত্তত্তা আহ ‘‘সকলেন ৰচনেনা’’তি. পরিণমন্তং ৰিপস্সনাক্খণে, পরিণতং মগ্গক্খণে. পরিণামো নাম ইধ পরিপাকোতি আহ ‘‘পরিপচ্চন্তং পরিপক্কঞ্চা’’তি. পরিপাকো চ আসেৰনলাভেন লদ্ধসামত্থিযস্স কিলেসে পরিচ্চজিতুং নিব্বানং পক্খন্দিতুং তিক্খৰিসদভাৰো. তেনাহ ‘‘অয’’ন্তিআদি. এস নযোতি য্ৰাযং নযো ‘‘ৰিৰেকনিস্সিত’’ন্তিআদিনা সম্মাদিট্ঠিযং ৰুত্তো, সেসেসু সম্মাসঙ্কপ্পাদীসুপি এসেৰ নযো, এৰং তত্থ নেতব্বন্তি অত্থো. পটিচ্চাতি নিস্সায. জাতিসভাৰাতি জাযনসভাৰা. সকলোতি অনৰসেসো, সব্বোতি অত্থো. ন কোচি মগ্গো সাৰসেসো হুত্ৰা সম্ভৰতি. হেট্ঠিমে মগ্গে উপ্পন্নে উপরিমো উপ্পন্নো এৰ নাম অনন্তরাযেন উপ্পজ্জনতো. ৰৰস্সগ্গত্থেতি ৰচসাযত্থে. ৰণ্ণযন্তীতি গুণৰণ্ণনৰসেন ৰিত্থারেন্তি.

কল্যাণমিত্তসুত্তৰণ্ণনা নিট্ঠিতা.

৯. পঠমঅপুত্তকসুত্তৰণ্ণনা

১৩০. দিৰ-সদ্দো দিৰা-সদ্দো ৰিয দিৰসপরিযাযো, তস্মা ৰিসেসনভাৰেন ৰুচ্চমানো দিৰসদ্দো অত্থৰিসেসং দীপেতীতি আহ ‘‘দিৰসস্স দিৰা’’তিআদি. সং ৰুচ্চতি ধনং, তস্স পতীতি সম্পতি, ধনসামিকো, তস্স হিতাৰহত্তা সাপতেয্যন্তি আহ ‘‘সাপতেয্যন্তি ধন’’ন্তি. তস্স গেহে কতাকতভণ্ডস্স অতিবহুভাৰতো ৰিম্হযপ্পত্তো রাজা ‘‘কো পন ৰাদো’’তি আহ. কাল়লোহং নাম অযোফলং. কচ্ছপাদিরূপেহিপি সোৰণ্ণাদীনি ঠপেন্তি. সকুণ্ডকভত্তন্তি সকুণ্ডেহি ৰা সথুসেহি ৰা পক্কভত্তং. বিলঙ্গং ৰুচ্চতি ধঞ্ঞবিলঙ্গং, আরনালন্তিপি ৰুচ্চতি, তং দুতিযং অস্সাতি বিলঙ্গদুতিযং. তঞ্হি কঞ্জিতো নিব্বত্তত্তা কঞ্জিকং নাম. তীহি পক্খেহি ৰত্থখণ্ডেহি কতনিৰাসনং তিপক্খৰসনং. তেনাহ ‘‘তীণি…পে… নিৰাসন’’ন্তি.

অসন্তো নীচো পুরিসোতি অসপ্পুরিসোতি আহ ‘‘লামকপুরিসো’’তি. কম্মস্স নিব্বত্তভাৰেন ওতরণতায ফলং অগ্গং নাম, উপরিভূমিগতত্তা উদ্ধং অগ্গং অস্সাতি উদ্ধগ্গিকং. দক্খিণন্তি দানমাহ. সগ্গো নাম কামভৰূপপত্তিভৰো, তস্স নিব্বত্তনতো ‘‘সগ্গস্স হিতা’’তি ৰুত্তং. তত্রুপপত্তিজননতোতি তত্র উপপত্তিযা জননতো, উপ্পাদনতোতি অত্থো.

