৮. নাৰাভিরুহনসিক্খাপদৰণ্ণনা

অট্ঠমে সংৰিধাযাতি কীল়াপুরেক্খারো সংৰিদহিত্ৰা, অভিরুহনকালে সঙ্কেতং কত্ৰাতি অত্থো. উদ্ধংগামিনিন্তি কীল়াৰসেন উদ্ধং নদিযা পটিসোতং গচ্ছন্তিং. অধোগামিনিন্তি তথেৰ অধো অনুসোতং গচ্ছন্তিং. যং পন তিত্থপ্পটিপাদনত্থং উদ্ধং ৰা অধো ৰা হরন্তি, এত্থ অনাপত্তি. অঞ্ঞত্র তিরিযং তরণাযাতি উপযোগত্থে নিস্সক্কৰচনং, যা তিরিযং তরণা, তং ঠপেত্ৰাতি অত্থো. পাচিত্তিযন্তি সগামকতীরপস্সেন গমনকালে গামন্তরগণনায, অগামকতীরপস্সেন ৰা যোজনৰিত্থতায নদিযা মজ্ঝেন ৰা গমনকালে অদ্ধযোজনগণনায পাচিত্তিযং, সমুদ্দে পন যথাসুখং গন্তুং ৰট্টতি.

সাৰত্থিযং ছব্বগ্গিযে ভিক্খূ আরব্ভ নাৰাভিরুহনৰত্থুস্মিং পঞ্ঞত্তং, ‘‘অঞ্ঞত্র তিরিযং তরণাযা’’তি অযমেত্থ অনুপঞ্ঞত্তি, সেসং অনন্তরসিক্খাপদে ৰুত্তনযেনেৰ ৰেদিতব্বন্তি.

নাৰাভিরুহনসিক্খাপদৰণ্ণনা নিট্ঠিতা.