৭. সপ্পাণকৰগ্গো

১. সঞ্চিচ্চপাণসিক্খাপদ-অত্থযোজনা

৩৮২. সপ্পাণকৰগ্গস্স পঠমে উসুং অসতি খিপতি অনেনাতি ইস্সাসোতি কতে ধনুযেৰ মুখ্যতো ইস্সাসো নাম, ধনুগ্গহা- চরিযো পন উপচারেন. উসুং অসতি খিপতীতি ইস্সাসোতি কতে ধনুগ্গহাচরিযো ইস্সাসো নাম, ইধ পন উপচারত্থো ৰা কত্তুত্থো ৰা গহেতব্বোতি আহ ‘‘ধনুগ্গহাচরিযো হোতী’’তি. পব্বজিতকালে ইস্সাসস্স অযুত্তত্তা ৰুত্তং ‘‘গিহিকালে’’তি. ৰোরোপিতাতি এত্থ ৰি অৰ পুব্বস্স রুহধাতুস্স অধিপ্পাযত্থং দস্সেতুং ৰুত্তং ‘‘ৰিযোজিতা’’তি.

যস্মা গচ্ছতীতি সম্বন্ধো. এতন্তি ‘‘জীৰিতা ৰোরোপিতা’’তিৰচনং. কস্মা ৰোহারমত্তমেৰ হোতি, ননু যতো কুতোচি যস্মিং কিস্মিংচি ৰিযোজিতে দ্ৰে ৰত্থূনি ৰিয ৰিসুং তিট্ঠন্তি পাণতো জীৰিতে ৰিযোজিতে পাণজীৰিতাপীতি আহ ‘‘ন হেত্থা’’তিআদি. হীতি সচ্চং. এত্থাতি ‘‘জীৰিতা ৰোরোপিতা’’তিৰচনে দস্সেতুন্তি সম্বন্ধো. কিঞ্চি জীৰিতং নামাতি যোজনা. অযং পনেত্থ অত্থসম্বন্ধো – সীসালঙ্কারে সীসতো ৰিযোজিতে সীসং অলঙ্কারতো ৰিসুং তিট্ঠতি যথা, এৰং জীৰিতে পাণতো ৰিযোজিতে জীৰিতং পাণতো ৰিসুং ন তিট্ঠতি নামাতি. অঞ্ঞদত্থূতি একংসেন. ‘‘পাণ’’ন্তি সামঞ্ঞতো ৰুত্তোপি মনুস্সপাণস্স পারাজিকট্ঠানে গহিতত্তা ইধ পারিসেসঞাযেন তিরচ্ছানপাণোৰ গহেতব্বোতি আহ ‘‘তিরচ্ছানগতোযেৰ পাণো’’তি. তন্তি পাণং. মহন্তে পন পাণেতি সম্বন্ধো.

৩৮৫. সোধেন্তো অপনেতীতি যোজনা. মঙ্গুলোতি মনুস্সরত্তপো একো কিমিৰিসেসো. সো হি রত্তপিৰনত্থায মঙ্গতি ইতো চিতো চ ইমং চিমঞ্চ ঠানং গচ্ছতীতি ‘‘মঙ্গুলো’’তি ৰুচ্চতি. পদক্খরানঞ্হি অৰিপরিতত্থং, সোতূনঞ্চ সজ্ঝাযোপদেসলভনত্থং কত্থচি ঠানে ৰচনত্থো ৰুত্তোতি দট্ঠব্বং. তস্স বীজমেৰ খুদ্দকট্ঠেন মঙ্গুলবীজকং, তস্মিং. তন্তি মঙ্গুলবীজকং. ভিন্দন্তো হুত্ৰাতি যোজনাতি. পঠমং.