সেতং উদকং এতিস্সাতি সেতোদকা. সো যেন ভাৰেন যত্থ পাকটতরো হুত্ৰা দিস্সতি, তং দস্সেতুং ‘‘ৰীচীনং ভিন্নট্ঠানে’’তি আহ. সুখোতরণট্ঠানতায কদ্দমাদিদোসৰিরহতো চ সুন্দরতিত্থা. তং অপেয্যমানন্তি তং উদকং কেনচি অপরিভুঞ্জিযমানং. অত্তনা কত্তব্বকিচ্চকরোতি অত্তনা কাতব্বকম্মসঙ্খাতকিচ্চকরো, পরিভোগৰসেন চেৰ সঙ্গহেতব্বসঙ্গণ্হনৰসেন চ নিযোজকোতি অত্থো. কুসলকিচ্চকরোতি অত্তনা কাতব্বপুঞ্ঞকরো.

পঠমঅপুত্তকসুত্তৰণ্ণনা নিট্ঠিতা.

১০. দুতিযঅপুত্তকসুত্তৰণ্ণনা

১৩১. পিণ্ডপাতেনাতি সহযোগে করণৰচনং. পটিপাদনং তেন সহ যোজনন্তি আহ ‘‘পিণ্ডপাতেন সদ্ধিং সংযোজেসি, পিণ্ডপাতং অদাসীতি অত্থো’’তি. ‘‘পণীতভোজনং ভুঞ্জিত্ৰা’’তি ৰুত্তং, পাল়িযং পন ‘‘কণাজকং ভুঞ্জতি বিলঙ্গদুতিয’’ন্তি. তং তং পৰত্তিতং যেভুয্যৰসেন ৰুত্তন্তি দট্ঠব্বং. ইদানি ‘‘ইমস্স সেট্ঠিস্স কস্সচি সমণস্স ৰা ব্রাহ্মণস্স ৰা দেথা’’তি ৰচনং ন সুতপুব্বং, যস্মা পচ্চেকবুদ্ধা নাম অত্তনো গুণানুভাৰেহি লোকে পাকটা সঞ্জাতা এৰ হোন্তি, তস্মা সেট্ঠিভরিযায ‘‘ন যস্স ৰা তস্স ৰা’’তিআদি চিন্তিতং. তথা হি তেসং দেন্তাপি সক্কচ্চং যেভুয্যেন পণীতমেৰ দেন্তি. নাসাপুটং পহরি অত্তনো আনুভাৰেন. সো লুদ্ধতায ‘‘বহু ৰত ধঞ্ঞং মমস্সা’’তি চিত্তং সংযমেতুং সন্ধারেতুং অসক্কোন্তো.

ৰিপ্পটিসারুপ্পন্নাকারং দস্সেতুং ‘‘ৰরমেত’’ন্তিআদি ৰুত্তং. ‘‘ইমস্স সমণস্স পিণ্ডপাতং দেহী’’তি ৰদতো ন একায এৰ জৰনৰীথিযা ৰসেন অত্থসিদ্ধি. অথ খো তত্থ আদিতো পৰত্তজৰনৰারোপি অত্থি মজ্ঝে পৰত্তজৰনৰারোপি, তং সন্ধাযাহ ‘‘পুব্বপচ্ছিমচেতনাৰসেনা’’তি. একা চেতনা দ্ৰে পটিসন্ধিযো ন দেতীতি এত্থ সাকেতপঞ্হৰসেন নিচ্ছযো ৰেদিতব্বো. চুদ্দসন্নং চেতনানং পুব্বে পুরেতরং কতত্তা পুরাণং.

