সেখিযকণ্ডং

সেখিযেসু সতিপি ৰীতিক্কমে অনাদরিযাপেক্খস্সেৰ আপত্তীতি দস্সনত্থং কারকো ন ৰুত্তো. অযঞ্হি ৰিনযধম্মতা, যদিদং সাপেক্খে কারকনিদ্দেসো, সো ৰুত্তনিযমে ৰিধি, ভুম্মকরণঞ্চ. অট্ঠঙ্গুলাধিকম্পি ওতারেত্ৰা নিৰাসেতুং ৰট্টতি. ততো পরং ওতারেন্তস্স দুক্কটন্তি মহাঅট্ঠকথাযং ৰুত্তং. আরামে ৰাতি বুদ্ধুপট্ঠানাদিকালে. পারুপিতব্বন্তি উত্তরাসঙ্গকিচ্চৰসেন ৰুত্তং.

ঠত্ৰাতি এত্থ গচ্ছন্তোপি পরিস্সযাভাৰং ওলোকেতুং লভতিযেৰাতি (ৰজির. টী. পাচিত্তিয ৫৮২) লিখিতং. যথা ৰাসূপগতস্স অন্তরঘরে কাযং ৰিৰরিত্ৰা নিসীদিতুং ৰট্টতি, তথা তস্স সন্তিকে গন্তুকামস্সপি কাযবন্ধনং অবন্ধিত্ৰা সঙ্ঘাটিং অপারুপিত্ৰা গামপ্পৰেসনমনারোচেত্ৰা যথাকামং গন্তুং ৰট্টতি. তস্মা অদ্ধানমগ্গগমনকালে একো ভিক্খু গামপ্পৰেসনৰত্তং পূরেত্ৰা গামং পৰিসিত্ৰা একং আৰসথং পুরতোৰ ঠিতং পত্ৰা পরিক্খারং ঠপেত্ৰা ৰাসূপগতো চে হোতি, ইতরেহি তস্স সন্তিকং যথাসুখং গন্তুং ৰট্টতি. কো পন ৰাদো চতূহপঞ্চাহং ৰাসমধিট্ঠায ৰসিতভিক্খূনং সন্তিকং গন্তুঞ্চ ৰাসূপগতানং সন্তিকং গন্তুঞ্চ ৰট্টতীতি. বুদ্ধপূজম্পি যথাসুখং গন্তুং ৰট্টতি. ৰুত্তম্পি চেতং অট্ঠকথাযং ‘‘অনাপত্তি কারণং পটিচ্চ তহং তহং ওলোকেতী’’তি. তত্থ কারণং নাম আমিসপূজাতি ৰেদিতব্বাতি লিখিতং.

ছব্বীসতিসারুপ্পৰণ্ণনা নিট্ঠিতা.

যস্মা ‘‘সমতিত্তিকো পিণ্ডপাতো পটিগ্গহেতব্বো’’তি (পাচি. ৬০২-৬০৩) ৰচনং পিণ্ডপাতো সমপুণ্ণো পটিগ্গহেতব্বোতি দীপেতি, তস্মা অত্তনো হত্থগতে পত্তে পিণ্ডপাতো দিয্যমানো থূপীকতোপি চে হোতি, ৰট্টতীতি দীপিতো হোতি. সূপোদনৰিঞ্ঞত্তিযং মুখে পক্খিপিত্ৰা ৰিপ্পটিসারে উপ্পন্নে পুন উগ্গিরিতুকামস্সাপি সহসা চে পৰিসতি, এত্থ অসঞ্চিচ্চ ভুঞ্জতি নাম. ৰিঞ্ঞত্তিকতঞ্চ অকতঞ্চ একস্মিং ঠানে ঠিতং সহসা অনুপধারেত্ৰা গহেত্ৰা ভুঞ্জতি, অস্সতিযা ভুঞ্জতি নাম.

সযং যানগতো হুত্ৰা, যথা যানগতস্স চে;

অলং ৰত্থুং তথা নালং, সছত্তো ছত্তপাণিনো.

‘‘সূপোদনৰিঞ্ঞত্তিসিক্খাপদং থেয্যসত্থসমুট্ঠানং, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদন’’ন্তি পাঠো.

সেখিযৰণ্ণনা নিট্ঠিতা.

ভিক্খুপাতিমোক্খৰণ্ণনা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স