পারাজিককণ্ডং

অভিলাপমত্তমেৰাতি এত্থ দহরৰসেন ‘‘ভন্তে’’তি চ ৰুড্ঢৰসেন ‘‘আৰুসো’’তি চ তত্থ দুৰিধো অভিলাপো, ইধ পন ৰুড্ঢদহরানং ‘‘অয্যা’’তি একমেৰ.

কাযসংসগ্গে ৰুত্তনযেনাতি এত্থ তব্বহুলনযেন কিরিযসমুট্ঠানতা ৰুত্তা. ‘‘কাযসংসগ্গং সমাপজ্জেয্যা’’তি অৰত্ৰা পন ‘‘সাদিযেয্যা’’তি ৰুত্তত্তা অকিরিযতোপি সমুট্ঠাতীতি ৰেদিতব্বং. যথা চেত্থ, এৰং হেট্ঠা ‘‘মনুস্সিত্থিযা তযো মগ্গে মেথুনং ধম্মং পটিসেৰন্তস্স আপত্তি পারাজিকস্সা’’তিআদিনা (পারা. ৫৬) নযেন কিরিযসমুট্ঠানতং ৰত্ৰা তদনন্তরং ‘‘ভিক্খুপচ্চত্থিকা মনুস্সিত্থিং ভিক্খুস্স সন্তিকং আনেত্ৰা ৰচ্চমগ্গেন অঙ্গজাতং অভিনিসীদেন্তি, সো চে পৰেসনং সাদিযতী’’তিআদিনা (পারা. ৫৮) নযেন অকিরিযসমুট্ঠানস্সপি ৰুত্তত্তা পঠমপারাজিকাযপি তব্বহুলনযেনেৰ কিরিযসমুট্ঠানতা ৰেদিতব্বা. ন হি পৰেসনসাদিযনাদিম্হি কিরিযসমুট্ঠানতা দিস্সতি.

অঙ্গজাতচলনঞ্চেত্থ ন সারতো দট্ঠব্বং ‘‘সো চে পৰেসনং ন সাদিযতি, পৰিট্ঠং ন সাদিযতি, ঠিতং ন সাদিযতি, উদ্ধরণং সাদিযতি, আপত্তি পারাজিকস্সা’’তি (পারা. ৫৮) এত্থ ঠিতনসাদিযনে পকতিযাপি পরিপুণ্ণচলনত্তা. সাদিযনপচ্চযা পটিসেৰনচলনঞ্চেত্থ ন দিস্সতেৰাতি তব্বহুলনযেনেৰ কিরিযসমুট্ঠানতা গহেতব্বা.

অপিচ ভিক্খুনিযাপি পঠমপারাজিকে তস্স সাদিযনস্স সরূপেন ৰুত্তত্তা তদনুরূপৰসেন ৰিভঙ্গনযমনোলোকেত্ৰা ‘‘কিরিযসমুট্ঠান’’মিচ্চেৰ ৰুত্তং. যথা চেতেসু তব্বহুলনযেন কিরিযসমুট্ঠানতা ৰুত্তা, তথা সুরাদীনং অকুসলেনেৰ পাতব্বতা. ইতরথা ‘‘যং অকুসলেনেৰ আপজ্জতি, অযং লোকৰজ্জা, সেসা পণ্ণত্তিৰজ্জা’’তি ৰুত্তে লোকৰজ্জপণ্ণত্তিৰজ্জানং নিযমলক্খণসিদ্ধি হোতি, তথা তং অৰত্ৰা ‘‘যস্সা সচিত্তকপক্খে চিত্তং অকুসলমেৰ হোতি, অযং লোকৰজ্জা, সেসা পণ্ণত্তিৰজ্জা’’তি (কঙ্খা. অট্ঠ. পঠমপারাজিকৰণ্ণনা) ৰুত্তে লোকৰজ্জৰচনং নিরত্থকং সিযা ৰত্থুঅজাননপক্খেপি অকুসলেনেৰ পাতব্বত্তা. যস্মা তত্থ সুরাপানৰীতিক্কমস্স অকুসলচিত্তুপ্পাদো নত্থি, তস্মা খন্ধকট্ঠকথাযং ‘‘মজ্জপানে পন ভিক্খুনো অজানিত্ৰাপি বীজতো পট্ঠায মজ্জং পিৰন্তস্স পাচিত্তিযং. সামণেরো জানিত্ৰাৰ পিৰন্তো সীলভেদং আপজ্জতি, ন অজানিত্ৰা’’তি (মহাৰ. অট্ঠ. ১০৮) ৰুত্তং, ন ৰুত্তং ‘‘ৰত্থুঅজাননপক্খে পাণাতিপাতাদীনং সিদ্ধিকরঅকুসলচিত্তুপ্পাদসদিসে চিত্তুপ্পাদে সতিপি সামণেরো সীলভেদং নাপজ্জতী’’তি. অভিনিৰেসৰচনং পাণাতিপাতাদীহি সমানগতিকত্তা সামণেরানং সুরাপানস্স. ‘‘সুরামেরযিমে’’তি ৰত্থুং জানিত্ৰা পাতব্বতাদিৰসেন ৰীতিক্কমন্তস্স অকুসলস্স অসম্ভৰো নত্থি. তেন ৰুত্তং ‘‘যস্সা সচিত্তকপক্খে’’তিআদি.

কিঞ্চেত্থ – যুত্তিৰচনেন অরহন্তানং অপ্পৰিসনতো সচিত্তকাচিত্তকপক্খেসু অকুসলনিযমোতি চে? ন, ধম্মতাৰসেন সেক্খানম্পি অপ্পৰিসনতো. অচিত্তকপক্খে অকুসলনিযমাভাৰদস্সনত্থং সুপন্তস্স মুখে পক্খিত্তজলবিন্দুমিৰ সুরাবিন্দুআদযো উদাহরিতব্বা. তব্বহুলনযেন হি অত্থে গহিতে পুব্বেনাপরং অট্ঠকথায সমেতি সদ্ধিং পাল়িযা চাতি. আচরিযাপি সুরাপানে অকুসলনিযমাভাৰমেৰ ৰদন্তি. একচ্চে পন কিরিযসমুট্ঠানতা পনস্স তব্বহুলনযমেৰ, ন পঠমপারাজিকে. কথং? কাযসংসগ্গসিক্খাপদং পঠমপারাজিকসমুট্ঠানং. এত্থ ভিক্খুস্স চ ভিক্খুনিযা চ কাযসংসগ্গভাৰে সতি ভিক্খুনী কাযঙ্গং অচোপযমানাপি চিত্তেনেৰ অধিৰাসেতি, আপজ্জতি, ন এৰং ভিক্খু. ভিক্খু পন চোপযমানোৰ আপজ্জতি, এৰমেৰ পঠমপারাজিকেপি চোপনে সতি এৰ আপজ্জতি, নাসতি. পৰেসনং সাদিযতীতি এত্থ পৰেসনসাদিযনং নাম সেৰনচিত্তুপ্পাদনং, মগ্গেন ৰা মগ্গপ্পটিপন্নম্পি ইচ্ছন্তি. তস্সাপি কাযচলনং একন্তং অত্থি এৰ. এৰং সন্তেপি ৰীমংসিত্ৰা গহেতব্বন্তি ৰদন্তীতি লিখিতং

পারাজিকৰণ্ণনা নিট্ঠিতা.