পরিগয্হতীতি পরিগ্গহোতি আহ ‘‘পরিগ্গহিতং ৰত্থু’’ন্তি. অন্ৰায উপনিস্সায জীৰন্তীতি অনুজীৰিনো. সব্বমেতন্তি ধনধঞ্ঞাদিসব্বং এতং যথাৰুত্তপরিগ্গহৰত্থুং. নিক্খিপ্পগামিনন্তি নিক্খিপিতব্বতাগামিনং. নিক্খিপিতব্বসভাৰং হোতীতি আহ ‘‘নিক্খিপ্পসভাৰ’’ন্তি. পহায গমনীযন্তি অযমেত্থ অত্থোতি আহ ‘‘পরিচ্চজিতব্বসভাৰমেৰা’’তি.

দুতিযঅপুত্তকসুত্তৰণ্ণনা নিট্ঠিতা.

দুতিযৰগ্গৰণ্ণনা নিট্ঠিতা.

৩. ততিযৰগ্গো

১. পুগ্গলসুত্তৰণ্ণনা

১৩২. ‘‘নীচে কুলে পচ্চাজাতো’’তিআদি অপ্পকাসনভাৰেন তমতীতি তমো, তেন তমেন যুত্তোতি তমো পুগ্গলো ৰুচ্চতি, তংযোগতো পুগ্গলস্স তব্বোহারো যথা ‘‘মচ্ছেরযোগতো মচ্ছেরো’’তি. তস্মা তমোতি অপ্পকাসনভাৰেন তমো তমভূতো অন্ধকারো ৰিয জাতো, অন্ধকারত্তং ৰা পত্তোতি অত্থো. ৰুত্তলক্খণং তমমেৰ পরম্পরতো অযনং গতি নিট্ঠা এতস্সাতি তমপরাযণো, তমপরাযণতং ৰা পত্তোতি অত্থো. ঞাযেনপি তমগ্গহণেন খন্ধতমোৰ কথিতো, ন অন্ধকারতমো. খন্ধতমোতি চ সম্পত্তিরহিতা খন্ধপৰত্তিযেৰ দট্ঠব্বা. ‘‘উচ্চে কুলে পচ্চাজাতো’’তিআদি পকাসনভাৰেন জোতেতীতি জোতি, তেন জোতিনা যুত্তোতিআদি সব্বং তমে ৰুত্তনযেনেৰ ৰেদিতব্বং. ইতরে দ্ৰেতি জোতিতমপরাযণো জোতিজোতিপরাযণোতি ইতরে দ্ৰে পুগ্গলে.

ৰেণুৰেত্তাদিকেহি পেল়াদিকারকা ৰিলীৰকারকা. মিগমচ্ছাদীনং নিসাদনতো নেসাদা, মাগৰিকমচ্ছবন্ধাদযো. রথেসু চম্মেন হননকরণতো রথকারা চম্মকারা ৰুত্তা. ‘‘পু’’ ইতি করীসস্স নামং, তং কুসেন্তি অপনেন্তীতি পুক্কুসা, পুপ্ফছড্ডকা. দুব্বণ্ণোতি ৰিরূপো. ওকোটিমকোতি আরোহাভাৰেন হেট্ঠিমকোটিকো, রস্সকাযোতি অত্থো. তেনাহ ‘‘লকুণ্ডকো’’তি. লকু ৰিয ঘটিকা ৰিয ডেতি পৰত্ততীতি হি লকুণ্ডকো, রস্সো. কণতি নিমীলতীতি কাণো. তং পনস্স নিমীলনং একেন অক্খিনা দ্ৰীহিপি ৰাতি আহ ‘‘একক্খিকাণো ৰা উভযক্খিকাণো ৰা’’তি. কুণনং কুণো, হত্থৰেকল্লং, সো এতস্স অত্থীতি কুণী. খঞ্জো ৰুচ্চতি পাদৰিকলো. হেট্ঠিমকাযসঙ্খাতো সরীরস্স পক্খো পদেসো হতো অস্সাতি পক্খহতো. তেনাহ ‘‘পীঠসম্পী’’তি. পদীপে পদীপনে এতব্বং নেতব্বন্তি পদীপেয্যং, তেলকপল্লাদিউপকরণং. ৰুত্তন্তি অট্ঠকথাযং ৰুত্তং.