২. সপ্পাণকসিক্খাপদং

৩৮৭. দুতিযে সহ পাণেহীতি সপ্পাণকং উদকন্তি দস্সেন্তো আহ ‘‘যে পাণকা’’তিআদি. হীতি সচ্চং. পত্তপূরম্পি উদকন্তি সম্বন্ধো. তাদিসেনাতি সপ্পাণকেন. ধোৰতোপি পাচিত্তিযন্তি যোজনা. উদকসোণ্ডিন্তি সিলামযং উদকসোণ্ডিং. পোক্খরণিন্তি সিলামযং পোক্খরণিং. উট্ঠাপযতোপি পাচিত্তিযন্তি সম্বন্ধো. ততোতি সোণ্ডিপোক্খরণীহি. উদকস্সাতি উদকেন, পূরে ঘটে আসিঞ্চিত্ৰাতি সম্বন্ধো. তত্থাতি উদকে. উদকেতি উদকসণ্ঠানকপদেসে আসিঞ্চিতউদকে. পতিস্সতীতি সোণ্ডিপোক্খরণীহি গহিতউদকং পতিস্সতীতি. দুতিযং.

৩. উক্কোটনসিক্খাপদং

৩৯২. ততিযে ‘‘উচ্চালেন্তী’’তিইমিনা উক্কোটেন্তীতি এত্থ উপুব্বস্স কুটধাতুস্স উচ্চালনত্থং দস্সেতি ধাতূন, মনেকত্থত্তা. যং যং পতিট্ঠিতং যথাপতিট্ঠিতং, তস্স ভাৰো যথাপতিট্ঠিতভাৰো, তেন.

৩৯৩. যো ধম্মোতি যো সমথধম্মো. ধম্মেনাতি এত্থ এনসদ্দেন ‘‘যথাধম্ম’’ন্তি এত্থ অংইতিকারিযস্স কারিং দস্সেতি. ইমিনা ‘‘যথাধম্ম’’ন্তি পদস্স ‘‘নিহতাধিকরণ’’ন্তি এত্থ নিহতসদ্দেন সম্বন্ধিতব্বভাৰং দস্সেতি. ‘‘সত্থারা’’তিপদং ‘‘ৰুত্তং’’ ইতিপদে কত্তা. নত্থি হতং হননং ইমস্সাতি নিহতন্তি ৰুত্তে অত্থতো ৰূপসমনমেৰাতি আহ ‘‘ৰূপসমিত’’ন্তি.

৩৯৫. যং ৰা তং ৰা কম্মং ধম্মকম্মং নাম ন হোতি, অথ খো অধিকরণৰূপসমকম্মমেৰ ধম্মকম্মং নামাতি দস্সেন্তো আহ ‘‘যেন কম্মেনা’’তিআদি. অযম্পীতি অযম্পি ভিক্খু. সেসপদানিপীতি ‘‘ধম্মকম্মে ৰেমতিকো’’তিআদীনি সেসপদানিপি. এত্থাতি ইমস্মিং সিক্খাপদে. ৰিত্থারো পন ৰুত্তোতি সম্বন্ধো. তত্থেৰাতি পরিৰারে এৰ. ইধাতি ইমস্মিং সিক্খাপদে, ৰিভঙ্গে ৰাতি. ততিযং.

৪. দুট্ঠুল্লসিক্খাপদং

৩৯৯. চতুত্থে অত্থুদ্ধারৰসেন দস্সিতানি দুট্ঠুল্লসদ্দত্থভাৰেন সদিসত্তাতি অধিপ্পাযো. ‘‘ধুর’’ন্তি এত্থ লক্খণৰন্তত্তা ভুম্মত্থে উপযোগৰচনন্তি আহ ‘‘ধুরে’’তি. ধুরে নিক্খিত্তমত্তে সতীতি যোজনা.

এৰং ধুরং নিক্খিপিত্ৰাতি ‘‘অঞ্ঞস্স নারোচেস্সামী’’তি এৰং ধুরং নিক্খিপিত্ৰা. অঞ্ঞস্সাতি ৰত্থু, পুগ্গলতো অঞ্ঞস্স দুতিযস্স. সোপীতি দুতিযোপি. অঞ্ঞস্সাতি ততিযস্স. যাৰ কোটি ন ছিজ্জতি, তাৰ আপজ্জতিযেৰাতি যোজনা. তস্সেৰাতি আপত্তিং আপন্নপুগ্গলস্স. ৰত্থুপুগ্গলোযেৰাতি আপত্তিং আপন্নপুগ্গলোযেৰ. অযন্তি পঠমভিক্খু. অঞ্ঞস্সাতি দুতিযস্স. সোতি দুতিযো আরোচেতীতি সম্বন্ধো. যেনাতি পঠমভিক্খুনা. অস্সাতি দুতিযস্স. তস্সেৰাতি পঠমভিক্খুস্সেৰ. ৰত্থুপুগ্গলং উপনিধায ‘‘ততিযেন পুগ্গলেন দুতিযস্সা’’তি ৰুত্তং.

