৩৩. কাযবন্ধননিদ্দেসো

কাযবন্ধনন্তি –

২৩৫. অকাযবন্ধনো গামং, দুক্কটং পৰিসেয্য চে;

বন্ধেয্য যত্থ সরতি, তত্থেৰাসতিযা গতো.

২৩৬. পট্টিকা সূকরন্তন্তি, দুৰিধং কাযবন্ধনং;

দুস্সপট্টো চ রজ্জু চ, একা তদনুলোমিকা.

২৩৭. মচ্ছকণ্টকখজ্জূরী-পত্তা মট্ঠা চ পট্টিকা;

লব্ভা দসা চতস্সোপি, অন্তে দিগুণসুত্তকং.

২৩৮. মালাদিং কক্কটচ্ছাদিং, দস্সেত্ৰা গুণসুত্তক;

কোট্টিতা কুঞ্জরচ্ছাদিং, পট্টিকা ন চ কপ্পতি.

২৩৯. ঘটকং মকরমুখাদিং, ন কপ্পন্তি দসামুখে;

উভন্তে ঘটকা লেখা, ৰিধে অঞ্ঞঞ্চ চিত্তকং.

২৪০. দেড্ডুভকঞ্চ মুরজং, মদ্দৰীণং কলাবুকং;

ন কপ্পন্তি দসাসু দ্ৰে, মজ্ঝিমাযেৰ কপ্পরে.

২৪১. ৰেল়ুদন্তৰিসাণট্ঠিকট্ঠলাখাফলামযা;

সঙ্খনাভিমযা সুত্তনল়লোহমযাপি চ;

ৰিধা কপ্পন্তি কপ্পিযা, গণ্ঠিযো চাপি তম্মযাতি.

পঠমভাণৰারং নিট্ঠিতং.