২৮. কম্মনিদ্দেসো

কম্মঞ্চাতি –

১৯৯. ৰগ্গেন অধম্মকম্মং, সমগ্গেন অধম্মিকং;

ৰগ্গেন ধম্মকম্মঞ্চ, সমগ্গেন চ ধম্মিকং;

চতুত্থংযেৰানুঞ্ঞাতং, সেসকম্মেসু দুক্কটং.

২০০. চতুৰগ্গো পঞ্চৰগ্গো, দসৰীসতিৰগ্গিকো;

তিরেকৰীসতিৰগ্গো, পঞ্চ সঙ্ঘা ৰিভাৰিতা.

২০১. চতুৰগ্গেত্থ অব্ভানু-পসম্পদাপৰারণা;

পঞ্চৰগ্গো চ অব্ভানং, মজ্ঝদেসুপসম্পদং.

২০২. দসৰগ্গো চ অব্ভানং, ঠপেত্ৰা সব্বকম্মিকো;

ইতরো সব্বকম্মেসু, কম্মপ্পত্তোতি দীপিতো.

২০৩. চতুৰগ্গেন কত্তব্বে, চত্তারো পকতত্তকা;

কম্মপ্পত্তা পরে ছন্দা-রহা সেসেপ্যযং নযো.

২০৪. চতুৰগ্গাদিকত্তব্বং, অসংৰাসকম্মারহ;

গরুকট্ঠেস্ৰঞ্ঞতরং, কত্ৰান গণপূরকং;

পরিৰাসাদিকং কম্মং, কতং কুপ্পঞ্চ দুক্কটং.

২০৫. অধম্মকম্মং ৰারেয্য, অন্তরাযে দুৰে তযো;

দিট্ঠাৰিমেকোধিট্ঠানং, ৰারেন্তেৰ ততোধিকা.

২০৬. কম্মারহা অসংৰাসা, খিত্তচিত্তদুখট্টিতা;

এতেসং সঙ্ঘমজ্ঝম্হি, পটিক্খেপো ন রুহতি.

২০৭. পকতত্তেকসীমট্ঠ-সমসংৰাসভিক্খুনো;

আরোচেন্তস্সন্তমসো-নন্তরস্সাপি রূহতি.

২০৮. কোপেতুং ধম্মিকং কম্মং, পটিক্কোসেয্য সম্মুখা;

তিরোক্খা কাযসামগ্গিং, ছন্দং নো দেয্য দুক্কটন্তি.