৪০০. পঞ্চাপত্তিক্খন্ধেতি থুল্লচ্চযাদিকে পঞ্চ আপত্তিক্খন্ধে. অজ্ঝাচারো নামাতি অধিভৰিত্ৰা ৰীতিক্কমিত্ৰা আচরিতব্বত্তা অজ্ঝাচারো নামাতি. চতুত্থং.

৫. ঊনৰীসতিৰস্সসিক্খাপদং

৪০২. পঞ্চমে অঙ্গুলিযোতি করসাখাযো. তা হি অঙ্গন্তি হত্থতো পঞ্চধা ভিজ্জিত্ৰা উগ্গচ্ছন্তীতি অঙ্গুলিযোতি ৰুচ্চন্তি. লিখন্তস্স উপালিস্সাতি সম্বন্ধো. তেনাতি বহুচিন্তেতব্বকারণেন. অস্সাতি উপালিস্স. উরোতি হদযং. তঞ্হি উসতি চিত্ততাপো দহতি এত্থাতি উরোতি ৰুচ্চতি. রূপসুত্তন্তি হেরঞ্ঞিকানং রূপসুত্তং, যথা হত্থাচরিযানং হত্থিসুত্তন্তি. অক্খীনীতি চক্খূনি. তানি হি অক্খন্তি ৰিসযেসু ব্যাপীভৰন্তি, রূপং ৰা পস্সতি ইমেহীতি অক্খীনীতি ৰুচ্চন্তি. মকসেন সূচিমুখানং গহিতত্তা ডংসেন পিঙ্গলমক্খিকাযোৰ গহেতব্বাতি আহ ‘‘ডংসাতি পিঙ্গলমক্খিকাযো’’তি. পিঙ্গলমক্খিকাযো হি ডংসনট্ঠেন খাদনট্ঠেন ডংসাতি ৰুচ্চন্তি. দুক্করো খমো এতাসন্তি দুক্খাতি দস্সেন্তো আহ ‘‘দুক্খমান’’ন্তি. ৰেদনানন্তি সম্বন্ধো. অসাতস্স কারণং দস্সেতুং ৰুত্তং ‘‘অমধুরান’’ন্তি. ইমিনা অমধুরত্তা ন সাদিতব্বাতি অসাতাতি অত্থং দস্সেতি. পাণসদ্দজীৰিতসদ্দানং পরিযাযভাৰং দস্সেতুং ৰুত্তং ‘‘জীৰিতহরান’’ন্তি. পাণং হরন্তি অপনেন্তীতি পাণহরা, তাসং ৰেদনানন্তি সম্বন্ধো.

৪০৪. ৰিজাযনকালতো পট্ঠায পরিপুণ্ণৰীসতিৰস্সো ন গহেতব্বো, গব্ভগহণকালতো পন পট্ঠাযাতি দস্সেন্তো আহ ‘‘পটিসন্ধিগ্গহণতো পট্ঠাযা’’তি. গব্ভে সযিতকালেন সদ্ধিং ৰীসতিমং ৰস্সং পরিপুণ্ণমস্সাতি গব্ভৰীসো পুগ্গলো. হীতি সচ্চং. যথাহাতি যেনাকারেন সঙ্খ্যং গচ্ছতি, তেনাকারেন ভগৰা আহাতি যোজনা. অথ ৰা যথা কিং ৰচনং ভগৰা আহাতি যোজনা.

গব্ভৰীসো হুত্ৰা উপসম্পন্নোতি সম্বন্ধো. অম্হীতি অস্মি. নুসদ্দো পরিৰিতক্কত্থে নিপাতো. যন্তি যাদিসং পঠমং চিত্তন্তি সম্বন্ধো. ইমিনা পটিসন্ধিচিত্তং দস্সেতি. ‘‘পঠমং ৰিঞ্ঞাণ’’ন্তি তস্সেৰ ৰেৰচনং. তন্তি পঠমং চিত্তং পঠমং ৰিঞ্ঞাণং. অস্সাতি সত্তস্স. সাৰ জাতীতি সা এৰ পটিসন্ধি, গব্ভো নাম হোতীতি সম্বন্ধো.

