৪০. অৰেভঙ্গিযনিদ্দেসো

অৰেভঙ্গিযন্তি –

৩২২. আরামারামৰত্থূনি, ৰিহারো তস্স ৰত্থু চ;

মঞ্চো পীঠং ভিসি বিব্বো-হনাদিসযনাসনং.

৩২৩. লোহকুম্ভী কটাহো চ,

লোহভাণকৰারকো;

কুঠারী ৰাসি ফরসু,

কুদ্দালো চ নিখাদনং.

৩২৪. ৰল্লি ৰেল়ু তিণং পণ্ণং, মুঞ্জপব্বজমত্তিকা;

দারুমত্তিকভণ্ডানি, পঞ্চেতে অৰিভাজিযা.

৩২৫. থুল্লচ্চযং ভাজযতো, ভাজিতাপি অভাজিতা;

গরুভণ্ডানি ৰুচ্চন্তি, এতেৰিস্সজ্জিযানি চ.

৩২৬. ৰল্লিড্ঢবাহুমত্তাপি, ৰেল়ু অট্ঠঙ্গুলাযতো;

তিণাদি মুট্ঠিমত্তম্পি, পণ্ণং একম্পি মত্তিকা.

৩২৭. পাকতা পঞ্চৰণ্ণা ৰা, সুধাকঙ্গুট্ঠ আদিকা;

তালপক্কপ্পমাণাপি, দিন্না ৰা তত্থজাতকা.

৩২৮. রক্খিতা সঙ্ঘিকা রজ্জু-যোত্তাদীপি অভাজিযা;

নিট্ঠিতে ভাজিযা কম্মে, সঙ্ঘিকে চেতিযস্স ৰা.

৩২৯. পত্তাদি ভিক্খুসারুপ্পং, তথা ৰিপ্পকতাকতং;

ভাজিযং লোহভণ্ডেসু, ৰারকং পাদগণ্হকং.

৩৩০. ৰেল়ুম্হি ভাজিযা তেল-নাল়ি কত্তরদণ্ডকো;

ছত্তদণ্ডসলাকাযো, তথোপাহনদণ্ডকো.

৩৩১. অনুঞ্ঞাতৰাসিদণ্ডো, করণ্ডো পাদগণ্হকো;

অরণঞ্জনিসিঙ্গাদি, ভিক্খূপকরণং তথা.

৩৩২. তচ্ছিতানিট্ঠিতং দারুভণ্ডং দন্তঞ্চ ভাজিযং;

ভিক্খূপকরণে পাদঘটকো মত্তিকামযো.

৩৩৩. ভাজিযং কপ্পিযং চম্মং, এল়চম্মমভাজিযং;

গরুনা গরুভণ্ডঞ্চ, থাৰরং থাৰরেন চ.

৩৩৪. থাৰরং পরিৰত্তেয্য, তথা কত্ৰা চ ভুঞ্জতু;

ৰল্লাদিং ফাতিকম্মেন, গণ্হে সেসমভাজিযন্তি.