আগমনৰিপত্তীতি আগমনট্ঠানৰসেন ৰিপত্তি আগমো এত্থাতি কত্ৰা. পুব্বুপ্পন্নপচ্চযৰিপত্তীতি পঠমুপ্পন্নপচ্চযৰসেন ৰিপত্তি. চণ্ডালাদিসভাৰা হিস্স মাতাপিতরো পঠমুপ্পন্নপচ্চযা, পঠমুপ্পত্তিযা ৰা পচ্চযা, তেহেৰস্স ৰিপত্তি এৰ, ন সম্পত্তি. পৰত্তপচ্চযৰিপত্তীতি পৰত্তে সুখপচ্চযৰিপত্তি. তাদিসে নিহীনকুলে উপ্পন্নোপি কোচি ৰিভৰসম্পন্নো সিযা, অযং পন দুগ্গতো দুরূপো হোতি. আজীৰুপাযৰিপত্তীতি আজীৰনুপাযৰসেন ৰিপত্তি. সুখেন হি জীৰিকং পৰত্তেতুং উপাযভূতা হত্থিসিপ্পাদযো ইমস্স নত্থি, পুপ্ফছড্ডকসিলাকোট্টনাদিকম্মং পন কত্ৰা জীৰিকং পৰত্তেতি. তেনাহ ‘‘কসিরৰুত্তিকে’’তি. অত্তভাৰৰিপত্তীতি উপধিৰিপত্তি. দুক্খকারণসমাযোগোতি কাযিকচেতসিকদুক্খুপ্পত্তিযা পচ্চযসমোধানং. সুখকারণৰিপত্তীতি সুখপচ্চযপরিহানি. উপভোগৰিপত্তীতি উপভোগসুখস্স ৰিনাসো অনুপলদ্ধি. জোতি চেৰ জোতিপরাযণভাৰো চ সুক্কপক্খো.

দসহি অক্কোসৰত্থূহীতি লক্খণৰচনং এতং যথা ‘‘যদি মে ব্যাধিতা হোন্তি, দাতব্বমিদমোসধ’’ন্তি, তস্মা দসহি অক্কোসৰত্থূহি, তত্থ ৰা যেন কেনচি পরিভাসতীতি অত্থো. একগ্গচিত্তোতি দানং দাতুং অপেক্খিততায সমাহিতচিত্তো.

পুগ্গলসুত্তৰণ্ণনা নিট্ঠিতা.

২. অয্যিকাসুত্তৰণ্ণনা

১৩৩. জরাজিণ্ণাতি জরায জিণ্ণা. তেন পাকটজরায মত্থকপ্পত্তিমাহ. ৰযোৰুড্ঢাতি ৰযসা ৰুড্ঢা. তেন পচ্ছিমৰযস্স ওসক্কসম্পৰত্তিং ৰদতি. জাতিমহল্লিকাতি জাতিমহত্তগতা. চিরকালং অতিক্কন্তাতি দ্ৰে তযো রাজপরিৰট্টে ৰীতিৰত্তা. ৰযো-সদ্দো সাধারণৰচনোপি জিণ্ণসদ্দসন্নিধানতো ওসানৰযং এৰ ৰদতীতি আহ ‘‘পচ্ছিমৰযং সম্পত্তা’’তি. অয্যিকাতি মাতামহিং সন্ধায ৰদতি. হত্থী এৰ রতনভূতো হত্থিরতনন্তি আহ ‘‘সতসহস্সগ্ঘনকেনা’’তিআদি. সব্বানি তানীতি কুম্ভকারভাজনানি, তেহি সদ্ধিং সত্তসন্তানস্স পমাণং দস্সেন্তো ‘‘তেসু হী’’তিআদিমাহ, তং সুৰিঞ্ঞেয্যমেৰ.

অয্যিকাসুত্তৰণ্ণনা নিট্ঠিতা.