তত্থাতি পাল়িযং, ৰিনিচ্ছযো এৰং ৰেদিতব্বোতি যোজনা. যোতি পুগ্গলো. মহাপৰারণাযাতি অস্সযুজপুণ্ণমিযং. সা হি পূজিতপৰারণত্তা মহাপৰারণাতি ৰুচ্চতি. ততোতি পৰারণায জাতকালতো. তন্তি মহাপৰারণং. পাটিপদে চাতি এত্থ চসদ্দো অনিযমৰিকপ্পত্থো, পৰারণদিৰসপাটিপদদিৰসেসু অঞ্ঞতরস্মিং দিৰসে উপসম্পাদেতব্বোতি অত্থো. হাযনৰড্ঢনন্তি কুচ্ছিম্হি ৰসিতমাসেসু অধিকেসু হাযনঞ্চ ঊনেসু ৰড্ঢুনঞ্চ ৰেদিতব্বং.

পোরাণকত্থেরা পন উপসম্পাদেন্তীতি সম্বন্ধো. একূনৰীসতিৰস্সন্তি অনন্তরে ৰুত্তং একূনৰীসতিৰস্সং. নিক্খমনীযোতি সাৰণমাসো. সো হি অন্তোৰীথিতো বাহিরৰীথিং নিক্খমতি সূরিযো অস্মিন্তি ‘‘নিক্খমনীযো’’তি ৰুচ্চতি. পাটিপদদিৰসেতি পচ্ছিমিকায ৰস্সূপগমনদিৰসে. তং উপসম্পাদনং. কস্মাতি পুচ্ছা. এত্থ ঠত্ৰা পরিহারো ৰুচ্চতে মযাতি যোজনা. ৰীসতিযা ৰস্সেসূতি উপসম্পন্নপুগ্গলস্স ৰীসতিযা ৰস্সেসু. তিংসরত্তিদিৰস্স একমাসত্তা ‘‘চত্তারো মাসা পরিহাযন্তী’’তি ৰুত্তং. উক্কড্ঢন্তীতি একস্স অধিকমাসস্স নাসনত্থায ৰস্সং উপরি কড্ঢন্তি. ততোতি ছমাসতো অপনেত্ৰাতি সম্বন্ধো. এত্থাতি ‘‘একূনৰীসতিৰস্স’’ন্তিআদিৰচনে. পন-সদ্দো হিসদ্দত্থো, সচ্চন্তি অত্থো. যোতি পুগ্গলো. তস্মাতি যস্মা গব্ভমাসানম্পি গণনূপগত্তা গহেত্ৰা উপসম্পাদেন্তি, তস্মা ছ মাসে ৰসিত্ৰাতি সম্বন্ধো. অট্ঠ মাসে ৰসিত্ৰা জাতোপি ন জীৰতীতি সুত্তন্তঅট্ঠকথাসু (দী. নি. অট্ঠ. ২.২৪-২৫; ম. নি. অট্ঠ. ৩.২০৫) ৰুত্তং.

৪০৬. দসৰস্সচ্চযেনাতি উপসম্পদতো দসৰস্সাতিক্কমেন. উপসম্পাদেতীতি উপজ্ঝাযো ৰা কম্মৰাচাচরিযো ৰা হুত্ৰা উপসম্পাদেতি. তন্তি উপজ্ঝাচরিযভূতং অনুপসম্পন্নপুগ্গলং. কম্মৰাচাচরিযো হুত্ৰা উপসম্পাদেন্তো তং মুঞ্চিত্ৰা সচে অঞ্ঞোপি কম্মৰাচাচরিযো অত্থি, সূপসম্পন্নো. সোৰ সচে কম্মৰাচং সাৰেতি, নুপসম্পন্নো. ঞত্ৰা পন পুন অনুপসম্পাদেন্তে সগ্গন্তরাযোপি মগ্গন্তরাযোপি হোতিযেৰাতি দট্ঠব্বন্তি. পঞ্চমং.

