৩. চীৰরনিদ্দেসো

চীৰরন্তি –

৩০. খোমকোসেয্যকপ্পাস-সাণভঙ্গানি কম্বলং;

কপ্পিযানি ছল়েতানি, সানুলোমানি জাতিতো.

৩১. দুকূলঞ্চেৰ পট্টুণ্ণ-পটং সোমারচীনজং;

ইদ্ধিজং দেৰদিন্নঞ্চ, তস্স তস্সানুলোমিকং.

৩২. তিচীৰরং পরিক্খার-চোল়ং ৰস্সিকসাটিকং;

অধিট্ঠে ন ৰিকপ্পেয্য, মুখপুঞ্ছননিসীদনং.

৩৩. পচ্চত্থরণকং কণ্ডু-চ্ছাদিমেত্থ তিচীৰরং;

ন ৰসেয্য ৰিনেকাহং, চাতুমাসং নিসীদনং.

৩৪. ‘‘ইমং সঙ্ঘাটিংধিট্ঠামি’’, সঙ্ঘাটিমিচ্চধিট্ঠযে;

অহত্থপাসমেতন্তি, সেসেসুপি অযং নযো.

৩৫. অধিট্ঠহন্তো সঙ্ঘাটি-প্পভুতিং পুব্বচীৰরং;

পচ্চুদ্ধরিত্ৰাধিট্ঠেয্য, পত্তাধিট্ঠহনে তথা.

৩৬. এতং ইমং ৰ সঙ্ঘাটিং, সংসে পচ্চুদ্ধরামিতি;

এৰং সব্বানি নামেন, ৰত্ৰা পচ্চুদ্ধরে ৰিদূ.

৩৭. সঙ্ঘাটি পচ্ছিমন্তেন, দীঘসো মুট্ঠিপঞ্চকো;

উত্তমন্তেন সুগত-চীৰরূনাপি ৰট্টতি.

৩৮. মুট্ঠিত্তিকঞ্চ তিরিযং, তথা একংসিকস্সপি;

অন্তরৰাসকো চাপি, দীঘসো মুট্ঠিপঞ্চকো;

অড্ঢতেয্যো দ্ৰিহত্থো ৰা, তিরিযন্তেন ৰট্টতি.

৩৯. নিসীদনস্স দীঘেন, ৰিদত্থি দ্ৰে ৰিসালতো;

দিযড্ঢং দসা ৰিদত্থি, সুগতস্স ৰিদত্থিযা.

৪০. কণ্ডুপ্পটিচ্ছাদিকস্স, তিরিযং দ্ৰে ৰিদত্থিযো;

দীঘন্ততো চতস্সোৰ, সুগতস্স ৰিদত্থিযা.

৪১. ৰস্সিকসাটিকাযাপি, দীঘসো ছ ৰিদত্থিযো;

তিরিযং অড্ঢতেয্যাৰ, সুগতস্স ৰিদত্থিযা.

৪২. এত্থ ছেদনপাচিত্তি, করোন্তস্স তদুত্তরি;

পচ্চত্থরণ মুখচোল়া, আকঙ্খিতপ্পমাণিকা.

৪৩. পরিক্খারচোল়ে গণনা, পমাণং ৰা ন দীপিতং;

তথা ৰত্ৰা অধিট্ঠেয্য, থৰিকাদিং ৰিকপ্পিযং.

৪৪. অহতাহতকপ্পানং, সঙ্ঘাটি দিগুণা সিযা;

একচ্চিযোত্তরাসঙ্গো, তথা অন্তরৰাসকো.

৪৫. উতুদ্ধটান দুস্সানং, সঙ্ঘাটি চ চতুগ্গুণা;

ভৰেয্যুং দিগুণা সেসা, পংসুকূলে যথারুচি.

৪৬. তীসু দ্ৰে ৰাপি একং ৰা, ছিন্দিতব্বং পহোতি যং;

সব্বেসু অপ্পহোন্তেসু, অন্ৰাধিমাদিযেয্য ৰা;

অচ্ছিন্নঞ্চ অনাদিণ্ণং, ন ধারেয্য তিচীৰরং.

৪৭. গামে নিৰেসনে উদ্দো-সিতপাসাদহম্মিযে;

নাৰাট্টমাল়আরামে, সত্থখেত্তখলে দুমে.

৪৮. অজ্ঝোকাসে ৰিহারে ৰা, নিক্খিপিত্ৰা তিচীৰরং;

ভিক্খুসম্মুতিযাঞ্ঞত্র, ৰিপ্পৰত্থুং ন ৰট্টতি.

৪৯. রোগৰস্সানপরিযন্তা, কণ্ডুচ্ছাদিকসাটিকা;

ততো পরং ৰিকপ্পেয্য, সেসা অপরিযন্তিকা.

৫০. পচ্চত্থরণ পরিক্খার-মুখপুঞ্ছনচোল়কং;

দসং প্যরত্তনাদিণ্ণকপ্পং লব্ভং নিসীদনং.

৫১. অদসং রজিতংযেৰ, সেসচীৰরপঞ্চকং;

কপ্পতাদিণ্ণকপ্পংৰ, সদসংৰ নিসীদনং.

৫২. অনধিট্ঠিতনিস্সট্ঠং, কপ্পেত্ৰা পরিভুঞ্জযে;

হত্থদীঘং ততোপড্ঢ-ৰিত্থারঞ্চ ৰিকপ্পিযং.

৫৩. তিচীৰরস্স ভিক্খুস্স, সব্বমেতং পকাসিতং;

পরিক্খারচোল়িযো সব্বং, তথা ৰত্ৰা অধিট্ঠতি.

৫৪. অচ্ছেদৰিস্সজ্জনগাহৰিব্ভমা,

পচ্চুদ্ধরো মারণলিঙ্গসিক্খা;

সব্বেস্ৰধিট্ঠানৰিযোগকারণা,

ৰিনিৰিদ্ধছিদ্দঞ্চ তিচীৰরস্স.

৫৫. কুসৰাকফলকানি, কম্বলং কেসৰালজং;

থুল্লচ্চযং ধারযতোলূকপক্খাজিনক্খিপে.

৫৬. কদলেরকক্কদুস্সে, পোত্থকে চাপি দুক্কটং;

সব্বনীলকমঞ্জেট্ঠ-পীতলোহিতকণ্হকে.

৫৭. মহারঙ্গমহানাম-রঙ্গরত্তে তিরীটকে;

অচ্ছিন্নদীঘদসকে, ফলপুপ্ফদসে তথা;

কঞ্চুকে ৰেঠনে সব্বং, লভতিচ্ছিন্নচীৰরোতি.