৫. পত্তনিদ্দেসো

পত্তো চাতি –

৬০. অযোপত্তো ভূমিপত্তো, জাতিযা কপ্পিযা দুৰে;

উক্কট্ঠো মজ্ঝিমো চেৰ, ওমকো চ পমাণতো.

৬১. উক্কট্ঠো মগধে নাল়ি-দ্ৰযতণ্ডুলসাধিতং;

গণ্হাতি ওদনং সূপং, ব্যঞ্জনঞ্চ তদূপিযং.

৬২. মজ্ঝিমো তস্সুপড্ঢোৰ, ততোপড্ঢোৰ ওমকো;

উক্কট্ঠতো চ উক্কট্ঠো, অপত্তো ওমকোমকো.

৬৩. অতিরেকপত্তো ধারেয্যো, দসাহপরমং সকো;

কপ্পো নিস্সগ্গিযো হোতি, তস্মিং কালেতিনামিতে.

৬৪. অচ্ছেদদানগাহেহি, ৰিব্ভমা মরণুদ্ধটা;

লিঙ্গসিক্খাহি ছিদ্দেন, পত্তাধিট্ঠানমুজ্ঝতি.

৬৫. পত্তং ন পটিসামেয্য, সোদকং ন চ ওতপে;

উণ্হে ন নিদহে ভুম্যা, ন ঠপে নো চ লগ্গযে.

৬৬. মিড্ঢন্তে পরিভণ্ডন্তে, অঙ্কে ৰা আতপত্তকে;

পাদেসু মঞ্চপীঠে ৰা, ঠপেতুং ন চ কপ্পতি.

৬৭. ন নীহরেয্য উচ্ছিট্ঠো-দকঞ্চ চলকট্ঠিকং;

পত্তেন পত্তহত্থো ৰা, কৰাটং ন পণামযে.

৬৮. ভূমিআধারকে দারুদণ্ডাধারে সুসজ্জিতে;

দুৰে পত্তে ঠপেয্যেকং, নিক্কুজ্জিত্ৰান ভূমিযং.

৬৯. দারুরূপিযসোৰণ্ণ-মণিৰেল়ুরিযামযা;

কংসকাচতিপুসীসফলিকাতম্বলোহজা.

৭০. ছৰসীসমযো চাপি, ঘটীতুম্বকটাহজা;

পত্তা অকপ্পিযা সব্বে, ৰুত্তা দুক্কটৰত্থুকাতি.