৬. থেয্যসত্থসিক্খাপদং

৪০৭. ছট্ঠে ‘‘পটিযালোক’’ন্তি এত্থ আলোকসদ্দেন সূরিযো ৰুত্তো উপচারেন. সূরিযো হি পুরত্থিমদিসতো উগ্গন্ত্ৰা পচ্ছিমদিসং গতো, তস্মা সূরিযসঙ্খাতস্স আলোকস্স পটিমুখং ‘‘পটিযালোক’’ন্তি ৰুত্তে পচ্ছিমদিসাযেৰ গহেতব্বাতি আহ ‘‘পচ্ছিমং দিসন্তি অত্থো’’তি. কম্মিকাতি কম্মে যুত্তা পযুত্তা.

৪০৯. রাজানন্তি এত্থ রঞ্ঞো সন্তকং ‘‘রাজা’’তি ৰুচ্চতি উপচারেন, অথ ৰা রঞ্ঞো এসো ‘‘রাজা’’তি কত্ৰা রঞ্ঞো সন্তকং ‘‘রাজা’’তি ৰুচ্চতি. থেয্যন্তি থেনেত্ৰা ‘‘সক্কচ্চ’’ন্তিআদীসু (পাচি. ৬০৬) ৰিয নিগ্গহীতাগমো হোতি. রাজানং, রঞ্ঞো সন্তকং ৰা থেয্যং থেনেত্ৰা গচ্ছন্তীতি অত্থো. ইতি ইমমত্থং দস্সেন্তো আহ ‘‘রাজানং ৰা থেনেত্ৰা’’তিআদি.

৪১১. চতূসু ৰিসঙ্কেতেসু দ্ৰীহি অনাপত্তি, দ্ৰীহি আপত্তিযেৰাতি. ছট্ঠং.

৭. সংৰিধানসিক্খাপদং

৪১২. সত্তমে ‘‘পধূপেন্তো’’তি এত্থ পপুব্ব ধূপধাতু পরিভাসনত্থে ৰত্ততীতি আহ ‘‘পরিভাসন্তো’’তি. ত্ৰং সমণোপি মাতুগামেন সদ্ধিং গচ্ছসি, তুয্হেৰেসো দোসো, নেতস্স পুরিসস্সাতি অত্তানংযেৰ পরিভাসন্তোতি অত্থো. ‘‘নিক্খামেসী’’তিইমিনা ‘‘নিপ্পাতেসী’’তিএত্থ নিপুব্ব পতধাতু গত্যত্থোতি দস্সেতীতি. সত্তমং.

৮. অরিট্ঠসিক্খাপদং

৪১৭. অট্ঠমে গন্ধেতি গিজ্ঝে. তে হি গিধন্তি কুণপং অভিকঙ্খন্তীতি ‘‘গন্ধা’’তি ৰুচ্চন্তি. গদ্ধেতিপি পাঠো, সোপি যুজ্জতি যথা ‘‘যুগনন্ধো, যুগনদ্ধো’’তি চ ‘‘পটিবন্ধো পটিবদ্ধো’’তি চ. বাধযিংসূতি হনিংসু. অস্সাতি অরিট্ঠস্স.