৪. ইস্সত্তসুত্তৰণ্ণনা

১৩৫. অট্ঠুপ্পত্তিকোতি এত্থ কা অস্স অট্ঠুপ্পত্তি? তিত্থিযানং ভগৰতো ভিক্খুসঙ্ঘস্স চ অলাভায অযসায পরিসক্কনং. তং ৰিত্থারতো দস্সেতুং ‘‘ভগৰতো কিরা’’তিআদি ৰুত্তং. যথা তং সব্বদিসাসু যমকমহামেঘো উট্ঠহিত্ৰা মহাওঘং ৰিয সব্বা পারমিযো ‘‘ইমস্মিংযেৰ অত্তভাৰে ৰিপাকং দস্সামা’’তি সম্পিণ্ডিতা ৰিয লাভসক্কারমহোঘং নিব্বত্তযিংসু. ততো ততো অন্নপানযানৰত্থমালাগন্ধৰিলেপনাদিহত্থা খত্তিযব্রাহ্মণাদযো আগন্ত্ৰা – ‘‘কহং ভগৰা, কহং দেৰদেৰো নরাসভো লোকনাথো’’তি ভগৰন্তং পরিযেসন্তি, সকটসতেহিপি পচ্চযে আহরিত্ৰা ওকাসং অলভমানা সমন্তা গাৰুতপ্পমাণম্পি সকটধুরেন সকটধুরং আহচ্চ তিট্ঠন্তি চেৰ অনুৰত্তন্তি চ অন্ধকৰিন্দব্রাহ্মণাদযো ৰিয. সব্বং খন্ধকে (মহাৰ. ২৮২) তেসু তেসু সুত্তেসু চ আগতনযেন ৰেদিতব্বং. যথা চ ভগৰতো, এৰং ভিক্খুসঙ্ঘস্সপি. ৰুত্তম্পি – ‘‘তেন খো পন সমযেন ভগৰা সক্কতো হোতি গরুকতো মানিতো পূজিতো অপচিতো লাভী চীৰর…পে… পরিক্খারানং, ভিক্খুসঙ্ঘোপি খো’’তিআদি (উদা. ৩৮), তথা ‘‘যাৰতা খো, চুন্দ, এতরহি সঙ্ঘো ৰা গণো ৰা লোকে উপ্পন্নো, নাহং, চুন্দ, অঞ্ঞং একং সঙ্ঘম্পি একং গণম্পি সমনুপস্সামি এৰং লাভগ্গযসগ্গপ্পত্তং, যথরিৰাযং, চুন্দ, ভিক্খুসঙ্ঘো’’তি (দী. নি. ৩.১৭৬). এৰন্তি ইদানি ৰুচ্চমানাকারেন. নিজ্ঝত্তিন্তি সঞ্ঞত্তিং. নন্তি কথং.

