৪৪. উপোসথনিদ্দেসো

উপোসথোতি –

৪১০. দুৰে উপোসথা চাতু-দ্দসো পন্নরসো ইতি;

সুত্তুদ্দেসমধিট্ঠান-পারিসুদ্ধিৰসা তযো.

৪১১. সুত্তুদ্দেসোৰ সঙ্ঘস্স, অধিট্ঠানউপোসথো;

পুগ্গলস্সেৰ সেসানং, পারিসুদ্ধিউপোসথো.

৪১২. পুব্বকিচ্চে চ করণে, পত্তকল্লে সমানিতে;

সুত্তং উদ্দিসতি সঙ্ঘো, পঞ্চধা সো ৰিভাৰিতো.

৪১৩. ৰিনান্তরাযং সঙ্খেপে-নুদ্দেসো ৰিনিৰারিতো;

‘‘থেরোৰ ইস্সরো দ্ৰীসু, উদ্দেসেস্ৰেত্থ তীসু ৰা;

ৰিসদেসূ’’তি ৰুত্তত্তা, অৰত্তন্তেপি ৰট্টতি.

৪১৪. আগচ্ছেয্যুং যদি সমা, উদ্দিসন্তে ৰ থোকিকা;

উদ্দিট্ঠং যং সুউদ্দিট্ঠং, সোতব্বমৰসেসকং.

৪১৫. উদ্দিট্ঠমত্তে সকলা-যেকচ্চাযুট্ঠিতায ৰা;

পারিসুদ্ধিং করেয্যেসং, সন্তিকে বহুকাথ চে;

কত্ৰা সব্বৰিকপ্পেসু, পুব্বকিচ্চং পুনুদ্দিসে.

৪১৬. পন্নরসোৰাসিকানং, ইতরানং সচেতরো;

সমানেতরেনুৰত্তন্তু, পুরিমানং সচেধিকা;

পুরিমা অনুৰত্তন্তু, তেসং সেসেপ্যযং নযো.

৪১৭. পাটিপদোৰাসিকানং, ইতরানং উপোসথো;

সমথোকানং সামগ্গিং, মূলট্ঠা দেন্তু কামতো.

৪১৮. বহি গন্ত্ৰান কাতব্বো, নো চে দেন্তি উপোসথো;

দেয্যানিচ্ছায সামগ্গী, বহূসু বহি ৰা ৰজে.

৪১৯. পাটিপদেগন্তুকানং, এৰমেৰ অযং নযো;

সাৰেয্য সুত্তং সঞ্চিচ্চ, অস্সাৰেন্তস্স দুক্কটং.

৪২০. সম্মজ্জিতুং পদীপেতুং, পঞ্ঞাপেতুং দকাসনং;

ন করেয্য তথা কল্লো, মহাথেরেন পেসিতো.

৪২১. সম্মজ্জিত্ৰা পদীপেত্ৰা, পট্ঠপেত্ৰা দকাসনং. গণঞত্তিং ঠপেত্ৰেৰং, কত্তব্বো তীহুপোসথো. ‘‘সুণন্তু মে আযস্মন্তা, অজ্জুপোসথো পন্নরসো, যদাযস্মন্তানং পত্তকল্লং, মযং অঞ্ঞমঞ্ঞং পারিসুদ্ধিউপোসথং করেয্যামা’’তি.

৪২২. একংসং চীৰরং কত্ৰা, নিসীদিত্ৰা উক্কুটিকং,. থেরেন অঞ্জলিং তেৰং, পগ্গয্হ সমুদীরিযা. ‘‘পরিসুদ্ধো অহং আৰুসো, পরিসুদ্ধোতি মং ধারেথা’’তি, ৰদে যাৰততীযকং.

৪২৩. সমত্তপুব্বারম্ভেন, তে নৰেনেৰমীরিযা. ‘‘পরিসুদ্ধো অহং ভন্তে, পরিসুদ্ধোতি মং ধারেথা’’তি, ৰদে যাৰততীযকং.

৪২৪. দ্ৰীসু থেরেন কত্তব্বং, কত্ৰেৰমীরিযো নৰো. ‘‘পরিসুদ্ধো অহং আৰুসো, পরিসুদ্ধোতি মং ধারেহী’’তি তিক্খত্তুং ৰত্তব্বো.

৪২৫. নৰেন থেরো তিক্খত্তুং, এৰমস্স উদীরিযো;

‘‘পরিসুদ্ধো অহং ভন্তে, পরিসুদ্ধোতি মং ধারেথা’’তি.

৪২৬. পুব্বকিচ্চং সমাপেত্ৰা, অধিট্ঠেয্যেৰমেককো. ‘‘অজ্জ মে উপোসথো পন্নরসোতি ৰা চাতুদ্দসোতি ৰা অধিট্ঠামী’’তি ৰত্তব্বং, নো চেধিট্ঠেয্য দুক্কটং.

৪২৭. যত্থ ৰসন্তি চত্তারো, তযো ৰা যদি ৰা দুৰে;

পারিসুদ্ধিং হরিত্ৰান, একেকস্সিতরীতরে;

তং তং উপোসথং কযিরুং, সিযা আপত্তি দুক্কটং.

৪২৮. ৰগ্গে সমগ্গে ৰগ্গোতি, সঞ্ঞিনো ৰিমতিস্স ৰা;

দুক্কটং করোতো ভেদা-ধিপ্পাযেন থুল্লচ্চযং;

ৰগ্গে সমগ্গেনাপত্তি, সমগ্গো ইতি সঞ্ঞিনো.

৪২৯. উক্খিত্তস্স গহট্ঠস্স, সেসানং সহধম্মিনং;

পারাজিকস্সাভব্বস্স, সিক্খানিক্খিত্তকস্স চ.

৪৩০. নিসিন্নপরিসাযঞ্চ, সভাগাপত্তিকো তথা;

ছন্দেন পরিৰুত্থেন, পাতিমোক্খং ন উদ্দিসে.

৪৩১. অদেসযিত্ৰানাপন্নং, নাৰিকত্ৰান ৰেমতিং;

নুপোসথেপি ৰা কাতুং, পোসথো ন চ কপ্পতি.

৪৩২. অট্ঠিতোপোসথাৰাসা, ন ৰজে তদহূ ৰিনা;

অন্তরাযং ৰ সঙ্ঘং ৰা-ধিট্ঠাতুং সীমমেৰ ৰাতি.