তদ্ধিতেন ৰুত্তস্স অত্থস্স দস্সেতুমাহ ‘‘তে’’তিআদি. তেতি অন্তরাযিকা. তত্থাতি পঞ্চৰিধেসু অন্তরাযিকেসু. ‘‘তথা’’তিপদেন ‘‘কম্মন্তরাযিকং নামা’’তি পদং অতিদিসতি. তং পনাতি ভিক্খুনিদূসককম্মং পন. মোক্খস্সেৰাতি মগ্গনিব্বানস্সেৰ. মগ্গো হি কিলেসেহি মুচ্চতীতি অত্থেন মোক্খো নাম. ঝানম্পেত্থ সঙ্গহিতং নীৰরণেহি ৰিমুচ্চনত্তা. নিব্বানং ৰিমুচ্চীতি অত্থেন মোক্খো নাম. ফলম্পেত্থ সঙ্গহিতং ৰিমুচ্চিতত্তা. নিযতমিচ্ছাদিট্ঠিধম্মাতি নিযতভাৰং পত্তা, নিযতৰসেন ৰা পৰত্তা মিচ্ছাদিট্ঠিসঙ্খাতা ধম্মা. তে পন নত্থিকঅহেতুক অকিরিযৰসেন তিৰিধা. পণ্ডকাদিগহণস্স নিদস্সনমত্তত্তা ‘পটিসন্ধিধম্মা’’তিপদেন অহেতুকদ্ৰিহেতুকপটিসন্ধিধম্মা গহেতব্বা সব্বেসম্পি ৰিপাকন্তরাযিকভাৰতো. তেপি মোক্খস্সেৰ অন্তরাযং করোন্তি, ন সগ্গস্স. তে পনাতি অরিযূপৰাদা পন. তাৰদেৰ উপৰাদন্তরাযিকা নামাতি যোজনা. তাপীতি সঞ্চিচ্চ আপন্না আপত্তিযোপি. পারাজিকাপত্তিং সন্ধায ৰুত্তং ‘‘ভিক্খুভাৰং ৰা পটিজানাতী’’তি. সঙ্ঘাদিসেসাপত্তিং সন্ধায ৰুত্তং ‘‘ন ৰুট্ঠাতি ৰা’’তি. লহুকাপত্তিং সন্ধায ৰুত্তং ‘‘ন দেসেতি ৰা’’তি.

তত্রাতি পঞ্চৰিধেসু অন্তরাযিকেসু. অযং ভিক্খূতি অরিট্ঠো গন্ধবাধিপুব্বো ভিক্খু. সেসন্তরাযিকেতি আণাৰীতিক্কমন্তরাযিকতো সেসে চতুব্বিধে অন্তরাযিকে. ইমে আগারিকাতি অগারে ৰসনসীলা ইমে মনুস্সা. ভিক্খূপি পস্সন্তি ফুসন্তি পরিভুঞ্জন্তীতি সম্বন্ধো. কস্মা ন ৰট্টন্তি, ৰট্টন্তিযেৰাতি অধিপ্পাযো. রসেন রসং সংসন্দিত্ৰাতি উপাদিণ্ণকরসেন অনুপাদিণ্ণকরসং, অনুপাদিণ্ণকরসেন ৰা উপাদিণ্ণকরসং সমানেত্ৰা. যোনিসো পচ্চৰেক্খণস্স অভাৰতো সংৰিজ্জতি ছন্দরাগো এত্থাতি সচ্ছন্দরাগো, সোযেৰ পরিভোগো সচ্ছন্দরাগপরিভোগো, তং. একং কত্ৰাতি সমানং কত্ৰা. ঘটেন্তো ৰিয পাপকং দিট্ঠিগতং উপ্পাদেত্ৰাতি যোজনা. কিংসদ্দো গরহত্থো, কস্মা ভগৰতা পঠমপারাজিকং পঞ্ঞত্তং, ন পঞ্ঞাপেতব্বন্তি অত্থো. মহাসমুদ্দং বন্ধন্তো যথা অকত্তব্বং করোতি, তথা পঠমপারাজিকং পঞ্ঞপেন্তো ভগৰা অপঞ্ঞত্তং পঞ্ঞপেতীতি অধিপ্পাযো. এত্থাতি পঠমপারাজিকে. আসন্তি ভব্বাসং. আণাচক্কেতি আণাসঙ্খাতে চক্কে.