এৰং পুচ্ছিতুং অযুত্তং তিত্থিযানং কথা মহাজনসন্নিপাতে নিয্যাতিতা হোতীতি. তস্মিং দাতব্বং, চিত্তপ্পসাদমত্তেন দেন্তেপি হি পুঞ্ঞং পৰড্ঢতি. আরোচিতং অত্তনোতি অধিপ্পাযো. ভগৰাতি সত্থু আমন্তনং. চিত্তং নাম যথাপচ্চযং পৰত্তমানং নিগণ্ঠা…পে… পসীদতি পসন্নস্সাতি অধিপ্পাযো. পুব্বে অৰিসেসতো দেয্যধম্মস্স দাতব্বট্ঠানং নাম পুচ্ছিতং, ইদানি তস্স মহপ্ফলভাৰকরো দক্খিণেয্যৰিসেসোতি আহ ‘‘অঞ্ঞং তযা পঠমং পুচ্ছিতং, অঞ্ঞং পচ্ছা’’তি. সল্লক্খেহি এতং. পচ্ছিমং পুরিমেন সদ্ধিং আনেহীতি অধিপ্পাযো. পুচ্ছিতস্স নাম পঞ্হস্স কথনং ময্হমেৰ ভারো. সমুপব্যূল়্হোতি একতো সেনায রাসিৰসেন সম্পিণ্ডিতোতি অত্থো. তেনাহ ‘‘রাসিভূতো’’তি. অসিক্খিতোতি সত্তট্ঠসংৰচ্ছরানি ধনুসিপ্পেন সিক্খিতো. ধনুসিপ্পং সিক্খিত্ৰাপি কোচি কতহত্থো ন হোতি, অযং পন অসিক্খিতো ন কতহত্থো, পোঙ্খানুপোঙ্খভাৰোযেৰ ব্যামমুট্ঠিবন্ধো. তিণপুঞ্জমত্তিকাপুঞ্জাদীসূতি আদি-সদ্দেন পংসুপুঞ্জৰালুকপুঞ্জসারফলকঅযোঘনাদিকে সঙ্গণ্হাতি. অকতপরিচযোতি তেসং সন্তিকা ৰিজ্ঝনট্ঠেন অকতপরিচযো. রাজরাজমহামত্তাদিকে উপেচ্চ অসনং উপাসনং, ন কতং উপাসনং এতেনাতি অকতূপাসনো. অসিক্খিততাদিনা ভীরুভাৰেন ৰা কাযস্স ছম্ভনং সঙ্কম্পনং উত্তাসো এতস্স অত্থীতি ছম্ভীতি আহ ‘‘পৰেধিতকাযো’’তি.

দক্খিণেয্যতায অধিপ্পেতত্তা ‘‘অরহত্তমগ্গেন কামচ্ছন্দো পহীনো হোতী’’তি আহ. অচ্চন্তপ্পহানস্স ইচ্ছিতত্তা ততিযেনেৰ কুক্কুচ্চং পহীনং হোতি পটিঘসম্পযোগং. অসেক্খস্স অযন্তি অসেক্খং, সীলক্খন্ধো. তযিদং ন অগ্গফলং সীলমেৰ অধিপ্পেতং, অথ খো যং কিঞ্চি অসেক্খসন্তানে পৰত্তং সীলং, লোকুত্তরো এৰ ন অধিপ্পেতো সিক্খায জাতত্তা, এৰং ৰিমুত্তিক্খন্ধোপীতি. সেক্খস্স এসোতি ৰা, অপরিযোসিতসিক্খত্তা সযমেৰ সিক্খতীতি ৰা সেক্খো, চতূসু মগ্গেসু হেট্ঠিমেসু চ তীসু ফলেসু সীলক্খন্ধো. উপরি সিক্খিতব্বাভাৰতো অসেক্খো. ৰুড্ঢিপ্পত্তো সেক্খোতি অসেক্খো. অগ্গফলভূতো সীলক্খন্ধো ৰুচ্চেয্য, অট্ঠকথাযং পন ৰিপস্সকস্স সীলস্স অধিপ্পেতত্তা তথা অত্থো ৰুত্তো. সব্বত্থাতি ‘‘অসেক্খেনা’’তিআদীসু. এত্থ চ যথা সীলসমাধিপঞ্ঞাক্খন্ধা মিস্সকা অধিপ্পেতা, এৰং ৰিমুত্তিক্খন্ধাপীতি তদঙ্গৰিমুত্তিআদযোপি ৰেদিতব্বা, ন পটিপ্পস্সদ্ধিৰিমুত্তি এৰ.

যেন সিপ্পেন ইস্সাসো হোতি, তং ইস্সত্তন্তি আহ ‘‘উসুসিপ্প’’ন্তি. যস্সা ৰাযোধাতুযা ৰসেন সরীরং সঞ্জাতথামং হোতি, তং বলপচ্চযং সন্ধাযাহ ‘‘বলং নাম ৰাযোধাতূ’’তি. সমপ্পৰত্তিতো হি ৰিসমপ্পৰত্তিনিৰারকধাতু বলং নাম, তেন ততো অঞ্ঞং বলরূপং নাম নত্থি.

