২৫. অকপ্পিযসযননিদ্দেসো

অকপ্পিযসযনানীতি –

১৮৭. আসন্দী তূলী পল্লঙ্কো, পটিকং গোনচিত্তকং;

পটলী ৰিকতী উদ্দ-লোমী একন্তলোমিকা.

১৮৮. কুত্তং কোসেয্যং কট্টিস্সং, হত্থিঅস্সরথত্থরা;

জিনপ্পৰেণিকদলী-মিগপ্পৰরঅত্থরা.

১৮৯. সলোহিতৰিতানঞ্চু-ভতোরত্তূপধানকং;

অকপ্পিযানি এতানি, দুক্কটং পরিভুঞ্জতো.

১৯০. আসন্দাদিত্তযা সেসে, লব্ভতে গিহিসন্তকে;

ধম্মাসনে চ ভত্তগ্গে, ঘরে চাপি নিসীদিতুং;

ভূমত্থরণসঙ্খেপে, সযিতুঞ্চাপি কপ্পতি.

১৯১. চতুরংসপীঠা সত্তঙ্গা, পঞ্চঙ্গা উচ্চপাদকা;

তূলোনদ্ধা ঘরেযেৰ, মঞ্চপীঠা নিসীদিতুং.

১৯২. চোল়ৰাকুণ্ণপণ্ণানং, তিণানঞ্চেৰ পূরিতা;

চীৰরচ্ছৰিযো পঞ্চ, ভিসী সব্বত্থ কপ্পিযা.

১৯৩. তূলত্তযং ভিসিগব্ভো, লোমানি মিগপক্খিনং;

বিম্বোহনে অনুঞ্ঞাতং, তূলৰজ্জা মসূরকে.

১৯৪. মনুস্সলোমমুণ্ণাযং, পণ্ণে পুপ্ফং তমালকং;

সুদ্ধং ন আসনঞ্চেৰ, লব্ভমপ্পটিৰেক্খিতন্তি.