অট্ঠিযেৰ অট্ঠিকং কুচ্ছিতত্থেন, কুচ্ছিতত্থে হি কো. অট্ঠিকমেৰ খলো নীচট্ঠেন লামকট্ঠেনাতি অট্ঠিকঙ্খলো নিগ্গহীতাগমং কত্ৰা. তেন উপমা সদিসাতি অট্ঠিকঙ্খলূপমা. ‘‘অট্ঠী’’তি চ ‘‘কঙ্খল’’ন্তি চ পদং গহেত্ৰা ৰণ্ণেন্তি আচরিযা (সারত্থ. টী. পাচিত্তিয ৩.৪১৭; ৰি. ৰি. টী. পাচিত্তিয ২.৪১৭; ম. নি. অট্ঠ. ২.৪২; ম. নি. টী. ৩.৪২). অঙ্গারকাসূপমাতি অঙ্গাররাসিসদিসা, অঙ্গারেহি ৰা পরিপুণ্ণা আৰাটসদিসা. অসিসূনূপমাতি এত্থ অসীতি খগ্গো. সো হি অসতে খিপতে অনেনাতি ‘‘অসী’’তি ৰুচ্চতি. সূনাতি অধিকোট্টনং. তঞ্হি সুনতি সঞ্চুণ্ণভাৰং গচ্ছতি এত্থাতি ‘‘সূনা’’তি ৰুচ্চতি. অসিনা সূনাতি অসিসূনা, তায উপমা সদিসাতি অসিসূনূপমা. সত্তিসূলূপমাতি সত্তিযা চ সূলেন চ সদিসা. এত্থাতি ইমিস্সং অট্ঠকথাযং. মজ্ঝিমট্ঠকথাযং অলগদ্দূপমসুত্তে (ম. নি. অট্ঠ. ১.২৩৪ আদযো) গহেতব্বো. এৰংসদ্দখোসদ্দানমন্তরে ৰিযসদ্দস্স ব্যাদেসভাৰং দস্সেতুং ৰুত্তং ‘‘এৰং ৰিয খো’’তি. অট্ঠমং.

৯. উক্খিত্তসম্ভোগসিক্খাপদং

৪২৪. নৰমে অনুধম্মস্স সরূপং দস্সেতুং ৰুত্তং ‘‘অনুলোমৰত্তং দিস্ৰা কতা ওসারণা’’তি. ইমিনা অনুলোমৰত্তং দিস্ৰা কতো ওসারণসঙ্খাতো ধম্মো অনুধম্মোতি দস্সেতি. ওসারণাতি পৰেসনা. তেনেৰাতি উক্খিত্তকস্স অকটানুধম্মত্তা এৰ. অস্সাতি ‘‘অকটানুধম্মেনা’’তি পদস্স.

দদতো ৰা গণ্হতো ৰাতি ৰাসদ্দো অনিযমৰিকপ্পত্থোতি. নৰমং.

১০. কণ্টকসিক্খাপদং

৪২৮. দসমে অরিট্ঠস্স উপ্পন্নং ৰিয এতস্সাপি উপ্পন্নন্তি যোজনা. উম্মজ্জন্তস্সাতি মনসিকরোন্তস্স. সংৰাসস্স নাসনা সংৰাসনাসনা. লিঙ্গস্স নাসনা লিঙ্গনাসনা. দণ্ডকম্মেন নাসনা দণ্ডকম্মনাসনা. তত্থাতি তিৰিধাসু নাসনাসু. দূসকো…পে… নাসেথাতি এত্থ অযং নাসনা লিঙ্গনাসনা নামাতি যোজনা. অযন্তি দণ্ডকম্মনাসনা. ইধাতি ইমস্মিং সিক্খাপদে, ‘‘নাসেতূ’’তি পদে ৰা. তত্থাতি পুরিমৰচনাপেক্খং, ‘‘এৰঞ্চ পন ভিক্খৰে’’তি আদিৰচনেতি অত্থো. পিরেতি আমন্তনপদং পরসদ্দেন সমানত্থন্তি আহ ‘‘পরা’’তি. ‘‘অম্হাকং অনজ্ঝত্তিকভূত’’ইতি ৰা ‘‘অম্হাকং পচ্চনীকভূত’’ ইতি ৰা অত্থো দট্ঠব্বো. ‘‘অমামক’’ইতিপদেন ‘‘পর’’ইতিপদস্স অধিপ্পাযত্থং দস্সেতি. অম্হে নমমাযক, অম্হেহি ৰা নমমাযিতব্ব ইতি অত্থো. ‘‘অম্হামক’’ইতিপি হকারযুত্তো পাঠো. অম্হেহি আমকইতি অত্থো. যত্থাতি যস্মিং ঠানে. তেতি উপযোগত্থে সামিৰচনং, তন্তি অত্থো. তৰ রূপসদ্দে ৰাতি সম্বন্ধো. ন পস্সামাতি ন পস্সাম, ন সুণাম.

৪২৯. তেনাতি সামণেরেন. ‘‘কারাপেয্যা’’তি পদে কারিতকম্মন্তি. দসমং.

সপ্পাণকৰগ্গো সত্তমো.