যস্মা অরহা এৰ একন্ততো সোরতো, তস্স ভাৰো সোরচ্চন্তি আহ ‘‘সোরচ্চন্তি অরহত্ত’’ন্তি. এতে দ্ৰেতি খন্তি সোরচ্চন্তি এতে দ্ৰে ধম্মা. পানীযং পিৰন্তি এত্থাতি পপা, যো কোচি জলাসযো যং কিঞ্চি পানীযট্ঠানন্তি আহ ‘‘চতুরস্সপোক্খরণীআদীনী’’তি. উদকৰিকূলাদীসু কমন্তি অতিক্কমন্তি এতেহীতি সঙ্কমনানি, সেতুআদীনি. সেতুকরণযুত্তট্ঠানে সেতুং, চঙ্কমনকরণযুত্তট্ঠানে চঙ্কমনং, মগ্গকরণযুত্তট্ঠানে মগ্গং করেয্যাতি অযমেত্থ অধিপ্পাযো. তেনাহ ‘‘পণ্ণাসা’’তিআদি.

ভিক্খাচারৰত্তন্তি অরিযানং হিতং ৰত্তপটিপত্তিং. দেন্তোপীতি পি-সদ্দেন অখীণাসৰস্স দেন্তোপীতি ইমমত্থং দস্সেতি যস্স কস্সচিপি দেন্তেনপি কম্মফলং সদ্দহিত্ৰা ৰিপ্পসন্নচিত্তেনেৰ দাতব্বত্তা. থনযন্তি ইদং তস্স মহামেঘভাৰদস্সনং, যো হি মহাৰস্সং ৰস্সতি, সো গজ্জন্তো ৰিজ্জুম্মালং ৰিস্সজ্জেন্তো পৰস্সতি. অভিসঙ্খরিত্ৰা সমোধানেত্ৰাতি খাদনীযস্স ৰিৰিধজাতিযানি সম্পিণ্ডেত্ৰা. তেনাহ ‘‘রাসিং কত্ৰা’’তি.

পকিরণং নাম ৰিকিরণম্পি হোতি অনেকত্থত্তা ধাতূনন্তি আহ ‘‘ৰিকিরতী’’তি. পকিরন্তো ৰিয ৰা দানং দেতীতি ইমিনা গুণখেত্তমেৰ অপরিযেসিত্ৰা করুণাখেত্তেপি মহাদানং পৰত্তেতীতি দস্সেতি. তেন ‘‘পকিরেতী’’তি ৰদন্তেন ভগৰতা অট্ঠুপ্পত্তিযং আগততিত্থিযৰাদেন অপ্পটিসেধিততাপি দীপিতা হোতি. পুঞ্ঞধারাতি পুঞ্ঞমযধারা পুঞ্ঞাভিসন্দা. সিনেহযন্তীতি থূলধারেনপি সিনেহেন সিনিদ্ধং করোন্তী. কিলেদযন্তীতি অল্লভাৰং পাপযন্তী. যথাযং পুঞ্ঞধারা দাতারং অন্তো সিনেহেতি পূরেতি অভিসন্দেতি, এৰং পটিগ্গাহকানম্পি অন্তো সিনেহেতি পূরেতি অভিসন্দেতি. তেনেৰাহ ‘‘দদং পিযো হোতি ভজন্তি নং বহূ’’তিআদি (অ. নি. ৫.৩৪) এৰং সন্তেপি ‘‘দাতারং অভিৰস্সতী’’তি ৰুত্তত্তা অট্ঠকথাযং দাযকৰসেনেৰ ‘‘সিনেহেতী’’তি ৰুত্তং, যস্মা ৰা পটিগ্গাহকস্স সিনেহুপ্পত্তি আমিসনিস্সিতাতি দাযকৰসেনেৰ ৰুত্তং.

ইস্সত্তসুত্তৰণ্ণনা নিট্ঠিতা.

৫. পব্বতূপমসুত্তৰণ্ণনা

১৩৬. খত্তিযাতি অভিসেকপ্পত্তা. ইস্সরিযমদো কামগেধো. পথৰিমণ্ডলস্স মহন্ততা তংনিৰাসিনং অনুযন্ততাতি সব্বমিদং যথিচ্ছিতস্স রাজকিচ্চস্স সুখেন সমিজ্ঝনস্স কারণকিত্তনং. যাদিসে রাজকিচ্চে উস্সুক্কং আপন্নো, তং ৰিত্থারতো দস্সেতুং ‘‘এস কিরা’’তিআদি ৰুত্তং. অন্তরগমনানীতি তিণ্ণং নিরন্তরগমনানং অন্তরন্তরা গমনানি. চোরা চিন্তযিংসূতি একো অন্তরভোগিকো রাজাপরাধিকো পঞ্চসতমনুস্সপরিৰারো চোরিযং করোন্তো ৰিচরতি, তে সন্ধায ৰুত্তং.

‘‘অযুত্তং তে কত’’ন্তি সচাহং ৰক্খামীতি যোজনা. ধুরৰিহারেতি রথস্স ধুরং ৰিয নগরস্স ধুরভূতে ৰিহারে. সন্থম্ভিতুন্তি ৰিস্সাসভাৰেন উপট্ঠাতুং. সদ্ধাযিকোতি সদ্ধায অযিতব্বো, সদ্ধেয্যোতি অত্থো. তেনাহ ‘‘সদ্ধাতব্বো’’তি. পচ্চযিকোতি পত্তিযাযিতব্বো. অব্ভসমং পুথুলভাৰেন. নিপ্পোথেন্তোতি নিম্মদ্দেন্তো. সণ্হকরণীযং অতিসণ্হং পিসন্তো নিসদপোতো ৰিয পিসন্তো.

ধম্মচরিযাতিআদিত্তম্পি সীসং চেলঞ্চ অজ্ঝুপেক্খিত্ৰা সম্মাপটিপত্তি এৰ কাতব্বা তস্সা এৰ পরলোকে পতিট্ঠাভাৰতো. আচিক্খামীতি কথেমি, কথেন্তো চ যথা তমত্থং সম্মদেৰ রাজা জানাতি, এৰং জানাপেমীতি. নিপ্ফত্তি যুদ্ধেন কাতব্বঅত্থসিদ্ধি. ৰিসিনোতি বন্ধতি যথাধিপ্পেতং চিত্তং এতেনাতি ৰিসযো, সমত্থভাৰো. মন্তসম্পন্নাতি সম্পন্নরাজমন্তা. মহাঅমচ্চাতি মহোসধাদিসদিসা নীতিসত্থছেকা অমচ্চপুরিসা. উপলাপেতুন্তি পরেসং অন্তরে ৰিরোধত্থং সঙ্গণ্হিতুং.

দ্ৰেযেৰ পব্বতাতি পব্বতসদিসা দ্ৰেযেৰ গহিতা. রাজোৰাদেতি রাজোৰাদসুত্তে. আগতাৰ তত্তন্তিযা অনুরূপত্থং. ৰিলুম্পমানাতি ইতি-সদ্দো আদিঅত্থো. ৰিপত্তীতি ভোগপরিহানাদিৰিনাসো. হত্থিযুদ্ধাদীহি জরামরণং জিনিতুং ন সক্কা সত্তস্স অৰিসযভাৰতো. যেন পন জিনিতুং সক্কা, তং দস্সেন্তো ভগৰা ‘‘বুদ্ধে…পে… নিৰেসযে’’তি আহ. রতনত্তযে হি সদ্ধা নিৰিট্ঠা মূলজাতা পতিট্ঠিতা একন্ততো জরামরণৰিজযায হোতি. তেনাহ ‘‘তস্মা সদ্ধ’’ন্তি.

পব্বতূপমসুত্তৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

কোসলসংযুত্তৰণ্ণনায লীনত্থপ্পকাসনা সমত্তা.